𑁧. 𑀉𑀭𑀕𑀲𑀼𑀢𑁆𑀢𑀁

𑁧. 𑀬𑁄 [𑀬𑁄 𑀯𑁂 (𑀲𑁆𑀬𑀸.)] 𑀉𑀧𑁆𑀧𑀢𑀺𑀢𑀁 𑀯𑀺𑀦𑁂𑀢𑀺 𑀓𑁄𑀥𑀁, 𑀯𑀺𑀲𑀝𑀁 𑀲𑀧𑁆𑀧𑀯𑀺𑀲𑀁𑀯 𑀑𑀲𑀥𑁂𑀳𑀺 [𑀑𑀲𑀥𑁂𑀪𑀺 (𑀓.)];

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 [𑀚𑀺𑀡𑁆𑀡𑀫𑀺𑀯 𑀢𑀘𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀚𑀺𑀡𑁆𑀡𑀫𑀺𑀯𑀸 𑀢𑀘𑀁 (?)] 𑀧𑀼𑀭𑀸𑀡𑀁.

𑁨. 𑀬𑁄 𑀭𑀸𑀕𑀫𑀼𑀤𑀘𑁆𑀙𑀺𑀤𑀸 𑀅𑀲𑁂𑀲𑀁, 𑀪𑀺𑀲𑀧𑀼𑀧𑁆𑀨𑀁𑀯 𑀲𑀭𑁄𑀭𑀼𑀳𑀁 [𑀲𑀭𑁂𑀭𑀼𑀳𑀁 (𑀓.)] 𑀯𑀺𑀕𑀬𑁆𑀳;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁, 𑀧𑀼𑀭𑀸𑀡𑀁.

𑁩. 𑀬𑁄 𑀢𑀡𑁆𑀳𑀫𑀼𑀤𑀘𑁆𑀙𑀺𑀤𑀸 𑀅𑀲𑁂𑀲𑀁, 𑀲𑀭𑀺𑀢𑀁 𑀲𑀻𑀖𑀲𑀭𑀁 𑀯𑀺𑀲𑁄𑀲𑀬𑀺𑀢𑁆𑀯𑀸;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑁪. 𑀬𑁄 𑀫𑀸𑀦𑀫𑀼𑀤𑀩𑁆𑀩𑀥𑀻 𑀅𑀲𑁂𑀲𑀁, 𑀦𑀴𑀲𑁂𑀢𑀼𑀁𑀯 𑀲𑀼𑀤𑀼𑀩𑁆𑀩𑀮𑀁 𑀫𑀳𑁄𑀖𑁄;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑁫. 𑀬𑁄 𑀦𑀸𑀚𑁆𑀛𑀕𑀫𑀸 𑀪𑀯𑁂𑀲𑀼 𑀲𑀸𑀭𑀁, 𑀯𑀺𑀘𑀺𑀦𑀁 𑀧𑀼𑀧𑁆𑀨𑀫𑀺𑀯 [𑀧𑀼𑀧𑁆𑀨𑀫𑀺𑀯 (𑀩𑀳𑀽𑀲𑀼)] 𑀉𑀤𑀼𑀫𑁆𑀩𑀭𑁂𑀲𑀼;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑁬. 𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸, 𑀇𑀢𑀺𑀪𑀯𑀸𑀪𑀯𑀢𑀜𑁆𑀘 [𑀇𑀢𑀺𑀩𑁆𑀪𑀯𑀸𑀪𑀯𑀢𑀜𑁆𑀘 (𑀓.)] 𑀯𑀻𑀢𑀺𑀯𑀢𑁆𑀢𑁄;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑁭. 𑀬𑀲𑁆𑀲 𑀯𑀺𑀢𑀓𑁆𑀓𑀸 𑀯𑀺𑀥𑀽𑀧𑀺𑀢𑀸, 𑀅𑀚𑁆𑀛𑀢𑁆𑀢𑀁 𑀲𑀼𑀯𑀺𑀓𑀧𑁆𑀧𑀺𑀢𑀸 𑀅𑀲𑁂𑀲𑀸;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑁮. 𑀬𑁄 𑀦𑀸𑀘𑁆𑀘𑀲𑀸𑀭𑀻 𑀦 𑀧𑀘𑁆𑀘𑀲𑀸𑀭𑀻, 𑀲𑀩𑁆𑀩𑀁 𑀅𑀘𑁆𑀘𑀕𑀫𑀸 𑀇𑀫𑀁 𑀧𑀧𑀜𑁆𑀘𑀁;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑁯. 𑀬𑁄 𑀦𑀸𑀘𑁆𑀘𑀲𑀸𑀭𑀻 𑀦 𑀧𑀘𑁆𑀘𑀲𑀸𑀭𑀻, 𑀲𑀩𑁆𑀩𑀁 𑀯𑀺𑀢𑀣𑀫𑀺𑀤𑀦𑁆𑀢𑀺 𑀜𑀢𑁆𑀯𑀸 [𑀉𑀢𑁆𑀯𑀸 (𑀲𑁆𑀬𑀸. 𑀧𑀻. 𑀓.)] 𑀮𑁄𑀓𑁂;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑁧𑁦. 𑀬𑁄 𑀦𑀸𑀘𑁆𑀘𑀲𑀸𑀭𑀻 𑀦 𑀧𑀘𑁆𑀘𑀲𑀸𑀭𑀻, 𑀲𑀩𑁆𑀩𑀁 𑀯𑀺𑀢𑀣𑀫𑀺𑀤𑀦𑁆𑀢𑀺 𑀯𑀻𑀢𑀮𑁄𑀪𑁄;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑁧𑁧. 𑀬𑁄 𑀦𑀸𑀘𑁆𑀘𑀲𑀸𑀭𑀻 𑀦 𑀧𑀘𑁆𑀘𑀲𑀸𑀭𑀻, 𑀲𑀩𑁆𑀩𑀁 𑀯𑀺𑀢𑀣𑀫𑀺𑀤𑀦𑁆𑀢𑀺 𑀯𑀻𑀢𑀭𑀸𑀕𑁄;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑁧𑁨. 𑀬𑁄 𑀦𑀸𑀘𑁆𑀘𑀲𑀸𑀭𑀻 𑀦 𑀧𑀘𑁆𑀘𑀲𑀸𑀭𑀻, 𑀲𑀩𑁆𑀩𑀁 𑀯𑀺𑀢𑀣𑀫𑀺𑀤𑀦𑁆𑀢𑀺 𑀯𑀻𑀢𑀤𑁄𑀲𑁄;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑁧𑁩. 𑀬𑁄 𑀦𑀸𑀘𑁆𑀘𑀲𑀸𑀭𑀻 𑀦 𑀧𑀘𑁆𑀘𑀲𑀸𑀭𑀻, 𑀲𑀩𑁆𑀩𑀁 𑀯𑀺𑀢𑀣𑀫𑀺𑀤𑀦𑁆𑀢𑀺 𑀯𑀻𑀢𑀫𑁄𑀳𑁄;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑁧𑁪. 𑀬𑀲𑁆𑀲𑀸𑀦𑀼𑀲𑀬𑀸 𑀦 𑀲𑀦𑁆𑀢𑀺 𑀓𑁂𑀘𑀺, 𑀫𑀽𑀮𑀸 𑀘 𑀅𑀓𑀼𑀲𑀮𑀸 𑀲𑀫𑀽𑀳𑀢𑀸𑀲𑁂;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑁧𑁫. 𑀬𑀲𑁆𑀲 𑀤𑀭𑀣𑀚𑀸 𑀦 𑀲𑀦𑁆𑀢𑀺 𑀓𑁂𑀘𑀺, 𑀑𑀭𑀁 𑀆𑀕𑀫𑀦𑀸𑀬 𑀧𑀘𑁆𑀘𑀬𑀸𑀲𑁂;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑁧𑁬. 𑀬𑀲𑁆𑀲 𑀯𑀦𑀣𑀚𑀸 𑀦 𑀲𑀦𑁆𑀢𑀺 𑀓𑁂𑀘𑀺, 𑀯𑀺𑀦𑀺𑀩𑀦𑁆𑀥𑀸𑀬 𑀪𑀯𑀸𑀬 𑀳𑁂𑀢𑀼𑀓𑀧𑁆𑀧𑀸;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑁧𑁭. 𑀬𑁄 𑀦𑀻𑀯𑀭𑀡𑁂 𑀧𑀳𑀸𑀬 𑀧𑀜𑁆𑀘, 𑀅𑀦𑀺𑀖𑁄 𑀢𑀺𑀡𑁆𑀡𑀓𑀣𑀁𑀓𑀣𑁄 𑀯𑀺𑀲𑀮𑁆𑀮𑁄;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡𑀁.

𑀉𑀭𑀕𑀲𑀼𑀢𑁆𑀢𑀁 𑀧𑀞𑀫𑀁 𑀦𑀺𑀝𑁆𑀞𑀺𑀢𑀁.