𑁩. 𑀫𑀢𑁆𑀢𑀸𑀧𑁂𑀢𑀺𑀯𑀢𑁆𑀣𑀼

𑁧𑁩𑁪. ‘‘𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀺, 𑀓𑀺𑀲𑀸 𑀥𑀫𑀦𑀺𑀲𑀦𑁆𑀣𑀢𑀸;

𑀉𑀧𑁆𑀨𑀸𑀲𑀼𑀮𑀺𑀓𑁂 𑀓𑀺𑀲𑀺𑀓𑁂, 𑀓𑀸 𑀦𑀼 𑀢𑁆𑀯𑀁 𑀇𑀥 𑀢𑀺𑀝𑁆𑀞𑀲𑀻’’𑀢𑀺.

𑁧𑁩𑁫. ‘‘𑀅𑀳𑀁 𑀫𑀢𑁆𑀢𑀸 𑀢𑀼𑀯𑀁 𑀢𑀺𑀲𑁆𑀲𑀸, 𑀲𑀧𑀢𑁆𑀢𑀻 𑀢𑁂 𑀧𑀼𑀭𑁂 𑀅𑀳𑀼𑀁;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺.

𑁧𑁩𑁬. ‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺.

𑁧𑁩𑁭. ‘‘𑀘𑀡𑁆𑀟𑀻 𑀘 𑀨𑀭𑀼𑀲𑀸 𑀘𑀸𑀲𑀺𑀁, 𑀇𑀲𑁆𑀲𑀼𑀓𑀻 𑀫𑀘𑁆𑀙𑀭𑀻 𑀲𑀞𑀸 [𑀲𑀞𑀻 (𑀲𑀻.)];

𑀢𑀸𑀳𑀁 𑀤𑀼𑀭𑀼𑀢𑁆𑀢𑀁 𑀯𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺.

𑁧𑁩𑁮. 𑀲𑀩𑁆𑀩𑀁 [𑀲𑀘𑁆𑀘𑀁 (𑀓.)] 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀬𑀣𑀸 𑀢𑁆𑀯𑀁 𑀘𑀡𑁆𑀟𑀺𑀓𑀸 𑀅𑀳𑀼;

𑀅𑀜𑁆𑀜𑀜𑁆𑀘 𑀔𑁄 𑀢𑀁 𑀧𑀼𑀘𑁆𑀙𑀸𑀫𑀺, 𑀓𑁂𑀦𑀸𑀲𑀺 𑀧𑀁𑀲𑀼𑀓𑀼𑀦𑁆𑀣𑀺𑀢𑀸’’𑀢𑀺.

𑁧𑁩𑁯. ‘‘𑀲𑀻𑀲𑀁𑀦𑁆𑀳𑀸𑀢𑀸 𑀢𑀼𑀯𑀁 𑀆𑀲𑀺, 𑀲𑀼𑀘𑀺𑀯𑀢𑁆𑀣𑀸 𑀅𑀮𑀗𑁆𑀓𑀢𑀸;

𑀅𑀳𑀜𑁆𑀘 𑀔𑁄 [𑀔𑁄 𑀢𑀁 (𑀲𑀻. 𑀓.)] 𑀅𑀥𑀺𑀫𑀢𑁆𑀢𑀁, 𑀲𑀫𑀮𑀗𑁆𑀓𑀢𑀢𑀭𑀸 𑀢𑀬𑀸.

𑁧𑁪𑁦. ‘‘𑀢𑀲𑁆𑀲𑀸 𑀫𑁂 𑀧𑁂𑀓𑁆𑀔𑀫𑀸𑀦𑀸𑀬, 𑀲𑀸𑀫𑀺𑀓𑁂𑀦 𑀲𑀫𑀦𑁆𑀢𑀬𑀺;

𑀢𑀢𑁄 𑀫𑁂 𑀇𑀲𑁆𑀲𑀸 𑀯𑀺𑀧𑀼𑀮𑀸, 𑀓𑁄𑀥𑁄 𑀫𑁂 𑀲𑀫𑀚𑀸𑀬𑀣.

𑁧𑁪𑁧. ‘‘𑀢𑀢𑁄 𑀧𑀁𑀲𑀼𑀁 𑀕𑀳𑁂𑀢𑁆𑀯𑀸𑀦, 𑀧𑀁𑀲𑀼𑀦𑀸 𑀢𑀁 𑀳𑀺 𑀑𑀓𑀺𑀭𑀺𑀁 [𑀢𑀁 𑀯𑀺𑀓𑀻𑀭𑀺𑀳𑀁 (𑀲𑁆𑀬𑀸. 𑀓.)];

𑀢𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀦𑀫𑁆𑀳𑀺 𑀧𑀁𑀲𑀼𑀓𑀼𑀦𑁆𑀣𑀺𑀢𑀸’’𑀢𑀺.

𑁧𑁪𑁨. ‘‘𑀲𑀘𑁆𑀘𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀧𑀁𑀲𑀼𑀦𑀸 𑀫𑀁 𑀢𑁆𑀯𑀫𑁄𑀓𑀺𑀭𑀺;

𑀅𑀜𑁆𑀜𑀜𑁆𑀘 𑀔𑁄 𑀢𑀁 𑀧𑀼𑀘𑁆𑀙𑀸𑀫𑀺, 𑀓𑁂𑀦 𑀔𑀚𑁆𑀚𑀲𑀺 𑀓𑀘𑁆𑀙𑀼𑀬𑀸’’𑀢𑀺.

𑁧𑁪𑁩. ‘‘𑀪𑁂𑀲𑀚𑁆𑀚𑀳𑀸𑀭𑀻 𑀉𑀪𑀬𑁄, 𑀯𑀦𑀦𑁆𑀢𑀁 𑀅𑀕𑀫𑀺𑀫𑁆𑀳𑀲𑁂;

𑀢𑁆𑀯𑀜𑁆𑀘 𑀪𑁂𑀲𑀚𑁆𑀚𑀫𑀸𑀳𑀭𑀺, 𑀅𑀳𑀜𑁆𑀘 𑀓𑀧𑀺𑀓𑀘𑁆𑀙𑀼𑀦𑁄.

𑁧𑁪𑁪. ‘‘𑀢𑀲𑁆𑀲𑀸 𑀢𑁆𑀬𑀸𑀚𑀸𑀦𑀫𑀸𑀦𑀸𑀬, 𑀲𑁂𑀬𑁆𑀬𑀁 𑀢𑁆𑀬𑀸𑀳𑀁 𑀲𑀫𑁄𑀓𑀺𑀭𑀺𑀁;

𑀢𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀦 𑀔𑀚𑁆𑀚𑀸𑀫𑀺 𑀓𑀘𑁆𑀙𑀼𑀬𑀸’’𑀢𑀺.

𑁧𑁪𑁫. ‘‘𑀲𑀘𑁆𑀘𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀲𑁂𑀬𑁆𑀬𑀁 𑀫𑁂 𑀢𑁆𑀯𑀁 𑀲𑀫𑁄𑀓𑀺𑀭𑀺;

𑀅𑀜𑁆𑀜𑀜𑁆𑀘 𑀔𑁄 𑀢𑀁 𑀧𑀼𑀘𑁆𑀙𑀸𑀫𑀺, 𑀓𑁂𑀦𑀸𑀲𑀺 𑀦𑀕𑁆𑀕𑀺𑀬𑀸 𑀢𑀼𑀯’’𑀦𑁆𑀢𑀺.

𑁧𑁪𑁬. ‘‘𑀲𑀳𑀸𑀬𑀸𑀦𑀁 𑀲𑀫𑀬𑁄 𑀆𑀲𑀺, 𑀜𑀸𑀢𑀻𑀦𑀁 𑀲𑀫𑀺𑀢𑀻 𑀅𑀳𑀼;

𑀢𑁆𑀯𑀜𑁆𑀘 𑀆𑀫𑀦𑁆𑀢𑀺𑀢𑀸 𑀆𑀲𑀺, 𑀲𑀲𑀸𑀫𑀺𑀦𑀻 𑀦𑁄 𑀘 𑀔𑁄 𑀅𑀳𑀁.

𑁧𑁪𑁭. ‘‘𑀢𑀲𑁆𑀲𑀸 𑀢𑁆𑀬𑀸𑀚𑀸𑀦𑀫𑀸𑀦𑀸𑀬, 𑀤𑀼𑀲𑁆𑀲𑀁 𑀢𑁆𑀬𑀸𑀳𑀁 𑀅𑀧𑀸𑀦𑀼𑀤𑀺𑀁;

𑀢𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀦𑀫𑁆𑀳𑀺 𑀦𑀕𑁆𑀕𑀺𑀬𑀸 𑀅𑀳’’𑀦𑁆𑀢𑀺.

𑁧𑁪𑁮. ‘‘𑀲𑀘𑁆𑀘𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀤𑀼𑀲𑁆𑀲𑀁 𑀫𑁂 𑀢𑁆𑀯𑀁 𑀅𑀧𑀸𑀦𑀼𑀤𑀺;

𑀅𑀜𑁆𑀜𑀜𑁆𑀘 𑀔𑁄 𑀢𑀁 𑀧𑀼𑀘𑁆𑀙𑀸𑀫𑀺, 𑀓𑁂𑀦𑀸𑀲𑀺 𑀕𑀽𑀣𑀕𑀦𑁆𑀥𑀺𑀦𑀻’’𑀢𑀺.

𑁧𑁪𑁯. ‘‘𑀢𑀯 𑀕𑀦𑁆𑀥𑀜𑁆𑀘 𑀫𑀸𑀮𑀜𑁆𑀘, 𑀧𑀘𑁆𑀘𑀕𑁆𑀖𑀜𑁆𑀘 𑀯𑀺𑀮𑁂𑀧𑀦𑀁;

𑀕𑀽𑀣𑀓𑀽𑀧𑁂 𑀅𑀥𑀸𑀭𑁂𑀲𑀺𑀁 [𑀅𑀥𑀸𑀭𑁂𑀲𑀺𑀁 (𑀓.)], 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀢𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀦𑀫𑁆𑀳𑀺 𑀕𑀽𑀣𑀕𑀦𑁆𑀥𑀺𑀦𑀻’’𑀢𑀺.

𑁧𑁫𑁦. ‘‘𑀲𑀘𑁆𑀘𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀢𑀁 𑀧𑀸𑀧𑀁 𑀧𑀓𑀢𑀁 𑀢𑀬𑀸;

𑀅𑀜𑁆𑀜𑀜𑁆𑀘 𑀔𑁄 𑀢𑀁 𑀧𑀼𑀘𑁆𑀙𑀸𑀫𑀺, 𑀓𑁂𑀦𑀸𑀲𑀺 𑀤𑀼𑀕𑁆𑀕𑀢𑀸 𑀢𑀼𑀯’’𑀦𑁆𑀢𑀺.

𑁧𑁫𑁧. ‘‘𑀉𑀪𑀺𑀦𑁆𑀦𑀁 𑀲𑀫𑀓𑀁 𑀆𑀲𑀺, 𑀬𑀁 𑀕𑁂𑀳𑁂 𑀯𑀺𑀚𑁆𑀚𑀢𑁂 𑀥𑀦𑀁;

𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀸𑀲𑀺𑀫𑀢𑁆𑀢𑀦𑁄;

𑀢𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀦𑀫𑁆𑀳𑀺 𑀤𑀼𑀕𑁆𑀕𑀢𑀸 𑀅𑀳𑀁.

𑁧𑁫𑁨. ‘‘𑀢𑀤𑁂𑀯 𑀫𑀁 𑀢𑁆𑀯𑀁 𑀅𑀯𑀘, ‘𑀧𑀸𑀧𑀓𑀫𑁆𑀫𑀁 𑀦𑀺𑀲𑁂𑀯𑀲𑀺;

𑀦 𑀳𑀺 𑀧𑀸𑀧𑁂𑀳𑀺 𑀓𑀫𑁆𑀫𑁂𑀳𑀺, 𑀲𑀼𑀮𑀪𑀸 𑀳𑁄𑀢𑀺 𑀲𑀼𑀕𑁆𑀕𑀢𑀻’’’𑀢𑀺.

𑁧𑁫𑁩. ‘‘𑀯𑀸𑀫𑀢𑁄 𑀫𑀁 𑀢𑁆𑀯𑀁 𑀧𑀘𑁆𑀘𑁂𑀲𑀺, 𑀅𑀣𑁄𑀧𑀺 𑀫𑀁 𑀉𑀲𑀽𑀬𑀲𑀺;

𑀧𑀲𑁆𑀲 𑀧𑀸𑀧𑀸𑀦𑀁 𑀓𑀫𑁆𑀫𑀸𑀦𑀁, 𑀯𑀺𑀧𑀸𑀓𑁄 𑀳𑁄𑀢𑀺 𑀬𑀸𑀤𑀺𑀲𑁄.

𑁧𑁫𑁪. ‘‘𑀢𑁂 𑀖𑀭𑀸 𑀢𑀸 𑀘 𑀤𑀸𑀲𑀺𑀬𑁄 [𑀢𑁂 𑀖𑀭𑀤𑀸𑀲𑀺𑀬𑁄 𑀆𑀲𑀼𑀁 (𑀲𑀻. 𑀲𑁆𑀬𑀸.), 𑀢𑁂 𑀖𑀭𑁂 𑀤𑀸𑀲𑀺𑀬𑁄 𑀘𑁂𑀯 (𑀓.)], 𑀢𑀸𑀦𑁂𑀯𑀸𑀪𑀭𑀡𑀸𑀦𑀺𑀫𑁂;

𑀢𑁂 𑀅𑀜𑁆𑀜𑁂 𑀧𑀭𑀺𑀘𑀸𑀭𑁂𑀦𑁆𑀢𑀺, 𑀦 𑀪𑁄𑀕𑀸 𑀳𑁄𑀦𑁆𑀢𑀺 𑀲𑀲𑁆𑀲𑀢𑀸.

𑁧𑁫𑁫. ‘‘𑀇𑀤𑀸𑀦𑀺 𑀪𑀽𑀢𑀲𑁆𑀲 𑀧𑀺𑀢𑀸, 𑀆𑀧𑀡𑀸 𑀕𑁂𑀳𑀫𑁂𑀳𑀺𑀢𑀺;

𑀅𑀧𑁆𑀧𑁂𑀯 𑀢𑁂 𑀤𑀤𑁂 𑀓𑀺𑀜𑁆𑀘𑀺, 𑀫𑀸 𑀲𑀼 𑀢𑀸𑀯 𑀇𑀢𑁄 𑀅𑀕𑀸’’𑀢𑀺.

𑁧𑁫𑁬. ‘‘𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀫𑁆𑀳𑀺, 𑀓𑀺𑀲𑀸 𑀥𑀫𑀦𑀺𑀲𑀦𑁆𑀣𑀢𑀸;

𑀓𑁄𑀧𑀻𑀦𑀫𑁂𑀢𑀁 𑀇𑀢𑁆𑀣𑀻𑀦𑀁, 𑀫𑀸 𑀫𑀁 𑀪𑀽𑀢𑀧𑀺𑀢𑀸𑀤𑁆𑀤𑀲𑀸’’𑀢𑀺.

𑁧𑁫𑁭. ‘‘𑀳𑀦𑁆𑀤 𑀓𑀺𑀁 𑀯𑀸 𑀢𑁆𑀬𑀸𑀳𑀁 [𑀓𑀺𑀁 𑀢𑁆𑀬𑀸𑀳𑀁 (𑀲𑀻. 𑀲𑁆𑀬𑀸.), 𑀓𑀺𑀁 𑀯𑀢𑀸𑀳𑀁 (𑀓.)] 𑀤𑀫𑁆𑀫𑀺, 𑀓𑀺𑀁 𑀯𑀸 𑀢𑁂𑀥 [𑀓𑀺𑀁 𑀯𑀸 𑀘 𑀢𑁂 (𑀲𑀻. 𑀲𑁆𑀬𑀸.), 𑀓𑀺𑀁 𑀯𑀺𑀥 𑀢𑁂 (𑀓.)] 𑀓𑀭𑁄𑀫𑀳𑀁;

𑀬𑁂𑀦 𑀢𑁆𑀯𑀁 𑀲𑀼𑀔𑀺𑀢𑀸 𑀅𑀲𑁆𑀲, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻’’𑀢𑀺.

𑁧𑁫𑁮. ‘‘𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀲𑀗𑁆𑀖𑀢𑁄, 𑀘𑀢𑁆𑀢𑀸𑀭𑁄 𑀧𑀦 𑀧𑀼𑀕𑁆𑀕𑀮𑀸;

𑀅𑀝𑁆𑀞 𑀪𑀺𑀓𑁆𑀔𑀽 𑀪𑁄𑀚𑀬𑀺𑀢𑁆𑀯𑀸, 𑀫𑀫 𑀤𑀓𑁆𑀔𑀺𑀡𑀫𑀸𑀤𑀺𑀲;

𑀢𑀤𑀸𑀳𑀁 𑀲𑀼𑀔𑀺𑀢𑀸 𑀳𑁂𑀲𑁆𑀲𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻’’𑀢𑀺.

𑁧𑁫𑁯. 𑀲𑀸𑀥𑀽𑀢𑀺 𑀲𑀸 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀪𑁄𑀚𑀬𑀺𑀢𑁆𑀯𑀸𑀝𑁆𑀞 𑀪𑀺𑀓𑁆𑀔𑀯𑁄;

𑀯𑀢𑁆𑀣𑁂𑀳𑀘𑁆𑀙𑀸𑀤𑀬𑀺𑀢𑁆𑀯𑀸𑀦, 𑀢𑀲𑁆𑀲𑀸 𑀤𑀓𑁆𑀔𑀺𑀡𑀫𑀸𑀤𑀺𑀲𑀻.

𑁧𑁬𑁦. 𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀯𑀺𑀧𑀸𑀓𑁄 𑀉𑀤𑀧𑀚𑁆𑀚𑀣;

𑀪𑁄𑀚𑀦𑀘𑁆𑀙𑀸𑀤𑀦𑀧𑀸𑀦𑀻𑀬𑀁, 𑀤𑀓𑁆𑀔𑀺𑀡𑀸𑀬 𑀇𑀤𑀁 𑀨𑀮𑀁.

𑁧𑁬𑁧. 𑀢𑀢𑁄 𑀲𑀼𑀤𑁆𑀥𑀸 𑀲𑀼𑀘𑀺𑀯𑀲𑀦𑀸, 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑀻;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸, 𑀲𑀧𑀢𑁆𑀢𑀺𑀁 𑀉𑀧𑀲𑀗𑁆𑀓𑀫𑀺.

𑁧𑁬𑁨. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁧𑁬𑁩. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁬𑁪. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁬𑁫. ‘‘𑀅𑀳𑀁 𑀫𑀢𑁆𑀢𑀸 𑀢𑀼𑀯𑀁 𑀢𑀺𑀲𑁆𑀲𑀸, 𑀲𑀧𑀢𑁆𑀢𑀻 𑀢𑁂 𑀧𑀼𑀭𑁂 𑀅𑀳𑀼𑀁;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸.

𑁧𑁬𑁬. ‘‘𑀢𑀯 𑀤𑀺𑀦𑁆𑀦𑁂𑀦 𑀤𑀸𑀦𑁂𑀦, 𑀫𑁄𑀤𑀸𑀫𑀺 𑀅𑀓𑀼𑀢𑁄𑀪𑀬𑀸;

𑀘𑀻𑀭𑀁 𑀚𑀻𑀯𑀸𑀳𑀺 𑀪𑀕𑀺𑀦𑀺, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀅𑀲𑁄𑀓𑀁 𑀯𑀺𑀭𑀚𑀁 𑀞𑀸𑀦𑀁, 𑀆𑀯𑀸𑀲𑀁 𑀯𑀲𑀯𑀢𑁆𑀢𑀺𑀦𑀁.

𑁧𑁬𑁭. ‘‘𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀤𑀸𑀦𑀁 𑀤𑀢𑁆𑀯𑀸𑀦 𑀲𑁄𑀪𑀦𑁂;

𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀫𑀮𑀁 𑀲𑀫𑀽𑀮𑀁, 𑀅𑀦𑀺𑀦𑁆𑀤𑀺𑀢𑀸 𑀲𑀕𑁆𑀕𑀫𑀼𑀧𑁂𑀳𑀺 𑀞𑀸𑀦’’𑀦𑁆𑀢𑀺.

𑀫𑀢𑁆𑀢𑀸𑀧𑁂𑀢𑀺𑀯𑀢𑁆𑀣𑀼 𑀢𑀢𑀺𑀬𑀁.