𑁫. 𑀉𑀘𑁆𑀙𑀼𑀧𑁂𑀢𑀯𑀢𑁆𑀣𑀼

𑁭𑁩𑁭. ‘‘𑀇𑀤𑀁 𑀫𑀫 𑀉𑀘𑁆𑀙𑀼𑀯𑀦𑀁 𑀫𑀳𑀦𑁆𑀢𑀁, 𑀦𑀺𑀩𑁆𑀩𑀢𑁆𑀢𑀢𑀺 𑀧𑀼𑀜𑁆𑀜𑀨𑀮𑀁 𑀅𑀦𑀧𑁆𑀧𑀓𑀁;

𑀢𑀁 𑀤𑀸𑀦𑀺 𑀫𑁂 𑀦 [𑀦 𑀤𑀸𑀦𑀺 𑀫𑁂 𑀢𑀁 (𑀲𑀻. 𑀓.)] 𑀧𑀭𑀺𑀪𑁄𑀕𑀫𑁂𑀢𑀺, 𑀆𑀘𑀺𑀓𑁆𑀔 𑀪𑀦𑁆𑀢𑁂 𑀓𑀺𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄.

𑁭𑁩𑁮. ‘‘𑀳𑀜𑁆𑀜𑀸𑀫𑀺 [𑀯𑀺𑀳𑀜𑁆𑀜𑀸𑀫𑀺 (𑀓.)] 𑀔𑀚𑁆𑀚𑀸𑀫𑀺 𑀘 𑀯𑀸𑀬𑀫𑀸𑀫𑀺, 𑀧𑀭𑀺𑀲𑀓𑁆𑀓𑀸𑀫𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀓𑀺𑀜𑁆𑀘𑀺;

𑀲𑁆𑀯𑀸𑀳𑀁 𑀙𑀺𑀦𑁆𑀦𑀣𑀸𑀫𑁄 𑀓𑀧𑀡𑁄 𑀮𑀸𑀮𑀧𑀸𑀫𑀺, 𑀓𑀺𑀲𑁆𑀲 [𑀓𑀺𑀲𑁆𑀲𑀲𑁆𑀲 (𑀲𑀻.), 𑀓𑀺𑀲𑁆𑀲𑀲𑁆𑀲𑀼 (?)] 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄.

𑁭𑁩𑁯. ‘‘𑀯𑀺𑀖𑀸𑀢𑁄 𑀘𑀸𑀳𑀁 𑀧𑀭𑀺𑀧𑀢𑀸𑀫𑀺 𑀙𑀫𑀸𑀬𑀁, 𑀧𑀭𑀺𑀯𑀢𑁆𑀢𑀸𑀫𑀺 𑀯𑀸𑀭𑀺𑀘𑀭𑁄𑀯 𑀖𑀫𑁆𑀫𑁂;

𑀭𑀼𑀤𑀢𑁄 𑀘 𑀫𑁂 [𑀤𑀽𑀭𑀢𑁄 𑀘 𑀫𑁂 (𑀲𑁆𑀬𑀸. 𑀓.)] 𑀅𑀲𑁆𑀲𑀼𑀓𑀸 𑀦𑀺𑀕𑁆𑀕𑀮𑀦𑁆𑀢𑀺, 𑀆𑀘𑀺𑀓𑁆𑀔 𑀪𑀦𑁆𑀢𑁂 𑀓𑀺𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄.

𑁭𑁪𑁦. ‘‘𑀙𑀸𑀢𑁄 𑀓𑀺𑀮𑀦𑁆𑀢𑁄 𑀘 𑀧𑀺𑀧𑀸𑀲𑀺𑀢𑁄 𑀘, 𑀲𑀦𑁆𑀢𑀲𑁆𑀲𑀺𑀢𑁄 𑀲𑀸𑀢𑀲𑀼𑀔𑀁 𑀦 𑀯𑀺𑀦𑁆𑀤𑁂;

𑀧𑀼𑀘𑁆𑀙𑀸𑀫𑀺 𑀢𑀁 𑀏𑀢𑀫𑀢𑁆𑀣𑀁 𑀪𑀤𑀦𑁆𑀢𑁂, 𑀓𑀣𑀁 𑀦𑀼 𑀉𑀘𑁆𑀙𑀼𑀧𑀭𑀺𑀪𑁄𑀕𑀁 𑀮𑀪𑁂𑀬𑁆𑀬’’𑀦𑁆𑀢𑀺.

𑁭𑁪𑁧. ‘‘𑀧𑀼𑀭𑁂 𑀢𑀼𑀯𑀁 𑀓𑀫𑁆𑀫𑀫𑀓𑀸𑀲𑀺 𑀅𑀢𑁆𑀢𑀦𑀸, 𑀫𑀦𑀼𑀲𑁆𑀲𑀪𑀽𑀢𑁄 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸;

𑀅𑀳𑀜𑁆𑀘 𑀢𑀁 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺, 𑀲𑀼𑀢𑁆𑀯𑀸𑀦 𑀢𑁆𑀯𑀁 𑀏𑀢𑀫𑀢𑁆𑀣𑀁 𑀯𑀺𑀚𑀸𑀦.

𑁭𑁪𑁨. ‘‘𑀉𑀘𑁆𑀙𑀼𑀁 𑀢𑀼𑀯𑀁 𑀔𑀸𑀤𑀫𑀸𑀦𑁄 𑀧𑀬𑀸𑀢𑁄, 𑀧𑀼𑀭𑀺𑀲𑁄 𑀘 𑀢𑁂 𑀧𑀺𑀝𑁆𑀞𑀺𑀢𑁄 𑀅𑀦𑁆𑀯𑀕𑀘𑁆𑀙𑀺;

𑀲𑁄 𑀘 𑀢𑀁 𑀧𑀘𑁆𑀘𑀸𑀲𑀦𑁆𑀢𑁄 𑀓𑀣𑁂𑀲𑀺, 𑀢𑀲𑁆𑀲 𑀢𑀼𑀯𑀁 𑀦 𑀓𑀺𑀜𑁆𑀘𑀺 𑀆𑀮𑀧𑀺𑀢𑁆𑀣.

𑁭𑁪𑁩. ‘‘𑀲𑁄 𑀘 𑀢𑀁 𑀅𑀪𑀡𑀦𑁆𑀢𑀁 𑀅𑀬𑀸𑀘𑀺, ‘𑀤𑁂𑀳𑀬𑁆𑀬 𑀉𑀘𑁆𑀙𑀼’𑀦𑁆𑀢𑀺 𑀘 𑀢𑀁 𑀅𑀯𑁄𑀘;

𑀢𑀲𑁆𑀲 𑀢𑀼𑀯𑀁 𑀧𑀺𑀝𑁆𑀞𑀺𑀢𑁄 𑀉𑀘𑁆𑀙𑀼𑀁 𑀅𑀤𑀸𑀲𑀺, 𑀢𑀲𑁆𑀲𑁂𑀢𑀁 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄.

𑁭𑁪𑁪. ‘‘𑀇𑀗𑁆𑀖 𑀢𑁆𑀯𑀁 𑀕𑀦𑁆𑀢𑁆𑀯𑀸𑀦 𑀧𑀺𑀝𑁆𑀞𑀺𑀢𑁄 𑀕𑀡𑁆𑀳𑁂𑀬𑁆𑀬𑀸𑀲𑀺 [𑀇𑀗𑁆𑀖 𑀢𑁆𑀯𑀁 𑀧𑀺𑀝𑁆𑀞𑀺𑀢𑁄 𑀕𑀡𑁆𑀳 𑀉𑀘𑁆𑀙𑀼𑀁 (𑀲𑀻.)], 𑀕𑀳𑁂𑀢𑁆𑀯𑀸𑀦 𑀢𑀁 𑀔𑀸𑀤𑀲𑁆𑀲𑀼 𑀬𑀸𑀯𑀤𑀢𑁆𑀣𑀁;

𑀢𑁂𑀦𑁂𑀯 𑀢𑁆𑀯𑀁 𑀅𑀢𑁆𑀢𑀫𑀦𑁄 𑀪𑀯𑀺𑀲𑁆𑀲𑀲𑀺, 𑀳𑀝𑁆𑀞𑁄 𑀘𑀼𑀤𑀕𑁆𑀕𑁄 𑀘 𑀧𑀫𑁄𑀤𑀺𑀢𑁄 𑀘𑀸’’𑀢𑀺.

𑁭𑁪𑁫. 𑀕𑀦𑁆𑀢𑁆𑀯𑀸𑀦 𑀲𑁄 𑀧𑀺𑀝𑁆𑀞𑀺𑀢𑁄 𑀅𑀕𑁆𑀕𑀳𑁂𑀲𑀺, 𑀕𑀳𑁂𑀢𑁆𑀯𑀸𑀦 𑀢𑀁 𑀔𑀸𑀤𑀺 𑀬𑀸𑀯𑀤𑀢𑁆𑀣𑀁;

𑀢𑁂𑀦𑁂𑀯 𑀲𑁄 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺, 𑀳𑀝𑁆𑀞𑁄 𑀘𑀼𑀤𑀕𑁆𑀕𑁄 𑀘 𑀧𑀫𑁄𑀤𑀺𑀢𑁄 𑀘𑀸𑀢𑀺.

𑀉𑀘𑁆𑀙𑀼𑀧𑁂𑀢𑀯𑀢𑁆𑀣𑀼 𑀧𑀜𑁆𑀘𑀫𑀁.