𑁬. 𑀲𑁂𑀭𑀺𑀡𑀻𑀧𑁂𑀢𑀯𑀢𑁆𑀣𑀼

𑁪𑁬𑁪. ‘‘𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀺, 𑀓𑀺𑀲𑀸 𑀥𑀫𑀦𑀺𑀲𑀦𑁆𑀣𑀢𑀸;

𑀉𑀧𑁆𑀨𑀸𑀲𑀼𑀮𑀺𑀓𑁂 𑀓𑀺𑀲𑀺𑀓𑁂, 𑀓𑀸 𑀦𑀼 𑀢𑁆𑀯𑀁 𑀇𑀥 𑀢𑀺𑀝𑁆𑀞𑀲𑀻’’𑀢𑀺.

𑁪𑁬𑁫. ‘‘𑀅𑀳𑀁 𑀪𑀤𑀦𑁆𑀢𑁂 𑀧𑁂𑀢𑀻𑀫𑁆𑀳𑀺, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺.

𑁪𑁬𑁬. ‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀓𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺.

𑁪𑁬𑁭. ‘‘𑀅𑀦𑀸𑀯𑀝𑁂𑀲𑀼 𑀢𑀺𑀢𑁆𑀣𑁂𑀲𑀼, 𑀯𑀺𑀘𑀺𑀦𑀺𑀁 𑀅𑀟𑁆𑀠𑀫𑀸𑀲𑀓𑀁;

𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀸𑀲𑀺𑀫𑀢𑁆𑀢𑀦𑁄.

𑁪𑁬𑁮. ‘‘𑀦𑀤𑀺𑀁 𑀉𑀧𑁂𑀫𑀺 𑀢𑀲𑀺𑀢𑀸, 𑀭𑀺𑀢𑁆𑀢𑀓𑀸 𑀧𑀭𑀺𑀯𑀢𑁆𑀢𑀢𑀺;

𑀙𑀸𑀬𑀁 𑀉𑀧𑁂𑀫𑀺 𑀉𑀡𑁆𑀳𑁂𑀲𑀼, 𑀆𑀢𑀧𑁄 𑀧𑀭𑀺𑀯𑀢𑁆𑀢𑀢𑀺.

𑁪𑁬𑁯. ‘‘𑀅𑀕𑁆𑀕𑀺𑀯𑀡𑁆𑀡𑁄 𑀘 𑀫𑁂 𑀯𑀸𑀢𑁄, 𑀟𑀳𑀦𑁆𑀢𑁄 𑀉𑀧𑀯𑀸𑀬𑀢𑀺;

𑀏𑀢𑀜𑁆𑀘 𑀪𑀦𑁆𑀢𑁂 𑀅𑀭𑀳𑀸𑀫𑀺, 𑀅𑀜𑁆𑀜𑀜𑁆𑀘 𑀧𑀸𑀧𑀓𑀁 𑀢𑀢𑁄.

𑁪𑁭𑁦. ‘‘𑀕𑀦𑁆𑀢𑁆𑀯𑀸𑀦 𑀳𑀢𑁆𑀣𑀺𑀦𑀺𑀁 𑀧𑀼𑀭𑀁, 𑀯𑀚𑁆𑀚𑁂𑀲𑀺 𑀫𑀬𑁆𑀳 𑀫𑀸𑀢𑀭𑀁;

‘𑀥𑀻𑀢𑀸 𑀘 𑀢𑁂 𑀫𑀬𑀸 𑀤𑀺𑀝𑁆𑀞𑀸, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’.

𑁪𑁭𑁧. ‘‘𑀅𑀢𑁆𑀣𑀺 𑀫𑁂 𑀏𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑀁, 𑀅𑀦𑀓𑁆𑀔𑀸𑀢𑀜𑁆𑀘 𑀢𑀁 𑀫𑀬𑀸;

𑀘𑀢𑁆𑀢𑀸𑀭𑀺𑀲𑀢𑀲𑀳𑀲𑁆𑀲𑀸𑀦𑀺, 𑀧𑀮𑁆𑀮𑀗𑁆𑀓𑀲𑁆𑀲 𑀘 𑀳𑁂𑀝𑁆𑀞𑀢𑁄.

𑁪𑁭𑁨. ‘‘𑀢𑀢𑁄 𑀫𑁂 𑀤𑀸𑀦𑀁 𑀤𑀤𑀢𑀼, 𑀢𑀲𑁆𑀲𑀸 𑀘 𑀳𑁄𑀢𑀼 𑀚𑀻𑀯𑀺𑀓𑀸;

𑀤𑀸𑀦𑀁 𑀤𑀢𑁆𑀯𑀸 𑀘 𑀫𑁂 𑀫𑀸𑀢𑀸, 𑀤𑀓𑁆𑀔𑀺𑀡𑀁 𑀅𑀦𑀼𑀤𑀺𑀘𑁆𑀙𑀢𑀼 [𑀅𑀦𑀼𑀤𑀺𑀲𑁆𑀲𑀢𑀼 (𑀲𑀻. 𑀧𑀻.), 𑀅𑀦𑁆𑀯𑀸𑀤𑀺𑀲𑁆𑀲𑀢𑀼 (𑀲𑁆𑀬𑀸.)];

𑀢𑀤𑀸𑀳𑀁 𑀲𑀼𑀔𑀺𑀢𑀸 𑀳𑁂𑀲𑁆𑀲𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻’’𑀢𑀺.

𑁪𑁭𑁩. ‘‘𑀲𑀸𑀥𑀽’’𑀢𑀺 𑀲𑁄 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀕𑀦𑁆𑀢𑁆𑀯𑀸𑀦 𑀳𑀢𑁆𑀣𑀺𑀦𑀺𑀁 𑀧𑀼𑀭𑀁;

𑀅𑀯𑁄𑀘 𑀢𑀲𑁆𑀲𑀸 𑀫𑀸𑀢𑀭𑀁 𑁋

‘𑀥𑀻𑀢𑀸 𑀘 𑀢𑁂 𑀫𑀬𑀸 𑀤𑀺𑀝𑁆𑀞𑀸, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’.

𑁪𑁭𑁪. ‘‘𑀲𑀸 𑀫𑀁 𑀢𑀢𑁆𑀣 𑀲𑀫𑀸𑀤𑀧𑁂𑀲𑀺, ( ) [(𑀕𑀦𑁆𑀢𑁆𑀯𑀸𑀦 𑀳𑀢𑁆𑀣𑀺𑀦𑀺𑀁 𑀧𑀼𑀭𑀁) (𑀲𑁆𑀬𑀸. 𑀓.)] 𑀯𑀚𑁆𑀚𑁂𑀲𑀺 𑀫𑀬𑁆𑀳 𑀫𑀸𑀢𑀭𑀁;

‘𑀥𑀻𑀢𑀸 𑀘 𑀢𑁂 𑀫𑀬𑀸 𑀤𑀺𑀝𑁆𑀞𑀸, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’.

𑁪𑁭𑁫. ‘‘𑀅𑀢𑁆𑀣𑀺 𑀘 𑀫𑁂 𑀏𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑀁, 𑀅𑀦𑀓𑁆𑀔𑀸𑀢𑀜𑁆𑀘 𑀢𑀁 𑀫𑀬𑀸;

𑀘𑀢𑁆𑀢𑀸𑀭𑀺𑀲𑀢𑀲𑀳𑀲𑁆𑀲𑀸𑀦𑀺, 𑀧𑀮𑁆𑀮𑀗𑁆𑀓𑀲𑁆𑀲 𑀘 𑀳𑁂𑀝𑁆𑀞𑀢𑁄.

𑁪𑁭𑁬. ‘‘𑀢𑀢𑁄 𑀫𑁂 𑀤𑀸𑀦𑀁 𑀤𑀤𑀢𑀼, 𑀢𑀲𑁆𑀲𑀸 𑀘 𑀳𑁄𑀢𑀼 𑀚𑀻𑀯𑀺𑀓𑀸;

𑀤𑀸𑀦𑀁 𑀤𑀢𑁆𑀯𑀸 𑀘 𑀫𑁂 𑀫𑀸𑀢𑀸, 𑀤𑀓𑁆𑀔𑀺𑀡𑀁 𑀅𑀦𑀼𑀤𑀺𑀘𑁆𑀙𑀢𑀼 ( ) [(𑀢𑀢𑁄 𑀢𑀼𑀯𑀁 𑀤𑀸𑀦𑀁 𑀤𑁂𑀳𑀺, 𑀢𑀲𑁆𑀲𑀸 𑀤𑀓𑁆𑀔𑀺𑀡𑀫𑀸𑀤𑀺𑀲𑀻) (𑀓.)];

‘𑀢𑀤𑀸 𑀲𑀸 𑀲𑀼𑀔𑀺𑀢𑀸 𑀳𑁂𑀲𑁆𑀲𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻’’’𑀢𑀺.

𑁪𑁭𑁭. 𑀢𑀢𑁄 𑀳𑀺 𑀲𑀸 𑀤𑀸𑀦𑀫𑀤𑀸, 𑀢𑀲𑁆𑀲𑀸 𑀤𑀓𑁆𑀔𑀺𑀡𑀫𑀸𑀤𑀺𑀲𑀻;

𑀧𑁂𑀢𑀻 𑀘 𑀲𑀼𑀔𑀺𑀢𑀸 𑀆𑀲𑀺, 𑀢𑀲𑁆𑀲𑀸 𑀘𑀸𑀲𑀺 𑀲𑀼𑀚𑀻𑀯𑀺𑀓𑀸𑀢𑀺.

𑀲𑁂𑀭𑀺𑀡𑀻𑀧𑁂𑀢𑀯𑀢𑁆𑀣𑀼 𑀙𑀝𑁆𑀞𑀁.