𑁧𑁨. 𑀓𑀡𑁆𑀡𑀫𑀼𑀡𑁆𑀟𑀧𑁂𑀢𑀺𑀯𑀢𑁆𑀣𑀼

𑁩𑁪𑁮. ‘‘𑀲𑁄𑀡𑁆𑀡𑀲𑁄𑀧𑀸𑀦𑀨𑀮𑀓𑀸, 𑀲𑁄𑀡𑁆𑀡𑀯𑀸𑀮𑀼𑀓𑀲𑀦𑁆𑀣𑀢𑀸;

𑀢𑀢𑁆𑀣 𑀲𑁄𑀕𑀦𑁆𑀥𑀺𑀬𑀸 𑀯𑀕𑁆𑀕𑀽, 𑀲𑀼𑀘𑀺𑀕𑀦𑁆𑀥𑀸 𑀫𑀦𑁄𑀭𑀫𑀸.

𑁩𑁪𑁯. ‘‘𑀦𑀸𑀦𑀸𑀭𑀼𑀓𑁆𑀔𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀦𑀸𑀦𑀸𑀕𑀦𑁆𑀥𑀲𑀫𑁂𑀭𑀺𑀢𑀸;

𑀦𑀸𑀦𑀸𑀧𑀤𑀼𑀫𑀲𑀜𑁆𑀙𑀦𑁆𑀦𑀸, 𑀧𑀼𑀡𑁆𑀟𑀭𑀻𑀓𑀲𑀫𑁄𑀢𑀢𑀸 [𑀲𑀫𑁄𑀳𑀢𑀸 (𑀓.)].

𑁩𑁫𑁦. ‘‘𑀲𑀼𑀭𑀪𑀺𑀁 𑀲𑀫𑁆𑀧𑀯𑀸𑀬𑀦𑁆𑀢𑀺, 𑀫𑀦𑀼𑀜𑁆𑀜𑀸 𑀫𑀸𑀮𑀼𑀢𑁂𑀭𑀺𑀢𑀸;

𑀳𑀁𑀲𑀓𑁄𑀜𑁆𑀘𑀸𑀪𑀺𑀭𑀼𑀤𑀸 𑀘, 𑀘𑀓𑁆𑀓𑀯𑀓𑁆𑀓𑀸𑀪𑀺𑀓𑀽𑀚𑀺𑀢𑀸.

𑁩𑁫𑁧. ‘‘𑀦𑀸𑀦𑀸𑀤𑀺𑀚𑀕𑀡𑀸𑀓𑀺𑀡𑁆𑀡𑀸, 𑀦𑀸𑀦𑀸𑀲𑀭𑀕𑀡𑀸𑀬𑀼𑀢𑀸;

𑀦𑀸𑀦𑀸𑀨𑀮𑀥𑀭𑀸 𑀭𑀼𑀓𑁆𑀔𑀸, 𑀦𑀸𑀦𑀸𑀧𑀼𑀧𑁆𑀨𑀥𑀭𑀸 𑀯𑀦𑀸.

𑁩𑁫𑁨. ‘‘𑀦 𑀫𑀦𑀼𑀲𑁆𑀲𑁂𑀲𑀼 𑀈𑀤𑀺𑀲𑀁, 𑀦𑀕𑀭𑀁 𑀬𑀸𑀤𑀺𑀲𑀁 𑀇𑀤𑀁;

𑀧𑀸𑀲𑀸𑀤𑀸 𑀩𑀳𑀼𑀓𑀸 𑀢𑀼𑀬𑁆𑀳𑀁, 𑀲𑁄𑀯𑀡𑁆𑀡𑀭𑀽𑀧𑀺𑀬𑀸𑀫𑀬𑀸;

𑀤𑀤𑁆𑀤𑀮𑁆𑀮𑀫𑀸𑀦𑀸 𑀆𑀪𑁂𑀦𑁆𑀢𑀺 [𑀆𑀪𑀦𑁆𑀢𑀺 (𑀓.)], 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸.

𑁩𑁫𑁩. ‘‘𑀧𑀜𑁆𑀘 𑀤𑀸𑀲𑀺𑀲𑀢𑀸 𑀢𑀼𑀬𑁆𑀳𑀁, 𑀬𑀸 𑀢𑁂𑀫𑀸 𑀧𑀭𑀺𑀘𑀸𑀭𑀺𑀓𑀸;

𑀢𑀸 [𑀓𑀸 (𑀓.)] 𑀓𑀫𑁆𑀩𑀼𑀓𑀸𑀬𑀽𑀭𑀥𑀭𑀸 [𑀓𑀫𑁆𑀩𑀼𑀓𑁂𑀬𑀽𑀭𑀥𑀭𑀸 (𑀲𑀻.)], 𑀓𑀜𑁆𑀘𑀦𑀸𑀯𑁂𑀴𑀪𑀽𑀲𑀺𑀢𑀸.

𑁩𑁫𑁪. ‘‘𑀧𑀮𑁆𑀮𑀗𑁆𑀓𑀸 𑀩𑀳𑀼𑀓𑀸 𑀢𑀼𑀬𑁆𑀳𑀁, 𑀲𑁄𑀯𑀡𑁆𑀡𑀭𑀽𑀧𑀺𑀬𑀸𑀫𑀬𑀸;

𑀓𑀤𑀮𑀺𑀫𑀺𑀕𑀲𑀜𑁆𑀙𑀦𑁆𑀦𑀸 [𑀓𑀸𑀤𑀮𑀺𑀫𑀺𑀕𑀲𑀜𑁆𑀙𑀦𑁆𑀦𑀸 (𑀲𑀻.)], 𑀲𑀚𑁆𑀚𑀸 𑀕𑁄𑀦𑀓𑀲𑀦𑁆𑀣𑀢𑀸.

𑁩𑁫𑁫. ‘‘𑀬𑀢𑁆𑀣 𑀢𑁆𑀯𑀁 𑀯𑀸𑀲𑀽𑀧𑀕𑀢𑀸, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻;

𑀲𑀫𑁆𑀧𑀢𑁆𑀢𑀸𑀬𑀟𑁆𑀠𑀭𑀢𑁆𑀢𑀸𑀬 [… 𑀭𑀢𑁆𑀢𑀺𑀬𑀸 (𑀓.)], 𑀢𑀢𑁄 𑀉𑀝𑁆𑀞𑀸𑀬 𑀕𑀘𑁆𑀙𑀲𑀺.

𑁩𑁫𑁬. ‘‘𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀦𑁆𑀢𑁆𑀯𑀸𑀦, 𑀧𑁄𑀓𑁆𑀔𑀭𑀜𑁆𑀜𑀸 𑀲𑀫𑀦𑁆𑀢𑀢𑁄;

𑀢𑀲𑁆𑀲𑀸 𑀢𑀻𑀭𑁂 𑀢𑀼𑀯𑀁 𑀞𑀸𑀲𑀺, 𑀳𑀭𑀺𑀢𑁂 𑀲𑀤𑁆𑀤𑀮𑁂 𑀲𑀼𑀪𑁂.

𑁩𑁫𑁭. ‘‘𑀢𑀢𑁄 𑀢𑁂 𑀓𑀡𑁆𑀡𑀫𑀼𑀡𑁆𑀟𑁄 𑀲𑀼𑀦𑀔𑁄, 𑀅𑀗𑁆𑀕𑀫𑀗𑁆𑀕𑀸𑀦𑀺 𑀔𑀸𑀤𑀢𑀺;

𑀬𑀤𑀸 𑀘 𑀔𑀸𑀬𑀺𑀢𑀸 𑀆𑀲𑀺, 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀸 𑀓𑀢𑀸;

𑀑𑀕𑀸𑀳𑀲𑀺 𑀧𑁄𑀓𑁆𑀔𑀭𑀡𑀺𑀁, 𑀳𑁄𑀢𑀺 𑀓𑀸𑀬𑁄 𑀬𑀣𑀸 𑀧𑀼𑀭𑁂.

𑁩𑁫𑁮. ‘‘𑀢𑀢𑁄 𑀢𑁆𑀯𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀻 [𑀅𑀗𑁆𑀕𑀧𑀘𑁆𑀘𑀗𑁆𑀕𑀸 (𑀓.)], 𑀲𑀼𑀘𑀸𑀭𑀼 𑀧𑀺𑀬𑀤𑀲𑁆𑀲𑀦𑀸;

𑀯𑀢𑁆𑀣𑁂𑀦 𑀧𑀸𑀭𑀼𑀧𑀺𑀢𑁆𑀯𑀸𑀦, 𑀆𑀬𑀸𑀲𑀺 𑀫𑀫 𑀲𑀦𑁆𑀢𑀺𑀓𑀁.

𑁩𑁫𑁯. ‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀓𑀡𑁆𑀡𑀫𑀼𑀡𑁆𑀟𑁄 𑀲𑀼𑀦𑀔𑁄 𑀢𑀯𑀅𑀗𑁆𑀕𑀫𑀗𑁆𑀕𑀸𑀦𑀺 𑀔𑀸𑀤𑀢𑀻’’𑀢𑀺.

𑁩𑁬𑁦. ‘‘𑀓𑀺𑀫𑀺𑀮𑀸𑀬𑀁 [𑀓𑀺𑀫𑁆𑀩𑀺𑀮𑀸𑀬𑀁 (𑀲𑀻. 𑀲𑁆𑀬𑀸.)] 𑀕𑀳𑀧𑀢𑀺, 𑀲𑀤𑁆𑀥𑁄 𑀆𑀲𑀺 𑀉𑀧𑀸𑀲𑀓𑁄;

𑀢𑀲𑁆𑀲𑀸𑀳𑀁 𑀪𑀭𑀺𑀬𑀸 𑀆𑀲𑀺𑀁, 𑀤𑀼𑀲𑁆𑀲𑀻𑀮𑀸 𑀅𑀢𑀺𑀘𑀸𑀭𑀺𑀦𑀻.

𑁩𑁬𑁧. ‘‘𑀲𑁄 𑀫𑀁 𑀅𑀢𑀺𑀘𑀭𑀫𑀸𑀦𑀸𑀬 [𑀏𑀯𑀫𑀸𑀢𑀺𑀘𑀭𑀫𑀸𑀦𑀸𑀬 (𑀲𑁆𑀬𑀸. 𑀧𑀻.)], 𑀲𑀸𑀫𑀺𑀓𑁄 𑀏𑀢𑀤𑀩𑁆𑀭𑀯𑀺;

‘𑀦𑁂𑀢𑀁 𑀙𑀦𑁆𑀦𑀁 [𑀦𑁂𑀢𑀁 𑀙𑀦𑁆𑀦𑀁 𑀦 (𑀲𑀻.), 𑀦𑁂𑀢𑀁 𑀙𑀦𑁆𑀦𑀁 𑀦𑁂𑀢𑀁 (𑀓.)] 𑀧𑀢𑀺𑀭𑀽𑀧𑀁, 𑀬𑀁 𑀢𑁆𑀯𑀁 𑀅𑀢𑀺𑀘𑀭𑀸𑀲𑀺 𑀫𑀁’.

𑁩𑁬𑁨. ‘‘𑀲𑀸𑀳𑀁 𑀖𑁄𑀭𑀜𑁆𑀘 𑀲𑀧𑀣𑀁, 𑀫𑀼𑀲𑀸𑀯𑀸𑀤𑀜𑁆𑀘 𑀪𑀸𑀲𑀺𑀲𑀁;

‘𑀦𑀸𑀳𑀁 𑀢𑀁 𑀅𑀢𑀺𑀘𑀭𑀸𑀫𑀺, 𑀓𑀸𑀬𑁂𑀦 𑀉𑀤 𑀘𑁂𑀢𑀲𑀸.

𑁩𑁬𑁩. ‘‘‘𑀲𑀘𑀸𑀳𑀁 𑀢𑀁 𑀅𑀢𑀺𑀘𑀭𑀸𑀫𑀺, 𑀓𑀸𑀬𑁂𑀦 𑀉𑀤 𑀘𑁂𑀢𑀲𑀸;

𑀓𑀡𑁆𑀡𑀫𑀼𑀡𑁆𑀟𑁄 𑀬𑀁 𑀲𑀼𑀦𑀔𑁄, 𑀅𑀗𑁆𑀕𑀫𑀗𑁆𑀕𑀸𑀦𑀺 𑀔𑀸𑀤𑀢𑀼’.

𑁩𑁬𑁪. ‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁, 𑀫𑀼𑀲𑀸𑀯𑀸𑀤𑀲𑁆𑀲 𑀘𑀽𑀪𑀬𑀁;

𑀲𑀢𑁆𑀢𑁂𑀯 𑀯𑀲𑁆𑀲𑀲𑀢𑀸𑀦𑀺, 𑀅𑀦𑀼𑀪𑀽𑀢𑀁 𑀬𑀢𑁄 𑀳𑀺 𑀫𑁂;

𑀓𑀡𑁆𑀡𑀫𑀼𑀡𑁆𑀟𑁄 𑀘 𑀲𑀼𑀦𑀔𑁄, 𑀅𑀗𑁆𑀕𑀫𑀗𑁆𑀕𑀸𑀦𑀺 𑀔𑀸𑀤𑀢𑀺.

𑁩𑁬𑁫. ‘‘𑀢𑁆𑀯𑀜𑁆𑀘 𑀤𑁂𑀯 𑀩𑀳𑀼𑀓𑀸𑀭𑁄, 𑀅𑀢𑁆𑀣𑀸𑀬 𑀫𑁂 𑀇𑀥𑀸𑀕𑀢𑁄;

𑀲𑀼𑀫𑀼𑀢𑁆𑀢𑀸𑀳𑀁 𑀓𑀡𑁆𑀡𑀫𑀼𑀡𑁆𑀟𑀲𑁆𑀲, 𑀅𑀲𑁄𑀓𑀸 𑀅𑀓𑀼𑀢𑁄𑀪𑀬𑀸.

𑁩𑁬𑁬. ‘‘𑀢𑀸𑀳𑀁 𑀤𑁂𑀯 𑀦𑀫𑀲𑁆𑀲𑀸𑀫𑀺, 𑀬𑀸𑀘𑀸𑀫𑀺 𑀧𑀜𑁆𑀚𑀮𑀻𑀓𑀢𑀸;

𑀪𑀼𑀜𑁆𑀚 𑀅𑀫𑀸𑀦𑀼𑀲𑁂 𑀓𑀸𑀫𑁂, 𑀭𑀫 𑀤𑁂𑀯 𑀫𑀬𑀸 𑀲𑀳𑀸’’𑀢𑀺.

𑁩𑁬𑁭. ‘‘𑀪𑀼𑀢𑁆𑀢𑀸 𑀅𑀫𑀸𑀦𑀼𑀲𑀸 𑀓𑀸𑀫𑀸, 𑀭𑀫𑀺𑀢𑁄𑀫𑁆𑀳𑀺 𑀢𑀬𑀸 𑀲𑀳;

𑀢𑀸𑀳𑀁 𑀲𑀼𑀪𑀕𑁂 𑀬𑀸𑀘𑀸𑀫𑀺, 𑀔𑀺𑀧𑁆𑀧𑀁 𑀧𑀝𑀺𑀦𑀬𑀸𑀳𑀺 𑀫’’𑀦𑁆𑀢𑀺.

𑀓𑀡𑁆𑀡𑀫𑀼𑀡𑁆𑀟𑀧𑁂𑀢𑀺𑀯𑀢𑁆𑀣𑀼 𑀤𑁆𑀯𑀸𑀤𑀲𑀫𑀁.