𑁧𑁦. 𑀕𑀡𑀧𑁂𑀢𑀯𑀢𑁆𑀣𑀼

𑁭𑁮𑁨. ‘‘𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀢𑁆𑀣, 𑀓𑀺𑀲𑀸 𑀥𑀫𑀦𑀺𑀲𑀦𑁆𑀣𑀢𑀸;

𑀉𑀧𑁆𑀨𑀸𑀲𑀼𑀮𑀺𑀓𑀸 [𑀉𑀧𑁆𑀧𑀸𑀲𑀼𑀴𑀺𑀓𑀸 (𑀓.)] 𑀓𑀺𑀲𑀺𑀓𑀸, 𑀓𑁂 𑀦𑀼 𑀢𑀼𑀫𑁆𑀳𑁂𑀢𑁆𑀣 𑀫𑀸𑀭𑀺𑀲𑀸’’𑀢𑀺.

𑁭𑁮𑁩. ‘‘𑀫𑀬𑀁 𑀪𑀤𑀦𑁆𑀢𑁂 𑀧𑁂𑀢𑀸𑀫𑁆𑀳𑀸, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺.

𑁭𑁮𑁪. ‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺.

𑁭𑁮𑁫. ‘‘𑀅𑀦𑀸𑀯𑀝𑁂𑀲𑀼 𑀢𑀺𑀢𑁆𑀣𑁂𑀲𑀼, 𑀯𑀺𑀘𑀺𑀦𑀺𑀫𑁆𑀳𑀤𑁆𑀥𑀫𑀸𑀲𑀓𑀁;

𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀫𑁆𑀳 𑀅𑀢𑁆𑀢𑀦𑁄.

𑁭𑁮𑁬. ‘‘𑀦𑀤𑀺𑀁 𑀉𑀧𑁂𑀫 𑀢𑀲𑀺𑀢𑀸, 𑀭𑀺𑀢𑁆𑀢𑀓𑀸 𑀧𑀭𑀺𑀯𑀢𑁆𑀢𑀢𑀺;

𑀙𑀸𑀬𑀁 𑀉𑀧𑁂𑀫 𑀉𑀡𑁆𑀳𑁂𑀲𑀼, 𑀆𑀢𑀧𑁄 𑀧𑀭𑀺𑀯𑀢𑁆𑀢𑀢𑀺.

𑁭𑁮𑁭. ‘‘𑀅𑀕𑁆𑀕𑀺𑀯𑀡𑁆𑀡𑁄 𑀘 𑀦𑁄 𑀯𑀸𑀢𑁄, 𑀟𑀳𑀦𑁆𑀢𑁄 𑀉𑀧𑀯𑀸𑀬𑀢𑀺;

𑀏𑀢𑀜𑁆𑀘 𑀪𑀦𑁆𑀢𑁂 𑀅𑀭𑀳𑀸𑀫, 𑀅𑀜𑁆𑀜𑀜𑁆𑀘 𑀧𑀸𑀧𑀓𑀁 𑀢𑀢𑁄.

𑁭𑁮𑁮. ‘‘𑀅𑀧𑀺 𑀬𑁄𑀚𑀦𑀸𑀦𑀺 [𑀅𑀥𑀺𑀬𑁄𑀚𑀦𑀸𑀦𑀺 (𑀲𑀻. 𑀓.)] 𑀕𑀘𑁆𑀙𑀸𑀫, 𑀙𑀸𑀢𑀸 𑀆𑀳𑀸𑀭𑀕𑁂𑀥𑀺𑀦𑁄;

𑀅𑀮𑀤𑁆𑀥𑀸𑀯 𑀦𑀺𑀯𑀢𑁆𑀢𑀸𑀫, 𑀅𑀳𑁄 𑀦𑁄 𑀅𑀧𑁆𑀧𑀧𑀼𑀜𑁆𑀜𑀢𑀸.

𑁭𑁮𑁯. ‘‘𑀙𑀸𑀢𑀸 𑀧𑀫𑀼𑀘𑁆𑀙𑀺𑀢𑀸 𑀪𑀦𑁆𑀢𑀸, 𑀪𑀽𑀫𑀺𑀬𑀁 𑀧𑀝𑀺𑀲𑀼𑀫𑁆𑀪𑀺𑀢𑀸;

𑀉𑀢𑁆𑀢𑀸𑀦𑀸 𑀧𑀝𑀺𑀓𑀺𑀭𑀸𑀫, 𑀅𑀯𑀓𑀼𑀚𑁆𑀚𑀸 𑀧𑀢𑀸𑀫𑀲𑁂.

𑁭𑁯𑁦. ‘‘𑀢𑁂 𑀘 𑀢𑀢𑁆𑀣𑁂𑀯 𑀧𑀢𑀺𑀢𑀸 [𑀢𑀢𑁆𑀣 𑀧𑀧𑀳𑀺𑀢𑀸 (𑀓.)], 𑀪𑀽𑀫𑀺𑀬𑀁 𑀧𑀝𑀺𑀲𑀼𑀫𑁆𑀪𑀺𑀢𑀸;

𑀉𑀭𑀁 𑀲𑀻𑀲𑀜𑁆𑀘 𑀖𑀝𑁆𑀝𑁂𑀫, 𑀅𑀳𑁄 𑀦𑁄 𑀅𑀧𑁆𑀧𑀧𑀼𑀜𑁆𑀜𑀢𑀸.

𑁭𑁯𑁧. ‘‘𑀏𑀢𑀜𑁆𑀘 𑀪𑀦𑁆𑀢𑁂 𑀅𑀭𑀳𑀸𑀫, 𑀅𑀜𑁆𑀜𑀜𑁆𑀘 𑀧𑀸𑀧𑀓𑀁 𑀢𑀢𑁄;

𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀫𑁆𑀳 𑀅𑀢𑁆𑀢𑀦𑁄.

𑁭𑁯𑁨. ‘‘𑀢𑁂 𑀳𑀺 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑁄𑀦𑀺𑀁 𑀮𑀤𑁆𑀥𑀸𑀦 𑀫𑀸𑀦𑀼𑀲𑀺𑀁;

𑀯𑀤𑀜𑁆𑀜𑀽 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀓𑀸𑀳𑀸𑀫 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺.

𑀕𑀡𑀧𑁂𑀢𑀯𑀢𑁆𑀣𑀼 𑀤𑀲𑀫𑀁.