𑁨. 𑀥𑀦𑀺𑀬𑀲𑀼𑀢𑁆𑀢𑀁

𑁧𑁮. ‘‘𑀧𑀓𑁆𑀓𑁄𑀤𑀦𑁄 𑀤𑀼𑀤𑁆𑀥𑀔𑀻𑀭𑁄𑀳𑀫𑀲𑁆𑀫𑀺, (𑀇𑀢𑀺 𑀥𑀦𑀺𑀬𑁄 𑀕𑁄𑀧𑁄)

𑀅𑀦𑀼𑀢𑀻𑀭𑁂 𑀫𑀳𑀺𑀬𑀸 𑀲𑀫𑀸𑀦𑀯𑀸𑀲𑁄;

𑀙𑀦𑁆𑀦𑀸 𑀓𑀼𑀝𑀺 𑀆𑀳𑀺𑀢𑁄 𑀕𑀺𑀦𑀺, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯’’.

𑁧𑁯. ‘‘𑀅𑀓𑁆𑀓𑁄𑀥𑀦𑁄 𑀯𑀺𑀕𑀢𑀔𑀺𑀮𑁄𑀳𑀫𑀲𑁆𑀫𑀺 [𑀯𑀺𑀕𑀢𑀔𑀻𑀮𑁄𑀳𑀫𑀲𑁆𑀫𑀺 (𑀲𑀻. 𑀧𑀻.)], (𑀇𑀢𑀺 𑀪𑀕𑀯𑀸)

𑀅𑀦𑀼𑀢𑀻𑀭𑁂 𑀫𑀳𑀺𑀬𑁂𑀓𑀭𑀢𑁆𑀢𑀺𑀯𑀸𑀲𑁄;

𑀯𑀺𑀯𑀝𑀸 𑀓𑀼𑀝𑀺 𑀦𑀺𑀩𑁆𑀩𑀼𑀢𑁄 𑀕𑀺𑀦𑀺, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯’’.

𑁨𑁦. ‘‘𑀅𑀦𑁆𑀥𑀓𑀫𑀓𑀲𑀸 𑀦 𑀯𑀺𑀚𑁆𑀚𑀭𑁂, (𑀇𑀢𑀺 𑀥𑀦𑀺𑀬𑁄 𑀕𑁄𑀧𑁄)

𑀓𑀘𑁆𑀙𑁂 𑀭𑀽𑀴𑁆𑀳𑀢𑀺𑀡𑁂 𑀘𑀭𑀦𑁆𑀢𑀺 𑀕𑀸𑀯𑁄;

𑀯𑀼𑀝𑁆𑀞𑀺𑀫𑁆𑀧𑀺 𑀲𑀳𑁂𑀬𑁆𑀬𑀼𑀫𑀸𑀕𑀢𑀁, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯’’.

𑁨𑁧. ‘‘𑀩𑀤𑁆𑀥𑀸𑀲𑀺 𑀪𑀺𑀲𑀻 𑀲𑀼𑀲𑀗𑁆𑀔𑀢𑀸, (𑀇𑀢𑀺 𑀪𑀕𑀯𑀸)

𑀢𑀺𑀡𑁆𑀡𑁄 𑀧𑀸𑀭𑀕𑀢𑁄 𑀯𑀺𑀦𑁂𑀬𑁆𑀬 𑀑𑀖𑀁;

𑀅𑀢𑁆𑀣𑁄 𑀪𑀺𑀲𑀺𑀬𑀸 𑀦 𑀯𑀺𑀚𑁆𑀚𑀢𑀺, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯’’.

𑁨𑁨. ‘‘𑀕𑁄𑀧𑀻 𑀫𑀫 𑀅𑀲𑁆𑀲𑀯𑀸 𑀅𑀮𑁄𑀮𑀸, (𑀇𑀢𑀺 𑀥𑀦𑀺𑀬𑁄 𑀕𑁄𑀧𑁄)

𑀤𑀻𑀖𑀭𑀢𑁆𑀢𑀁 [𑀤𑀻𑀖𑀭𑀢𑁆𑀢 (𑀓.)] 𑀲𑀁𑀯𑀸𑀲𑀺𑀬𑀸 𑀫𑀦𑀸𑀧𑀸;

𑀢𑀲𑁆𑀲𑀸 𑀦 𑀲𑀼𑀡𑀸𑀫𑀺 𑀓𑀺𑀜𑁆𑀘𑀺 𑀧𑀸𑀧𑀁, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯’’.

𑁨𑁩. ‘‘𑀘𑀺𑀢𑁆𑀢𑀁 𑀫𑀫 𑀅𑀲𑁆𑀲𑀯𑀁 𑀯𑀺𑀫𑀼𑀢𑁆𑀢𑀁, (𑀇𑀢𑀺 𑀪𑀕𑀯𑀸)

𑀤𑀻𑀖𑀭𑀢𑁆𑀢𑀁 𑀧𑀭𑀺𑀪𑀸𑀯𑀺𑀢𑀁 𑀲𑀼𑀤𑀦𑁆𑀢𑀁;

𑀧𑀸𑀧𑀁 𑀧𑀦 𑀫𑁂 𑀦 𑀯𑀺𑀚𑁆𑀚𑀢𑀺, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯’’.

𑁨𑁪. ‘‘𑀅𑀢𑁆𑀢𑀯𑁂𑀢𑀦𑀪𑀢𑁄𑀳𑀫𑀲𑁆𑀫𑀺, (𑀇𑀢𑀺 𑀥𑀦𑀺𑀬𑁄 𑀕𑁄𑀧𑁄)

𑀧𑀼𑀢𑁆𑀢𑀸 𑀘 𑀫𑁂 𑀲𑀫𑀸𑀦𑀺𑀬𑀸 𑀅𑀭𑁄𑀕𑀸;

𑀢𑁂𑀲𑀁 𑀦 𑀲𑀼𑀡𑀸𑀫𑀺 𑀓𑀺𑀜𑁆𑀘𑀺 𑀧𑀸𑀧𑀁, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯’’.

𑁨𑁫. ‘‘𑀦𑀸𑀳𑀁 𑀪𑀢𑀓𑁄𑀲𑁆𑀫𑀺 𑀓𑀲𑁆𑀲𑀘𑀺, (𑀇𑀢𑀺 𑀪𑀕𑀯𑀸)

𑀦𑀺𑀩𑁆𑀩𑀺𑀝𑁆𑀞𑁂𑀦 𑀘𑀭𑀸𑀫𑀺 𑀲𑀩𑁆𑀩𑀮𑁄𑀓𑁂;

𑀅𑀢𑁆𑀣𑁄 𑀪𑀢𑀺𑀬𑀸 𑀦 𑀯𑀺𑀚𑁆𑀚𑀢𑀺, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯’’.

𑁨𑁬. ‘‘𑀅𑀢𑁆𑀣𑀺 𑀯𑀲𑀸 𑀅𑀢𑁆𑀣𑀺 𑀥𑁂𑀦𑀼𑀧𑀸, (𑀇𑀢𑀺 𑀥𑀦𑀺𑀬𑁄 𑀕𑁄𑀧𑁄)

𑀕𑁄𑀥𑀭𑀡𑀺𑀬𑁄 𑀧𑀯𑁂𑀡𑀺𑀬𑁄𑀧𑀺 𑀅𑀢𑁆𑀣𑀺;

𑀉𑀲𑀪𑁄𑀧𑀺 𑀕𑀯𑀫𑁆𑀧𑀢𑀻𑀥 𑀅𑀢𑁆𑀣𑀺, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯’’.

𑁨𑁭. ‘‘𑀦𑀢𑁆𑀣𑀺 𑀯𑀲𑀸 𑀦𑀢𑁆𑀣𑀺 𑀥𑁂𑀦𑀼𑀧𑀸, (𑀇𑀢𑀺 𑀪𑀕𑀯𑀸)

𑀕𑁄𑀥𑀭𑀡𑀺𑀬𑁄 𑀧𑀯𑁂𑀡𑀺𑀬𑁄𑀧𑀺 𑀦𑀢𑁆𑀣𑀺;

𑀉𑀲𑀪𑁄𑀧𑀺 𑀕𑀯𑀫𑁆𑀧𑀢𑀻𑀥 𑀦𑀢𑁆𑀣𑀺, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯’’.

𑁨𑁮. ‘‘𑀔𑀺𑀮𑀸 𑀦𑀺𑀔𑀸𑀢𑀸 𑀅𑀲𑀫𑁆𑀧𑀯𑁂𑀥𑀻, (𑀇𑀢𑀺 𑀥𑀦𑀺𑀬𑁄 𑀕𑁄𑀧𑁄)

𑀤𑀸𑀫𑀸 𑀫𑀼𑀜𑁆𑀚𑀫𑀬𑀸 𑀦𑀯𑀸 𑀲𑀼𑀲𑀡𑁆𑀞𑀸𑀦𑀸;

𑀦 𑀳𑀺 𑀲𑀓𑁆𑀔𑀺𑀦𑁆𑀢𑀺 𑀥𑁂𑀦𑀼𑀧𑀸𑀧𑀺 𑀙𑁂𑀢𑁆𑀢𑀼𑀁 [𑀙𑁂𑀢𑀼𑀁 (𑀓.)], 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯’’.

𑁨𑁯. ‘‘𑀉𑀲𑀪𑁄𑀭𑀺𑀯 𑀙𑁂𑀢𑁆𑀯 [𑀙𑁂𑀢𑁆𑀯𑀸 (𑀲𑁆𑀬𑀸. 𑀓.)] 𑀩𑀦𑁆𑀥𑀦𑀸𑀦𑀺, (𑀇𑀢𑀺 𑀪𑀕𑀯𑀸)

𑀦𑀸𑀕𑁄 𑀧𑀽𑀢𑀺𑀮𑀢𑀁𑀯 𑀤𑀸𑀮𑀬𑀺𑀢𑁆𑀯𑀸 [𑀧𑀽𑀢𑀺𑀮𑀢𑀁 𑀧𑀤𑀸𑀮𑀬𑀺𑀢𑁆𑀯𑀸 (𑀲𑁆𑀬𑀸. 𑀓.)];

𑀦𑀸𑀳𑀁 𑀧𑀼𑀦𑀼𑀧𑁂𑀲𑁆𑀲𑀁 [𑀧𑀼𑀦 𑀉𑀧𑁂𑀲𑁆𑀲𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀧𑀼𑀦𑀼𑀧𑁂𑀬𑁆𑀬 (𑀓.)] 𑀕𑀩𑁆𑀪𑀲𑁂𑀬𑁆𑀬𑀁, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯’’.

𑁩𑁦. ‘‘𑀦𑀺𑀦𑁆𑀦𑀜𑁆𑀘 𑀣𑀮𑀜𑁆𑀘 𑀧𑀽𑀭𑀬𑀦𑁆𑀢𑁄, 𑀫𑀳𑀸𑀫𑁂𑀖𑁄 𑀧𑀯𑀲𑁆𑀲𑀺 𑀢𑀸𑀯𑀤𑁂𑀯;

𑀲𑀼𑀢𑁆𑀯𑀸 𑀤𑁂𑀯𑀲𑁆𑀲 𑀯𑀲𑁆𑀲𑀢𑁄, 𑀇𑀫𑀫𑀢𑁆𑀣𑀁 𑀥𑀦𑀺𑀬𑁄 𑀅𑀪𑀸𑀲𑀣.

𑁩𑁧. ‘‘𑀮𑀸𑀪𑀸 𑀯𑀢 𑀦𑁄 𑀅𑀦𑀧𑁆𑀧𑀓𑀸, 𑀬𑁂 𑀫𑀬𑀁 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲𑀸𑀫;

𑀲𑀭𑀡𑀁 𑀢𑀁 𑀉𑀧𑁂𑀫 𑀘𑀓𑁆𑀔𑀼𑀫, 𑀲𑀢𑁆𑀣𑀸 𑀦𑁄 𑀳𑁄𑀳𑀺 𑀢𑀼𑀯𑀁 𑀫𑀳𑀸𑀫𑀼𑀦𑀺.

𑁩𑁨. ‘‘𑀕𑁄𑀧𑀻 𑀘 𑀅𑀳𑀜𑁆𑀘 𑀅𑀲𑁆𑀲𑀯𑀸, 𑀩𑁆𑀭𑀳𑁆𑀫𑀘𑀭𑀺𑀬𑀁 [𑀩𑁆𑀭𑀳𑁆𑀫𑀘𑀭𑀺𑀬 (𑀓.)] 𑀲𑀼𑀕𑀢𑁂 𑀘𑀭𑀸𑀫𑀲𑁂;

𑀚𑀸𑀢𑀺𑀫𑀭𑀡𑀲𑁆𑀲 𑀧𑀸𑀭𑀕𑀽 [𑀧𑀸𑀭𑀕𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑀸 𑀪𑀯𑀸𑀫𑀲𑁂’’.

𑁩𑁩. ‘‘𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, (𑀇𑀢𑀺 𑀫𑀸𑀭𑁄 𑀧𑀸𑀧𑀺𑀫𑀸)

𑀕𑁄𑀫𑀸 [𑀕𑁄𑀫𑀺𑀓𑁄 (𑀲𑀻. 𑀧𑀻.), 𑀕𑁄𑀧𑀺𑀓𑁄 (𑀲𑁆𑀬𑀸. 𑀓𑀁.), 𑀕𑁄𑀧𑀺𑀬𑁄 (𑀓.)] 𑀕𑁄𑀳𑀺 𑀢𑀣𑁂𑀯 𑀦𑀦𑁆𑀤𑀢𑀺;

𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀦𑀦𑁆𑀤𑀦𑀸, 𑀦 𑀳𑀺 𑀲𑁄 𑀦𑀦𑁆𑀤𑀢𑀺 𑀬𑁄 𑀦𑀺𑀭𑀽𑀧𑀥𑀺’’.

𑁩𑁪. ‘‘𑀲𑁄𑀘𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, (𑀇𑀢𑀺 𑀪𑀕𑀯𑀸)

𑀕𑁄𑀧𑀺𑀬𑁄 𑀕𑁄𑀳𑀺 𑀢𑀣𑁂𑀯 𑀲𑁄𑀘𑀢𑀺;

𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸, 𑀦 𑀳𑀺 𑀲𑁄 𑀲𑁄𑀘𑀢𑀺 𑀬𑁄 𑀦𑀺𑀭𑀽𑀧𑀥𑀻’’𑀢𑀺.

𑀥𑀦𑀺𑀬𑀲𑀼𑀢𑁆𑀢𑀁 𑀤𑀼𑀢𑀺𑀬𑀁 𑀦𑀺𑀝𑁆𑀞𑀺𑀢𑀁.