𑁧𑁧. 𑀦𑀸𑀕𑀧𑁂𑀢𑀯𑀢𑁆𑀣𑀼

𑁭𑁩. ‘‘𑀧𑀼𑀭𑀢𑁄𑀯 [𑀧𑀼𑀭𑀢𑁄 𑀘 (𑀲𑁆𑀬𑀸.)] 𑀲𑁂𑀢𑁂𑀦 𑀧𑀮𑁂𑀢𑀺 𑀳𑀢𑁆𑀣𑀺𑀦𑀸, 𑀫𑀚𑁆𑀛𑁂 𑀧𑀦 𑀅𑀲𑁆𑀲𑀢𑀭𑀻𑀭𑀣𑁂𑀦;

𑀧𑀘𑁆𑀙𑀸 𑀘 𑀓𑀜𑁆𑀜𑀸 𑀲𑀺𑀯𑀺𑀓𑀸𑀬 𑀦𑀻𑀬𑀢𑀺, 𑀑𑀪𑀸𑀲𑀬𑀦𑁆𑀢𑀻 𑀤𑀲 𑀲𑀩𑁆𑀩𑀢𑁄 [𑀲𑀩𑁆𑀩𑀢𑁄 (𑀓.)] 𑀤𑀺𑀲𑀸.

𑁭𑁪. ‘‘𑀢𑀼𑀫𑁆𑀳𑁂 𑀧𑀦 𑀫𑀼𑀕𑁆𑀕𑀭𑀳𑀢𑁆𑀣𑀧𑀸𑀡𑀺𑀦𑁄, 𑀭𑀼𑀤𑀁𑀫𑀼𑀔𑀸 𑀙𑀺𑀦𑁆𑀦𑀧𑀪𑀺𑀦𑁆𑀦𑀕𑀢𑁆𑀢𑀸;

𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀢𑁆𑀣 𑀧𑀸𑀧𑀁, 𑀬𑁂𑀦𑀜𑁆𑀜𑀫𑀜𑁆𑀜𑀲𑁆𑀲 𑀧𑀺𑀯𑀸𑀣 𑀮𑁄𑀳𑀺𑀢’’𑀦𑁆𑀢𑀺.

𑁭𑁫. ‘‘𑀧𑀼𑀭𑀢𑁄𑀯 𑀬𑁄 𑀕𑀘𑁆𑀙𑀢𑀺 𑀓𑀼𑀜𑁆𑀚𑀭𑁂𑀦, 𑀲𑁂𑀢𑁂𑀦 𑀦𑀸𑀕𑁂𑀦 𑀘𑀢𑀼𑀓𑁆𑀓𑀫𑁂𑀦;

𑀅𑀫𑁆𑀳𑀸𑀓 𑀧𑀼𑀢𑁆𑀢𑁄 𑀅𑀳𑀼 𑀚𑁂𑀝𑁆𑀞𑀓𑁄 𑀲𑁄 [𑀲𑁄𑀯 𑀚𑁂𑀝𑁆𑀞𑁄 (𑀓.)], 𑀤𑀸𑀦𑀸𑀦𑀺 𑀤𑀢𑁆𑀯𑀸𑀦 𑀲𑀼𑀔𑀻 𑀧𑀫𑁄𑀤𑀢𑀺.

𑁭𑁬. ‘‘𑀬𑁄 𑀲𑁄 𑀫𑀚𑁆𑀛𑁂 𑀅𑀲𑁆𑀲𑀢𑀭𑀻𑀭𑀣𑁂𑀦, 𑀘𑀢𑀼𑀩𑁆𑀪𑀺 𑀬𑀼𑀢𑁆𑀢𑁂𑀦 𑀲𑀼𑀯𑀕𑁆𑀕𑀺𑀢𑁂𑀦;

𑀅𑀫𑁆𑀳𑀸𑀓 𑀧𑀼𑀢𑁆𑀢𑁄 𑀅𑀳𑀼 𑀫𑀚𑁆𑀛𑀺𑀫𑁄 𑀲𑁄, 𑀅𑀫𑀘𑁆𑀙𑀭𑀻 𑀤𑀸𑀦𑀯𑀢𑀻 𑀯𑀺𑀭𑁄𑀘𑀢𑀺.

𑁭𑁭. ‘‘𑀬𑀸 𑀲𑀸 𑀘 𑀧𑀘𑁆𑀙𑀸 𑀲𑀺𑀯𑀺𑀓𑀸𑀬 𑀦𑀻𑀬𑀢𑀺, 𑀦𑀸𑀭𑀻 𑀲𑀧𑀜𑁆𑀜𑀸 𑀫𑀺𑀕𑀫𑀦𑁆𑀤𑀮𑁄𑀘𑀦𑀸;

𑀅𑀫𑁆𑀳𑀸𑀓 𑀥𑀻𑀢𑀸 𑀅𑀳𑀼 𑀲𑀸 𑀓𑀦𑀺𑀝𑁆𑀞𑀺𑀓𑀸, 𑀪𑀸𑀕𑀟𑁆𑀠𑀪𑀸𑀕𑁂𑀦 𑀲𑀼𑀔𑀻 𑀧𑀫𑁄𑀤𑀢𑀺.

𑁭𑁮. ‘‘𑀏𑀢𑁂 𑀘 𑀤𑀸𑀦𑀸𑀦𑀺 𑀅𑀤𑀁𑀲𑀼 𑀧𑀼𑀩𑁆𑀩𑁂, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;

𑀫𑀬𑀁 𑀧𑀦 𑀫𑀘𑁆𑀙𑀭𑀺𑀦𑁄 𑀅𑀳𑀼𑀫𑁆𑀳, 𑀧𑀭𑀺𑀪𑀸𑀲𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;

𑀏𑀢𑁂 𑀘 𑀤𑀢𑁆𑀯𑀸 𑀧𑀭𑀺𑀘𑀸𑀭𑀬𑀦𑁆𑀢𑀺, 𑀫𑀬𑀜𑁆𑀘 𑀲𑀼𑀲𑁆𑀲𑀸𑀫 𑀦𑀴𑁄𑀯 𑀙𑀺𑀦𑁆𑀦𑁄’’𑀢𑀺 [𑀔𑀺𑀢𑁆𑀢𑁄𑀢𑀺 (𑀲𑀻.)].

𑁭𑁯. ‘‘𑀓𑀺𑀁 𑀢𑀼𑀫𑁆𑀳𑀸𑀓𑀁 𑀪𑁄𑀚𑀦𑀁 𑀓𑀺𑀁 𑀲𑀬𑀸𑀦𑀁, 𑀓𑀣𑀜𑁆𑀘 𑀬𑀸𑀧𑁂𑀣 𑀲𑀼𑀧𑀸𑀧𑀥𑀫𑁆𑀫𑀺𑀦𑁄;

𑀧𑀳𑀽𑀢𑀪𑁄𑀕𑁂𑀲𑀼 𑀅𑀦𑀧𑁆𑀧𑀓𑁂𑀲𑀼, 𑀲𑀼𑀔𑀁 𑀯𑀺𑀭𑀸𑀥𑀸𑀬 [𑀯𑀺𑀭𑀸𑀕𑀸𑀬 (𑀲𑁆𑀬𑀸. 𑀓.)] 𑀤𑀼𑀓𑁆𑀔𑀚𑁆𑀚 𑀧𑀢𑁆𑀢𑀸’’𑀢𑀺.

𑁮𑁦. ‘‘𑀅𑀜𑁆𑀜𑀫𑀜𑁆𑀜𑀁 𑀯𑀥𑀺𑀢𑁆𑀯𑀸𑀦, 𑀧𑀺𑀯𑀸𑀫 𑀧𑀼𑀩𑁆𑀩𑀮𑁄𑀳𑀺𑀢𑀁;

𑀩𑀳𑀼𑀁 𑀧𑀺𑀢𑁆𑀯𑀸 𑀦 𑀥𑀸𑀢𑀸 𑀳𑁄𑀫, 𑀦𑀘𑁆𑀙𑀸𑀤𑀺𑀫𑁆𑀳𑀲𑁂 [𑀦𑀭𑀼𑀘𑁆𑀘𑀸𑀤𑀺𑀫𑁆𑀳𑀲𑁂 (𑀓.)] 𑀫𑀬𑀁.

𑁮𑁧. ‘‘𑀇𑀘𑁆𑀘𑁂𑀯 𑀫𑀘𑁆𑀘𑀸 𑀧𑀭𑀺𑀤𑁂𑀯𑀬𑀦𑁆𑀢𑀺, 𑀅𑀤𑀸𑀬𑀓𑀸 𑀧𑁂𑀘𑁆𑀘 [𑀫𑀘𑁆𑀙𑀭𑀺𑀦𑁄 (𑀓.)] 𑀬𑀫𑀲𑁆𑀲 𑀞𑀸𑀬𑀺𑀦𑁄;

𑀬𑁂 𑀢𑁂 𑀯𑀺𑀤𑀺𑀘𑁆𑀘 [𑀯𑀺𑀤𑀺𑀢𑁆𑀯𑀸 (𑀲𑀻.)] 𑀅𑀥𑀺𑀕𑀫𑁆𑀫 𑀪𑁄𑀕𑁂, 𑀦 𑀪𑀼𑀜𑁆𑀚𑀭𑁂 𑀦𑀸𑀧𑀺 𑀓𑀭𑁄𑀦𑁆𑀢𑀺 𑀧𑀼𑀜𑁆𑀜𑀁.

𑁮𑁨. ‘‘𑀢𑁂 𑀔𑀼𑀧𑁆𑀧𑀺𑀧𑀸𑀲𑀽𑀧𑀕𑀢𑀸 𑀧𑀭𑀢𑁆𑀣, 𑀧𑀘𑁆𑀙𑀸 [𑀧𑁂𑀢𑀸 (𑀲𑀻.)] 𑀘𑀺𑀭𑀁 𑀛𑀸𑀬𑀭𑁂 𑀟𑀬𑁆𑀳𑀫𑀸𑀦𑀸;

𑀓𑀫𑁆𑀫𑀸𑀦𑀺 𑀓𑀢𑁆𑀯𑀸𑀦 𑀤𑀼𑀔𑀼𑀤𑁆𑀭𑀸𑀦𑀺, 𑀅𑀦𑀼𑀪𑁄𑀦𑁆𑀢𑀺 𑀤𑀼𑀓𑁆𑀔𑀁 𑀓𑀝𑀼𑀓𑀧𑁆𑀨𑀮𑀸𑀦𑀺.

𑁮𑁩. ‘‘𑀇𑀢𑁆𑀢𑀭𑀁 𑀳𑀺 𑀥𑀦𑀁 𑀥𑀜𑁆𑀜𑀁, 𑀇𑀢𑁆𑀢𑀭𑀁 𑀇𑀥 𑀚𑀻𑀯𑀺𑀢𑀁;

𑀇𑀢𑁆𑀢𑀭𑀁 𑀇𑀢𑁆𑀢𑀭𑀢𑁄 𑀜𑀢𑁆𑀯𑀸, 𑀤𑀻𑀧𑀁 𑀓𑀬𑀺𑀭𑀸𑀣 𑀧𑀡𑁆𑀟𑀺𑀢𑁄.

𑁮𑁪. ‘‘𑀬𑁂 𑀢𑁂 𑀏𑀯𑀁 𑀧𑀚𑀸𑀦𑀦𑁆𑀢𑀺, 𑀦𑀭𑀸 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸;

𑀢𑁂 𑀤𑀸𑀦𑁂 𑀦𑀧𑁆𑀧𑀫𑀚𑁆𑀚𑀦𑁆𑀢𑀺, 𑀲𑀼𑀢𑁆𑀯𑀸 𑀅𑀭𑀳𑀢𑀁 𑀯𑀘𑁄’’𑀢𑀺.

𑀦𑀸𑀕𑀧𑁂𑀢𑀯𑀢𑁆𑀣𑀼 𑀏𑀓𑀸𑀤𑀲𑀫𑀁.