𑁫. 𑀘𑀼𑀦𑁆𑀤𑀲𑀼𑀢𑁆𑀢𑀁

𑁮𑁩. ‘‘𑀧𑀼𑀘𑁆𑀙𑀸𑀫𑀺 𑀫𑀼𑀦𑀺𑀁 𑀧𑀳𑀽𑀢𑀧𑀜𑁆𑀜𑀁, (𑀇𑀢𑀺 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄)

𑀩𑀼𑀤𑁆𑀥𑀁 𑀥𑀫𑁆𑀫𑀲𑁆𑀲𑀸𑀫𑀺𑀁 𑀯𑀻𑀢𑀢𑀡𑁆𑀳𑀁;

𑀤𑁆𑀯𑀺𑀧𑀤𑀼𑀢𑁆𑀢𑀫𑀁 [𑀤𑀺𑀧𑀤𑀼𑀢𑁆𑀢𑀫𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀸𑀭𑀣𑀻𑀦𑀁 𑀧𑀯𑀭𑀁, 𑀓𑀢𑀺 𑀮𑁄𑀓𑁂 𑀲𑀫𑀡𑀸 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺’’.

𑁮𑁪. ‘‘𑀘𑀢𑀼𑀭𑁄 𑀲𑀫𑀡𑀸 𑀦 𑀧𑀜𑁆𑀘𑀫𑀢𑁆𑀣𑀺, (𑀘𑀼𑀦𑁆𑀤𑀸𑀢𑀺 𑀪𑀕𑀯𑀸)

𑀢𑁂 𑀢𑁂 𑀆𑀯𑀺𑀓𑀭𑁄𑀫𑀺 𑀲𑀓𑁆𑀔𑀺𑀧𑀼𑀝𑁆𑀞𑁄;

𑀫𑀕𑁆𑀕𑀚𑀺𑀦𑁄 𑀫𑀕𑁆𑀕𑀤𑁂𑀲𑀓𑁄 𑀘, 𑀫𑀕𑁆𑀕𑁂 𑀚𑀻𑀯𑀢𑀺 𑀬𑁄 𑀘 𑀫𑀕𑁆𑀕𑀤𑀽𑀲𑀻’’.

𑁮𑁫. ‘‘𑀓𑀁 𑀫𑀕𑁆𑀕𑀚𑀺𑀦𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸, (𑀇𑀢𑀺 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄)

𑀫𑀕𑁆𑀕𑀓𑁆𑀔𑀸𑀬𑀻 𑀓𑀣𑀁 𑀅𑀢𑀼𑀮𑁆𑀬𑁄 𑀳𑁄𑀢𑀺;

𑀫𑀕𑁆𑀕𑁂 𑀚𑀻𑀯𑀢𑀺 𑀫𑁂 𑀩𑁆𑀭𑀽𑀳𑀺 𑀧𑀼𑀝𑁆𑀞𑁄, 𑀅𑀣 𑀫𑁂 𑀆𑀯𑀺𑀓𑀭𑁄𑀳𑀺 𑀫𑀕𑁆𑀕𑀤𑀽𑀲𑀺𑀁’’ [𑀫𑀕𑁆𑀕𑀤𑀽𑀲𑀻 (𑀓.)].

𑁮𑁬. ‘‘𑀬𑁄 𑀢𑀺𑀡𑁆𑀡𑀓𑀣𑀁𑀓𑀣𑁄 𑀯𑀺𑀲𑀮𑁆𑀮𑁄, 𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑁄 𑀅𑀦𑀸𑀦𑀼𑀕𑀺𑀤𑁆𑀥𑁄;

𑀮𑁄𑀓𑀲𑁆𑀲 𑀲𑀤𑁂𑀯𑀓𑀲𑁆𑀲 𑀦𑁂𑀢𑀸, 𑀢𑀸𑀤𑀺𑀁 𑀫𑀕𑁆𑀕𑀚𑀺𑀦𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸.

𑁮𑁭. ‘‘𑀧𑀭𑀫𑀁 𑀧𑀭𑀫𑀦𑁆𑀢𑀺 𑀬𑁄𑀥 𑀜𑀢𑁆𑀯𑀸, 𑀅𑀓𑁆𑀔𑀸𑀢𑀺 𑀯𑀺𑀪𑀚𑀢𑁂 𑀇𑀥𑁂𑀯 𑀥𑀫𑁆𑀫𑀁;

𑀢𑀁 𑀓𑀗𑁆𑀔𑀙𑀺𑀤𑀁 𑀫𑀼𑀦𑀺𑀁 𑀅𑀦𑁂𑀚𑀁, 𑀤𑀼𑀢𑀺𑀬𑀁 𑀪𑀺𑀓𑁆𑀔𑀼𑀦𑀫𑀸𑀳𑀼 𑀫𑀕𑁆𑀕𑀤𑁂𑀲𑀺𑀁.

𑁮𑁮. ‘‘𑀬𑁄 𑀥𑀫𑁆𑀫𑀧𑀤𑁂 𑀲𑀼𑀤𑁂𑀲𑀺𑀢𑁂, 𑀫𑀕𑁆𑀕𑁂 𑀚𑀻𑀯𑀢𑀺 𑀲𑀜𑁆𑀜𑀢𑁄 𑀲𑀢𑀻𑀫𑀸;

𑀅𑀦𑀯𑀚𑁆𑀚𑀧𑀤𑀸𑀦𑀺 𑀲𑁂𑀯𑀫𑀸𑀦𑁄, 𑀢𑀢𑀺𑀬𑀁 𑀪𑀺𑀓𑁆𑀔𑀼𑀦𑀫𑀸𑀳𑀼 𑀫𑀕𑁆𑀕𑀚𑀻𑀯𑀺𑀁.

𑁮𑁯. ‘‘𑀙𑀤𑀦𑀁 𑀓𑀢𑁆𑀯𑀸𑀦 𑀲𑀼𑀩𑁆𑀩𑀢𑀸𑀦𑀁, 𑀧𑀓𑁆𑀔𑀦𑁆𑀤𑀻 𑀓𑀼𑀮𑀤𑀽𑀲𑀓𑁄 𑀧𑀕𑀩𑁆𑀪𑁄;

𑀫𑀸𑀬𑀸𑀯𑀻 𑀅𑀲𑀜𑁆𑀜𑀢𑁄 𑀧𑀮𑀸𑀧𑁄, 𑀧𑀢𑀺𑀭𑀽𑀧𑁂𑀦 𑀘𑀭𑀁 𑀲 𑀫𑀕𑁆𑀕𑀤𑀽𑀲𑀻.

𑁯𑁦. ‘‘𑀏𑀢𑁂 𑀘 𑀧𑀝𑀺𑀯𑀺𑀚𑁆𑀛𑀺 𑀬𑁄 𑀕𑀳𑀝𑁆𑀞𑁄, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀲𑀧𑀜𑁆𑀜𑁄;

𑀲𑀩𑁆𑀩𑁂 𑀦𑁂𑀢𑀸𑀤𑀺𑀲𑀸𑀢𑀺 [𑀲𑀩𑁆𑀩𑁂 𑀦𑁂 𑀢𑀸𑀤𑀺𑀲𑀸𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀜𑀢𑁆𑀯𑀸, 𑀇𑀢𑀺 𑀤𑀺𑀲𑁆𑀯𑀸 𑀦 𑀳𑀸𑀧𑁂𑀢𑀺 𑀢𑀲𑁆𑀲 𑀲𑀤𑁆𑀥𑀸;

𑀓𑀣𑀁 𑀳𑀺 𑀤𑀼𑀝𑁆𑀞𑁂𑀦 𑀅𑀲𑀫𑁆𑀧𑀤𑀼𑀝𑁆𑀞𑀁, 𑀲𑀼𑀤𑁆𑀥𑀁 𑀅𑀲𑀼𑀤𑁆𑀥𑁂𑀦 𑀲𑀫𑀁 𑀓𑀭𑁂𑀬𑁆𑀬𑀸’’𑀢𑀺.

𑀘𑀼𑀦𑁆𑀤𑀲𑀼𑀢𑁆𑀢𑀁 𑀧𑀜𑁆𑀘𑀫𑀁 𑀦𑀺𑀝𑁆𑀞𑀺𑀢𑀁.