𑁨. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀫𑀸𑀢𑀼𑀧𑁂𑀢𑀺𑀯𑀢𑁆𑀣𑀼

𑁧𑁧𑁬. ‘‘𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀺, 𑀓𑀺𑀲𑀸 𑀥𑀫𑀦𑀺𑀲𑀦𑁆𑀣𑀢𑀸;

𑀉𑀧𑁆𑀨𑀸𑀲𑀼𑀮𑀺𑀓𑁂 𑀓𑀺𑀲𑀺𑀓𑁂, 𑀓𑀸 𑀦𑀼 𑀢𑁆𑀯𑀁 𑀇𑀥 𑀢𑀺𑀝𑁆𑀞𑀲𑀺’’.

𑁧𑁧𑁭. ‘‘𑀅𑀳𑀁 𑀢𑁂 𑀲𑀓𑀺𑀬𑀸 𑀫𑀸𑀢𑀸, 𑀧𑀼𑀩𑁆𑀩𑁂 𑀅𑀜𑁆𑀜𑀸𑀲𑀼 𑀚𑀸𑀢𑀻𑀲𑀼;

𑀉𑀧𑀧𑀦𑁆𑀦𑀸 𑀧𑁂𑀢𑁆𑀢𑀺𑀯𑀺𑀲𑀬𑀁, 𑀔𑀼𑀧𑁆𑀧𑀺𑀧𑀸𑀲𑀲𑀫𑀧𑁆𑀧𑀺𑀢𑀸.

𑁧𑁧𑁮. ‘‘𑀙𑀟𑁆𑀟𑀺𑀢𑀁 𑀔𑀺𑀧𑀺𑀢𑀁 𑀔𑁂𑀴𑀁, 𑀲𑀺𑀗𑁆𑀖𑀸𑀡𑀺𑀓𑀁 𑀲𑀺𑀮𑁂𑀲𑀼𑀫𑀁;

𑀯𑀲𑀜𑁆𑀘 𑀟𑀬𑁆𑀳𑀫𑀸𑀦𑀸𑀦𑀁, 𑀯𑀺𑀚𑀸𑀢𑀸𑀦𑀜𑁆𑀘 𑀮𑁄𑀳𑀺𑀢𑀁.

𑁧𑁧𑁯. ‘‘𑀯𑀡𑀺𑀓𑀸𑀦𑀜𑁆𑀘 𑀬𑀁 𑀖𑀸𑀦-𑀲𑀻𑀲𑀘𑁆𑀙𑀺𑀦𑁆𑀦𑀸𑀦 𑀮𑁄𑀳𑀺𑀢𑀁;

𑀔𑀼𑀤𑀸𑀧𑀭𑁂𑀢𑀸 𑀪𑀼𑀜𑁆𑀚𑀸𑀫𑀺, 𑀇𑀢𑁆𑀣𑀺𑀧𑀼𑀭𑀺𑀲𑀦𑀺𑀲𑁆𑀲𑀺𑀢𑀁.

𑁧𑁨𑁦. ‘‘𑀧𑀼𑀩𑁆𑀩𑀮𑁄𑀳𑀺𑀢𑀁 𑀪𑀓𑁆𑀔𑀸𑀫𑀺 [𑀧𑀼𑀩𑁆𑀩𑀮𑁄𑀳𑀺𑀢𑀪𑀓𑁆𑀔𑀸𑀲𑁆𑀫𑀺 (𑀲𑀻.)], 𑀧𑀲𑀽𑀦𑀁 𑀫𑀸𑀦𑀼𑀲𑀸𑀦 𑀘;

𑀅𑀮𑁂𑀡𑀸 𑀅𑀦𑀕𑀸𑀭𑀸 𑀘, 𑀦𑀻𑀮𑀫𑀜𑁆𑀘𑀧𑀭𑀸𑀬𑀡𑀸.

𑁧𑁨𑁧. ‘‘𑀤𑁂𑀳𑀺 𑀧𑀼𑀢𑁆𑀢𑀓 𑀫𑁂 𑀤𑀸𑀦𑀁, 𑀤𑀢𑁆𑀯𑀸 𑀅𑀦𑁆𑀯𑀸𑀤𑀺𑀲𑀸𑀳𑀺 𑀫𑁂;

𑀅𑀧𑁆𑀧𑁂𑀯 𑀦𑀸𑀫 𑀫𑀼𑀘𑁆𑀘𑁂𑀬𑁆𑀬𑀁, 𑀧𑀼𑀩𑁆𑀩𑀮𑁄𑀳𑀺𑀢𑀪𑁄𑀚𑀦𑀸’’𑀢𑀺.

𑁧𑁨𑁨. 𑀫𑀸𑀢𑀼𑀬𑀸 𑀯𑀘𑀦𑀁 𑀲𑀼𑀢𑁆𑀯𑀸, 𑀉𑀧𑀢𑀺𑀲𑁆𑀲𑁄𑀦𑀼𑀓𑀫𑁆𑀧𑀓𑁄;

𑀆𑀫𑀦𑁆𑀢𑀬𑀺 𑀫𑁄𑀕𑁆𑀕𑀮𑁆𑀮𑀸𑀦𑀁, 𑀅𑀦𑀼𑀭𑀼𑀤𑁆𑀥𑀜𑁆𑀘 𑀓𑀧𑁆𑀧𑀺𑀦𑀁.

𑁧𑁨𑁩. 𑀘𑀢𑀲𑁆𑀲𑁄 𑀓𑀼𑀝𑀺𑀬𑁄 𑀓𑀢𑁆𑀯𑀸, 𑀲𑀗𑁆𑀖𑁂 𑀘𑀸𑀢𑀼𑀤𑁆𑀤𑀺𑀲𑁂 𑀅𑀤𑀸;

𑀓𑀼𑀝𑀺𑀬𑁄 𑀅𑀦𑁆𑀦𑀧𑀸𑀦𑀜𑁆𑀘, 𑀫𑀸𑀢𑀼 𑀤𑀓𑁆𑀔𑀺𑀡𑀫𑀸𑀤𑀺𑀲𑀻.

𑁧𑁨𑁪. 𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀯𑀺𑀧𑀸𑀓𑁄 𑀉𑀤𑀧𑀚𑁆𑀚𑀣;

𑀪𑁄𑀚𑀦𑀁 𑀧𑀸𑀦𑀻𑀬𑀁 𑀯𑀢𑁆𑀣𑀁, 𑀤𑀓𑁆𑀔𑀺𑀡𑀸𑀬 𑀇𑀤𑀁 𑀨𑀮𑀁.

𑁧𑁨𑁫. 𑀢𑀢𑁄 𑀲𑀼𑀤𑁆𑀥𑀸 𑀲𑀼𑀘𑀺𑀯𑀲𑀦𑀸, 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑀻;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸, 𑀓𑁄𑀮𑀺𑀢𑀁 𑀉𑀧𑀲𑀗𑁆𑀓𑀫𑀺.

𑁧𑁨𑁬. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁧𑁨𑁭. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁨𑁮. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁨𑁯. ‘‘𑀲𑀸𑀭𑀺𑀧𑀼𑀢𑁆𑀢𑀲𑁆𑀲𑀸𑀳𑀁 𑀫𑀸𑀢𑀸, 𑀧𑀼𑀩𑁆𑀩𑁂 𑀅𑀜𑁆𑀜𑀸𑀲𑀼 𑀚𑀸𑀢𑀻𑀲𑀼;

𑀉𑀧𑀧𑀦𑁆𑀦𑀸 𑀧𑁂𑀢𑁆𑀢𑀺𑀯𑀺𑀲𑀬𑀁, 𑀔𑀼𑀧𑁆𑀧𑀺𑀧𑀸𑀲𑀲𑀫𑀧𑁆𑀧𑀺𑀢𑀸.

𑁧𑁩𑁦. ‘‘𑀙𑀟𑁆𑀟𑀺𑀢𑀁 𑀔𑀺𑀧𑀺𑀢𑀁 𑀔𑁂𑀴𑀁, 𑀲𑀺𑀗𑁆𑀖𑀸𑀡𑀺𑀓𑀁 𑀲𑀺𑀮𑁂𑀲𑀼𑀫𑀁;

𑀯𑀲𑀜𑁆𑀘 𑀟𑀬𑁆𑀳𑀫𑀸𑀦𑀸𑀦𑀁, 𑀯𑀺𑀚𑀸𑀢𑀸𑀦𑀜𑁆𑀘 𑀮𑁄𑀳𑀺𑀢𑀁.

𑁧𑁩𑁧. ‘‘𑀯𑀡𑀺𑀓𑀸𑀦𑀜𑁆𑀘 𑀬𑀁 𑀖𑀸𑀦-𑀲𑀻𑀲𑀘𑁆𑀙𑀺𑀦𑁆𑀦𑀸𑀦 𑀮𑁄𑀳𑀺𑀢𑀁;

𑀔𑀼𑀤𑀸𑀧𑀭𑁂𑀢𑀸 𑀪𑀼𑀜𑁆𑀚𑀸𑀫𑀺, 𑀇𑀢𑁆𑀣𑀺𑀧𑀼𑀭𑀺𑀲𑀦𑀺𑀲𑁆𑀲𑀺𑀢𑀁.

𑁧𑁩𑁨. ‘‘𑀧𑀼𑀩𑁆𑀩𑀮𑁄𑀳𑀺𑀢𑀁 𑀪𑀓𑁆𑀔𑀺𑀲𑁆𑀲𑀁, 𑀧𑀲𑀽𑀦𑀁 𑀫𑀸𑀦𑀼𑀲𑀸𑀦 𑀘;

𑀅𑀮𑁂𑀡𑀸 𑀅𑀦𑀕𑀸𑀭𑀸 𑀘, 𑀦𑀻𑀮𑀫𑀜𑁆𑀘𑀧𑀭𑀸𑀬𑀡𑀸.

𑁧𑁩𑁩. ‘‘𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀤𑀸𑀦𑁂𑀦, 𑀫𑁄𑀤𑀸𑀫𑀺 𑀅𑀓𑀼𑀢𑁄𑀪𑀬𑀸;

𑀫𑀼𑀦𑀺𑀁 𑀓𑀸𑀭𑀼𑀡𑀺𑀓𑀁 𑀮𑁄𑀓𑁂, 𑀪𑀦𑁆𑀢𑁂 𑀯𑀦𑁆𑀤𑀺𑀢𑀼𑀫𑀸𑀕𑀢𑀸’’𑀢𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀫𑀸𑀢𑀼𑀧𑁂𑀢𑀺𑀯𑀢𑁆𑀣𑀼 𑀤𑀼𑀢𑀺𑀬𑀁.