𑁯. 𑀕𑀽𑀣𑀔𑀸𑀤𑀓𑀧𑁂𑀢𑀺𑀯𑀢𑁆𑀣𑀼

𑁭𑁭𑁪. ‘‘𑀕𑀽𑀣𑀓𑀽𑀧𑀢𑁄 𑀉𑀕𑁆𑀕𑀦𑁆𑀢𑁆𑀯𑀸, 𑀓𑀸 𑀦𑀼 𑀤𑀻𑀦𑀸 𑀧𑀢𑀺𑀝𑁆𑀞𑀲𑀺;

𑀦𑀺𑀲𑁆𑀲𑀁𑀲𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸, 𑀓𑀺𑀁 𑀦𑀼 𑀲𑀤𑁆𑀤𑀳𑀲𑁂 𑀢𑀼𑀯’’𑀦𑁆𑀢𑀺.

𑁭𑁭𑁫. ‘‘𑀅𑀳𑀁 𑀪𑀤𑀦𑁆𑀢𑁂 𑀧𑁂𑀢𑀻𑀫𑁆𑀳𑀺, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺.

𑁭𑁭𑁬. ‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀤𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀻’’𑀢𑀺.

𑁭𑁭𑁭. ‘‘𑀅𑀳𑀼 𑀆𑀯𑀸𑀲𑀺𑀓𑁄 𑀫𑀬𑁆𑀳𑀁, 𑀇𑀲𑁆𑀲𑀼𑀓𑀻 𑀓𑀼𑀮𑀫𑀘𑁆𑀙𑀭𑀻;

𑀅𑀚𑁆𑀛𑁄𑀲𑀺𑀢𑁄 𑀫𑀬𑁆𑀳𑀁 𑀖𑀭𑁂, 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄.

𑁭𑁭𑁮. ‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀓𑁆𑀔𑀯𑁄 𑀧𑀭𑀺𑀪𑀸𑀲𑀺𑀲𑀁;

𑀢𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺.

𑁭𑁭𑁯. ‘‘𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀯𑀡𑁆𑀡𑁂𑀦, 𑀬𑁄 𑀢𑁂 𑀆𑀲𑀺 𑀓𑀼𑀮𑀽𑀧𑀓𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀓𑀺𑀁 𑀦𑀼 𑀧𑁂𑀘𑁆𑀘 𑀕𑀢𑀺𑀁 𑀕𑀢𑁄’’𑀢𑀺.

𑁭𑁮𑁦. ‘‘𑀢𑀲𑁆𑀲𑁂𑀯𑀸𑀳𑀁 𑀧𑀸𑀧𑀓𑀫𑁆𑀫𑀲𑁆𑀲, 𑀲𑀻𑀲𑁂 𑀢𑀺𑀝𑁆𑀞𑀸𑀫𑀺 𑀫𑀢𑁆𑀣𑀓𑁂;

𑀲𑁄 𑀘 𑀧𑀭𑀯𑀺𑀲𑀬𑀁 𑀧𑀢𑁆𑀢𑁄, 𑀫𑀫𑁂𑀯 𑀧𑀭𑀺𑀘𑀸𑀭𑀓𑁄.

𑁭𑁮𑁧. ‘‘𑀬𑀁 𑀪𑀤𑀦𑁆𑀢𑁂 𑀳𑀤𑀦𑁆𑀢𑀜𑁆𑀜𑁂, 𑀏𑀢𑀁 𑀫𑁂 𑀳𑁄𑀢𑀺 𑀪𑁄𑀚𑀦𑀁;

𑀅𑀳𑀜𑁆𑀘 𑀔𑁄 𑀬𑀁 𑀳𑀤𑀸𑀫𑀺, 𑀏𑀢𑀁 𑀲𑁄 𑀉𑀧𑀚𑀻𑀯𑀢𑀻’’𑀢𑀺.

𑀕𑀽𑀣𑀔𑀸𑀤𑀓𑀧𑁂𑀢𑀺𑀯𑀢𑁆𑀣𑀼 𑀦𑀯𑀫𑀁.