𑁪. 𑀦𑀦𑁆𑀤𑀸𑀧𑁂𑀢𑀺𑀯𑀢𑁆𑀣𑀼

𑁧𑁬𑁮. ‘‘𑀓𑀸𑀴𑀻 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀺, 𑀨𑀭𑀼𑀲𑀸 𑀪𑀻𑀭𑀼𑀤𑀲𑁆𑀲𑀦𑀸;

𑀧𑀺𑀗𑁆𑀕𑀮𑀸𑀲𑀺 𑀓𑀴𑀸𑀭𑀸𑀲𑀺, 𑀦 𑀢𑀁 𑀫𑀜𑁆𑀜𑀸𑀫𑀺 𑀫𑀸𑀦𑀼𑀲𑀺’’𑀦𑁆𑀢𑀺.

𑁧𑁬𑁯. ‘‘𑀅𑀳𑀁 𑀦𑀦𑁆𑀤𑀸 𑀦𑀦𑁆𑀤𑀺𑀲𑁂𑀦, 𑀪𑀭𑀺𑀬𑀸 𑀢𑁂 𑀧𑀼𑀭𑁂 𑀅𑀳𑀼𑀁;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺.

𑁧𑁭𑁦. ‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺.

𑁧𑁭𑁧. ‘‘𑀘𑀡𑁆𑀟𑀻 𑀘 𑀨𑀭𑀼𑀲𑀸 𑀘𑀸𑀲𑀺𑀁 [𑀘𑀡𑁆𑀟𑀻 𑀨𑀭𑀼𑀲𑀯𑀸𑀘𑀸 𑀘 (𑀲𑀻.)], 𑀢𑀬𑀺 𑀘𑀸𑀧𑀺 𑀅𑀕𑀸𑀭𑀯𑀸;

𑀢𑀸𑀳𑀁 𑀤𑀼𑀭𑀼𑀢𑁆𑀢𑀁 𑀯𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺.

𑁧𑁭𑁨. ‘‘𑀳𑀦𑁆𑀤𑀼𑀢𑁆𑀢𑀭𑀻𑀬𑀁 𑀤𑀤𑀸𑀫𑀺 𑀢𑁂, 𑀇𑀫𑀁 [𑀇𑀤𑀁 (𑀲𑀻. 𑀅𑀝𑁆𑀞.)] 𑀤𑀼𑀲𑁆𑀲𑀁 𑀦𑀺𑀯𑀸𑀲𑀬;

𑀇𑀫𑀁 𑀤𑀼𑀲𑁆𑀲𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀏𑀳𑀺 𑀦𑁂𑀲𑁆𑀲𑀸𑀫𑀺 𑀢𑀁 𑀖𑀭𑀁.

𑁧𑁭𑁩. ‘‘𑀯𑀢𑁆𑀣𑀜𑁆𑀘 𑀅𑀦𑁆𑀦𑀧𑀸𑀦𑀜𑁆𑀘, 𑀮𑀘𑁆𑀙𑀲𑀺 𑀢𑁆𑀯𑀁 𑀖𑀭𑀁 𑀕𑀢𑀸;

𑀧𑀼𑀢𑁆𑀢𑁂 𑀘 𑀢𑁂 𑀧𑀲𑁆𑀲𑀺𑀲𑁆𑀲𑀲𑀺, 𑀲𑀼𑀡𑀺𑀲𑀸𑀬𑁄 𑀘 𑀤𑀓𑁆𑀔𑀲𑀻’’𑀢𑀺.

𑁧𑁭𑁪. ‘‘𑀳𑀢𑁆𑀣𑁂𑀦 𑀳𑀢𑁆𑀣𑁂 𑀢𑁂 𑀤𑀺𑀦𑁆𑀦𑀁, 𑀦 𑀫𑀬𑁆𑀳𑀁 𑀉𑀧𑀓𑀧𑁆𑀧𑀢𑀺;

𑀪𑀺𑀓𑁆𑀔𑀽 𑀘 𑀲𑀻𑀮𑀲𑀫𑁆𑀧𑀦𑁆𑀦𑁂, 𑀯𑀻𑀢𑀭𑀸𑀕𑁂 𑀩𑀳𑀼𑀲𑁆𑀲𑀼𑀢𑁂.

𑁧𑁭𑁫. ‘‘𑀢𑀧𑁆𑀧𑁂𑀳𑀺 𑀅𑀦𑁆𑀦𑀧𑀸𑀦𑁂𑀦, 𑀫𑀫 𑀤𑀓𑁆𑀔𑀺𑀡𑀫𑀸𑀤𑀺𑀲;

𑀢𑀤𑀸𑀳𑀁 𑀲𑀼𑀔𑀺𑀢𑀸 𑀳𑁂𑀲𑁆𑀲𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻’’𑀢𑀺.

𑁧𑁭𑁬. 𑀲𑀸𑀥𑀽𑀢𑀺 𑀲𑁄 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀤𑀸𑀦𑀁 𑀯𑀺𑀧𑀼𑀮𑀫𑀸𑀓𑀺𑀭𑀺;

𑀅𑀦𑁆𑀦𑀁 𑀧𑀸𑀦𑀁 𑀔𑀸𑀤𑀦𑀻𑀬𑀁, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀙𑀢𑁆𑀢𑀁 𑀕𑀦𑁆𑀥𑀜𑁆𑀘 𑀫𑀸𑀮𑀜𑁆𑀘, 𑀯𑀺𑀯𑀺𑀥𑀸 𑀘 𑀉𑀧𑀸𑀳𑀦𑀸.

𑁧𑁭𑁭. 𑀪𑀺𑀓𑁆𑀔𑀽 𑀘 𑀲𑀻𑀮𑀲𑀫𑁆𑀧𑀦𑁆𑀦𑁂, 𑀯𑀻𑀢𑀭𑀸𑀕𑁂 𑀩𑀳𑀼𑀲𑁆𑀲𑀼𑀢𑁂;

𑀢𑀧𑁆𑀧𑁂𑀢𑁆𑀯𑀸 𑀅𑀦𑁆𑀦𑀧𑀸𑀦𑁂𑀦, 𑀢𑀲𑁆𑀲𑀸 𑀤𑀓𑁆𑀔𑀺𑀡𑀫𑀸𑀤𑀺𑀲𑀻.

𑁧𑁭𑁮. 𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀯𑀺𑀧𑀸𑀓𑁄 𑀉𑀤𑀧𑀚𑁆𑀚𑀣;

𑀪𑁄𑀚𑀦𑀘𑁆𑀙𑀸𑀤𑀦𑀧𑀸𑀦𑀻𑀬𑀁, 𑀤𑀓𑁆𑀔𑀺𑀡𑀸𑀬 𑀇𑀤𑀁 𑀨𑀮𑀁.

𑁧𑁭𑁯. 𑀢𑀢𑁄 𑀲𑀼𑀤𑁆𑀥𑀸 𑀲𑀼𑀘𑀺𑀯𑀲𑀦𑀸, 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑀻;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸, 𑀲𑀸𑀫𑀺𑀓𑀁 𑀉𑀧𑀲𑀗𑁆𑀓𑀫𑀺.

𑁧𑁮𑁦. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁧𑁮𑁧. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁮𑁨. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁮𑁩. ‘‘𑀅𑀳𑀁 𑀦𑀦𑁆𑀤𑀸 𑀦𑀦𑁆𑀤𑀺𑀲𑁂𑀦, 𑀪𑀭𑀺𑀬𑀸 𑀢𑁂 𑀧𑀼𑀭𑁂 𑀅𑀳𑀼𑀁;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸.

𑁧𑁮𑁪. ‘‘𑀢𑀯 𑀤𑀺𑀦𑁆𑀦𑁂𑀦 𑀤𑀸𑀦𑁂𑀦, 𑀫𑁄𑀤𑀸𑀫𑀺 𑀅𑀓𑀼𑀢𑁄𑀪𑀬𑀸;

𑀘𑀺𑀭𑀁 𑀚𑀻𑀯 𑀕𑀳𑀧𑀢𑀺, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀅𑀲𑁄𑀓𑀁 𑀯𑀺𑀭𑀚𑀁 𑀔𑁂𑀫𑀁, 𑀆𑀯𑀸𑀲𑀁 𑀯𑀲𑀯𑀢𑁆𑀢𑀺𑀦𑀁.

𑁧𑁮𑁫. ‘‘𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀤𑀸𑀦𑀁 𑀤𑀢𑁆𑀯𑀸 𑀕𑀳𑀧𑀢𑀺;

𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀫𑀮𑀁 𑀲𑀫𑀽𑀮𑀁, 𑀅𑀦𑀺𑀦𑁆𑀤𑀺𑀢𑁄 𑀲𑀕𑁆𑀕𑀫𑀼𑀧𑁂𑀳𑀺 𑀞𑀸𑀦’’𑀦𑁆𑀢𑀺.

𑀦𑀦𑁆𑀤𑀸𑀧𑁂𑀢𑀺𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.