𑁭. 𑀥𑀫𑁆𑀫𑀘𑀓𑁆𑀓𑀓𑀣𑀸

𑁧. 𑀲𑀘𑁆𑀘𑀯𑀸𑀭𑁄

𑁩𑁯. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺…𑀧𑁂… 𑀇𑀢𑀺 𑀳𑀺𑀤𑀁 𑀆𑀬𑀲𑁆𑀫𑀢𑁄 𑀓𑁄𑀡𑁆𑀟𑀜𑁆𑀜𑀲𑁆𑀲 ‘‘𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄’’ 𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺.

[𑀓] ‘‘𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

𑀘𑀓𑁆𑀔𑀼𑀁 𑀉𑀤𑀧𑀸𑀤𑀻𑀢𑀺 𑁋 𑀓𑁂𑀦𑀝𑁆𑀞𑁂𑀦? 𑀜𑀸𑀡𑀁 𑀉𑀤𑀧𑀸𑀤𑀻𑀢𑀺 𑁋 𑀓𑁂𑀦𑀝𑁆𑀞𑁂𑀦? 𑀧𑀜𑁆𑀜𑀸 𑀉𑀤𑀧𑀸𑀤𑀻𑀢𑀺 𑁋 𑀓𑁂𑀦𑀝𑁆𑀞𑁂𑀦? 𑀯𑀺𑀚𑁆𑀚𑀸 𑀉𑀤𑀧𑀸𑀤𑀻𑀢𑀺 𑁋 𑀓𑁂𑀦𑀝𑁆𑀞𑁂𑀦? 𑀆𑀮𑁄𑀓𑁄 𑀉𑀤𑀧𑀸𑀤𑀻𑀢𑀺 𑁋 𑀓𑁂𑀦𑀝𑁆𑀞𑁂𑀦? 𑀘𑀓𑁆𑀔𑀼𑀁 𑀉𑀤𑀧𑀸𑀤𑀻𑀢𑀺 𑁋 𑀤𑀲𑁆𑀲𑀦𑀝𑁆𑀞𑁂𑀦. 𑀜𑀸𑀡𑀁 𑀉𑀤𑀧𑀸𑀤𑀻𑀢𑀺 𑁋 𑀜𑀸𑀢𑀝𑁆𑀞𑁂𑀦. 𑀧𑀜𑁆𑀜𑀸 𑀉𑀤𑀧𑀸𑀤𑀻𑀢𑀺 𑁋 𑀧𑀚𑀸𑀦𑀦𑀝𑁆𑀞𑁂𑀦. 𑀯𑀺𑀚𑁆𑀚𑀸 𑀉𑀤𑀧𑀸𑀤𑀻𑀢𑀺 𑁋 𑀧𑀝𑀺𑀯𑁂𑀥𑀝𑁆𑀞𑁂𑀦. 𑀆𑀮𑁄𑀓𑁄 𑀉𑀤𑀧𑀸𑀤𑀻𑀢𑀺 𑁋 𑀑𑀪𑀸𑀲𑀝𑁆𑀞𑁂𑀦.

𑀘𑀓𑁆𑀔𑀼𑀁 𑀥𑀫𑁆𑀫𑁄, 𑀤𑀲𑁆𑀲𑀦𑀝𑁆𑀞𑁄 𑀅𑀢𑁆𑀣𑁄. 𑀜𑀸𑀡𑀁 𑀥𑀫𑁆𑀫𑁄, 𑀜𑀸𑀢𑀝𑁆𑀞𑁄 𑀅𑀢𑁆𑀣𑁄. 𑀧𑀜𑁆𑀜𑀸 𑀥𑀫𑁆𑀫𑁄, 𑀧𑀚𑀸𑀦𑀦𑀝𑁆𑀞𑁄 𑀅𑀢𑁆𑀣𑁄. 𑀯𑀺𑀚𑁆𑀚𑀸 𑀥𑀫𑁆𑀫𑁄, 𑀧𑀝𑀺𑀯𑁂𑀥𑀝𑁆𑀞𑁄 𑀅𑀢𑁆𑀣𑁄. 𑀆𑀮𑁄𑀓𑁄 𑀥𑀫𑁆𑀫𑁄, 𑀑𑀪𑀸𑀲𑀝𑁆𑀞𑁄 𑀅𑀢𑁆𑀣𑁄. 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀜𑁆𑀘 𑀅𑀢𑁆𑀣𑀸 𑀤𑀼𑀓𑁆𑀔𑀯𑀢𑁆𑀣𑀼𑀓𑀸 𑀲𑀘𑁆𑀘𑀯𑀢𑁆𑀣𑀼𑀓𑀸 𑀲𑀘𑁆𑀘𑀸𑀭𑀫𑁆𑀫𑀡𑀸 𑀲𑀘𑁆𑀘𑀕𑁄𑀘𑀭𑀸 𑀲𑀘𑁆𑀘𑀲𑀗𑁆𑀕𑀳𑀺𑀢𑀸 𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀸 𑀲𑀘𑁆𑀘𑁂 𑀲𑀫𑀼𑀤𑀸𑀕𑀢𑀸 𑀲𑀘𑁆𑀘𑁂 𑀞𑀺𑀢𑀸 𑀲𑀘𑁆𑀘𑁂 𑀧𑀢𑀺𑀝𑁆𑀞𑀺𑀢𑀸.

𑁪𑁦. 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀓𑁂𑀦𑀝𑁆𑀞𑁂𑀦 𑀥𑀫𑁆𑀫𑀘𑀓𑁆𑀓𑀁? 𑀥𑀫𑁆𑀫𑀜𑁆𑀘 𑀧𑀯𑀢𑁆𑀢𑁂𑀢𑀺 𑀘𑀓𑁆𑀓𑀜𑁆𑀘𑀸𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀘𑀓𑁆𑀓𑀜𑁆𑀘 𑀧𑀯𑀢𑁆𑀢𑁂𑀢𑀺 𑀥𑀫𑁆𑀫𑀜𑁆𑀘𑀸𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂𑀦 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀘𑀭𑀺𑀬𑀸𑀬 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀞𑀺𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀯𑀲𑀺𑀧𑁆𑀧𑀢𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀯𑀲𑀺𑀁 𑀧𑀸𑀧𑁂𑀦𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀧𑀸𑀭𑀫𑀺𑀁 𑀧𑀸𑀧𑁂𑀦𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀯𑁂𑀲𑀸𑀭𑀚𑁆𑀚𑀁 𑀧𑀸𑀧𑁂𑀦𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 [𑀕𑀭𑀼𑀓𑀭𑁄𑀦𑁆𑀢𑁄 (𑀲𑁆𑀬𑀸.)] 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀁 𑀫𑀸𑀦𑁂𑀦𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀁 𑀧𑀽𑀚𑁂𑀦𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀤𑁆𑀥𑀚𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀓𑁂𑀢𑀼 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀢𑀁 𑀔𑁄 𑀧𑀦 𑀥𑀫𑁆𑀫𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀦𑁆𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁.

𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀢𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀤𑁆𑀥𑀸𑀩𑀮𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀯𑀻𑀭𑀺𑀬𑀩𑀮𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀢𑀺𑀩𑀮𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀫𑀸𑀥𑀺𑀩𑀮𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀧𑀜𑁆𑀜𑀸𑀩𑀮𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀫𑁆𑀫𑀸𑀯𑀸𑀘𑀸 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀫𑁆𑀫𑀸𑀆𑀚𑀻𑀯𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀫𑁆𑀫𑀸𑀯𑀸𑀬𑀸𑀫𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀫𑁆𑀫𑀸𑀲𑀢𑀺 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀫𑁆𑀫𑀸𑀲𑀫𑀸𑀥𑀺 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁.

𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀦𑀺𑀬𑁆𑀬𑀸𑀦𑀺𑀓𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀳𑁂𑀢𑀼𑀝𑁆𑀞𑁂𑀦 𑀫𑀕𑁆𑀕𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀢𑀺𑀧𑀝𑁆𑀞𑀸𑀦𑀸 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀧𑀤𑀳𑀦𑀝𑁆𑀞𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀸 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺𑀧𑀸𑀤𑀸 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀢𑀣𑀝𑁆𑀞𑁂𑀦 𑀲𑀘𑁆𑀘𑀸 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑀣𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀏𑀓𑀭𑀲𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀬𑀼𑀕𑀦𑀤𑁆𑀥𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀯𑀺𑀲𑀼𑀤𑁆𑀥𑀺 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀫𑀼𑀢𑁆𑀢𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀧𑀝𑀺𑀯𑁂𑀥𑀝𑁆𑀞𑁂𑀦 𑀯𑀺𑀚𑁆𑀚𑀸 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀧𑀭𑀺𑀘𑁆𑀘𑀸𑀕𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀫𑀼𑀘𑁆𑀙𑁂𑀤𑀝𑁆𑀞𑁂𑀦 𑀔𑀬𑁂 𑀜𑀸𑀡𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀝𑁆𑀞𑁂𑀦 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀙𑀦𑁆𑀤𑁄 𑀫𑀽𑀮𑀝𑁆𑀞𑁂𑀦 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀫𑀦𑀲𑀺𑀓𑀸𑀭𑁄 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀨𑀲𑁆𑀲𑁄 𑀲𑀫𑁄𑀥𑀸𑀦𑀝𑁆𑀞𑁂𑀦 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀯𑁂𑀤𑀦𑀸 𑀲𑀫𑁄𑀲𑀭𑀡𑀝𑁆𑀞𑁂𑀦 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀫𑀸𑀥𑀺 𑀧𑀫𑀼𑀔𑀝𑁆𑀞𑁂𑀦 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀲𑀢𑀺 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀧𑀜𑁆𑀜𑀸 𑀢𑀢𑀼𑀢𑁆𑀢𑀭𑀝𑁆𑀞𑁂𑀦 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀯𑀺𑀫𑀼𑀢𑁆𑀢𑀺 𑀲𑀸𑀭𑀝𑁆𑀞𑁂𑀦 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁.

‘‘𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺…𑀧𑁂… 𑀧𑀭𑀺𑀜𑁆𑀜𑀸𑀢𑀦𑁆𑀢𑀺 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺.

𑀘𑀓𑁆𑀔𑀼𑀁 𑀉𑀤𑀧𑀸𑀤𑀻𑀢𑀺 𑁋 𑀓𑁂𑀦𑀝𑁆𑀞𑁂𑀦…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀻𑀢𑀺 𑁋 𑀓𑁂𑀦𑀝𑁆𑀞𑁂𑀦? 𑀘𑀓𑁆𑀔𑀼𑀁 𑀉𑀤𑀧𑀸𑀤𑀻𑀢𑀺 𑁋 𑀤𑀲𑁆𑀲𑀦𑀝𑁆𑀞𑁂𑀦…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀻𑀢𑀺 𑁋 𑀑𑀪𑀸𑀲𑀝𑁆𑀞𑁂𑀦. 𑀘𑀓𑁆𑀔𑀼𑀁 𑀥𑀫𑁆𑀫𑁄, 𑀤𑀲𑁆𑀲𑀦𑀝𑁆𑀞𑁄 𑀅𑀢𑁆𑀣𑁄…𑀧𑁂… 𑀆𑀮𑁄𑀓𑁄 𑀥𑀫𑁆𑀫𑁄, 𑀑𑀪𑀸𑀲𑀝𑁆𑀞𑁄 𑀅𑀢𑁆𑀣𑁄. 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀜𑁆𑀘 𑀅𑀢𑁆𑀣𑀸 𑀤𑀼𑀓𑁆𑀔𑀯𑀢𑁆𑀣𑀼𑀓𑀸 𑀲𑀘𑁆𑀘𑀯𑀢𑁆𑀣𑀼𑀓𑀸 𑀲𑀘𑁆𑀘𑀸𑀭𑀫𑁆𑀫𑀡𑀸 𑀲𑀘𑁆𑀘𑀕𑁄𑀘𑀭𑀸 𑀲𑀘𑁆𑀘𑀲𑀗𑁆𑀕𑀳𑀺𑀢𑀸 𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀸 𑀲𑀘𑁆𑀘𑁂 𑀲𑀫𑀼𑀤𑀸𑀕𑀢𑀸 𑀲𑀘𑁆𑀘𑁂 𑀞𑀺𑀢𑀸 𑀲𑀘𑁆𑀘𑁂 𑀧𑀢𑀺𑀝𑁆𑀞𑀺𑀢𑀸.

𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀓𑁂𑀦𑀝𑁆𑀞𑁂𑀦 𑀥𑀫𑁆𑀫𑀘𑀓𑁆𑀓𑀁? 𑀥𑀫𑁆𑀫𑀜𑁆𑀘 𑀧𑀯𑀢𑁆𑀢𑁂𑀢𑀺 𑀘𑀓𑁆𑀓𑀜𑁆𑀘𑀸𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀘𑀓𑁆𑀓𑀜𑁆𑀘 𑀧𑀯𑀢𑁆𑀢𑁂𑀢𑀺 𑀥𑀫𑁆𑀫𑀜𑁆𑀘𑀸𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂𑀦 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀧𑀭𑀺𑀬𑀸𑀬 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀞𑀺𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁…𑀧𑁂… 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀥𑀫𑁆𑀫𑁄 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁.

[𑀔-𑀖] ‘‘𑀇𑀤𑀁 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺…𑀧𑁂… ‘‘𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁 𑀧𑀳𑀸𑀢𑀩𑁆𑀩’’𑀦𑁆𑀢𑀺…𑀧𑁂… ‘‘𑀧𑀳𑀻𑀦’’𑀦𑁆𑀢𑀺 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺.

𑀘𑀓𑁆𑀔𑀼𑀁 𑀉𑀤𑀧𑀸𑀤𑀻𑀢𑀺 𑁋 𑀓𑁂𑀦𑀝𑁆𑀞𑁂𑀦…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀻𑀢𑀺 𑁋 𑀓𑁂𑀦𑀝𑁆𑀞𑁂𑀦? 𑀘𑀓𑁆𑀔𑀼𑀁 𑀉𑀤𑀧𑀸𑀤𑀻𑀢𑀺 𑁋 𑀤𑀲𑁆𑀲𑀦𑀝𑁆𑀞𑁂𑀦…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀻𑀢𑀺 𑁋 𑀑𑀪𑀸𑀲𑀝𑁆𑀞𑁂𑀦.

𑀘𑀓𑁆𑀔𑀼𑀁 𑀥𑀫𑁆𑀫𑁄, 𑀤𑀲𑁆𑀲𑀦𑀝𑁆𑀞𑁄 𑀅𑀢𑁆𑀣𑁄…𑀧𑁂… 𑀆𑀮𑁄𑀓𑁄 𑀥𑀫𑁆𑀫𑁄, 𑀑𑀪𑀸𑀲𑀝𑁆𑀞𑁄 𑀅𑀢𑁆𑀣𑁄. 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀜𑁆𑀘 𑀅𑀢𑁆𑀣𑀸 𑀲𑀫𑀼𑀤𑀬𑀯𑀢𑁆𑀣𑀼𑀓𑀸 𑀲𑀘𑁆𑀘𑀯𑀢𑁆𑀣𑀼𑀓𑀸…𑀧𑁂… 𑀦𑀺𑀭𑁄𑀥𑀯𑀢𑁆𑀣𑀼𑀓𑀸 𑀲𑀘𑁆𑀘𑀯𑀢𑁆𑀣𑀼𑀓𑀸…𑀧𑁂… 𑀫𑀕𑁆𑀕𑀯𑀢𑁆𑀣𑀼𑀓𑀸 𑀲𑀘𑁆𑀘𑀯𑀢𑁆𑀣𑀼𑀓𑀸 𑀲𑀘𑁆𑀘𑀸𑀭𑀫𑁆𑀫𑀡𑀸 𑀲𑀘𑁆𑀘𑀕𑁄𑀘𑀭𑀸 𑀲𑀘𑁆𑀘𑀲𑀗𑁆𑀕𑀳𑀺𑀢𑀸 𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀸 𑀲𑀘𑁆𑀘𑁂 𑀲𑀫𑀼𑀤𑀸𑀕𑀢𑀸 𑀲𑀘𑁆𑀘𑁂 𑀞𑀺𑀢𑀸 𑀲𑀘𑁆𑀘𑁂 𑀧𑀢𑀺𑀝𑁆𑀞𑀺𑀢𑀸.

𑁨. 𑀲𑀢𑀺𑀧𑀝𑁆𑀞𑀸𑀦𑀯𑀸𑀭𑁄

𑁪𑁧. ‘‘‘𑀅𑀬𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸’𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀲𑀸 𑀔𑁄 𑀧𑀦𑀸𑀬𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 𑀫𑁂, 𑀪𑀺𑀓𑁆𑀔𑀯𑁂,…𑀧𑁂… 𑀪𑀸𑀯𑀺𑀢𑀸𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺’’.

‘‘𑀅𑀬𑀁 𑀯𑁂𑀤𑀦𑀸𑀲𑀼…𑀧𑁂… 𑀅𑀬𑀁 𑀘𑀺𑀢𑁆𑀢𑁂… 𑀅𑀬𑀁 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀲𑀸 𑀔𑁄 𑀧𑀦𑀸𑀬𑀁 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 𑀫𑁂, 𑀪𑀺𑀓𑁆𑀔𑀯𑁂…𑀧𑁂… 𑀪𑀸𑀯𑀺𑀢𑀸𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺’’.

𑀅𑀬𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀢𑀺 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺…𑀧𑁂… 𑀲𑀸 𑀔𑁄 𑀧𑀦𑀸𑀬𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑁂𑀢𑀩𑁆𑀩𑀸𑀢𑀺…𑀧𑁂… 𑀪𑀸𑀯𑀺𑀢𑀸𑀢𑀺 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺.

𑀘𑀓𑁆𑀔𑀼𑀁 𑀥𑀫𑁆𑀫𑁄, 𑀤𑀲𑁆𑀲𑀦𑀝𑁆𑀞𑁄 𑀅𑀢𑁆𑀣𑁄…𑀧𑁂… 𑀆𑀮𑁄𑀓𑁄 𑀥𑀫𑁆𑀫𑁄, 𑀑𑀪𑀸𑀲𑀝𑁆𑀞𑁄 𑀅𑀢𑁆𑀣𑁄. 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀜𑁆𑀘 𑀅𑀢𑁆𑀣𑀸 𑀓𑀸𑀬𑀯𑀢𑁆𑀣𑀼𑀓𑀸 𑀲𑀢𑀺𑀧𑀝𑁆𑀞𑀸𑀦𑀯𑀢𑁆𑀣𑀼𑀓𑀸…𑀧𑁂… 𑀯𑁂𑀤𑀦𑀸𑀯𑀢𑁆𑀣𑀼𑀓𑀸 𑀲𑀢𑀺𑀧𑀝𑁆𑀞𑀸𑀦𑀯𑀢𑁆𑀣𑀼𑀓𑀸… 𑀘𑀺𑀢𑁆𑀢𑀯𑀢𑁆𑀣𑀼𑀓𑀸 𑀲𑀢𑀺𑀧𑀝𑁆𑀞𑀸𑀦𑀯𑀢𑁆𑀣𑀼𑀓𑀸… 𑀥𑀫𑁆𑀫𑀯𑀢𑁆𑀣𑀼𑀓𑀸 𑀲𑀢𑀺𑀧𑀝𑁆𑀞𑀸𑀦𑀯𑀢𑁆𑀣𑀼𑀓𑀸 𑀲𑀢𑀺𑀧𑀝𑁆𑀞𑀸𑀦𑀸𑀭𑀫𑁆𑀫𑀡𑀸 𑀲𑀢𑀺𑀧𑀝𑁆𑀞𑀸𑀦𑀕𑁄𑀘𑀭𑀸 𑀲𑀢𑀺𑀧𑀝𑁆𑀞𑀸𑀦𑀲𑀗𑁆𑀕𑀳𑀺𑀢𑀸 𑀲𑀢𑀺𑀧𑀝𑁆𑀞𑀸𑀦𑀧𑀭𑀺𑀬𑀸𑀧𑀦𑁆𑀦𑀸 𑀲𑀢𑀺𑀧𑀝𑁆𑀞𑀸𑀦𑁂 𑀲𑀫𑀼𑀤𑀸𑀕𑀢𑀸 𑀲𑀢𑀺𑀧𑀝𑁆𑀞𑀸𑀦𑁂 𑀞𑀺𑀢𑀸 𑀲𑀢𑀺𑀧𑀝𑁆𑀞𑀸𑀦𑁂 𑀧𑀢𑀺𑀝𑁆𑀞𑀺𑀢𑀸.

𑁩. 𑀇𑀤𑁆𑀥𑀺𑀧𑀸𑀤𑀯𑀸𑀭𑁄

𑁪𑁨. ‘‘‘𑀅𑀬𑀁 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄’𑀢𑀺 𑀫𑁂, 𑀪𑀺𑀓𑁆𑀔𑀯𑁂 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺. ‘𑀲𑁄 𑀔𑁄 𑀧𑀦𑀸𑀬𑀁 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄 𑀪𑀸𑀯𑁂𑀢𑀩𑁆𑀩𑁄’𑀢𑀺 𑀫𑁂, 𑀪𑀺𑀓𑁆𑀔𑀯𑁂…𑀧𑁂… 𑀪𑀸𑀯𑀺𑀢𑁄𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀅𑀬𑀁 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀅𑀬𑀁 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀅𑀬𑀁 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀲𑁄 𑀔𑁄 𑀧𑀦𑀸𑀬𑀁 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄 𑀪𑀸𑀯𑁂𑀢𑀩𑁆𑀩𑁄𑀢𑀺 𑀫𑁂, 𑀪𑀺𑀓𑁆𑀔𑀯𑁂…𑀧𑁂… 𑀪𑀸𑀯𑀺𑀢𑁄𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺’’.

𑀅𑀬𑀁 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄𑀢𑀺 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺…𑀧𑁂… 𑀲𑁄 𑀔𑁄 𑀧𑀦𑀸𑀬𑀁 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄 𑀪𑀸𑀯𑁂𑀢𑀩𑁆𑀩𑁄𑀢𑀺…𑀧𑁂… 𑀪𑀸𑀯𑀺𑀢𑁄𑀢𑀺 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

𑀘𑀓𑁆𑀔𑀼𑀁 𑀉𑀤𑀧𑀸𑀤𑀻𑀢𑀺 𑁋 𑀓𑁂𑀦𑀝𑁆𑀞𑁂𑀦? 𑀜𑀸𑀡𑀁 𑀉𑀤𑀧𑀸𑀤𑀻𑀢𑀺 𑁋 𑀓𑁂𑀦𑀝𑁆𑀞𑁂𑀦? 𑀧𑀜𑁆𑀜𑀸 𑀉𑀤𑀧𑀸𑀤𑀻𑀢𑀺 𑁋 𑀓𑁂𑀦𑀝𑁆𑀞𑁂𑀦? 𑀯𑀺𑀚𑁆𑀚𑀸 𑀉𑀤𑀧𑀸𑀤𑀻𑀢𑀺 𑁋 𑀓𑁂𑀦𑀝𑁆𑀞𑁂𑀦? 𑀆𑀮𑁄𑀓𑁄 𑀉𑀤𑀧𑀸𑀤𑀻𑀢𑀺 𑁋 𑀓𑁂𑀦𑀝𑁆𑀞𑁂𑀦? 𑀘𑀓𑁆𑀔𑀼𑀁 𑀉𑀤𑀧𑀸𑀤𑀻𑀢𑀺 𑁋 𑀤𑀲𑁆𑀲𑀦𑀝𑁆𑀞𑁂𑀦. 𑀜𑀸𑀡𑀁 𑀉𑀤𑀧𑀸𑀤𑀻𑀢𑀺 𑁋 𑀜𑀸𑀢𑀝𑁆𑀞𑁂𑀦. 𑀧𑀜𑁆𑀜𑀸 𑀉𑀤𑀧𑀸𑀤𑀻𑀢𑀺 𑁋 𑀧𑀚𑀸𑀦𑀦𑀝𑁆𑀞𑁂𑀦. 𑀯𑀺𑀚𑁆𑀚𑀸 𑀉𑀤𑀧𑀸𑀤𑀻𑀢𑀺 𑁋 𑀧𑀝𑀺𑀯𑁂𑀥𑀝𑁆𑀞𑁂𑀦. 𑀆𑀮𑁄𑀓𑁄 𑀉𑀤𑀧𑀸𑀤𑀻𑀢𑀺 𑁋 𑀑𑀪𑀸𑀲𑀝𑁆𑀞𑁂𑀦.

𑀘𑀓𑁆𑀔𑀼𑀁 𑀥𑀫𑁆𑀫𑁄, 𑀤𑀲𑁆𑀲𑀦𑀝𑁆𑀞𑁄 𑀅𑀢𑁆𑀣𑁄. 𑀜𑀸𑀡𑀁 𑀥𑀫𑁆𑀫𑁄, 𑀜𑀸𑀢𑀝𑁆𑀞𑁄 𑀅𑀢𑁆𑀣𑁄. 𑀧𑀜𑁆𑀜𑀸 𑀥𑀫𑁆𑀫𑁄, 𑀧𑀚𑀸𑀦𑀦𑀝𑁆𑀞𑁄 𑀅𑀢𑁆𑀣𑁄. 𑀯𑀺𑀚𑁆𑀚𑀸 𑀥𑀫𑁆𑀫𑁄, 𑀧𑀝𑀺𑀯𑁂𑀥𑀝𑁆𑀞𑁄 𑀅𑀢𑁆𑀣𑁄. 𑀆𑀮𑁄𑀓𑁄 𑀥𑀫𑁆𑀫𑁄, 𑀑𑀪𑀸𑀲𑀝𑁆𑀞𑁄 𑀅𑀢𑁆𑀣𑁄. 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀜𑁆𑀘 𑀅𑀢𑁆𑀣𑀸 𑀙𑀦𑁆𑀤𑀯𑀢𑁆𑀣𑀼𑀓𑀸 𑀇𑀤𑁆𑀥𑀺𑀧𑀸𑀤𑀯𑀢𑁆𑀣𑀼𑀓𑀸 𑀇𑀤𑁆𑀥𑀺𑀧𑀸𑀤𑀸𑀭𑀫𑁆𑀫𑀡𑀸 𑀇𑀤𑁆𑀥𑀺𑀧𑀸𑀤𑀕𑁄𑀘𑀭𑀸 𑀇𑀤𑁆𑀥𑀺𑀧𑀸𑀤𑀲𑀗𑁆𑀕𑀳𑀺𑀢𑀸 𑀇𑀤𑁆𑀥𑀺𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸 𑀇𑀤𑁆𑀥𑀺𑀧𑀸𑀤𑁂 𑀲𑀫𑀼𑀤𑀸𑀕𑀢𑀸 𑀇𑀤𑁆𑀥𑀺𑀧𑀸𑀤𑁂 𑀞𑀺𑀢𑀸 𑀇𑀤𑁆𑀥𑀺𑀧𑀸𑀤𑁂 𑀧𑀢𑀺𑀝𑁆𑀞𑀺𑀢𑀸.

𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀓𑁂𑀦𑀝𑁆𑀞𑁂𑀦 𑀥𑀫𑁆𑀫𑀘𑀓𑁆𑀓𑀁? 𑀥𑀫𑁆𑀫𑀜𑁆𑀘 𑀧𑀯𑀢𑁆𑀢𑁂𑀢𑀺 𑀘𑀓𑁆𑀓𑀜𑁆𑀘𑀸𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀘𑀓𑁆𑀓𑀜𑁆𑀘 𑀧𑀯𑀢𑁆𑀢𑁂𑀢𑀺 𑀥𑀫𑁆𑀫𑀜𑁆𑀘𑀸𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂𑀦 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀘𑀭𑀺𑀬𑀸𑀬 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀞𑀺𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀯𑀲𑀺𑀧𑁆𑀧𑀢𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀯𑀲𑀺𑀁 𑀧𑀸𑀧𑁂𑀦𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂 𑀧𑀸𑀭𑀫𑀺𑀁 𑀧𑀸𑀧𑁂𑀦𑁆𑀢𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁…𑀧𑁂… 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀤𑁆𑀥𑀚𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀓𑁂𑀢𑀼 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁. 𑀢𑀁 𑀔𑁄 𑀧𑀦 𑀥𑀫𑁆𑀫𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀦𑁆𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁.

𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁…𑀧𑁂… 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑁋 𑀥𑀫𑁆𑀫𑀘𑀓𑁆𑀓𑀁.

𑀅𑀬𑀁 𑀯𑀻𑀭𑀺𑀬𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄𑀢𑀺 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺…𑀧𑁂… 𑀲𑁄 𑀔𑁄 𑀧𑀦𑀸𑀬𑀁 𑀯𑀻𑀭𑀺𑀬𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄 𑀪𑀸𑀯𑁂𑀢𑀩𑁆𑀩𑁄𑀢𑀺…𑀧𑁂… 𑀪𑀸𑀯𑀺𑀢𑁄𑀢𑀺 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺…𑀧𑁂… 𑀆𑀮𑁄𑀓𑁄 𑀉𑀤𑀧𑀸𑀤𑀺.

𑀘𑀓𑁆𑀔𑀼𑀁 𑀥𑀫𑁆𑀫𑁄, 𑀤𑀲𑁆𑀲𑀦𑀝𑁆𑀞𑁄 𑀅𑀢𑁆𑀣𑁄…𑀧𑁂… 𑀆𑀮𑁄𑀓𑁄 𑀥𑀫𑁆𑀫𑁄, 𑀑𑀪𑀸𑀲𑀝𑁆𑀞𑁄 𑀅𑀢𑁆𑀣𑁄. 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀜𑁆𑀘 𑀅𑀢𑁆𑀣𑀸 𑀯𑀻𑀭𑀺𑀬𑀯𑀢𑁆𑀣𑀼𑀓𑀸 𑀇𑀤𑁆𑀥𑀺𑀧𑀸𑀤𑀯𑀢𑁆𑀣𑀼𑀓𑀸…𑀧𑁂… 𑀘𑀺𑀢𑁆𑀢𑀯𑀢𑁆𑀣𑀼𑀓𑀸 𑀇𑀤𑁆𑀥𑀺𑀧𑀸𑀤𑀯𑀢𑁆𑀣𑀼𑀓𑀸… 𑀯𑀻𑀫𑀁𑀲𑀸𑀯𑀢𑁆𑀣𑀼𑀓𑀸 𑀇𑀤𑁆𑀥𑀺𑀧𑀸𑀤𑀯𑀢𑁆𑀣𑀼𑀓𑀸 𑀇𑀤𑁆𑀥𑀺𑀧𑀸𑀤𑀸𑀭𑀫𑁆𑀫𑀡𑀸 𑀇𑀤𑁆𑀥𑀺𑀧𑀸𑀤𑀕𑁄𑀘𑀭𑀸 𑀇𑀤𑁆𑀥𑀺𑀧𑀸𑀤𑀲𑀗𑁆𑀕𑀳𑀺𑀢𑀸 𑀇𑀤𑁆𑀥𑀺𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸 𑀇𑀤𑁆𑀥𑀺𑀧𑀸𑀤𑁂 𑀲𑀫𑀼𑀤𑀸𑀕𑀢𑀸 𑀇𑀤𑁆𑀥𑀺𑀧𑀸𑀤𑁂 𑀞𑀺𑀢𑀸 𑀇𑀤𑁆𑀥𑀺𑀧𑀸𑀤𑁂 𑀧𑀢𑀺𑀝𑁆𑀞𑀺𑀢𑀸.

𑀥𑀫𑁆𑀫𑀘𑀓𑁆𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.