𑁧𑁨. 𑀫𑀼𑀦𑀺𑀲𑀼𑀢𑁆𑀢𑀁

𑁨𑁦𑁯. 𑀲𑀦𑁆𑀣𑀯𑀸𑀢𑁄 [𑀲𑀦𑁆𑀥𑀯𑀢𑁄 (𑀓.)] 𑀪𑀬𑀁 𑀚𑀸𑀢𑀁, 𑀦𑀺𑀓𑁂𑀢𑀸 𑀚𑀸𑀬𑀢𑁂 𑀭𑀚𑁄;

𑀅𑀦𑀺𑀓𑁂𑀢𑀫𑀲𑀦𑁆𑀣𑀯𑀁, 𑀏𑀢𑀁 𑀯𑁂 𑀫𑀼𑀦𑀺𑀤𑀲𑁆𑀲𑀦𑀁.

𑁨𑁧𑁦. 𑀬𑁄 𑀚𑀸𑀢𑀫𑀼𑀘𑁆𑀙𑀺𑀚𑁆𑀚 𑀦 𑀭𑁄𑀧𑀬𑁂𑀬𑁆𑀬, 𑀚𑀸𑀬𑀦𑁆𑀢𑀫𑀲𑁆𑀲 𑀦𑀸𑀦𑀼𑀧𑁆𑀧𑀯𑁂𑀘𑁆𑀙𑁂;

𑀢𑀫𑀸𑀳𑀼 𑀏𑀓𑀁 𑀫𑀼𑀦𑀺𑀦𑀁 𑀘𑀭𑀦𑁆𑀢𑀁, 𑀅𑀤𑁆𑀤𑀓𑁆𑀔𑀺 𑀲𑁄 𑀲𑀦𑁆𑀢𑀺𑀧𑀤𑀁 𑀫𑀳𑁂𑀲𑀺.

𑁨𑁧𑁧. 𑀲𑀗𑁆𑀔𑀸𑀬 𑀯𑀢𑁆𑀣𑀽𑀦𑀺 𑀧𑀫𑀸𑀬 [𑀧𑀳𑀸𑀬 (𑀓. 𑀲𑀻. 𑀓.), 𑀲𑀫𑀸𑀬 (𑀓.) 𑀧 + 𑀫𑀻 + 𑀢𑁆𑀯𑀸 = 𑀧𑀫𑀸𑀬, 𑀬𑀣𑀸 𑀦𑀺𑀲𑁆𑀲𑀸𑀬𑀸𑀢𑀺𑀧𑀤𑀁] 𑀩𑀻𑀚𑀁, 𑀲𑀺𑀦𑁂𑀳𑀫𑀲𑁆𑀲 𑀦𑀸𑀦𑀼𑀧𑁆𑀧𑀯𑁂𑀘𑁆𑀙𑁂;

𑀲 𑀯𑁂 𑀫𑀼𑀦𑀻 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻, 𑀢𑀓𑁆𑀓𑀁 𑀧𑀳𑀸𑀬 𑀦 𑀉𑀧𑁂𑀢𑀺 𑀲𑀗𑁆𑀔𑀁.

𑁨𑁧𑁨. 𑀅𑀜𑁆𑀜𑀸𑀬 𑀲𑀩𑁆𑀩𑀸𑀦𑀺 𑀦𑀺𑀯𑁂𑀲𑀦𑀸𑀦𑀺, 𑀅𑀦𑀺𑀓𑀸𑀫𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁;

𑀲 𑀯𑁂 𑀫𑀼𑀦𑀻 𑀯𑀻𑀢𑀕𑁂𑀥𑁄 𑀅𑀕𑀺𑀤𑁆𑀥𑁄, 𑀦𑀸𑀬𑀽𑀳𑀢𑀻 𑀧𑀸𑀭𑀕𑀢𑁄 𑀳𑀺 𑀳𑁄𑀢𑀺.

𑁨𑁧𑁩. 𑀲𑀩𑁆𑀩𑀸𑀪𑀺𑀪𑀼𑀁 𑀲𑀩𑁆𑀩𑀯𑀺𑀤𑀼𑀁 𑀲𑀼𑀫𑁂𑀥𑀁, 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀽𑀧𑀮𑀺𑀢𑁆𑀢𑀁;

𑀲𑀩𑁆𑀩𑀜𑁆𑀚𑀳𑀁 𑀢𑀡𑁆𑀳𑀓𑁆𑀔𑀬𑁂 𑀯𑀺𑀫𑀼𑀢𑁆𑀢𑀁, 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 [𑀫𑀼𑀦𑀺𑀁 (𑀲𑀻. 𑀧𑀻.)] 𑀯𑁂𑀤𑀬𑀦𑁆𑀢𑀺.

𑁨𑁧𑁪. 𑀧𑀜𑁆𑀜𑀸𑀩𑀮𑀁 𑀲𑀻𑀮𑀯𑀢𑀽𑀧𑀧𑀦𑁆𑀦𑀁, 𑀲𑀫𑀸𑀳𑀺𑀢𑀁 𑀛𑀸𑀦𑀭𑀢𑀁 𑀲𑀢𑀻𑀫𑀁;

𑀲𑀗𑁆𑀕𑀸 𑀧𑀫𑀼𑀢𑁆𑀢𑀁 𑀅𑀔𑀺𑀮𑀁 𑀅𑀦𑀸𑀲𑀯𑀁, 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀺.

𑁨𑁧𑁫. 𑀏𑀓𑀁 𑀘𑀭𑀦𑁆𑀢𑀁 𑀫𑀼𑀦𑀺𑀫𑀧𑁆𑀧𑀫𑀢𑁆𑀢𑀁, 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀼 𑀅𑀯𑁂𑀥𑀫𑀸𑀦𑀁;

𑀲𑀻𑀳𑀁𑀯 𑀲𑀤𑁆𑀤𑁂𑀲𑀼 𑀅𑀲𑀦𑁆𑀢𑀲𑀦𑁆𑀢𑀁, 𑀯𑀸𑀢𑀁𑀯 𑀚𑀸𑀮𑀫𑁆𑀳𑀺 𑀅𑀲𑀚𑁆𑀚𑀫𑀸𑀦𑀁;

𑀧𑀤𑁆𑀫𑀁𑀯 [𑀧𑀤𑀼𑀫𑀁𑀯 (𑀲𑀻. 𑀲𑁆𑀬𑀸. 𑀧𑀻.)] 𑀢𑁄𑀬𑁂𑀦 𑀅𑀮𑀺𑀧𑁆𑀧𑀫𑀸𑀦𑀁 [𑀅𑀮𑀺𑀫𑁆𑀧𑀫𑀸𑀦𑀁 (𑀲𑁆𑀬𑀸. 𑀓.)], 𑀦𑁂𑀢𑀸𑀭𑀫𑀜𑁆𑀜𑁂𑀲𑀫𑀦𑀜𑁆𑀜𑀦𑁂𑀬𑁆𑀬𑀁;

𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀺.

𑁨𑁧𑁬. 𑀬𑁄 𑀑𑀕𑀳𑀡𑁂 𑀣𑀫𑁆𑀪𑁄𑀭𑀺𑀯𑀸𑀪𑀺𑀚𑀸𑀬𑀢𑀺, 𑀬𑀲𑁆𑀫𑀺𑀁 𑀧𑀭𑁂 𑀯𑀸𑀘𑀸𑀧𑀭𑀺𑀬𑀦𑁆𑀢𑀁 [𑀯𑀸𑀘𑀁 𑀧𑀭𑀺𑀬𑀦𑁆𑀢𑀁 (𑀓.)] 𑀯𑀤𑀦𑁆𑀢𑀺;

𑀢𑀁 𑀯𑀻𑀢𑀭𑀸𑀕𑀁 𑀲𑀼𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑀁, 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀺.

𑁨𑁧𑁭. 𑀬𑁄 𑀯𑁂 𑀞𑀺𑀢𑀢𑁆𑀢𑁄 𑀢𑀲𑀭𑀁𑀯 𑀉𑀚𑁆𑀚𑀼, 𑀚𑀺𑀕𑀼𑀘𑁆𑀙𑀢𑀺 𑀓𑀫𑁆𑀫𑁂𑀳𑀺 𑀧𑀸𑀧𑀓𑁂𑀳𑀺;

𑀯𑀻𑀫𑀁𑀲𑀫𑀸𑀦𑁄 𑀯𑀺𑀲𑀫𑀁 𑀲𑀫𑀜𑁆𑀘, 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀺.

𑁨𑁧𑁮. 𑀬𑁄 𑀲𑀜𑁆𑀜𑀢𑀢𑁆𑀢𑁄 𑀦 𑀓𑀭𑁄𑀢𑀺 𑀧𑀸𑀧𑀁, 𑀤𑀳𑀭𑁄 𑀫𑀚𑁆𑀛𑀺𑀫𑁄 𑀘 𑀫𑀼𑀦𑀺 [𑀤𑀳𑀭𑁄 𑀘 𑀫𑀚𑁆𑀛𑁄 𑀘 𑀫𑀼𑀦𑀻 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀬𑀢𑀢𑁆𑀢𑁄;

𑀅𑀭𑁄𑀲𑀦𑁂𑀬𑁆𑀬𑁄 𑀦 𑀲𑁄 𑀭𑁄𑀲𑁂𑀢𑀺 𑀓𑀜𑁆𑀘𑀺 [𑀦 𑀭𑁄𑀲𑁂𑀢𑀺 (𑀲𑁆𑀬𑀸.)], 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀺.

𑁨𑁧𑁯. 𑀬𑀤𑀕𑁆𑀕𑀢𑁄 𑀫𑀚𑁆𑀛𑀢𑁄 𑀲𑁂𑀲𑀢𑁄 𑀯𑀸, 𑀧𑀺𑀡𑁆𑀟𑀁 𑀮𑀪𑁂𑀣 𑀧𑀭𑀤𑀢𑁆𑀢𑀽𑀧𑀚𑀻𑀯𑀻;

𑀦𑀸𑀮𑀁 𑀣𑀼𑀢𑀼𑀁 𑀦𑁄𑀧𑀺 𑀦𑀺𑀧𑀘𑁆𑀘𑀯𑀸𑀤𑀻, 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀺.

𑁨𑁨𑁦. 𑀫𑀼𑀦𑀺𑀁 𑀘𑀭𑀦𑁆𑀢𑀁 𑀯𑀺𑀭𑀢𑀁 𑀫𑁂𑀣𑀼𑀦𑀲𑁆𑀫𑀸, 𑀬𑁄 𑀬𑁄𑀩𑁆𑀩𑀦𑁂 𑀦𑁄𑀧𑀦𑀺𑀩𑀚𑁆𑀛𑀢𑁂 𑀓𑁆𑀯𑀘𑀺;

𑀫𑀤𑀧𑁆𑀧𑀫𑀸𑀤𑀸 𑀯𑀺𑀭𑀢𑀁 𑀯𑀺𑀧𑁆𑀧𑀫𑀼𑀢𑁆𑀢𑀁, 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀺.

𑁨𑁨𑁧. 𑀅𑀜𑁆𑀜𑀸𑀬 𑀮𑁄𑀓𑀁 𑀧𑀭𑀫𑀢𑁆𑀣𑀤𑀲𑁆𑀲𑀺𑀁, 𑀑𑀖𑀁 𑀲𑀫𑀼𑀤𑁆𑀤𑀁 𑀅𑀢𑀺𑀢𑀭𑀺𑀬 𑀢𑀸𑀤𑀺𑀁;

𑀢𑀁 𑀙𑀺𑀦𑁆𑀦𑀕𑀦𑁆𑀣𑀁 𑀅𑀲𑀺𑀢𑀁 𑀅𑀦𑀸𑀲𑀯𑀁, 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀺.

𑁨𑁨𑁨. 𑀅𑀲𑀫𑀸 𑀉𑀪𑁄 𑀤𑀽𑀭𑀯𑀺𑀳𑀸𑀭𑀯𑀼𑀢𑁆𑀢𑀺𑀦𑁄, 𑀕𑀺𑀳𑀻 [𑀕𑀺𑀳𑀺 (𑀓.)] 𑀤𑀸𑀭𑀧𑁄𑀲𑀻 𑀅𑀫𑀫𑁄 𑀘 𑀲𑀼𑀩𑁆𑀩𑀢𑁄;

𑀧𑀭𑀧𑀸𑀡𑀭𑁄𑀥𑀸𑀬 𑀕𑀺𑀳𑀻 𑀅𑀲𑀜𑁆𑀜𑀢𑁄, 𑀦𑀺𑀘𑁆𑀘𑀁 𑀫𑀼𑀦𑀻 𑀭𑀓𑁆𑀔𑀢𑀺 𑀧𑀸𑀡𑀺𑀦𑁂 [𑀧𑀸𑀡𑀺𑀦𑁄 (𑀲𑀻.)] 𑀬𑀢𑁄.

𑁨𑁨𑁩. 𑀲𑀺𑀔𑀻 𑀬𑀣𑀸 𑀦𑀻𑀮𑀕𑀻𑀯𑁄 [𑀦𑀻𑀮𑀕𑀺𑀯𑁄 (𑀲𑁆𑀬𑀸.)] 𑀯𑀺𑀳𑀗𑁆𑀕𑀫𑁄, 𑀳𑀁𑀲𑀲𑁆𑀲 𑀦𑁄𑀧𑁂𑀢𑀺 𑀚𑀯𑀁 𑀓𑀼𑀤𑀸𑀘𑀦𑀁;

𑀏𑀯𑀁 𑀕𑀺𑀳𑀻 𑀦𑀸𑀦𑀼𑀓𑀭𑁄𑀢𑀺 𑀪𑀺𑀓𑁆𑀔𑀼𑀦𑁄, 𑀫𑀼𑀦𑀺𑀦𑁄 𑀯𑀺𑀯𑀺𑀢𑁆𑀢𑀲𑁆𑀲 𑀯𑀦𑀫𑁆𑀳𑀺 𑀛𑀸𑀬𑀢𑁄𑀢𑀺.

𑀫𑀼𑀦𑀺𑀲𑀼𑀢𑁆𑀢𑀁 𑀤𑁆𑀯𑀸𑀤𑀲𑀫𑀁 𑀦𑀺𑀝𑁆𑀞𑀺𑀢𑀁.

𑀉𑀭𑀕𑀯𑀕𑁆𑀕𑁄 𑀧𑀞𑀫𑁄 𑀦𑀺𑀝𑁆𑀞𑀺𑀢𑁄.