𑁧𑁦. 𑀥𑀸𑀢𑀼𑀯𑀺𑀯𑀡𑁆𑀡𑀧𑁂𑀢𑀯𑀢𑁆𑀣𑀼

𑁫𑁦𑁭. ‘‘𑀅𑀦𑁆𑀢𑀮𑀺𑀓𑁆𑀔𑀲𑁆𑀫𑀺𑀁 𑀢𑀺𑀝𑁆𑀞𑀦𑁆𑀢𑁄, 𑀤𑀼𑀕𑁆𑀕𑀦𑁆𑀥𑁄 𑀧𑀽𑀢𑀺 𑀯𑀸𑀬𑀲𑀺;

𑀫𑀼𑀔𑀜𑁆𑀘 𑀢𑁂 𑀓𑀺𑀫𑀬𑁄 𑀧𑀽𑀢𑀺𑀕𑀦𑁆𑀥𑀁, 𑀔𑀸𑀤𑀦𑁆𑀢𑀺 𑀓𑀺𑀁 𑀓𑀫𑁆𑀫𑀫𑀓𑀸𑀲𑀺 𑀧𑀼𑀩𑁆𑀩𑁂.

𑁫𑁦𑁮. ‘‘𑀢𑀢𑁄 𑀲𑀢𑁆𑀣𑀁 𑀕𑀳𑁂𑀢𑁆𑀯𑀸𑀦, 𑀑𑀓𑁆𑀓𑀦𑁆𑀢𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁;

𑀔𑀸𑀭𑁂𑀦 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸, 𑀑𑀓𑁆𑀓𑀦𑁆𑀢𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁.

𑁫𑁦𑁯. ‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀤𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀻’’𑀢𑀺.

𑁫𑁧𑁦. ‘‘𑀅𑀳𑀁 𑀭𑀸𑀚𑀕𑀳𑁂 𑀭𑀫𑁆𑀫𑁂, 𑀭𑀫𑀡𑀻𑀬𑁂 𑀕𑀺𑀭𑀺𑀩𑁆𑀩𑀚𑁂;

𑀇𑀲𑁆𑀲𑀭𑁄 𑀥𑀦𑀥𑀜𑁆𑀜𑀲𑁆𑀲, 𑀲𑀼𑀧𑀳𑀽𑀢𑀲𑁆𑀲 𑀫𑀸𑀭𑀺𑀲.

𑁫𑁧𑁧. ‘‘𑀢𑀲𑁆𑀲𑀸𑀬𑀁 𑀫𑁂 𑀪𑀭𑀺𑀬𑀸 𑀘, 𑀥𑀻𑀢𑀸 𑀘 𑀲𑀼𑀡𑀺𑀲𑀸 𑀘 𑀫𑁂;

𑀢𑀸 𑀫𑀸𑀮𑀁 𑀉𑀧𑁆𑀧𑀮𑀜𑁆𑀘𑀸𑀧𑀺, 𑀧𑀘𑁆𑀘𑀕𑁆𑀖𑀜𑁆𑀘 𑀯𑀺𑀮𑁂𑀧𑀦𑀁;

𑀣𑀽𑀧𑀁 𑀳𑀭𑀦𑁆𑀢𑀺𑀬𑁄 𑀯𑀸𑀭𑁂𑀲𑀺𑀁, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸.

𑁫𑁧𑁨. ‘‘𑀙𑀴𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀫𑀬𑀁 𑀧𑀘𑁆𑀘𑀢𑁆𑀢𑀯𑁂𑀤𑀦𑀸;

𑀣𑀽𑀧𑀧𑀽𑀚𑀁 𑀯𑀺𑀯𑀡𑁆𑀡𑁂𑀢𑁆𑀯𑀸, 𑀧𑀘𑁆𑀘𑀸𑀫 𑀦𑀺𑀭𑀬𑁂 𑀪𑀼𑀲𑀁.

𑁫𑁧𑁩. ‘‘𑀬𑁂 𑀘 𑀔𑁄 𑀣𑀽𑀧𑀧𑀽𑀚𑀸𑀬, 𑀯𑀢𑁆𑀢𑀦𑁆𑀢𑁂 𑀅𑀭𑀳𑀢𑁄 𑀫𑀳𑁂;

𑀆𑀤𑀻𑀦𑀯𑀁 𑀧𑀓𑀸𑀲𑁂𑀦𑁆𑀢𑀺, 𑀯𑀺𑀯𑁂𑀘𑀬𑁂𑀣 [𑀯𑀺𑀯𑁂𑀘𑀬𑀣 (𑀲𑀻.)] 𑀦𑁂 𑀢𑀢𑁄.

𑁫𑁧𑁪. ‘‘𑀇𑀫𑀸 𑀘 𑀧𑀲𑁆𑀲 𑀆𑀬𑀦𑁆𑀢𑀺𑀬𑁄, 𑀫𑀸𑀮𑀥𑀸𑀭𑀻 𑀅𑀮𑀗𑁆𑀓𑀢𑀸;

𑀫𑀸𑀮𑀸𑀯𑀺𑀧𑀸𑀓𑀁𑀦𑀼𑀪𑁄𑀦𑁆𑀢𑀺𑀬𑁄 [𑀅𑀦𑀼𑀪𑀯𑀦𑁆𑀢𑀺 (𑀲𑀻. 𑀧𑀻.)], 𑀲𑀫𑀺𑀤𑁆𑀥𑀸 𑀘 𑀢𑀸 [𑀲𑀫𑀺𑀤𑁆𑀥𑀸 𑀢𑀸 (𑀲𑀻. 𑀲𑁆𑀬𑀸.)] 𑀬𑀲𑀲𑁆𑀲𑀺𑀦𑀺𑀬𑁄.

𑁫𑁧𑁫. ‘‘𑀢𑀜𑁆𑀘 𑀤𑀺𑀲𑁆𑀯𑀸𑀦 𑀅𑀘𑁆𑀙𑁂𑀭𑀁, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁;

𑀦𑀫𑁄 𑀓𑀭𑁄𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀯𑀦𑁆𑀤𑀦𑁆𑀢𑀺 𑀢𑀁 𑀫𑀳𑀸𑀫𑀼𑀦𑀺𑀁.

𑁫𑁧𑁬. ‘‘𑀲𑁄𑀳𑀁 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑁄𑀦𑀺𑀁 𑀮𑀤𑁆𑀥𑀸𑀦 𑀫𑀸𑀦𑀼𑀲𑀺𑀁;

𑀣𑀽𑀧𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀧𑁆𑀧𑀫𑀢𑁆𑀢𑁄 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺.

𑀥𑀸𑀢𑀼𑀯𑀺𑀯𑀡𑁆𑀡𑀧𑁂𑀢𑀯𑀢𑁆𑀣𑀼 𑀤𑀲𑀫𑀁.

𑀘𑀽𑀴𑀯𑀕𑁆𑀕𑁄 𑀢𑀢𑀺𑀬𑁄 𑀦𑀺𑀝𑁆𑀞𑀺𑀢𑁄.