𑁧. 𑀲𑀁𑀲𑀸𑀭𑀫𑁄𑀘𑀓𑀧𑁂𑀢𑀺𑀯𑀢𑁆𑀣𑀼

𑁯𑁫. ‘‘𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀺, 𑀓𑀺𑀲𑀸 𑀥𑀫𑀦𑀺𑀲𑀦𑁆𑀣𑀢𑀸;

𑀉𑀧𑁆𑀨𑀸𑀲𑀼𑀮𑀺𑀓𑁂 [𑀉𑀧𑁆𑀧𑀸𑀲𑀼𑀴𑀺𑀓𑁂 (𑀓.)] 𑀓𑀺𑀲𑀺𑀓𑁂, 𑀓𑀸 𑀦𑀼 𑀢𑁆𑀯𑀁 𑀇𑀥 𑀢𑀺𑀝𑁆𑀞𑀲𑀻’’𑀢𑀺.

𑁯𑁬. ‘‘𑀅𑀳𑀁 𑀪𑀤𑀦𑁆𑀢𑁂 𑀧𑁂𑀢𑀻𑀫𑁆𑀳𑀺, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺.

𑁯𑁭. ‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺.

𑁯𑁮. ‘‘𑀅𑀦𑀼𑀓𑀫𑁆𑀧𑀓𑀸 𑀫𑀬𑁆𑀳𑀁 𑀦𑀸𑀳𑁂𑀲𑀼𑀁 𑀪𑀦𑁆𑀢𑁂, 𑀧𑀺𑀢𑀸 𑀘 𑀫𑀸𑀢𑀸 𑀅𑀣𑀯𑀸𑀧𑀺 𑀜𑀸𑀢𑀓𑀸;

𑀬𑁂 𑀫𑀁 𑀦𑀺𑀬𑁄𑀚𑁂𑀬𑁆𑀬𑀼𑀁 𑀤𑀤𑀸𑀳𑀺 𑀤𑀸𑀦𑀁, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁.

𑁯𑁯. ‘‘𑀇𑀢𑁄 𑀅𑀳𑀁 𑀯𑀲𑁆𑀲𑀲𑀢𑀸𑀦𑀺 𑀧𑀜𑁆𑀘, 𑀬𑀁 𑀏𑀯𑀭𑀽𑀧𑀸 𑀯𑀺𑀘𑀭𑀸𑀫𑀺 𑀦𑀕𑁆𑀕𑀸;

𑀔𑀼𑀤𑀸𑀬 𑀢𑀡𑁆𑀳𑀸𑀬 𑀘 𑀔𑀚𑁆𑀚𑀫𑀸𑀦𑀸, 𑀧𑀸𑀧𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀁 𑀫𑀫𑁂𑀤𑀁.

𑁧𑁦𑁦. ‘‘𑀯𑀦𑁆𑀤𑀸𑀫𑀺 𑀢𑀁 𑀅𑀬𑁆𑀬 𑀧𑀲𑀦𑁆𑀦𑀘𑀺𑀢𑁆𑀢𑀸, 𑀅𑀦𑀼𑀓𑀫𑁆𑀧 𑀫𑀁 𑀯𑀻𑀭 𑀫𑀳𑀸𑀦𑀼𑀪𑀸𑀯;

𑀤𑀢𑁆𑀯𑀸 𑀘 𑀫𑁂 𑀆𑀤𑀺𑀲 𑀬𑀁 𑀳𑀺 𑀓𑀺𑀜𑁆𑀘𑀺, 𑀫𑁄𑀘𑁂𑀳𑀺 𑀫𑀁 𑀤𑀼𑀕𑁆𑀕𑀢𑀺𑀬𑀸 𑀪𑀤𑀦𑁆𑀢𑁂’’𑀢𑀺.

𑁧𑁦𑁧. 𑀲𑀸𑀥𑀽𑀢𑀺 𑀲𑁄 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀲𑀸𑀭𑀺𑀧𑀼𑀢𑁆𑀢𑁄𑀦𑀼𑀓𑀫𑁆𑀧𑀓𑁄;

𑀪𑀺𑀓𑁆𑀔𑀽𑀦𑀁 𑀆𑀮𑁄𑀧𑀁 𑀤𑀢𑁆𑀯𑀸, 𑀧𑀸𑀡𑀺𑀫𑀢𑁆𑀢𑀜𑁆𑀘 𑀘𑁄𑀴𑀓𑀁;

𑀣𑀸𑀮𑀓𑀲𑁆𑀲 𑀘 𑀧𑀸𑀦𑀻𑀬𑀁, 𑀢𑀲𑁆𑀲𑀸 𑀤𑀓𑁆𑀔𑀺𑀡𑀫𑀸𑀤𑀺𑀲𑀺.

𑁧𑁦𑁨. 𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀯𑀺𑀧𑀸𑀓𑁄 𑀉𑀤𑀧𑀚𑁆𑀚𑀣;

𑀪𑁄𑀚𑀦𑀘𑁆𑀙𑀸𑀤𑀦𑀧𑀸𑀦𑀻𑀬𑀁, 𑀤𑀓𑁆𑀔𑀺𑀡𑀸𑀬 𑀇𑀤𑀁 𑀨𑀮𑀁.

𑁧𑁦𑁩. 𑀢𑀢𑁄 𑀲𑀼𑀤𑁆𑀥𑀸 𑀲𑀼𑀘𑀺𑀯𑀲𑀦𑀸, 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑀻;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸, 𑀲𑀸𑀭𑀺𑀧𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀺.

𑁧𑁦𑁪. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁧𑁦𑁫. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁦𑁬. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁦𑁭. ‘‘𑀉𑀧𑁆𑀧𑀡𑁆𑀟𑀼𑀓𑀺𑀁 𑀓𑀺𑀲𑀁 𑀙𑀸𑀢𑀁, 𑀦𑀕𑁆𑀕𑀁 𑀲𑀫𑁆𑀧𑀢𑀺𑀢𑀘𑁆𑀙𑀯𑀺𑀁 [𑀆𑀧𑀢𑀺𑀢𑀘𑁆𑀙𑀯𑀺𑀁 (𑀲𑀻.)];

𑀫𑀼𑀦𑀺 𑀓𑀸𑀭𑀼𑀡𑀺𑀓𑁄 𑀮𑁄𑀓𑁂, 𑀢𑀁 𑀫𑀁 𑀅𑀤𑁆𑀤𑀓𑁆𑀔𑀺 𑀤𑀼𑀕𑁆𑀕𑀢𑀁.

𑁧𑁦𑁮. ‘‘𑀪𑀺𑀓𑁆𑀔𑀽𑀦𑀁 𑀆𑀮𑁄𑀧𑀁 𑀤𑀢𑁆𑀯𑀸, 𑀧𑀸𑀡𑀺𑀫𑀢𑁆𑀢𑀜𑁆𑀘 𑀘𑁄𑀴𑀓𑀁;

𑀣𑀸𑀮𑀓𑀲𑁆𑀲 𑀘 𑀧𑀸𑀦𑀻𑀬𑀁, 𑀫𑀫 𑀤𑀓𑁆𑀔𑀺𑀡𑀫𑀸𑀤𑀺𑀲𑀺.

𑁧𑁦𑁯. ‘‘𑀆𑀮𑁄𑀧𑀲𑁆𑀲 𑀨𑀮𑀁 𑀧𑀲𑁆𑀲, 𑀪𑀢𑁆𑀢𑀁 𑀯𑀲𑁆𑀲𑀲𑀢𑀁 𑀤𑀲;

𑀪𑀼𑀜𑁆𑀚𑀸𑀫𑀺 𑀓𑀸𑀫𑀓𑀸𑀫𑀺𑀦𑀻, 𑀅𑀦𑁂𑀓𑀭𑀲𑀩𑁆𑀬𑀜𑁆𑀚𑀦𑀁.

𑁧𑁧𑁦. ‘‘𑀧𑀸𑀡𑀺𑀫𑀢𑁆𑀢𑀲𑁆𑀲 𑀘𑁄𑀴𑀲𑁆𑀲, 𑀯𑀺𑀧𑀸𑀓𑀁 𑀧𑀲𑁆𑀲 𑀬𑀸𑀤𑀺𑀲𑀁;

𑀬𑀸𑀯𑀢𑀸 𑀦𑀦𑁆𑀤𑀭𑀸𑀚𑀲𑁆𑀲, 𑀯𑀺𑀚𑀺𑀢𑀲𑁆𑀫𑀺𑀁 𑀧𑀝𑀺𑀘𑁆𑀙𑀤𑀸.

𑁧𑁧𑁧. ‘‘𑀢𑀢𑁄 𑀩𑀳𑀼𑀢𑀭𑀸 𑀪𑀦𑁆𑀢𑁂, 𑀯𑀢𑁆𑀣𑀸𑀦𑀘𑁆𑀙𑀸𑀤𑀦𑀸𑀦𑀺 𑀫𑁂;

𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀻𑀬𑀸𑀦𑀺, 𑀔𑁄𑀫𑀓𑀧𑁆𑀧𑀸𑀲𑀺𑀓𑀸𑀦𑀺 𑀘.

𑁧𑁧𑁨. ‘‘𑀯𑀺𑀧𑀼𑀮𑀸 𑀘 𑀫𑀳𑀕𑁆𑀖𑀸 𑀘, 𑀢𑁂𑀧𑀸𑀓𑀸𑀲𑁂𑀯𑀮𑀫𑁆𑀩𑀭𑁂;

𑀲𑀸𑀳𑀁 𑀢𑀁 𑀧𑀭𑀺𑀤𑀳𑀸𑀫𑀺, 𑀬𑀁 𑀬𑀁 𑀳𑀺 𑀫𑀦𑀲𑁄 𑀧𑀺𑀬𑀁.

𑁧𑁧𑁩. ‘‘𑀣𑀸𑀮𑀓𑀲𑁆𑀲 𑀘 𑀧𑀸𑀦𑀻𑀬𑀁, 𑀯𑀺𑀧𑀸𑀓𑀁 𑀧𑀲𑁆𑀲 𑀬𑀸𑀤𑀺𑀲𑀁;

𑀕𑀫𑁆𑀪𑀻𑀭𑀸 𑀘𑀢𑀼𑀭𑀲𑁆𑀲𑀸 𑀘, 𑀧𑁄𑀓𑁆𑀔𑀭𑀜𑁆𑀜𑁄 𑀲𑀼𑀦𑀺𑀫𑁆𑀫𑀺𑀢𑀸.

𑁧𑁧𑁪. ‘‘𑀲𑁂𑀢𑁄𑀤𑀓𑀸 𑀲𑀼𑀧𑁆𑀧𑀢𑀺𑀢𑁆𑀣𑀸, 𑀲𑀻𑀢𑀸 𑀅𑀧𑁆𑀧𑀝𑀺𑀕𑀦𑁆𑀥𑀺𑀬𑀸;

𑀧𑀤𑀼𑀫𑀼𑀧𑁆𑀧𑀮𑀲𑀜𑁆𑀙𑀦𑁆𑀦𑀸, 𑀯𑀸𑀭𑀺𑀓𑀺𑀜𑁆𑀚𑀓𑁆𑀔𑀧𑀽𑀭𑀺𑀢𑀸.

𑁧𑁧𑁫. ‘‘𑀲𑀸𑀳𑀁 𑀭𑀫𑀸𑀫𑀺 𑀓𑀻𑀴𑀸𑀫𑀺, 𑀫𑁄𑀤𑀸𑀫𑀺 𑀅𑀓𑀼𑀢𑁄𑀪𑀬𑀸;

𑀫𑀼𑀦𑀺𑀁 𑀓𑀸𑀭𑀼𑀡𑀺𑀓𑀁 𑀮𑁄𑀓𑁂, 𑀪𑀦𑁆𑀢𑁂 𑀯𑀦𑁆𑀤𑀺𑀢𑀼𑀫𑀸𑀕𑀢𑀸’’𑀢𑀺.

𑀲𑀁𑀲𑀸𑀭𑀫𑁄𑀘𑀓𑀧𑁂𑀢𑀺𑀯𑀢𑁆𑀣𑀼 𑀧𑀞𑀫𑀁.