𑁧𑁦. 𑀔𑀮𑁆𑀮𑀸𑀝𑀺𑀬𑀧𑁂𑀢𑀺𑀯𑀢𑁆𑀣𑀼

𑁫𑁮. ‘‘𑀓𑀸 𑀦𑀼 𑀅𑀦𑁆𑀢𑁄𑀯𑀺𑀫𑀸𑀦𑀲𑁆𑀫𑀺𑀁, 𑀢𑀺𑀝𑁆𑀞𑀦𑁆𑀢𑀻 𑀦𑀽𑀧𑀦𑀺𑀓𑁆𑀔𑀫𑀺;

𑀉𑀧𑀦𑀺𑀓𑁆𑀔𑀫𑀲𑁆𑀲𑀼 𑀪𑀤𑁆𑀤𑁂, 𑀧𑀲𑁆𑀲𑀸𑀫 𑀢𑀁 𑀩𑀳𑀺𑀝𑁆𑀞𑀺𑀢’’𑀦𑁆𑀢𑀺.

𑁫𑁯. ‘‘𑀅𑀝𑁆𑀝𑀻𑀬𑀸𑀫𑀺 𑀳𑀭𑀸𑀬𑀸𑀫𑀺, 𑀦𑀕𑁆𑀕𑀸 𑀦𑀺𑀓𑁆𑀔𑀫𑀺𑀢𑀼𑀁 𑀩𑀳𑀺;

𑀓𑁂𑀲𑁂𑀳𑀫𑁆𑀳𑀺 𑀧𑀝𑀺𑀘𑁆𑀙𑀦𑁆𑀦𑀸, 𑀧𑀼𑀜𑁆𑀜𑀁 𑀫𑁂 𑀅𑀧𑁆𑀧𑀓𑀁 𑀓𑀢’’𑀦𑁆𑀢𑀺.

𑁬𑁦. ‘‘𑀳𑀦𑁆𑀤𑀼𑀢𑁆𑀢𑀭𑀻𑀬𑀁 𑀤𑀤𑀸𑀫𑀺 𑀢𑁂, 𑀇𑀤𑀁 𑀤𑀼𑀲𑁆𑀲𑀁 𑀦𑀺𑀯𑀸𑀲𑀬;

𑀇𑀤𑀁 𑀤𑀼𑀲𑁆𑀲𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀏𑀳𑀺 𑀦𑀺𑀓𑁆𑀔𑀫 𑀲𑁄𑀪𑀦𑁂;

𑀉𑀧𑀦𑀺𑀓𑁆𑀔𑀫𑀲𑁆𑀲𑀼 𑀪𑀤𑁆𑀤𑁂, 𑀧𑀲𑁆𑀲𑀸𑀫 𑀢𑀁 𑀩𑀳𑀺𑀝𑁆𑀞𑀺𑀢’’𑀦𑁆𑀢𑀺.

𑁬𑁧. ‘‘𑀳𑀢𑁆𑀣𑁂𑀦 𑀳𑀢𑁆𑀣𑁂 𑀢𑁂 𑀤𑀺𑀦𑁆𑀦𑀁, 𑀦 𑀫𑀬𑁆𑀳𑀁 𑀉𑀧𑀓𑀧𑁆𑀧𑀢𑀺;

𑀏𑀲𑁂𑀢𑁆𑀣𑀼𑀧𑀸𑀲𑀓𑁄 𑀲𑀤𑁆𑀥𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄.

𑁬𑁨. ‘‘𑀏𑀢𑀁 𑀅𑀘𑁆𑀙𑀸𑀤𑀬𑀺𑀢𑁆𑀯𑀸𑀦, 𑀫𑀫 𑀤𑀓𑁆𑀔𑀺𑀡𑀫𑀸𑀤𑀺𑀲;

𑀢𑀣𑀸𑀳𑀁 [𑀅𑀣𑀸𑀳𑀁 (𑀲𑀻.)] 𑀲𑀼𑀔𑀺𑀢𑀸 𑀳𑁂𑀲𑁆𑀲𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻’’𑀢𑀺.

𑁬𑁩. 𑀢𑀜𑁆𑀘 𑀢𑁂 𑀦𑁆𑀳𑀸𑀧𑀬𑀺𑀢𑁆𑀯𑀸𑀦, 𑀯𑀺𑀮𑀺𑀫𑁆𑀧𑁂𑀢𑁆𑀯𑀸𑀦 𑀯𑀸𑀡𑀺𑀚𑀸;

𑀯𑀢𑁆𑀣𑁂𑀳𑀘𑁆𑀙𑀸𑀤𑀬𑀺𑀢𑁆𑀯𑀸𑀦, 𑀢𑀲𑁆𑀲𑀸 𑀤𑀓𑁆𑀔𑀺𑀡𑀫𑀸𑀤𑀺𑀲𑀼𑀁.

𑁬𑁪. 𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂 [𑀲𑀫𑀦𑀦𑁆𑀢𑀭𑀸 𑀅𑀦𑀼𑀤𑁆𑀤𑀺𑀝𑁆𑀞𑁂 (𑀲𑁆𑀬𑀸. 𑀓.)], 𑀯𑀺𑀧𑀸𑀓𑁄 𑀉𑀤𑀧𑀚𑁆𑀚𑀣 [𑀉𑀧𑀧𑀚𑁆𑀚𑀣 (𑀲𑀻. 𑀲𑁆𑀬𑀸.)];

𑀪𑁄𑀚𑀦𑀘𑁆𑀙𑀸𑀤𑀦𑀧𑀸𑀦𑀻𑀬𑀁 [𑀪𑁄𑀚𑀦𑀘𑁆𑀙𑀸𑀤𑀦𑀁 𑀧𑀸𑀦𑀻𑀬𑀁 (𑀲𑁆𑀬𑀸. 𑀓.)], 𑀤𑀓𑁆𑀔𑀺𑀡𑀸𑀬 𑀇𑀤𑀁 𑀨𑀮𑀁.

𑁬𑁫. 𑀢𑀢𑁄 𑀲𑀼𑀤𑁆𑀥𑀸 𑀲𑀼𑀘𑀺𑀯𑀲𑀦𑀸, 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑀻;

𑀳𑀲𑀦𑁆𑀢𑀻 𑀯𑀺𑀫𑀸𑀦𑀸 𑀦𑀺𑀓𑁆𑀔𑀫𑀺, ‘𑀤𑀓𑁆𑀔𑀺𑀡𑀸𑀬 𑀇𑀤𑀁 𑀨𑀮’’’𑀦𑁆𑀢𑀺.

𑁬𑁬. ‘‘𑀲𑀼𑀘𑀺𑀢𑁆𑀢𑀭𑀽𑀧𑀁 𑀭𑀼𑀘𑀺𑀭𑀁, 𑀯𑀺𑀫𑀸𑀦𑀁 𑀢𑁂 𑀧𑀪𑀸𑀲𑀢𑀺;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺.

𑁬𑁭. ‘‘𑀪𑀺𑀓𑁆𑀔𑀼𑀦𑁄 𑀘𑀭𑀫𑀸𑀦𑀲𑁆𑀲, 𑀤𑁄𑀡𑀺𑀦𑀺𑀫𑁆𑀫𑀚𑁆𑀚𑀦𑀺𑀁 𑀅𑀳𑀁;

𑀅𑀤𑀸𑀲𑀺𑀁 𑀉𑀚𑀼𑀪𑀽𑀢𑀲𑁆𑀲, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁬𑁮. ‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀼𑀲𑀮𑀲𑁆𑀲, 𑀯𑀺𑀧𑀸𑀓𑀁 𑀤𑀻𑀖𑀫𑀦𑁆𑀢𑀭𑀁;

𑀅𑀦𑀼𑀪𑁄𑀫𑀺 𑀯𑀺𑀫𑀸𑀦𑀲𑁆𑀫𑀺𑀁, 𑀢𑀜𑁆𑀘 𑀤𑀸𑀦𑀺 𑀧𑀭𑀺𑀢𑁆𑀢𑀓𑀁.

𑁬𑁯. ‘‘𑀉𑀤𑁆𑀥𑀁 𑀘𑀢𑀽𑀳𑀺 𑀫𑀸𑀲𑁂𑀳𑀺, 𑀓𑀸𑀮𑀁𑀓𑀺𑀭𑀺𑀬𑀸 [𑀓𑀸𑀮𑀁𑀓𑀺𑀭𑀺𑀬𑀸 (𑀓.)] 𑀪𑀯𑀺𑀲𑁆𑀲𑀢𑀺;

𑀏𑀓𑀦𑁆𑀢𑀓𑀝𑀼𑀓𑀁 𑀖𑁄𑀭𑀁, 𑀦𑀺𑀭𑀬𑀁 𑀧𑀧𑀢𑀺𑀲𑁆𑀲𑀳𑀁.

𑁭𑁦. [𑀫. 𑀦𑀺. 𑁩.𑁨𑁫𑁦, 𑁨𑁬𑁭; 𑀅. 𑀦𑀺. 𑁩.𑁩𑁬; 𑀧𑁂. 𑀯. 𑁨𑁪𑁦, 𑁬𑁯𑁩] ‘‘𑀘𑀢𑀼𑀓𑁆𑀓𑀡𑁆𑀡𑀁 𑀘𑀢𑀼𑀤𑁆𑀯𑀸𑀭𑀁, 𑀯𑀺𑀪𑀢𑁆𑀢𑀁 𑀪𑀸𑀕𑀲𑁄 𑀫𑀺𑀢𑀁;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑀁, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑀁.

𑁭𑁧. ‘‘𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸.

𑁭𑁨. ‘‘𑀢𑀢𑁆𑀣𑀸𑀳𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀤𑀼𑀓𑁆𑀔𑀁 𑀯𑁂𑀤𑀺𑀲𑁆𑀲 𑀯𑁂𑀤𑀦𑀁;

𑀨𑀮𑀜𑁆𑀘 𑀧𑀸𑀧𑀓𑀫𑁆𑀫𑀲𑁆𑀲, 𑀢𑀲𑁆𑀫𑀸 𑀲𑁄𑀘𑀸𑀫𑀳𑀁 𑀪𑀼𑀲’’𑀦𑁆𑀢𑀺.

𑀔𑀮𑁆𑀮𑀸𑀝𑀺𑀬𑀧𑁂𑀢𑀺𑀯𑀢𑁆𑀣𑀼 𑀤𑀲𑀫𑀁.