𑁬. 𑀓𑀼𑀫𑀸𑀭𑀧𑁂𑀢𑀯𑀢𑁆𑀣𑀼

𑁭𑁪𑁬. ‘‘𑀲𑀸𑀯𑀢𑁆𑀣𑀺 𑀦𑀸𑀫 𑀦𑀕𑀭𑀁, 𑀳𑀺𑀫𑀯𑀦𑁆𑀢𑀲𑁆𑀲 𑀧𑀲𑁆𑀲𑀢𑁄;

𑀢𑀢𑁆𑀣 𑀆𑀲𑀼𑀁 𑀤𑁆𑀯𑁂 𑀓𑀼𑀫𑀸𑀭𑀸, 𑀭𑀸𑀚𑀧𑀼𑀢𑁆𑀢𑀸𑀢𑀺 𑀫𑁂 𑀲𑀼𑀢𑀁.

𑁭𑁪𑁭. ‘‘𑀲𑀫𑁆𑀫𑀢𑁆𑀢𑀸 [𑀧𑀫𑀢𑁆𑀢𑀸 (𑀓.)] 𑀭𑀚𑀦𑀻𑀬𑁂𑀲𑀼, 𑀓𑀸𑀫𑀲𑁆𑀲𑀸𑀤𑀸𑀪𑀺𑀦𑀦𑁆𑀤𑀺𑀦𑁄;

𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁂 𑀕𑀺𑀤𑁆𑀥𑀸, 𑀦 𑀢𑁂 𑀧𑀲𑁆𑀲𑀺𑀁𑀲𑀼𑀦𑀸𑀕𑀢𑀁.

𑁭𑁪𑁮. ‘‘𑀢𑁂 𑀘𑀼𑀢𑀸 𑀘 𑀫𑀦𑀼𑀲𑁆𑀲𑀢𑁆𑀢𑀸, 𑀧𑀭𑀮𑁄𑀓𑀁 𑀇𑀢𑁄 𑀕𑀢𑀸;

𑀢𑁂𑀥 𑀖𑁄𑀲𑁂𑀦𑁆𑀢𑁆𑀬𑀤𑀺𑀲𑁆𑀲𑀦𑁆𑀢𑀸, 𑀧𑀼𑀩𑁆𑀩𑁂 𑀤𑀼𑀓𑁆𑀓𑀝𑀫𑀢𑁆𑀢𑀦𑁄.

𑁭𑁪𑁯. ‘‘‘𑀩𑀳𑀽𑀲𑀼 𑀯𑀢 [𑀩𑀳𑀼𑀲𑁆𑀲𑀼𑀢𑁂𑀲𑀼 (𑀲𑀻. 𑀓.)] 𑀲𑀦𑁆𑀢𑁂𑀲𑀼, 𑀤𑁂𑀬𑁆𑀬𑀥𑀫𑁆𑀫𑁂 𑀉𑀧𑀝𑁆𑀞𑀺𑀢𑁂;

𑀦𑀸𑀲𑀓𑁆𑀔𑀺𑀫𑁆𑀳𑀸 𑀘 𑀅𑀢𑁆𑀢𑀸𑀦𑀁, 𑀧𑀭𑀺𑀢𑁆𑀢𑀁 𑀓𑀸𑀢𑀼𑀁 𑀲𑀼𑀔𑀸𑀯𑀳𑀁.

𑁭𑁫𑁦. ‘‘‘𑀓𑀺𑀁 𑀢𑀢𑁄 𑀧𑀸𑀧𑀓𑀁 𑀅𑀲𑁆𑀲, 𑀬𑀁 𑀦𑁄 𑀭𑀸𑀚𑀓𑀼𑀮𑀸 𑀘𑀼𑀢𑀸;

𑀉𑀧𑀧𑀦𑁆𑀦𑀸 𑀧𑁂𑀢𑁆𑀢𑀺𑀯𑀺𑀲𑀬𑀁, 𑀔𑀼𑀧𑁆𑀧𑀺𑀧𑀸𑀲𑀲𑀫𑀧𑁆𑀧𑀺𑀢𑀸 [𑀔𑀼𑀧𑁆𑀧𑀺𑀧𑀸𑀲𑀸𑀲𑀫𑀧𑁆𑀧𑀺𑀢𑀸 (𑀲𑀻. 𑀧𑀻.)].

𑁭𑁫𑁧. ‘‘𑀲𑀸𑀫𑀺𑀦𑁄 𑀇𑀥 𑀳𑀼𑀢𑁆𑀯𑀸𑀦, 𑀳𑁄𑀦𑁆𑀢𑀺 𑀅𑀲𑀸𑀫𑀺𑀦𑁄 𑀢𑀳𑀺𑀁;

𑀪𑀫𑀦𑁆𑀢𑀺 [𑀘𑀭𑀦𑁆𑀢𑀺 (𑀲𑀻. 𑀧𑀻.), 𑀫𑀭𑀦𑁆𑀢𑀺 (𑀲𑁆𑀬𑀸.)] 𑀔𑀼𑀧𑁆𑀧𑀺𑀧𑀸𑀲𑀸𑀬, 𑀫𑀦𑀼𑀲𑁆𑀲𑀸 𑀉𑀦𑁆𑀦𑀢𑁄𑀦𑀢𑀸.

𑁭𑁫𑁨. ‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀇𑀲𑁆𑀲𑀭𑀫𑀤𑀲𑀫𑁆𑀪𑀯𑀁;

𑀧𑀳𑀸𑀬 𑀇𑀲𑁆𑀲𑀭𑀫𑀤𑀁, 𑀪𑀯𑁂 𑀲𑀕𑁆𑀕𑀕𑀢𑁄 𑀦𑀭𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀲𑀧𑁆𑀧𑀜𑁆𑀜𑁄, 𑀲𑀕𑁆𑀕𑀁 𑀲𑁄 𑀉𑀧𑀧𑀚𑁆𑀚𑀢𑀻’’𑀢𑀺.

𑀓𑀼𑀫𑀸𑀭𑀧𑁂𑀢𑀯𑀢𑁆𑀣𑀼 𑀙𑀝𑁆𑀞𑀁.