𑁩. 𑀘𑀽𑀴𑀯𑀕𑁆𑀕𑁄

𑁧. 𑀅𑀪𑀺𑀚𑁆𑀚𑀫𑀸𑀦𑀧𑁂𑀢𑀯𑀢𑁆𑀣𑀼

𑁩𑁮𑁭. ‘‘𑀅𑀪𑀺𑀚𑁆𑀚𑀫𑀸𑀦𑁂 𑀯𑀸𑀭𑀺𑀫𑁆𑀳𑀺, 𑀕𑀗𑁆𑀕𑀸𑀬 𑀇𑀥 𑀕𑀘𑁆𑀙𑀲𑀺;

𑀦𑀕𑁆𑀕𑁄 𑀧𑀼𑀩𑁆𑀩𑀤𑁆𑀥𑀧𑁂𑀢𑁄𑀯 𑀫𑀸𑀮𑀥𑀸𑀭𑀻 𑀅𑀮𑀗𑁆𑀓𑀢𑁄;

𑀓𑀼𑀳𑀺𑀁 𑀕𑀫𑀺𑀲𑁆𑀲𑀲𑀺 𑀧𑁂𑀢, 𑀓𑀢𑁆𑀣 𑀯𑀸𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑁩𑁮𑁮. ‘‘𑀘𑀼𑀦𑁆𑀤𑀝𑁆𑀞𑀺𑀮𑀁 [𑀘𑀼𑀦𑁆𑀤𑀝𑁆𑀞𑀺𑀓𑀁 (𑀲𑀻.)] 𑀕𑀫𑀺𑀲𑁆𑀲𑀸𑀫𑀺, 𑀧𑁂𑀢𑁄 𑀲𑁄 𑀇𑀢𑀺 𑀪𑀸𑀲𑀢𑀺;

𑀅𑀦𑁆𑀢𑀭𑁂 𑀯𑀸𑀲𑀪𑀕𑀸𑀫𑀁, 𑀩𑀸𑀭𑀸𑀡𑀲𑀺𑀁 𑀘 [𑀩𑀸𑀭𑀸𑀡𑀲𑀺𑀬𑀸 𑀘 (𑀲𑀻. 𑀲𑁆𑀬𑀸.)] 𑀲𑀦𑁆𑀢𑀺𑀓𑁂’’.

𑁩𑁮𑁯. 𑀢𑀜𑁆𑀘 𑀤𑀺𑀲𑁆𑀯𑀸 𑀫𑀳𑀸𑀫𑀢𑁆𑀢𑁄, 𑀓𑁄𑀮𑀺𑀬𑁄 𑀇𑀢𑀺 𑀯𑀺𑀲𑁆𑀲𑀼𑀢𑁄;

𑀲𑀢𑁆𑀢𑀼𑀁 𑀪𑀢𑁆𑀢𑀜𑁆𑀘 𑀧𑁂𑀢𑀲𑁆𑀲, 𑀧𑀻𑀢𑀓𑀜𑁆𑀘 𑀬𑀼𑀕𑀁 𑀅𑀤𑀸.

𑁩𑁯𑁦. 𑀦𑀸𑀯𑀸𑀬 𑀢𑀺𑀝𑁆𑀞𑀫𑀸𑀦𑀸𑀬, 𑀓𑀧𑁆𑀧𑀓𑀲𑁆𑀲 𑀅𑀤𑀸𑀧𑀬𑀺;

𑀓𑀧𑁆𑀧𑀓𑀲𑁆𑀲 𑀧𑀤𑀺𑀦𑁆𑀦𑀫𑁆𑀳𑀺, 𑀞𑀸𑀦𑁂 𑀧𑁂𑀢𑀲𑁆𑀲 𑀤𑀺𑀲𑁆𑀲𑀣 [𑀧𑁂𑀢𑀲𑁆𑀲𑀼’𑀤𑀺𑀲𑁆𑀲𑀣 (𑀲𑀻.), 𑀧𑁂𑀢𑀲𑁆𑀲𑀼’𑀤𑀺𑀘𑁆𑀙𑀣 (?)].

𑁩𑁯𑁧. 𑀢𑀢𑁄 𑀲𑀼𑀯𑀢𑁆𑀣𑀯𑀲𑀦𑁄, 𑀫𑀸𑀮𑀥𑀸𑀭𑀻 𑀅𑀮𑀗𑁆𑀓𑀢𑁄;

𑀞𑀸𑀦𑁂 𑀞𑀺𑀢𑀲𑁆𑀲 𑀧𑁂𑀢𑀲𑁆𑀲, 𑀤𑀓𑁆𑀔𑀺𑀡𑀸 𑀉𑀧𑀓𑀧𑁆𑀧𑀣;

𑀢𑀲𑁆𑀫𑀸 𑀤𑀚𑁆𑀚𑁂𑀣 𑀧𑁂𑀢𑀸𑀦𑀁, 𑀅𑀦𑀼𑀓𑀫𑁆𑀧𑀸𑀬 𑀧𑀼𑀦𑀧𑁆𑀧𑀼𑀦𑀁.

𑁩𑁯𑁨. 𑀲𑀸𑀢𑀼𑀦𑁆𑀦𑀯𑀲𑀦𑀸 [𑀲𑀸𑀳𑀼𑀦𑁆𑀦𑀯𑀸𑀲𑀺𑀦𑁄 (𑀲𑁆𑀬𑀸. 𑀧𑀻.), 𑀲𑀸𑀳𑀼𑀦𑁆𑀤𑀯𑀸𑀲𑀺𑀦𑁄 (𑀓.)] 𑀏𑀓𑁂, 𑀅𑀜𑁆𑀜𑁂 𑀓𑁂𑀲𑀦𑀺𑀯𑀸𑀲𑀦𑀸 [𑀓𑁂𑀲𑀦𑀺𑀯𑀸𑀲𑀺𑀦𑁄 (𑀲𑁆𑀬𑀸. 𑀓.)];

𑀧𑁂𑀢𑀸 𑀪𑀢𑁆𑀢𑀸𑀬 𑀕𑀘𑁆𑀙𑀦𑁆𑀢𑀺, 𑀧𑀓𑁆𑀓𑀫𑀦𑁆𑀢𑀺 𑀤𑀺𑀲𑁄𑀤𑀺𑀲𑀁.

𑁩𑁯𑁩. 𑀤𑀽𑀭𑁂 𑀏𑀓𑁂 [𑀤𑀽𑀭𑁂 𑀧𑁂𑀢𑀸 (𑀓.)] 𑀧𑀥𑀸𑀯𑀺𑀢𑁆𑀯𑀸, 𑀅𑀮𑀤𑁆𑀥𑀸𑀯 𑀦𑀺𑀯𑀢𑁆𑀢𑀭𑁂;

𑀙𑀸𑀢𑀸 𑀧𑀫𑀼𑀘𑁆𑀙𑀺𑀢𑀸 𑀪𑀦𑁆𑀢𑀸, 𑀪𑀽𑀫𑀺𑀬𑀁 𑀧𑀝𑀺𑀲𑀼𑀫𑁆𑀪𑀺𑀢𑀸.

𑁩𑁯𑁪. 𑀢𑁂 𑀘 [𑀓𑁂𑀘𑀺 (𑀲𑀻. 𑀲𑁆𑀬𑀸.)] 𑀢𑀢𑁆𑀣 𑀧𑀧𑀢𑀺𑀢𑀸 [𑀧𑀧𑀢𑀺𑀢𑁆𑀯𑀸 (𑀲𑀻.), 𑀘 𑀧𑀢𑀺𑀢𑀸 (𑀲𑁆𑀬𑀸.)], 𑀪𑀽𑀫𑀺𑀬𑀁 𑀧𑀝𑀺𑀲𑀼𑀫𑁆𑀪𑀺𑀢𑀸;

𑀧𑀼𑀩𑁆𑀩𑁂 𑀅𑀓𑀢𑀓𑀮𑁆𑀬𑀸𑀡𑀸, 𑀅𑀕𑁆𑀕𑀺𑀤𑀟𑁆𑀠𑀸𑀯 𑀆𑀢𑀧𑁂.

𑁩𑁯𑁫. ‘‘𑀫𑀬𑀁 𑀧𑀼𑀩𑁆𑀩𑁂 𑀧𑀸𑀧𑀥𑀫𑁆𑀫𑀸, 𑀖𑀭𑀡𑀻 𑀓𑀼𑀮𑀫𑀸𑀢𑀭𑁄;

𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀫𑁆𑀳 𑀅𑀢𑁆𑀢𑀦𑁄.

𑁩𑁯𑁬. ‘‘𑀧𑀳𑀽𑀢𑀁 𑀅𑀦𑁆𑀦𑀧𑀸𑀦𑀫𑁆𑀧𑀺, 𑀅𑀧𑀺𑀲𑁆𑀲𑀼 𑀅𑀯𑀓𑀺𑀭𑀻𑀬𑀢𑀺;

𑀲𑀫𑁆𑀫𑀕𑁆𑀕𑀢𑁂 𑀧𑀩𑁆𑀩𑀚𑀺𑀢𑁂, 𑀦 𑀘 𑀓𑀺𑀜𑁆𑀘𑀺 𑀅𑀤𑀫𑁆𑀳𑀲𑁂.

𑁩𑁯𑁭. ‘‘𑀅𑀓𑀫𑁆𑀫𑀓𑀸𑀫𑀸 𑀅𑀮𑀲𑀸, 𑀲𑀸𑀤𑀼𑀓𑀸𑀫𑀸 𑀫𑀳𑀕𑁆𑀖𑀲𑀸;

𑀆𑀮𑁄𑀧𑀧𑀺𑀡𑁆𑀟𑀤𑀸𑀢𑀸𑀭𑁄, 𑀧𑀝𑀺𑀕𑁆𑀕𑀳𑁂 𑀧𑀭𑀺𑀪𑀸𑀲𑀺𑀫𑁆𑀳𑀲𑁂 [𑀧𑀭𑀺𑀪𑀸𑀲𑀺𑀢𑀸 (𑀲𑁆𑀬𑀸. 𑀓.)].

𑁩𑁯𑁮. ‘‘𑀢𑁂 𑀖𑀭𑀸 𑀢𑀸 𑀘 𑀤𑀸𑀲𑀺𑀬𑁄, 𑀢𑀸𑀦𑁂𑀯𑀸𑀪𑀭𑀡𑀸𑀦𑀺 𑀦𑁄;

𑀢𑁂 𑀅𑀜𑁆𑀜𑁂 𑀧𑀭𑀺𑀘𑀸𑀭𑁂𑀦𑁆𑀢𑀺, 𑀫𑀬𑀁 𑀤𑀼𑀓𑁆𑀔𑀲𑁆𑀲 𑀪𑀸𑀕𑀺𑀦𑁄.

𑁩𑁯𑁯. ‘‘𑀯𑁂𑀡𑀻 𑀯𑀸 𑀅𑀯𑀜𑁆𑀜𑀸 𑀳𑁄𑀦𑁆𑀢𑀺, 𑀭𑀣𑀓𑀸𑀭𑀻 𑀘 𑀤𑀼𑀩𑁆𑀪𑀺𑀓𑀸;

𑀘𑀡𑁆𑀟𑀸𑀮𑀻 𑀓𑀧𑀡𑀸 𑀳𑁄𑀦𑁆𑀢𑀺, 𑀓𑀧𑁆𑀧𑀓𑀸 [𑀦𑁆𑀳𑀸𑀧𑀺𑀓𑀸 (𑀲𑀻.)] 𑀘 𑀧𑀼𑀦𑀧𑁆𑀧𑀼𑀦𑀁.

𑁪𑁦𑁦. ‘‘𑀬𑀸𑀦𑀺 𑀬𑀸𑀦𑀺 𑀦𑀺𑀳𑀻𑀦𑀸𑀦𑀺, 𑀓𑀼𑀮𑀸𑀦𑀺 𑀓𑀧𑀡𑀸𑀦𑀺 𑀘;

𑀢𑁂𑀲𑀼 𑀢𑁂𑀲𑁆𑀯𑁂𑀯 𑀚𑀸𑀬𑀦𑁆𑀢𑀺, 𑀏𑀲𑀸 𑀫𑀘𑁆𑀙𑀭𑀺𑀦𑁄 𑀕𑀢𑀺.

𑁪𑁦𑁧. ‘‘𑀧𑀼𑀩𑁆𑀩𑁂 𑀘 𑀓𑀢𑀓𑀮𑁆𑀬𑀸𑀡𑀸, 𑀤𑀸𑀬𑀓𑀸 𑀯𑀻𑀢𑀫𑀘𑁆𑀙𑀭𑀸;

𑀲𑀕𑁆𑀕𑀁 𑀢𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀑𑀪𑀸𑀲𑁂𑀦𑁆𑀢𑀺 𑀘 𑀦𑀦𑁆𑀤𑀦𑀁.

𑁪𑁦𑁨. ‘‘𑀯𑁂𑀚𑀬𑀦𑁆𑀢𑁂 𑀘 𑀧𑀸𑀲𑀸𑀤𑁂, 𑀭𑀫𑀺𑀢𑁆𑀯𑀸 𑀓𑀸𑀫𑀓𑀸𑀫𑀺𑀦𑁄;

𑀉𑀘𑁆𑀘𑀸𑀓𑀼𑀮𑁂𑀲𑀼 𑀚𑀸𑀬𑀦𑁆𑀢𑀺, 𑀲𑀪𑁄𑀕𑁂𑀲𑀼 𑀢𑀢𑁄 𑀘𑀼𑀢𑀸.

𑁪𑁦𑁩. ‘‘𑀓𑀽𑀝𑀸𑀕𑀸𑀭𑁂 𑀘 𑀧𑀸𑀲𑀸𑀤𑁂, 𑀧𑀮𑁆𑀮𑀗𑁆𑀓𑁂 𑀕𑁄𑀦𑀓𑀢𑁆𑀣𑀢𑁂;

𑀩𑀻𑀚𑀺𑀢𑀗𑁆𑀕𑀸 [𑀯𑀻𑀚𑀺𑀢𑀗𑁆𑀕𑀸 (𑀲𑀻. 𑀲𑁆𑀬𑀸.)] 𑀫𑁄𑀭𑀳𑀢𑁆𑀣𑁂𑀳𑀺, 𑀓𑀼𑀮𑁂 𑀚𑀸𑀢𑀸 𑀬𑀲𑀲𑁆𑀲𑀺𑀦𑁄.

𑁪𑁦𑁪. ‘‘𑀅𑀗𑁆𑀓𑀢𑁄 𑀅𑀗𑁆𑀓𑀁 𑀕𑀘𑁆𑀙𑀦𑁆𑀢𑀺, 𑀫𑀸𑀮𑀥𑀸𑀭𑀻 𑀅𑀮𑀗𑁆𑀓𑀢𑀸;

𑀥𑀸𑀢𑀺𑀬𑁄 𑀉𑀧𑀢𑀺𑀝𑁆𑀞𑀦𑁆𑀢𑀺, 𑀲𑀸𑀬𑀁 𑀧𑀸𑀢𑀁 𑀲𑀼𑀔𑁂𑀲𑀺𑀦𑁄.

𑁪𑁦𑁫. ‘‘𑀦𑀬𑀺𑀤𑀁 𑀅𑀓𑀢𑀧𑀼𑀜𑁆𑀜𑀸𑀦𑀁, 𑀓𑀢𑀧𑀼𑀜𑁆𑀜𑀸𑀦𑀫𑁂𑀯𑀺𑀤𑀁;

𑀅𑀲𑁄𑀓𑀁 𑀦𑀦𑁆𑀤𑀦𑀁 𑀭𑀫𑁆𑀫𑀁, 𑀢𑀺𑀤𑀲𑀸𑀦𑀁 𑀫𑀳𑀸𑀯𑀦𑀁.

𑁪𑁦𑁬. ‘‘𑀲𑀼𑀔𑀁 𑀅𑀓𑀢𑀧𑀼𑀜𑁆𑀜𑀸𑀦𑀁, 𑀇𑀥 𑀦𑀢𑁆𑀣𑀺 𑀧𑀭𑀢𑁆𑀣 𑀘;

𑀲𑀼𑀔𑀜𑁆𑀘 𑀓𑀢𑀧𑀼𑀜𑁆𑀜𑀸𑀦𑀁, 𑀇𑀥 𑀘𑁂𑀯 𑀧𑀭𑀢𑁆𑀣 𑀘.

𑁪𑁦𑁭. ‘‘𑀢𑁂𑀲𑀁 𑀲𑀳𑀩𑁆𑀬𑀓𑀸𑀫𑀸𑀦𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼𑀁;

𑀓𑀢𑀧𑀼𑀜𑁆𑀜𑀸 𑀳𑀺 𑀫𑁄𑀤𑀦𑁆𑀢𑀺, 𑀲𑀕𑁆𑀕𑁂 𑀪𑁄𑀕𑀲𑀫𑀗𑁆𑀕𑀺𑀦𑁄’’𑀢𑀺.

𑀅𑀪𑀺𑀚𑁆𑀚𑀫𑀸𑀦𑀧𑁂𑀢𑀯𑀢𑁆𑀣𑀼 𑀧𑀞𑀫𑀁.

𑁨. 𑀲𑀸𑀡𑀯𑀸𑀲𑀻𑀣𑁂𑀭𑀧𑁂𑀢𑀯𑀢𑁆𑀣𑀼

𑁪𑁦𑁮. 𑀓𑀼𑀡𑁆𑀟𑀺𑀦𑀸𑀕𑀭𑀺𑀬𑁄 𑀣𑁂𑀭𑁄, 𑀲𑀸𑀡𑀯𑀸𑀲𑀺 [𑀲𑀸𑀦𑀼𑀯𑀸𑀲𑀺 (𑀲𑀻.), 𑀲𑀸𑀦𑀯𑀸𑀲𑀺 (𑀲𑁆𑀬𑀸.)] 𑀦𑀺𑀯𑀸𑀲𑀺𑀓𑁄;

𑀧𑁄𑀝𑁆𑀞𑀧𑀸𑀤𑁄𑀢𑀺 𑀦𑀸𑀫𑁂𑀦, 𑀲𑀫𑀡𑁄 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄.

𑁪𑁦𑁯. 𑀢𑀲𑁆𑀲 𑀫𑀸𑀢𑀸 𑀧𑀺𑀢𑀸 𑀪𑀸𑀢𑀸, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸.

𑁪𑁧𑁦. 𑀢𑁂 𑀤𑀼𑀕𑁆𑀕𑀢𑀸 𑀲𑀽𑀘𑀺𑀓𑀝𑁆𑀝𑀸, 𑀓𑀺𑀮𑀦𑁆𑀢𑀸 𑀦𑀕𑁆𑀕𑀺𑀦𑁄 𑀓𑀺𑀲𑀸;

𑀉𑀢𑁆𑀢𑀲𑀦𑁆𑀢𑀸 [𑀑𑀢𑁆𑀢𑀧𑁆𑀧𑀦𑁆𑀢𑀸 (𑀲𑁆𑀬𑀸. 𑀓.)] 𑀫𑀳𑀢𑁆𑀢𑀸𑀲𑀸 [𑀫𑀳𑀸𑀢𑀸𑀲𑀸 (𑀲𑀻.)], 𑀦 𑀤𑀲𑁆𑀲𑁂𑀦𑁆𑀢𑀺 𑀓𑀼𑀭𑀽𑀭𑀺𑀦𑁄 [𑀓𑀼𑀭𑀼𑀤𑁆𑀤𑀺𑀦𑁄 (𑀓.)].

𑁪𑁧𑁧. 𑀢𑀲𑁆𑀲 𑀪𑀸𑀢𑀸 𑀯𑀺𑀢𑀭𑀺𑀢𑁆𑀯𑀸, 𑀦𑀕𑁆𑀕𑁄 𑀏𑀓𑀧𑀣𑁂𑀓𑀓𑁄;

𑀘𑀢𑀼𑀓𑀼𑀡𑁆𑀟𑀺𑀓𑁄 𑀪𑀯𑀺𑀢𑁆𑀯𑀸𑀦, 𑀣𑁂𑀭𑀲𑁆𑀲 𑀤𑀲𑁆𑀲𑀬𑀻𑀢𑀼𑀫𑀁.

𑁪𑁧𑁨. 𑀣𑁂𑀭𑁄 𑀘𑀸𑀫𑀦𑀲𑀺𑀓𑀢𑁆𑀯𑀸, 𑀢𑀼𑀡𑁆𑀳𑀻𑀪𑀽𑀢𑁄 𑀅𑀢𑀺𑀓𑁆𑀓𑀫𑀺;

𑀲𑁄 𑀘 𑀯𑀺𑀜𑁆𑀜𑀸𑀧𑀬𑀻 𑀣𑁂𑀭𑀁, ‘𑀪𑀸𑀢𑀸 𑀧𑁂𑀢𑀕𑀢𑁄 𑀅𑀳𑀁’.

𑁪𑁧𑁩. ‘‘𑀫𑀸𑀢𑀸 𑀧𑀺𑀢𑀸 𑀘 𑀢𑁂 𑀪𑀦𑁆𑀢𑁂, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸.

𑁪𑁧𑁪. ‘‘𑀢𑁂 𑀤𑀼𑀕𑁆𑀕𑀢𑀸 𑀲𑀽𑀘𑀺𑀓𑀝𑁆𑀝𑀸, 𑀓𑀺𑀮𑀦𑁆𑀢𑀸 𑀦𑀕𑁆𑀕𑀺𑀦𑁄 𑀓𑀺𑀲𑀸;

𑀉𑀢𑁆𑀢𑀲𑀦𑁆𑀢𑀸 𑀫𑀳𑀢𑁆𑀢𑀸𑀲𑀸, 𑀦 𑀤𑀲𑁆𑀲𑁂𑀦𑁆𑀢𑀺 𑀓𑀼𑀭𑀽𑀭𑀺𑀦𑁄.

𑁪𑁧𑁫. ‘‘𑀅𑀦𑀼𑀓𑀫𑁆𑀧𑀲𑁆𑀲𑀼 𑀓𑀸𑀭𑀼𑀡𑀺𑀓𑁄, 𑀤𑀢𑁆𑀯𑀸 𑀅𑀦𑁆𑀯𑀸𑀤𑀺𑀲𑀸𑀳𑀺 𑀦𑁄;

𑀢𑀯 𑀤𑀺𑀦𑁆𑀦𑁂𑀦 𑀤𑀸𑀦𑁂𑀦, 𑀬𑀸𑀧𑁂𑀲𑁆𑀲𑀦𑁆𑀢𑀺 𑀓𑀼𑀭𑀽𑀭𑀺𑀦𑁄’’𑀢𑀺.

𑁪𑁧𑁬. 𑀣𑁂𑀭𑁄 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀸𑀬, 𑀪𑀺𑀓𑁆𑀔𑀽 𑀅𑀜𑁆𑀜𑁂 𑀘 𑀤𑁆𑀯𑀸𑀤𑀲;

𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀁𑀲𑀼, 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀓𑀸𑀭𑀡𑀸.

𑁪𑁧𑁭. 𑀣𑁂𑀭𑁄 𑀲𑀩𑁆𑀩𑁂𑀯 𑀢𑁂 𑀆𑀳, ‘‘𑀬𑀣𑀸𑀮𑀤𑁆𑀥𑀁 𑀤𑀤𑀸𑀣 𑀫𑁂;

𑀲𑀗𑁆𑀖𑀪𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀦𑀼𑀓𑀫𑁆𑀧𑀸𑀬 𑀜𑀸𑀢𑀺𑀦𑀁’’.

𑁪𑁧𑁮. 𑀦𑀺𑀬𑁆𑀬𑀸𑀤𑀬𑀺𑀁𑀲𑀼 𑀣𑁂𑀭𑀲𑁆𑀲, 𑀣𑁂𑀭𑁄 𑀲𑀗𑁆𑀖𑀁 𑀦𑀺𑀫𑀦𑁆𑀢𑀬𑀺;

𑀤𑀢𑁆𑀯𑀸 𑀅𑀦𑁆𑀯𑀸𑀤𑀺𑀲𑀺 𑀣𑁂𑀭𑁄, 𑀫𑀸𑀢𑀼 𑀧𑀺𑀢𑀼 𑀘 𑀪𑀸𑀢𑀼𑀦𑁄;

‘‘𑀇𑀤𑀁 𑀫𑁂 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’’.

𑁪𑁧𑁯. 𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀪𑁄𑀚𑀦𑀁 𑀉𑀤𑀧𑀚𑁆𑀚𑀣;

𑀲𑀼𑀘𑀺𑀁 𑀧𑀡𑀻𑀢𑀁 𑀲𑀫𑁆𑀧𑀦𑁆𑀦𑀁, 𑀅𑀦𑁂𑀓𑀭𑀲𑀩𑁆𑀬𑀜𑁆𑀚𑀦𑀁.

𑁪𑁨𑁦. 𑀢𑀢𑁄 𑀉𑀤𑁆𑀤𑀲𑁆𑀲𑀬𑀻 [𑀉𑀤𑁆𑀤𑀺𑀲𑀬𑀻 (𑀲𑀻. 𑀓.), 𑀉𑀤𑁆𑀤𑀺𑀲𑁆𑀲𑀢𑀺 (𑀲𑁆𑀬𑀸. 𑀓.)] 𑀪𑀸𑀢𑀸, 𑀯𑀡𑁆𑀡𑀯𑀸 𑀩𑀮𑀯𑀸 𑀲𑀼𑀔𑀻;

‘‘𑀧𑀳𑀽𑀢𑀁 𑀪𑁄𑀚𑀦𑀁 𑀪𑀦𑁆𑀢𑁂, 𑀧𑀲𑁆𑀲 𑀦𑀕𑁆𑀕𑀸𑀫𑁆𑀳𑀲𑁂 𑀫𑀬𑀁;

𑀢𑀣𑀸 𑀪𑀦𑁆𑀢𑁂 𑀧𑀭𑀓𑁆𑀓𑀫, 𑀬𑀣𑀸 𑀯𑀢𑁆𑀣𑀁 𑀮𑀪𑀸𑀫𑀲𑁂’’𑀢𑀺.

𑁪𑁨𑁧. 𑀣𑁂𑀭𑁄 𑀲𑀗𑁆𑀓𑀸𑀭𑀓𑀽𑀝𑀫𑁆𑀳𑀸, 𑀉𑀘𑁆𑀘𑀺𑀦𑀺𑀢𑁆𑀯𑀸𑀦 𑀦𑀦𑁆𑀢𑀓𑁂;

𑀧𑀺𑀮𑁄𑀢𑀺𑀓𑀁 𑀧𑀝𑀁 𑀓𑀢𑁆𑀯𑀸, 𑀲𑀗𑁆𑀖𑁂 𑀘𑀸𑀢𑀼𑀤𑁆𑀤𑀺𑀲𑁂 𑀅𑀤𑀸.

𑁪𑁨𑁨. 𑀤𑀢𑁆𑀯𑀸 𑀅𑀦𑁆𑀯𑀸𑀤𑀺𑀲𑀻 𑀣𑁂𑀭𑁄, 𑀫𑀸𑀢𑀼 𑀧𑀺𑀢𑀼 𑀘 𑀪𑀸𑀢𑀼𑀦𑁄;

‘‘𑀇𑀤𑀁 𑀫𑁂 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’’.

𑁪𑁨𑁩. 𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀯𑀢𑁆𑀣𑀸𑀦𑀺 𑀉𑀤𑀧𑀚𑁆𑀚𑀺𑀲𑀼𑀁;

𑀢𑀢𑁄 𑀲𑀼𑀯𑀢𑁆𑀣𑀯𑀲𑀦𑁄, 𑀣𑁂𑀭𑀲𑁆𑀲 𑀤𑀲𑁆𑀲𑀬𑀻𑀢𑀼𑀫𑀁.

𑁪𑁨𑁪. ‘‘𑀬𑀸𑀯𑀢𑀸 𑀦𑀦𑁆𑀤𑀭𑀸𑀚𑀲𑁆𑀲, 𑀯𑀺𑀚𑀺𑀢𑀲𑁆𑀫𑀺𑀁 𑀧𑀝𑀺𑀘𑁆𑀙𑀤𑀸;

𑀢𑀢𑁄 𑀩𑀳𑀼𑀢𑀭𑀸 𑀪𑀦𑁆𑀢𑁂, 𑀯𑀢𑁆𑀣𑀸𑀦𑀘𑁆𑀙𑀸𑀤𑀦𑀸𑀦𑀺 𑀦𑁄.

𑁪𑁨𑁫. ‘‘𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀻𑀬𑀸𑀦𑀺, 𑀔𑁄𑀫 𑀓𑀧𑁆𑀧𑀸𑀲𑀺𑀓𑀸𑀦𑀺 𑀘;

𑀯𑀺𑀧𑀼𑀮𑀸 𑀘 𑀫𑀳𑀕𑁆𑀖𑀸 𑀘, 𑀢𑁂𑀧𑀸𑀓𑀸𑀲𑁂𑀯𑀮𑀫𑁆𑀩𑀭𑁂.

𑁪𑁨𑁬. ‘‘𑀢𑁂 𑀫𑀬𑀁 𑀧𑀭𑀺𑀤𑀳𑀸𑀫, 𑀬𑀁 𑀬𑀁 𑀳𑀺 𑀫𑀦𑀲𑁄 𑀧𑀺𑀬𑀁;

𑀢𑀣𑀸 𑀪𑀦𑁆𑀢𑁂 𑀧𑀭𑀓𑁆𑀓𑀫, 𑀬𑀣𑀸 𑀕𑁂𑀳𑀁 𑀮𑀪𑀸𑀫𑀲𑁂’’𑀢𑀺.

𑁪𑁨𑁭. 𑀣𑁂𑀭𑁄 𑀧𑀡𑁆𑀡𑀓𑀼𑀝𑀺𑀁 𑀓𑀢𑁆𑀯𑀸, 𑀲𑀗𑁆𑀖𑁂 𑀘𑀸𑀢𑀼𑀤𑁆𑀤𑀺𑀲𑁂 𑀅𑀤𑀸;

𑀤𑀢𑁆𑀯𑀸 𑀅𑀦𑁆𑀯𑀸𑀤𑀺𑀲𑀻 𑀣𑁂𑀭𑁄, 𑀫𑀸𑀢𑀼 𑀧𑀺𑀢𑀼 𑀘 𑀪𑀸𑀢𑀼𑀦𑁄;

‘‘𑀇𑀤𑀁 𑀫𑁂 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’’.

𑁪𑁨𑁮. 𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀖𑀭𑀸𑀦𑀺 𑀉𑀤𑀧𑀚𑁆𑀚𑀺𑀲𑀼𑀁;

𑀓𑀽𑀝𑀸𑀕𑀸𑀭𑀦𑀺𑀯𑁂𑀲𑀦𑀸, 𑀯𑀺𑀪𑀢𑁆𑀢𑀸 𑀪𑀸𑀕𑀲𑁄 𑀫𑀺𑀢𑀸.

𑁪𑁨𑁯. ‘‘𑀦 𑀫𑀦𑀼𑀲𑁆𑀲𑁂𑀲𑀼 𑀈𑀤𑀺𑀲𑀸, 𑀬𑀸𑀤𑀺𑀲𑀸 𑀦𑁄 𑀖𑀭𑀸 𑀇𑀥;

𑀅𑀧𑀺 𑀤𑀺𑀩𑁆𑀩𑁂𑀲𑀼 𑀬𑀸𑀤𑀺𑀲𑀸, 𑀢𑀸𑀤𑀺𑀲𑀸 𑀦𑁄 𑀖𑀭𑀸 𑀇𑀥.

𑁪𑁩𑁦. ‘‘𑀤𑀤𑁆𑀤𑀮𑁆𑀮𑀫𑀸𑀦𑀸 𑀆𑀪𑁂𑀦𑁆𑀢𑀺 [𑀆𑀪𑀦𑁆𑀢𑀺 (𑀓.)], 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸;

‘𑀢𑀣𑀸 𑀪𑀦𑁆𑀢𑁂 𑀧𑀭𑀓𑁆𑀓𑀫, 𑀬𑀣𑀸 𑀧𑀸𑀦𑀻𑀬𑀁 𑀮𑀪𑀸𑀫𑀲𑁂’’𑀢𑀺.

𑁪𑁩𑁧. 𑀣𑁂𑀭𑁄 𑀓𑀭𑀡𑀁 [𑀓𑀭𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑀽𑀭𑁂𑀢𑁆𑀯𑀸, 𑀲𑀗𑁆𑀖𑁂 𑀘𑀸𑀢𑀼𑀤𑁆𑀤𑀺𑀲𑁂 𑀅𑀤𑀸;

𑀤𑀢𑁆𑀯𑀸 𑀅𑀦𑁆𑀯𑀸𑀤𑀺𑀲𑀻 𑀣𑁂𑀭𑁄, 𑀫𑀸𑀢𑀼 𑀧𑀺𑀢𑀼 𑀘 𑀪𑀸𑀢𑀼𑀦𑁄;

‘‘𑀇𑀤𑀁 𑀫𑁂 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’.

𑁪𑁩𑁨. 𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀧𑀸𑀦𑀻𑀬𑀁 𑀉𑀤𑀧𑀚𑁆𑀚𑀣;

𑀕𑀫𑁆𑀪𑀻𑀭𑀸 𑀘𑀢𑀼𑀭𑀲𑁆𑀲𑀸 𑀘, 𑀧𑁄𑀓𑁆𑀔𑀭𑀜𑁆𑀜𑁄 𑀲𑀼𑀦𑀺𑀫𑁆𑀫𑀺𑀢𑀸.

𑁪𑁩𑁩. 𑀲𑀻𑀢𑁄𑀤𑀺𑀓𑀸 𑀲𑀼𑀧𑁆𑀧𑀢𑀺𑀢𑁆𑀣𑀸, 𑀲𑀻𑀢𑀸 𑀅𑀧𑁆𑀧𑀝𑀺𑀕𑀦𑁆𑀥𑀺𑀬𑀸;

𑀧𑀤𑀼𑀫𑀼𑀧𑁆𑀧𑀮𑀲𑀜𑁆𑀙𑀦𑁆𑀦𑀸, 𑀯𑀸𑀭𑀺𑀓𑀺𑀜𑁆𑀚𑀓𑁆𑀔𑀧𑀽𑀭𑀺𑀢𑀸.

𑁪𑁩𑁪. 𑀢𑀢𑁆𑀣 𑀦𑁆𑀳𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀣𑁂𑀭𑀲𑁆𑀲 𑀧𑀝𑀺𑀤𑀲𑁆𑀲𑀬𑀼𑀁;

‘‘𑀧𑀳𑀽𑀢𑀁 𑀧𑀸𑀦𑀻𑀬𑀁 𑀪𑀦𑁆𑀢𑁂, 𑀧𑀸𑀤𑀸 𑀤𑀼𑀓𑁆𑀔𑀸 𑀨𑀮𑀦𑁆𑀢𑀺 𑀦𑁄’’.

𑁪𑁩𑁫. ‘‘𑀆𑀳𑀺𑀡𑁆𑀟𑀫𑀸𑀦𑀸 𑀔𑀜𑁆𑀚𑀸𑀫, 𑀲𑀓𑁆𑀔𑀭𑁂 𑀓𑀼𑀲𑀓𑀡𑁆𑀝𑀓𑁂;

‘𑀢𑀣𑀸 𑀪𑀦𑁆𑀢𑁂 𑀧𑀭𑀓𑁆𑀓𑀫, 𑀬𑀣𑀸 𑀬𑀸𑀦𑀁 𑀮𑀪𑀸𑀫𑀲𑁂’’’𑀢𑀺.

𑁪𑁩𑁬. 𑀣𑁂𑀭𑁄 𑀲𑀺𑀧𑀸𑀝𑀺𑀓𑀁 𑀮𑀤𑁆𑀥𑀸, 𑀲𑀗𑁆𑀖𑁂 𑀘𑀸𑀢𑀼𑀤𑁆𑀤𑀺𑀲𑁂 𑀅𑀤𑀸;

𑀤𑀢𑁆𑀯𑀸 𑀅𑀦𑁆𑀯𑀸𑀤𑀺𑀲𑀻 𑀣𑁂𑀭𑁄, 𑀫𑀸𑀢𑀼 𑀧𑀺𑀢𑀼 𑀘 𑀪𑀸𑀢𑀼𑀦𑁄;

‘‘𑀇𑀤𑀁 𑀫𑁂 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’’.

𑁪𑁩𑁭. 𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀧𑁂𑀢𑀸 𑀭𑀣𑁂𑀦 𑀫𑀸𑀕𑀫𑀼𑀁;

‘‘𑀅𑀦𑀼𑀓𑀫𑁆𑀧𑀺𑀢𑀫𑁆𑀳 𑀪𑀤𑀦𑁆𑀢𑁂, 𑀪𑀢𑁆𑀢𑁂𑀦𑀘𑁆𑀙𑀸𑀤𑀦𑁂𑀦 𑀘.

𑁪𑁩𑁮. ‘‘𑀖𑀭𑁂𑀦 𑀧𑀸𑀦𑀻𑀬𑀤𑀸𑀦𑁂𑀦, 𑀬𑀸𑀦𑀤𑀸𑀦𑁂𑀦 𑀘𑀽𑀪𑀬𑀁;

𑀫𑀼𑀦𑀺𑀁 𑀓𑀸𑀭𑀼𑀡𑀺𑀓𑀁 𑀮𑁄𑀓𑁂, 𑀪𑀦𑁆𑀢𑁂 𑀯𑀦𑁆𑀤𑀺𑀢𑀼𑀫𑀸𑀕𑀢𑀸’’𑀢𑀺.

𑀲𑀸𑀡𑀯𑀸𑀲𑀻𑀣𑁂𑀭𑀧𑁂𑀢𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀭𑀣𑀓𑀸𑀭𑀧𑁂𑀢𑀺𑀯𑀢𑁆𑀣𑀼

𑁪𑁩𑁯. ‘‘𑀯𑁂𑀴𑀼𑀭𑀺𑀬𑀣𑀫𑁆𑀪𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀁, 𑀯𑀺𑀫𑀸𑀦𑀫𑀸𑀭𑀼𑀬𑁆𑀳 𑀅𑀦𑁂𑀓𑀘𑀺𑀢𑁆𑀢𑀁;

𑀢𑀢𑁆𑀣𑀘𑁆𑀙𑀲𑀺 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀧𑀣𑀤𑁆𑀥𑀦𑀺 [𑀲𑀫𑀦𑁆𑀢𑀢𑁄 (𑀓.)] 𑀧𑀦𑁆𑀦𑀭𑀲𑁂𑀯 𑀘𑀦𑁆𑀤𑁄.

𑁪𑁪𑁦. ‘‘𑀯𑀡𑁆𑀡𑁄 𑀘 𑀢𑁂 𑀓𑀦𑀓𑀲𑁆𑀲 𑀲𑀦𑁆𑀦𑀺𑀪𑁄, 𑀉𑀢𑁆𑀢𑀢𑁆𑀢𑀭𑀽𑀧𑁄 𑀪𑀼𑀲 𑀤𑀲𑁆𑀲𑀦𑁂𑀬𑁆𑀬𑁄;

𑀧𑀮𑁆𑀮𑀗𑁆𑀓𑀲𑁂𑀝𑁆𑀞𑁂 𑀅𑀢𑀼𑀮𑁂 𑀦𑀺𑀲𑀺𑀦𑁆𑀦𑀸, 𑀏𑀓𑀸 𑀢𑀼𑀯𑀁 𑀦𑀢𑁆𑀣𑀺 𑀘 𑀢𑀼𑀬𑁆𑀳 𑀲𑀸𑀫𑀺𑀓𑁄.

𑁪𑁪𑁧. ‘‘𑀇𑀫𑀸 𑀘 𑀢𑁂 𑀧𑁄𑀓𑁆𑀔𑀭𑀡𑀻 𑀲𑀫𑀦𑁆𑀢𑀸, 𑀧𑀳𑀽𑀢𑀫𑀮𑁆𑀬𑀸 [𑀧𑀳𑀽𑀢𑀫𑀸𑀮𑀸 (𑀲𑀻. 𑀲𑁆𑀬𑀸.)] 𑀩𑀳𑀼𑀧𑀼𑀡𑁆𑀟𑀭𑀻𑀓𑀸;

𑀲𑀼𑀯𑀡𑁆𑀡𑀘𑀼𑀡𑁆𑀡𑁂𑀳𑀺 𑀲𑀫𑀦𑁆𑀢𑀫𑁄𑀢𑁆𑀣𑀢𑀸, 𑀦 𑀢𑀢𑁆𑀣 𑀧𑀗𑁆𑀓𑁄 𑀧𑀡𑀓𑁄 𑀘 𑀯𑀺𑀚𑁆𑀚𑀢𑀺.

𑁪𑁪𑁨. ‘‘𑀳𑀁𑀲𑀸 𑀘𑀺𑀫𑁂 𑀤𑀲𑁆𑀲𑀦𑀻𑀬𑀸 𑀫𑀦𑁄𑀭𑀫𑀸, 𑀉𑀤𑀓𑀲𑁆𑀫𑀺𑀫𑀦𑀼𑀧𑀭𑀺𑀬𑀦𑁆𑀢𑀺 𑀲𑀩𑁆𑀩𑀤𑀸;

𑀲𑀫𑀬𑁆𑀬 𑀯𑀕𑁆𑀕𑀽𑀧𑀦𑀤𑀦𑁆𑀢𑀺 𑀲𑀩𑁆𑀩𑁂, 𑀩𑀺𑀦𑁆𑀤𑀼𑀲𑁆𑀲𑀭𑀸 𑀤𑀼𑀦𑁆𑀤𑀼𑀪𑀻𑀦𑀁𑀯 𑀖𑁄𑀲𑁄.

𑁪𑁪𑁩. ‘‘𑀤𑀤𑁆𑀤𑀮𑁆𑀮𑀫𑀸𑀦𑀸 𑀬𑀲𑀲𑀸 𑀬𑀲𑀲𑁆𑀲𑀺𑀦𑀻, 𑀦𑀸𑀯𑀸𑀬 𑀘 𑀢𑁆𑀯𑀁 𑀅𑀯𑀮𑀫𑁆𑀩 𑀢𑀺𑀝𑁆𑀞𑀲𑀺;

𑀆𑀴𑀸𑀭𑀧𑀫𑁆𑀳𑁂 𑀳𑀲𑀺𑀢𑁂 𑀧𑀺𑀬𑀁𑀯𑀤𑁂, 𑀲𑀩𑁆𑀩𑀗𑁆𑀕𑀓𑀮𑁆𑀬𑀸𑀡𑀺 𑀪𑀼𑀲𑀁 𑀯𑀺𑀭𑁄𑀘𑀲𑀺.

𑁪𑁪𑁪. ‘‘𑀇𑀤𑀁 𑀯𑀺𑀫𑀸𑀦𑀁 𑀯𑀺𑀭𑀚𑀁 𑀲𑀫𑁂 𑀞𑀺𑀢𑀁, 𑀉𑀬𑁆𑀬𑀸𑀦𑀯𑀦𑁆𑀢𑀁 [𑀉𑀬𑁆𑀬𑀸𑀦𑀯𑀦𑀁 (𑀓.)] 𑀭𑀢𑀺𑀦𑀦𑁆𑀤𑀺𑀯𑀟𑁆𑀠𑀦𑀁;

𑀇𑀘𑁆𑀙𑀸𑀫𑀳𑀁 𑀦𑀸𑀭𑀺 𑀅𑀦𑁄𑀫𑀤𑀲𑁆𑀲𑀦𑁂, 𑀢𑀬𑀸 𑀲𑀳 𑀦𑀦𑁆𑀤𑀦𑁂 𑀇𑀥 𑀫𑁄𑀤𑀺𑀢𑀼’’𑀦𑁆𑀢𑀺.

𑁪𑁪𑁫. ‘‘𑀓𑀭𑁄𑀳𑀺 𑀓𑀫𑁆𑀫𑀁 𑀇𑀥 𑀯𑁂𑀤𑀦𑀻𑀬𑀁, 𑀘𑀺𑀢𑁆𑀢𑀜𑁆𑀘 𑀢𑁂 𑀇𑀥 𑀦𑀺𑀳𑀺𑀢𑀁 𑀪𑀯𑀢𑀼 [𑀦𑀢𑀜𑁆𑀘 𑀳𑁄𑀢𑀼 (𑀓.), 𑀦𑀺𑀢𑀜𑁆𑀘 𑀳𑁄𑀢𑀼 (𑀲𑁆𑀬𑀸.)];

𑀓𑀢𑁆𑀯𑀸𑀦 𑀓𑀫𑁆𑀫𑀁 𑀇𑀥 𑀯𑁂𑀤𑀦𑀻𑀬𑀁, 𑀏𑀯𑀁 𑀫𑀫𑀁 𑀮𑀘𑁆𑀙𑀲𑀺 𑀓𑀸𑀫𑀓𑀸𑀫𑀺𑀦𑀺’’𑀦𑁆𑀢𑀺.

𑁪𑁪𑁬. ‘‘𑀲𑀸𑀥𑀽’’𑀢𑀺 𑀲𑁄 𑀢𑀲𑁆𑀲𑀸 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸, 𑀅𑀓𑀸𑀲𑀺 𑀓𑀫𑁆𑀫𑀁 𑀢𑀳𑀺𑀁 𑀯𑁂𑀤𑀦𑀻𑀬𑀁;

𑀓𑀢𑁆𑀯𑀸𑀦 𑀓𑀫𑁆𑀫𑀁 𑀢𑀳𑀺𑀁 𑀯𑁂𑀤𑀦𑀻𑀬𑀁, 𑀉𑀧𑀧𑀚𑁆𑀚𑀺 𑀲𑁄 𑀫𑀸𑀡𑀯𑁄 𑀢𑀲𑁆𑀲𑀸 𑀲𑀳𑀩𑁆𑀬𑀢𑀦𑁆𑀢𑀺.

𑀭𑀣𑀓𑀸𑀭𑀧𑁂𑀢𑀺𑀯𑀢𑁆𑀣𑀼 𑀢𑀢𑀺𑀬𑀁.

𑀪𑀸𑀡𑀯𑀸𑀭𑀁 𑀤𑀼𑀢𑀺𑀬𑀁 𑀦𑀺𑀝𑁆𑀞𑀺𑀢𑀁.

𑁪. 𑀪𑀼𑀲𑀧𑁂𑀢𑀯𑀢𑁆𑀣𑀼

𑁪𑁪𑁭. ‘‘𑀪𑀼𑀲𑀸𑀦𑀺 𑀏𑀓𑁄 𑀲𑀸𑀮𑀺𑀁 𑀧𑀼𑀦𑀸𑀧𑀭𑁄, 𑀅𑀬𑀜𑁆𑀘 𑀦𑀸𑀭𑀻 𑀲𑀓𑀫𑀁𑀲𑀮𑁄𑀳𑀺𑀢𑀁;

𑀢𑀼𑀯𑀜𑁆𑀘 𑀕𑀽𑀣𑀁 𑀅𑀲𑀼𑀘𑀺𑀁 𑀅𑀓𑀦𑁆𑀢𑀁 [𑀅𑀓𑀦𑁆𑀢𑀺𑀓𑀁 (𑀲𑀻. 𑀧𑀻.)], 𑀧𑀭𑀺𑀪𑀼𑀜𑁆𑀚𑀲𑀺 𑀓𑀺𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄’’𑀢𑀺.

𑁪𑁪𑁮. ‘‘𑀅𑀬𑀁 𑀧𑀼𑀭𑁂 𑀫𑀸𑀢𑀭𑀁 𑀳𑀺𑀁𑀲𑀢𑀺, 𑀅𑀬𑀁 𑀧𑀦 𑀓𑀽𑀝𑀯𑀸𑀡𑀺𑀚𑁄;

𑀅𑀬𑀁 𑀫𑀁𑀲𑀸𑀦𑀺 𑀔𑀸𑀤𑀺𑀢𑁆𑀯𑀸, 𑀫𑀼𑀲𑀸𑀯𑀸𑀤𑁂𑀦 𑀯𑀜𑁆𑀘𑁂𑀢𑀺.

𑁪𑁪𑁯. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀅𑀕𑀸𑀭𑀺𑀦𑀻 𑀲𑀩𑁆𑀩𑀓𑀼𑀮𑀲𑁆𑀲 𑀇𑀲𑁆𑀲𑀭𑀸;

𑀲𑀦𑁆𑀢𑁂𑀲𑀼 𑀧𑀭𑀺𑀕𑀼𑀳𑀸𑀫𑀺, 𑀫𑀸 𑀘 𑀓𑀺𑀜𑁆𑀘𑀺 𑀇𑀢𑁄 𑀅𑀤𑀁.

𑁪𑁫𑁦. ‘‘𑀫𑀼𑀲𑀸𑀯𑀸𑀤𑁂𑀦 𑀙𑀸𑀤𑁂𑀫𑀺, ‘𑀦𑀢𑁆𑀣𑀺 𑀏𑀢𑀁 𑀫𑀫 𑀕𑁂𑀳𑁂;

𑀲𑀘𑁂 𑀲𑀦𑁆𑀢𑀁 𑀦𑀺𑀕𑀼𑀳𑀸𑀫𑀺, 𑀕𑀽𑀣𑁄 𑀫𑁂 𑀳𑁄𑀢𑀼 𑀪𑁄𑀚𑀦𑀁’.

𑁪𑁫𑁧. ‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦, 𑀫𑀼𑀲𑀸𑀯𑀸𑀤𑀲𑁆𑀲 𑀘𑀽𑀪𑀬𑀁;

𑀲𑀼𑀕𑀦𑁆𑀥𑀁 𑀲𑀸𑀮𑀺𑀦𑁄 𑀪𑀢𑁆𑀢𑀁, 𑀕𑀽𑀣𑀁 𑀫𑁂 𑀧𑀭𑀺𑀯𑀢𑁆𑀢𑀢𑀺.

𑁪𑁫𑁨. ‘‘𑀅𑀯𑀜𑁆𑀛𑀸𑀦𑀺 𑀘 𑀓𑀫𑁆𑀫𑀸𑀦𑀺, 𑀦 𑀳𑀺 𑀓𑀫𑁆𑀫𑀁 𑀯𑀺𑀦𑀲𑁆𑀲𑀢𑀺;

𑀤𑀼𑀕𑁆𑀕𑀦𑁆𑀥𑀁 𑀓𑀺𑀫𑀺𑀦𑀁 [𑀓𑀺𑀫𑀺𑀚𑀁 (𑀲𑀻.)] 𑀫𑀻𑀴𑀁, 𑀪𑀼𑀜𑁆𑀚𑀸𑀫𑀺 𑀘 𑀧𑀺𑀯𑀸𑀫𑀺 𑀘𑀸’’𑀢𑀺.

𑀪𑀼𑀲𑀧𑁂𑀢𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀓𑀼𑀫𑀸𑀭𑀧𑁂𑀢𑀯𑀢𑁆𑀣𑀼