𑁧𑁩. 𑀉𑀩𑁆𑀩𑀭𑀺𑀧𑁂𑀢𑀯𑀢𑁆𑀣𑀼

𑁩𑁬𑁮. 𑀅𑀳𑀼 𑀭𑀸𑀚𑀸 𑀩𑁆𑀭𑀳𑁆𑀫𑀤𑀢𑁆𑀢𑁄, 𑀧𑀜𑁆𑀘𑀸𑀮𑀸𑀦𑀁 𑀭𑀣𑁂𑀲𑀪𑁄;

𑀅𑀳𑁄𑀭𑀢𑁆𑀢𑀸𑀦𑀫𑀘𑁆𑀘𑀬𑀸, 𑀭𑀸𑀚𑀸 𑀓𑀸𑀮𑀫𑀓𑁆𑀭𑀼𑀩𑁆𑀩𑀣 [𑀭𑀸𑀚𑀸 𑀓𑀸𑀮𑀗𑁆𑀓𑀭𑀻 𑀢𑀤𑀸 (𑀲𑀻.)].

𑁩𑁬𑁯. 𑀢𑀲𑁆𑀲 𑀆𑀴𑀸𑀳𑀦𑀁 𑀕𑀦𑁆𑀢𑁆𑀯𑀸, 𑀪𑀭𑀺𑀬𑀸 𑀓𑀦𑁆𑀤𑀢𑀺 𑀉𑀩𑁆𑀩𑀭𑀻 [𑀉𑀧𑁆𑀧𑀭𑀺 (𑀓.)];

𑀩𑁆𑀭𑀳𑁆𑀫𑀤𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀩𑁆𑀭𑀳𑁆𑀫𑀤𑀢𑁆𑀢𑀸𑀢𑀺 𑀓𑀦𑁆𑀤𑀢𑀺.

𑁩𑁭𑁦. 𑀇𑀲𑀺 𑀘 𑀢𑀢𑁆𑀣 𑀆𑀕𑀘𑁆𑀙𑀺, 𑀲𑀫𑁆𑀧𑀦𑁆𑀦𑀘𑀭𑀡𑁄 𑀫𑀼𑀦𑀺;

𑀲𑁄 𑀘 𑀢𑀢𑁆𑀣 𑀅𑀧𑀼𑀘𑁆𑀙𑀺𑀢𑁆𑀣, 𑀬𑁂 𑀢𑀢𑁆𑀣 𑀲𑀼𑀲𑀫𑀸𑀕𑀢𑀸.

𑁩𑁭𑁧. ‘‘𑀓𑀲𑁆𑀲 𑀇𑀤𑀁 𑀆𑀴𑀸𑀳𑀦𑀁, 𑀦𑀸𑀦𑀸𑀕𑀦𑁆𑀥𑀲𑀫𑁂𑀭𑀺𑀢𑀁;

𑀓𑀲𑁆𑀲𑀸𑀬𑀁 𑀓𑀦𑁆𑀤𑀢𑀺 𑀪𑀭𑀺𑀬𑀸, 𑀇𑀢𑁄 𑀤𑀽𑀭𑀕𑀢𑀁 𑀧𑀢𑀺𑀁;

𑀩𑁆𑀭𑀳𑁆𑀫𑀤𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻, ‘𑀩𑁆𑀭𑀳𑁆𑀫𑀤𑀢𑁆𑀢𑀸’𑀢𑀺 𑀓𑀦𑁆𑀤𑀢𑀺’’.

𑁩𑁭𑁨. 𑀢𑁂 𑀘 𑀢𑀢𑁆𑀣 𑀯𑀺𑀬𑀸𑀓𑀁𑀲𑀼, 𑀬𑁂 𑀢𑀢𑁆𑀣 𑀲𑀼𑀲𑀫𑀸𑀕𑀢𑀸;

‘‘𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀪𑀤𑀦𑁆𑀢𑁂 [𑀪𑀤𑁆𑀤𑀦𑁆𑀢𑁂 (𑀓.)], 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀫𑀸𑀭𑀺𑀲.

𑁩𑁭𑁩. ‘‘𑀢𑀲𑁆𑀲 𑀇𑀤𑀁 𑀆𑀴𑀸𑀳𑀦𑀁, 𑀦𑀸𑀦𑀸𑀕𑀦𑁆𑀥𑀲𑀫𑁂𑀭𑀺𑀢𑀁;

𑀢𑀲𑁆𑀲𑀸𑀬𑀁 𑀓𑀦𑁆𑀤𑀢𑀺 𑀪𑀭𑀺𑀬𑀸, 𑀇𑀢𑁄 𑀤𑀽𑀭𑀕𑀢𑀁 𑀧𑀢𑀺𑀁;

𑀩𑁆𑀭𑀳𑁆𑀫𑀤𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻, ‘𑀩𑁆𑀭𑀳𑁆𑀫𑀤𑀢𑁆𑀢𑀸’𑀢𑀺 𑀓𑀦𑁆𑀤𑀢𑀺’’.

𑁩𑁭𑁪. ‘‘𑀙𑀴𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲𑀦𑀸𑀫𑀓𑀸;

𑀇𑀫𑀲𑁆𑀫𑀺𑀁 𑀆𑀴𑀸𑀳𑀦𑁂 𑀤𑀟𑁆𑀠𑀸, 𑀢𑁂𑀲𑀁 𑀓𑀫𑀦𑀼𑀲𑁄𑀘𑀲𑀻’’𑀢𑀺.

𑁩𑁭𑁫. ‘‘𑀬𑁄 𑀭𑀸𑀚𑀸 𑀘𑀽𑀴𑀦𑀻𑀧𑀼𑀢𑁆𑀢𑁄, 𑀧𑀜𑁆𑀘𑀸𑀮𑀸𑀦𑀁 𑀭𑀣𑁂𑀲𑀪𑁄;

𑀢𑀁 𑀪𑀦𑁆𑀢𑁂 𑀅𑀦𑀼𑀲𑁄𑀘𑀸𑀫𑀺, 𑀪𑀢𑁆𑀢𑀸𑀭𑀁 𑀲𑀩𑁆𑀩𑀓𑀸𑀫𑀤’’𑀦𑁆𑀢𑀺.

𑁩𑁭𑁬. ‘‘𑀲𑀩𑁆𑀩𑁂 𑀯𑀸𑀳𑁂𑀲𑀼𑀁 𑀭𑀸𑀚𑀸𑀦𑁄, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲𑀦𑀸𑀫𑀓𑀸;

𑀲𑀩𑁆𑀩𑁂𑀯𑀘𑀽𑀴𑀦𑀻𑀧𑀼𑀢𑁆𑀢𑀸, 𑀧𑀜𑁆𑀘𑀸𑀮𑀸𑀦𑀁 𑀭𑀣𑁂𑀲𑀪𑀸.

𑁩𑁭𑁭. ‘‘𑀲𑀩𑁆𑀩𑁂𑀲𑀁 𑀅𑀦𑀼𑀧𑀼𑀩𑁆𑀩𑁂𑀦, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺;

𑀓𑀲𑁆𑀫𑀸 𑀧𑀼𑀭𑀺𑀫𑀓𑁂 𑀳𑀺𑀢𑁆𑀯𑀸, 𑀧𑀘𑁆𑀙𑀺𑀫𑀁 𑀅𑀦𑀼𑀲𑁄𑀘𑀲𑀻’’𑀢𑀺.

𑁩𑁭𑁮. ‘‘𑀆𑀢𑀼𑀫𑁂 𑀇𑀢𑁆𑀣𑀺𑀪𑀽𑀢𑀸𑀬, 𑀤𑀻𑀖𑀭𑀢𑁆𑀢𑀸𑀬 𑀫𑀸𑀭𑀺𑀲;

𑀬𑀲𑁆𑀲𑀸 𑀫𑁂 𑀇𑀢𑁆𑀣𑀺𑀪𑀽𑀢𑀸𑀬, 𑀲𑀁𑀲𑀸𑀭𑁂 𑀩𑀳𑀼𑀪𑀸𑀲𑀲𑀻’’𑀢𑀺.

𑁩𑁭𑁯. ‘‘𑀅𑀳𑀼 𑀇𑀢𑁆𑀣𑀻 𑀅𑀳𑀼 𑀧𑀼𑀭𑀺𑀲𑁄, 𑀧𑀲𑀼𑀬𑁄𑀦𑀺𑀫𑁆𑀧𑀺 𑀆𑀕𑀫𑀸;

𑀏𑀯𑀫𑁂𑀢𑀁 𑀅𑀢𑀻𑀢𑀸𑀦𑀁, 𑀧𑀭𑀺𑀬𑀦𑁆𑀢𑁄 𑀦 𑀤𑀺𑀲𑁆𑀲𑀢𑀻’’𑀢𑀺.

𑁩𑁮𑁦. ‘‘𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁩𑁮𑁧. ‘‘𑀅𑀩𑁆𑀩𑀳𑀻 𑀯𑀢 𑀫𑁂 𑀲𑀮𑁆𑀮𑀁, 𑀲𑁄𑀓𑀁 𑀳𑀤𑀬𑀦𑀺𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀸𑀬, 𑀧𑀢𑀺𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁩𑁮𑁨. ‘‘𑀲𑀸𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑀸𑀲𑁆𑀫𑀺, 𑀲𑀻𑀢𑀺𑀪𑀽𑀢𑀸𑀲𑁆𑀫𑀺 𑀦𑀺𑀩𑁆𑀩𑀼𑀢𑀸;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸 𑀫𑀳𑀸𑀫𑀼𑀦𑀻’’𑀢𑀺.

𑁩𑁮𑁩. 𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀫𑀡𑀲𑁆𑀲 𑀲𑀼𑀪𑀸𑀲𑀺𑀢𑀁;

𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬, 𑀧𑀩𑁆𑀩𑀚𑀺 𑀅𑀦𑀕𑀸𑀭𑀺𑀬𑀁.

𑁩𑁮𑁪. 𑀲𑀸 𑀘 𑀧𑀩𑁆𑀩𑀚𑀺𑀢𑀸 𑀲𑀦𑁆𑀢𑀸, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁;

𑀫𑁂𑀢𑁆𑀢𑀸𑀘𑀺𑀢𑁆𑀢𑀁 𑀅𑀪𑀸𑀯𑁂𑀲𑀺, 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸.

𑁩𑁮𑁫. 𑀕𑀸𑀫𑀸 𑀕𑀸𑀫𑀁 𑀯𑀺𑀘𑀭𑀦𑁆𑀢𑀻, 𑀦𑀺𑀕𑀫𑁂 𑀭𑀸𑀚𑀥𑀸𑀦𑀺𑀬𑁄;

𑀉𑀭𑀼𑀯𑁂𑀮𑀸 𑀦𑀸𑀫 𑀲𑁄 𑀕𑀸𑀫𑁄, 𑀬𑀢𑁆𑀣 𑀓𑀸𑀮𑀫𑀓𑁆𑀭𑀼𑀩𑁆𑀩𑀣.

𑁩𑁮𑁬. 𑀫𑁂𑀢𑁆𑀢𑀸𑀘𑀺𑀢𑁆𑀢𑀁 𑀆𑀪𑀸𑀯𑁂𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸;

𑀇𑀢𑁆𑀣𑀺𑀘𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑀸 𑀅𑀳𑀽𑀢𑀺.

𑀉𑀩𑁆𑀩𑀭𑀺𑀧𑁂𑀢𑀯𑀢𑁆𑀣𑀼 𑀢𑁂𑀭𑀲𑀫𑀁.

𑀉𑀩𑁆𑀩𑀭𑀺𑀯𑀕𑁆𑀕𑁄 𑀤𑀼𑀢𑀺𑀬𑁄 𑀦𑀺𑀝𑁆𑀞𑀺𑀢𑁄.