𑁧𑁧. 𑀯𑀺𑀚𑀬𑀲𑀼𑀢𑁆𑀢𑀁

𑁧𑁯𑁫. 𑀘𑀭𑀁 𑀯𑀸 𑀬𑀤𑀺 𑀯𑀸 𑀢𑀺𑀝𑁆𑀞𑀁, 𑀦𑀺𑀲𑀺𑀦𑁆𑀦𑁄 𑀉𑀤 𑀯𑀸 𑀲𑀬𑀁;

𑀲𑀫𑀺𑀜𑁆𑀚𑁂𑀢𑀺 𑀧𑀲𑀸𑀭𑁂𑀢𑀺, 𑀏𑀲𑀸 𑀓𑀸𑀬𑀲𑁆𑀲 𑀇𑀜𑁆𑀚𑀦𑀸.

𑁧𑁯𑁬. 𑀅𑀝𑁆𑀞𑀺𑀦𑀳𑀸𑀭𑀼𑀲𑀁𑀬𑀼𑀢𑁆𑀢𑁄, 𑀢𑀘𑀫𑀁𑀲𑀸𑀯𑀮𑁂𑀧𑀦𑁄;

𑀙𑀯𑀺𑀬𑀸 𑀓𑀸𑀬𑁄 𑀧𑀝𑀺𑀘𑁆𑀙𑀦𑁆𑀦𑁄, 𑀬𑀣𑀸𑀪𑀽𑀢𑀁 𑀦 𑀤𑀺𑀲𑁆𑀲𑀢𑀺.

𑁧𑁯𑁭. 𑀅𑀦𑁆𑀢𑀧𑀽𑀭𑁄 𑀉𑀤𑀭𑀧𑀽𑀭𑁄, 𑀬𑀓𑀦𑀧𑁂𑀴𑀲𑁆𑀲 [𑀬𑀓𑀧𑁂𑀴𑀲𑁆𑀲 (𑀲𑀻. 𑀲𑁆𑀬𑀸.)] 𑀯𑀢𑁆𑀣𑀺𑀦𑁄;

𑀳𑀤𑀬𑀲𑁆𑀲 𑀧𑀧𑁆𑀨𑀸𑀲𑀲𑁆𑀲, 𑀯𑀓𑁆𑀓𑀲𑁆𑀲 𑀧𑀺𑀳𑀓𑀲𑁆𑀲 𑀘.

𑁧𑁯𑁮. 𑀲𑀺𑀗𑁆𑀖𑀸𑀡𑀺𑀓𑀸𑀬 𑀔𑁂𑀴𑀲𑁆𑀲, 𑀲𑁂𑀤𑀲𑁆𑀲 𑀘 𑀫𑁂𑀤𑀲𑁆𑀲 𑀘;

𑀮𑁄𑀳𑀺𑀢𑀲𑁆𑀲 𑀮𑀲𑀺𑀓𑀸𑀬, 𑀧𑀺𑀢𑁆𑀢𑀲𑁆𑀲 𑀘 𑀯𑀲𑀸𑀬 𑀘.

𑁧𑁯𑁯. 𑀅𑀣𑀲𑁆𑀲 𑀦𑀯𑀳𑀺 𑀲𑁄𑀢𑁂𑀳𑀺, 𑀅𑀲𑀼𑀘𑀻 𑀲𑀯𑀢𑀺 𑀲𑀩𑁆𑀩𑀤𑀸;

𑀅𑀓𑁆𑀔𑀺𑀫𑁆𑀳𑀸 𑀅𑀓𑁆𑀔𑀺𑀕𑀽𑀣𑀓𑁄, 𑀓𑀡𑁆𑀡𑀫𑁆𑀳𑀸 𑀓𑀡𑁆𑀡𑀕𑀽𑀣𑀓𑁄.

𑁨𑁦𑁦. 𑀲𑀺𑀗𑁆𑀖𑀸𑀡𑀺𑀓𑀸 𑀘 𑀦𑀸𑀲𑀢𑁄, 𑀫𑀼𑀔𑁂𑀦 𑀯𑀫𑀢𑁂𑀓𑀤𑀸;

𑀧𑀺𑀢𑁆𑀢𑀁 𑀲𑁂𑀫𑁆𑀳𑀜𑁆𑀘 𑀯𑀫𑀢𑀺, 𑀓𑀸𑀬𑀫𑁆𑀳𑀸 𑀲𑁂𑀤𑀚𑀮𑁆𑀮𑀺𑀓𑀸.

𑁨𑁦𑁧. 𑀅𑀣𑀲𑁆𑀲 𑀲𑀼𑀲𑀺𑀭𑀁 𑀲𑀻𑀲𑀁, 𑀫𑀢𑁆𑀣𑀮𑀼𑀗𑁆𑀕𑀲𑁆𑀲 𑀧𑀽𑀭𑀺𑀢𑀁;

𑀲𑀼𑀪𑀢𑁄 𑀦𑀁 𑀫𑀜𑁆𑀜𑀢𑀺, 𑀩𑀸𑀮𑁄 𑀅𑀯𑀺𑀚𑁆𑀚𑀸𑀬 𑀧𑀼𑀭𑀓𑁆𑀔𑀢𑁄.

𑁨𑁦𑁨. 𑀬𑀤𑀸 𑀘 𑀲𑁄 𑀫𑀢𑁄 𑀲𑁂𑀢𑀺, 𑀉𑀤𑁆𑀥𑀼𑀫𑀸𑀢𑁄 𑀯𑀺𑀦𑀻𑀮𑀓𑁄;

𑀅𑀧𑀯𑀺𑀤𑁆𑀥𑁄 𑀲𑀼𑀲𑀸𑀦𑀲𑁆𑀫𑀺𑀁, 𑀅𑀦𑀧𑁂𑀓𑁆𑀔𑀸 𑀳𑁄𑀦𑁆𑀢𑀺 𑀜𑀸𑀢𑀬𑁄.

𑁨𑁦𑁩. 𑀔𑀸𑀤𑀦𑁆𑀢𑀺 𑀦𑀁 𑀲𑀼𑀯𑀸𑀦𑀸 [𑀲𑀼𑀧𑀸𑀡𑀸 (𑀧𑀻.)] 𑀘, 𑀲𑀺𑀗𑁆𑀕𑀸𑀮𑀸 [𑀲𑀺𑀕𑀸𑀮𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀓𑀸 𑀓𑀺𑀫𑀻;

𑀓𑀸𑀓𑀸 𑀕𑀺𑀚𑁆𑀛𑀸 𑀘 𑀔𑀸𑀤𑀦𑁆𑀢𑀺, 𑀬𑁂 𑀘𑀜𑁆𑀜𑁂 𑀲𑀦𑁆𑀢𑀺 𑀧𑀸𑀡𑀺𑀦𑁄.

𑁨𑁦𑁪. 𑀲𑀼𑀢𑁆𑀯𑀸𑀦 𑀩𑀼𑀤𑁆𑀥𑀯𑀘𑀦𑀁, 𑀪𑀺𑀓𑁆𑀔𑀼 𑀧𑀜𑁆𑀜𑀸𑀡𑀯𑀸 𑀇𑀥;

𑀲𑁄 𑀔𑁄 𑀦𑀁 𑀧𑀭𑀺𑀚𑀸𑀦𑀸𑀢𑀺, 𑀬𑀣𑀸𑀪𑀽𑀢𑀜𑁆𑀳𑀺 𑀧𑀲𑁆𑀲𑀢𑀺.

𑁨𑁦𑁫. 𑀬𑀣𑀸 𑀇𑀤𑀁 𑀢𑀣𑀸 𑀏𑀢𑀁, 𑀬𑀣𑀸 𑀏𑀢𑀁 𑀢𑀣𑀸 𑀇𑀤𑀁;

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀓𑀸𑀬𑁂 𑀙𑀦𑁆𑀤𑀁 𑀯𑀺𑀭𑀸𑀚𑀬𑁂.

𑁨𑁦𑁬. 𑀙𑀦𑁆𑀤𑀭𑀸𑀕𑀯𑀺𑀭𑀢𑁆𑀢𑁄 𑀲𑁄, 𑀪𑀺𑀓𑁆𑀔𑀼 𑀧𑀜𑁆𑀜𑀸𑀡𑀯𑀸 𑀇𑀥;

𑀅𑀚𑁆𑀛𑀕𑀸 𑀅𑀫𑀢𑀁 𑀲𑀦𑁆𑀢𑀺𑀁, 𑀦𑀺𑀩𑁆𑀩𑀸𑀦𑀁 𑀧𑀤𑀫𑀘𑁆𑀘𑀼𑀢𑀁.

𑁨𑁦𑁭. 𑀤𑁆𑀯𑀺𑀧𑀸𑀤𑀓𑁄𑀬𑀁 [𑀤𑀺𑀧𑀸𑀤𑀓𑁄𑀬𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀲𑀼𑀘𑀺, 𑀤𑀼𑀕𑁆𑀕𑀦𑁆𑀥𑁄 𑀧𑀭𑀺𑀳𑀸𑀭𑀢𑀺 [𑀧𑀭𑀺𑀳𑀻𑀭𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)];

𑀦𑀸𑀦𑀸𑀓𑀼𑀡𑀧𑀧𑀭𑀺𑀧𑀽𑀭𑁄, 𑀯𑀺𑀲𑁆𑀲𑀯𑀦𑁆𑀢𑁄 𑀢𑀢𑁄 𑀢𑀢𑁄.

𑁨𑁦𑁮. 𑀏𑀢𑀸𑀤𑀺𑀲𑁂𑀦 𑀓𑀸𑀬𑁂𑀦, 𑀬𑁄 𑀫𑀜𑁆𑀜𑁂 𑀉𑀡𑁆𑀡𑀫𑁂𑀢𑀯𑁂 [𑀉𑀦𑁆𑀦𑀫𑁂𑀢𑀯𑁂 (?)];

𑀧𑀭𑀁 𑀯𑀸 𑀅𑀯𑀚𑀸𑀦𑁂𑀬𑁆𑀬, 𑀓𑀺𑀫𑀜𑁆𑀜𑀢𑁆𑀭 𑀅𑀤𑀲𑁆𑀲𑀦𑀸𑀢𑀺.

𑀯𑀺𑀚𑀬𑀲𑀼𑀢𑁆𑀢𑀁 𑀏𑀓𑀸𑀤𑀲𑀫𑀁 𑀦𑀺𑀝𑁆𑀞𑀺𑀢𑀁.