𑁧𑁨. 𑀉𑀭𑀕𑀧𑁂𑀢𑀯𑀢𑁆𑀣𑀼

𑁮𑁫. ‘‘𑀉𑀭𑀕𑁄𑀯 𑀢𑀘𑀁 𑀚𑀺𑀡𑁆𑀡𑀁, 𑀳𑀺𑀢𑁆𑀯𑀸 𑀕𑀘𑁆𑀙𑀢𑀺 𑀲𑀦𑁆𑀢𑀦𑀼𑀁;

𑀏𑀯𑀁 𑀲𑀭𑀻𑀭𑁂 𑀦𑀺𑀩𑁆𑀪𑁄𑀕𑁂, 𑀧𑁂𑀢𑁂 𑀓𑀸𑀮𑀗𑁆𑀓𑀢𑁂 𑀲𑀢𑀺.

𑁮𑁬. ‘‘𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀭𑁄𑀤𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀺’’.

𑁮𑁭. ‘‘𑀅𑀦𑀩𑁆𑀪𑀺𑀢𑁄 [𑀅𑀦𑀯𑁆𑀳𑀺𑀢𑁄 (𑀲𑀻.)] 𑀢𑀢𑁄 𑀆𑀕𑀸, 𑀦𑀸𑀦𑀼𑀜𑁆𑀜𑀸𑀢𑁄 𑀇𑀢𑁄 𑀕𑀢𑁄;

𑀬𑀣𑀸𑀕𑀢𑁄 𑀢𑀣𑀸 𑀕𑀢𑁄, 𑀢𑀢𑁆𑀣 𑀓𑀸 [𑀓𑀸 𑀢𑀢𑁆𑀣 (𑀲𑀻.)] 𑀧𑀭𑀺𑀤𑁂𑀯𑀦𑀸.

𑁮𑁮. ‘‘𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀭𑁄𑀤𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀺’’.

𑁮𑁯. ‘‘𑀲𑀘𑁂 𑀭𑁄𑀤𑁂 𑀓𑀺𑀲𑀸 𑀅𑀲𑁆𑀲𑀁, 𑀢𑀢𑁆𑀣 𑀫𑁂 𑀓𑀺𑀁 𑀨𑀮𑀁 𑀲𑀺𑀬𑀸;

𑀜𑀸𑀢𑀺𑀫𑀺𑀢𑁆𑀢𑀲𑀼𑀳𑀚𑁆𑀚𑀸𑀦𑀁, 𑀪𑀺𑀬𑁆𑀬𑁄 𑀦𑁄 𑀅𑀭𑀢𑀻 𑀲𑀺𑀬𑀸.

𑁯𑁦. ‘‘𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀭𑁄𑀤𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀺’’.

𑁯𑁧. ‘‘𑀬𑀣𑀸𑀧𑀺 𑀤𑀸𑀭𑀓𑁄 𑀘𑀦𑁆𑀤𑀁, 𑀕𑀘𑁆𑀙𑀦𑁆𑀢𑀫𑀦𑀼𑀭𑁄𑀤𑀢𑀺;

𑀏𑀯𑀁 𑀲𑀫𑁆𑀧𑀤𑀫𑁂𑀯𑁂𑀢𑀁, 𑀬𑁄 𑀧𑁂𑀢𑀫𑀦𑀼𑀲𑁄𑀘𑀢𑀺.

𑁯𑁨. ‘‘𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀭𑁄𑀤𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀺’’.

𑁯𑁩. ‘‘𑀬𑀣𑀸𑀧𑀺 𑀩𑁆𑀭𑀳𑁆𑀫𑁂 𑀉𑀤𑀓𑀼𑀫𑁆𑀪𑁄, 𑀪𑀺𑀦𑁆𑀦𑁄 𑀅𑀧𑁆𑀧𑀝𑀺𑀲𑀦𑁆𑀥𑀺𑀬𑁄;

𑀏𑀯𑀁 𑀲𑀫𑁆𑀧𑀤𑀫𑁂𑀯𑁂𑀢𑀁, 𑀬𑁄 𑀧𑁂𑀢𑀫𑀦𑀼𑀲𑁄𑀘𑀢𑀺.

𑁯𑁪. ‘‘𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀭𑁄𑀤𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀻’’𑀢𑀺.

𑀉𑀭𑀕𑀧𑁂𑀢𑀯𑀢𑁆𑀣𑀼 𑀤𑁆𑀯𑀸𑀤𑀲𑀫𑀁.

𑀉𑀭𑀕𑀯𑀕𑁆𑀕𑁄 𑀧𑀞𑀫𑁄 𑀦𑀺𑀝𑁆𑀞𑀺𑀢𑁄.