𑁧𑁧. 𑀲𑀼𑀢𑁆𑀢𑀧𑁂𑀢𑀯𑀢𑁆𑀣𑀼

𑁩𑁪𑁧. ‘‘𑀅𑀳𑀁 𑀧𑀼𑀭𑁂 𑀧𑀩𑁆𑀩𑀚𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀲𑀼𑀢𑁆𑀢𑀁 𑀅𑀤𑀸𑀲𑀺𑀁 𑀉𑀧𑀲𑀗𑁆𑀓𑀫𑁆𑀫 𑀬𑀸𑀘𑀺𑀢𑀸;

𑀢𑀲𑁆𑀲 𑀯𑀺𑀧𑀸𑀓𑁄 𑀯𑀺𑀧𑀼𑀮𑀨𑀮𑀽𑀧𑀮𑀩𑁆𑀪𑀢𑀺, 𑀩𑀳𑀼𑀓𑀸 𑀘 𑀫𑁂 𑀉𑀧𑁆𑀧𑀚𑁆𑀚𑀭𑁂 [𑀩𑀳𑀽 𑀘 𑀫𑁂 𑀉𑀧𑀧𑀚𑁆𑀚𑀭𑁂 (𑀲𑀻.)] 𑀯𑀢𑁆𑀣𑀓𑁄𑀝𑀺𑀬𑁄.

𑁩𑁪𑁨. ‘‘𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀁 𑀭𑀫𑀺𑀢𑀁 [𑀭𑀫𑁆𑀫𑀫𑀺𑀤𑀁 (𑀓.)] 𑀯𑀺𑀫𑀸𑀦𑀁, 𑀅𑀦𑁂𑀓𑀘𑀺𑀢𑁆𑀢𑀁 𑀦𑀭𑀦𑀸𑀭𑀺𑀲𑁂𑀯𑀺𑀢𑀁;

𑀲𑀸𑀳𑀁 𑀪𑀼𑀜𑁆𑀚𑀸𑀫𑀺 𑀘 𑀧𑀸𑀭𑀼𑀧𑀸𑀫𑀺 𑀘, 𑀧𑀳𑀽𑀢𑀯𑀺𑀢𑁆𑀢𑀸 𑀦 𑀘 𑀢𑀸𑀯 𑀔𑀻𑀬𑀢𑀺.

𑁩𑁪𑁩. ‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀫𑀦𑁆𑀯𑀬𑀸, 𑀲𑀼𑀔𑀜𑁆𑀘 𑀲𑀸𑀢𑀜𑁆𑀘 𑀇𑀥𑀽𑀧𑀮𑀩𑁆𑀪𑀢𑀺;

𑀲𑀸𑀳𑀁 𑀕𑀦𑁆𑀢𑁆𑀯𑀸 𑀧𑀼𑀦𑀤𑁂𑀯 𑀫𑀸𑀦𑀼𑀲𑀁, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀦𑀬𑀬𑁆𑀬𑀧𑀼𑀢𑁆𑀢 𑀫’’𑀦𑁆𑀢𑀺.

𑁩𑁪𑁪. ‘‘𑀲𑀢𑁆𑀢 𑀢𑀼𑀯𑀁 𑀯𑀲𑁆𑀲𑀲𑀢𑀸 𑀇𑀥𑀸𑀕𑀢𑀸,

𑀚𑀺𑀡𑁆𑀡𑀸 𑀘 𑀯𑀼𑀟𑁆𑀠𑀸 𑀘 𑀢𑀳𑀺𑀁 𑀪𑀯𑀺𑀲𑁆𑀲𑀲𑀺;

𑀲𑀩𑁆𑀩𑁂𑀯 𑀢𑁂 𑀓𑀸𑀮𑀓𑀢𑀸 𑀘 𑀜𑀸𑀢𑀓𑀸,

𑀓𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸𑀦 𑀇𑀢𑁄 𑀓𑀭𑀺𑀲𑁆𑀲𑀲𑀻’’𑀢𑀺.

𑁩𑁪𑁫. ‘‘𑀲𑀢𑁆𑀢𑁂𑀯 𑀯𑀲𑁆𑀲𑀸𑀦𑀺 𑀇𑀥𑀸𑀕𑀢𑀸𑀬 𑀫𑁂, 𑀤𑀺𑀩𑁆𑀩𑀜𑁆𑀘 𑀲𑀼𑀔𑀜𑁆𑀘 𑀲𑀫𑀧𑁆𑀧𑀺𑀢𑀸𑀬;

𑀲𑀸𑀳𑀁 𑀕𑀦𑁆𑀢𑁆𑀯𑀸𑀦 𑀧𑀼𑀦𑀤𑁂𑀯 𑀫𑀸𑀦𑀼𑀲𑀁, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀦𑀬𑀬𑁆𑀬𑀧𑀼𑀢𑁆𑀢 𑀫’’𑀦𑁆𑀢𑀺.

𑁩𑁪𑁬. 𑀲𑁄 𑀢𑀁 𑀕𑀳𑁂𑀢𑁆𑀯𑀸𑀦 𑀧𑀲𑀬𑁆𑀳 𑀩𑀸𑀳𑀸𑀬𑀁, 𑀧𑀘𑁆𑀘𑀸𑀦𑀬𑀺𑀢𑁆𑀯𑀸𑀦 𑀣𑁂𑀭𑀺𑀁 𑀲𑀼𑀤𑀼𑀩𑁆𑀩𑀮𑀁;

‘‘𑀯𑀚𑁆𑀚𑁂𑀲𑀺 𑀅𑀜𑁆𑀜𑀫𑁆𑀧𑀺 𑀚𑀦𑀁 𑀇𑀥𑀸𑀕𑀢𑀁, ‘𑀓𑀭𑁄𑀣 𑀧𑀼𑀜𑁆𑀜𑀸𑀦𑀺 𑀲𑀼𑀔𑀽𑀧𑀮𑀩𑁆𑀪𑀢𑀺’’.

𑁩𑁪𑁭. ‘‘𑀤𑀺𑀝𑁆𑀞𑀸 𑀫𑀬𑀸 𑀅𑀓𑀢𑁂𑀦 𑀲𑀸𑀥𑀼𑀦𑀸, 𑀧𑁂𑀢𑀸 𑀯𑀺𑀳𑀜𑁆𑀜𑀦𑁆𑀢𑀺 𑀢𑀣𑁂𑀯 𑀫𑀦𑀼𑀲𑁆𑀲𑀸;

𑀓𑀫𑁆𑀫𑀜𑁆𑀘 𑀓𑀢𑁆𑀯𑀸 𑀲𑀼𑀔𑀯𑁂𑀤𑀦𑀻𑀬𑀁, 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘 𑀲𑀼𑀔𑁂 𑀞𑀺𑀢𑀸 𑀧𑀚𑀸’’𑀢𑀺.

𑀲𑀼𑀢𑁆𑀢𑀧𑁂𑀢𑀯𑀢𑁆𑀣𑀼 𑀏𑀓𑀸𑀤𑀲𑀫𑀁.