𑁭. 𑀭𑀸𑀚𑀧𑀼𑀢𑁆𑀢𑀧𑁂𑀢𑀯𑀢𑁆𑀣𑀼

𑁭𑁫𑁩. 𑀧𑀼𑀩𑁆𑀩𑁂 𑀓𑀢𑀸𑀦𑀁 𑀓𑀫𑁆𑀫𑀸𑀦𑀁, 𑀯𑀺𑀧𑀸𑀓𑁄 𑀫𑀣𑀬𑁂 𑀫𑀦𑀁;

𑀭𑀽𑀧𑁂 𑀲𑀤𑁆𑀤𑁂 𑀭𑀲𑁂 𑀕𑀦𑁆𑀥𑁂, 𑀨𑁄𑀝𑁆𑀞𑀩𑁆𑀩𑁂 𑀘 𑀫𑀦𑁄𑀭𑀫𑁂.

𑁭𑁫𑁪. 𑀦𑀘𑁆𑀘𑀁 𑀕𑀻𑀢𑀁 𑀭𑀢𑀺𑀁 𑀔𑀺𑀟𑁆𑀟𑀁, 𑀅𑀦𑀼𑀪𑀼𑀢𑁆𑀯𑀸 𑀅𑀦𑀧𑁆𑀧𑀓𑀁;

𑀉𑀬𑁆𑀬𑀸𑀦𑁂 𑀧𑀭𑀺𑀘𑀭𑀺𑀢𑁆𑀯𑀸, 𑀧𑀯𑀺𑀲𑀦𑁆𑀢𑁄 𑀕𑀺𑀭𑀺𑀩𑁆𑀩𑀚𑀁.

𑁭𑁫𑁫. 𑀇𑀲𑀺𑀁 𑀲𑀼𑀦𑁂𑀢𑁆𑀢 [𑀲𑀼𑀦𑀺𑀢 (𑀓.)] 𑀫𑀤𑁆𑀤𑀓𑁆𑀔𑀺, 𑀅𑀢𑁆𑀢𑀤𑀦𑁆𑀢𑀁 𑀲𑀫𑀸𑀳𑀺𑀢𑀁;

𑀅𑀧𑁆𑀧𑀺𑀘𑁆𑀙𑀁 𑀳𑀺𑀭𑀺𑀲𑀫𑁆𑀧𑀦𑁆𑀦𑀁, 𑀉𑀜𑁆𑀙𑁂 𑀧𑀢𑁆𑀢𑀕𑀢𑁂 𑀭𑀢𑀁.

𑁭𑁫𑁬. 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀑𑀭𑀼𑀬𑁆𑀳, 𑀮𑀤𑁆𑀥𑀸 𑀪𑀦𑁆𑀢𑁂𑀢𑀺 𑀘𑀸𑀩𑁆𑀭𑀯𑀺;

𑀢𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀉𑀘𑁆𑀘𑀁 𑀧𑀕𑁆𑀕𑀬𑁆𑀳 𑀔𑀢𑁆𑀢𑀺𑀬𑁄.

𑁭𑁫𑁭. 𑀣𑀡𑁆𑀟𑀺𑀮𑁂 𑀧𑀢𑁆𑀢𑀁 𑀪𑀺𑀦𑁆𑀤𑀺𑀢𑁆𑀯𑀸, 𑀳𑀲𑀫𑀸𑀦𑁄 𑀅𑀧𑀓𑁆𑀓𑀫𑀺;

‘‘𑀭𑀜𑁆𑀜𑁄 𑀓𑀺𑀢𑀯𑀲𑁆𑀲𑀸𑀳𑀁 𑀧𑀼𑀢𑁆𑀢𑁄, 𑀓𑀺𑀁 𑀫𑀁 𑀪𑀺𑀓𑁆𑀔𑀼 𑀓𑀭𑀺𑀲𑁆𑀲𑀲𑀺’’.

𑁭𑁫𑁮. 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀨𑀭𑀼𑀲𑀲𑁆𑀲, 𑀯𑀺𑀧𑀸𑀓𑁄 𑀓𑀝𑀼𑀓𑁄 𑀅𑀳𑀼;

𑀬𑀁 𑀭𑀸𑀚𑀧𑀼𑀢𑁆𑀢𑁄 𑀯𑁂𑀤𑁂𑀲𑀺, 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑁄.

𑁭𑁫𑁯. 𑀙𑀴𑁂𑀯 𑀘𑀢𑀼𑀭𑀸𑀲𑀻𑀢𑀺, 𑀯𑀲𑁆𑀲𑀸𑀦𑀺 𑀦𑀯𑀼𑀢𑀸𑀦𑀺 𑀘;

𑀪𑀼𑀲𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀺𑀢𑁆𑀣𑁄, 𑀦𑀺𑀭𑀬𑁂 𑀓𑀢𑀓𑀺𑀩𑁆𑀩𑀺𑀲𑁄.

𑁭𑁬𑁦. 𑀉𑀢𑁆𑀢𑀸𑀦𑁄𑀧𑀺 𑀘 𑀧𑀘𑁆𑀘𑀺𑀢𑁆𑀣, 𑀦𑀺𑀓𑀼𑀚𑁆𑀚𑁄 𑀯𑀸𑀫𑀤𑀓𑁆𑀔𑀺𑀡𑁄;

𑀉𑀤𑁆𑀥𑀁𑀧𑀸𑀤𑁄 𑀞𑀺𑀢𑁄 𑀘𑁂𑀯, 𑀘𑀺𑀭𑀁 𑀩𑀸𑀮𑁄 𑀅𑀧𑀘𑁆𑀘𑀣.

𑁭𑁬𑁧. 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀧𑀽𑀕𑀸𑀦𑀺 𑀦𑀳𑀼𑀢𑀸𑀦𑀺 𑀘;

𑀪𑀼𑀲𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀺𑀢𑁆𑀣𑁄, 𑀦𑀺𑀭𑀬𑁂 𑀓𑀢𑀓𑀺𑀩𑁆𑀩𑀺𑀲𑁄.

𑁭𑁬𑁨. 𑀏𑀢𑀸𑀤𑀺𑀲𑀁 𑀔𑁄 𑀓𑀝𑀼𑀓𑀁, 𑀅𑀧𑁆𑀧𑀤𑀼𑀝𑁆𑀞𑀧𑁆𑀧𑀤𑁄𑀲𑀺𑀦𑀁;

𑀧𑀘𑁆𑀘𑀦𑁆𑀢𑀺 𑀧𑀸𑀧𑀓𑀫𑁆𑀫𑀦𑁆𑀢𑀸, 𑀇𑀲𑀺𑀫𑀸𑀲𑀚𑁆𑀚 𑀲𑀼𑀩𑁆𑀩𑀢𑀁.

𑁭𑁬𑁩. 𑀲𑁄 𑀢𑀢𑁆𑀣 𑀩𑀳𑀼𑀯𑀲𑁆𑀲𑀸𑀦𑀺, 𑀯𑁂𑀤𑀬𑀺𑀢𑁆𑀯𑀸 𑀩𑀳𑀼𑀁 𑀤𑀼𑀔𑀁;

𑀔𑀼𑀧𑁆𑀧𑀺𑀧𑀸𑀲𑀳𑀢𑁄 𑀦𑀸𑀫 [𑀔𑀼𑀧𑁆𑀧𑀺𑀧𑀸𑀲𑀸𑀳𑀢𑁄 𑀦𑀸𑀫 (𑀲𑀻. 𑀧𑀻)], 𑀧𑁂𑀢𑁄 𑀆𑀲𑀺 𑀢𑀢𑁄 𑀘𑀼𑀢𑁄.

𑁭𑁬𑁪. 𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸 [𑀤𑀺𑀲𑁆𑀯𑀸 (𑀲𑀻.)], 𑀇𑀲𑁆𑀲𑀭𑀫𑀤𑀲𑀫𑁆𑀪𑀯𑀁;

𑀧𑀳𑀸𑀬 𑀇𑀲𑁆𑀲𑀭𑀫𑀤𑀁, 𑀦𑀺𑀯𑀸𑀢𑀫𑀦𑀼𑀯𑀢𑁆𑀢𑀬𑁂.

𑁭𑁬𑁫. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀲𑀁𑀲𑁄, 𑀬𑁄 𑀩𑀼𑀤𑁆𑀥𑁂𑀲𑀼 𑀲𑀕𑀸𑀭𑀯𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀲𑀧𑁆𑀧𑀜𑁆𑀜𑁄, 𑀲𑀕𑁆𑀕𑀁 𑀲𑁄 𑀉𑀧𑀧𑀚𑁆𑀚𑀢𑀻𑀢𑀺.

𑀭𑀸𑀚𑀧𑀼𑀢𑁆𑀢𑀧𑁂𑀢𑀯𑀢𑁆𑀣𑀼 𑀲𑀢𑁆𑀢𑀫𑀁.