𑁨. 𑀩𑀮𑀯𑀸𑀭𑁄

𑁨𑁪. 𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀅𑀲𑁆𑀲𑀤𑁆𑀥𑀺𑀬𑁂 𑀦 𑀓𑀫𑁆𑀧𑀢𑀺. 𑀲𑀤𑁆𑀥𑀸𑀩𑀮𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀓𑁄𑀲𑀚𑁆𑀚𑁂 𑀦 𑀓𑀫𑁆𑀧𑀢𑀺. 𑀯𑀻𑀭𑀺𑀬𑀩𑀮𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀧𑀫𑀸𑀤𑁂 𑀦 𑀓𑀫𑁆𑀧𑀢𑀺. 𑀲𑀢𑀺𑀩𑀮𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀉𑀤𑁆𑀥𑀘𑁆𑀘𑁂 𑀦 𑀓𑀫𑁆𑀧𑀢𑀺. 𑀲𑀫𑀸𑀥𑀺𑀩𑀮𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀅𑀯𑀺𑀚𑁆𑀚𑀸𑀬 𑀦 𑀓𑀫𑁆𑀧𑀢𑀺. 𑀧𑀜𑁆𑀜𑀸𑀩𑀮𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀇𑀫𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀦𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀩𑀮𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀆𑀲𑁂𑀯𑀻𑀬𑀢𑀺. 𑀇𑀫𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀪𑀸𑀯𑀦𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀩𑀮𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀸𑀯𑀻𑀬𑀢𑀺. 𑀇𑀫𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀩𑀳𑀼𑀮𑀻𑀓𑀢𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀩𑀮𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀩𑀳𑀼𑀮𑀻𑀓𑀭𑀻𑀬𑀢𑀺. 𑀇𑀫𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀮𑀗𑁆𑀓𑀸𑀭𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀩𑀮𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑁆𑀯𑀸𑀮𑀗𑁆𑀓𑀢𑀸 𑀳𑁄𑀢𑀺. 𑀇𑀫𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀓𑁆𑀔𑀸𑀭𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀩𑀮𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑀼𑀧𑀭𑀺𑀓𑁆𑀔𑀢𑀸 𑀳𑁄𑀢𑀺. 𑀇𑀫𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀯𑀸𑀭𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀩𑀮𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑀼𑀧𑀭𑀺𑀯𑀼𑀢𑀸 𑀳𑁄𑀢𑀺. 𑀇𑀫𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀦𑀸 𑀳𑁄𑀦𑁆𑀢𑀺, 𑀪𑀸𑀯𑀦𑀸 𑀳𑁄𑀦𑁆𑀢𑀺, 𑀩𑀳𑀼𑀮𑀻𑀓𑀢𑀸 𑀳𑁄𑀦𑁆𑀢𑀺, 𑀅𑀮𑀗𑁆𑀓𑀸𑀭𑀸 𑀳𑁄𑀦𑁆𑀢𑀺, 𑀧𑀭𑀺𑀓𑁆𑀔𑀸𑀭𑀸 𑀳𑁄𑀦𑁆𑀢𑀺, 𑀧𑀭𑀺𑀯𑀸𑀭𑀸 𑀳𑁄𑀦𑁆𑀢𑀺, 𑀧𑀸𑀭𑀺𑀧𑀽𑀭𑀻 𑀳𑁄𑀦𑁆𑀢𑀺, 𑀲𑀳𑀕𑀢𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀸 𑀳𑁄𑀦𑁆𑀢𑀺, 𑀲𑀁𑀲𑀝𑁆𑀞𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀸 𑀳𑁄𑀦𑁆𑀢𑀺, 𑀧𑀓𑁆𑀔𑀦𑁆𑀤𑀦𑀸 𑀳𑁄𑀦𑁆𑀢𑀺, 𑀧𑀲𑀻𑀤𑀦𑀸 𑀳𑁄𑀦𑁆𑀢𑀺, 𑀲𑀦𑁆𑀢𑀺𑀝𑁆𑀞𑀦𑀸 𑀳𑁄𑀦𑁆𑀢𑀺, 𑀯𑀺𑀫𑀼𑀘𑁆𑀘𑀦𑀸 𑀳𑁄𑀦𑁆𑀢𑀺, ‘‘𑀏𑀢𑀁 𑀲𑀦𑁆𑀢’’𑀦𑁆𑀢𑀺 𑀨𑀲𑁆𑀲𑀦𑀸 𑀳𑁄𑀦𑁆𑀢𑀺, 𑀬𑀸𑀦𑀻𑀓𑀢𑀸 𑀳𑁄𑀦𑁆𑀢𑀺, 𑀯𑀢𑁆𑀣𑀼𑀓𑀢𑀸 𑀳𑁄𑀦𑁆𑀢𑀺, 𑀅𑀦𑀼𑀝𑁆𑀞𑀺𑀢𑀸 𑀳𑁄𑀦𑁆𑀢𑀺, 𑀧𑀭𑀺𑀘𑀺𑀢𑀸 𑀳𑁄𑀦𑁆𑀢𑀺, 𑀲𑀼𑀲𑀫𑀸𑀭𑀤𑁆𑀥𑀸 𑀳𑁄𑀦𑁆𑀢𑀺, 𑀲𑀼𑀪𑀸𑀯𑀺𑀢𑀸 𑀳𑁄𑀦𑁆𑀢𑀺, 𑀲𑁆𑀯𑀸𑀥𑀺𑀝𑁆𑀞𑀺𑀢𑀸 𑀳𑁄𑀦𑁆𑀢𑀺, 𑀲𑀼𑀲𑀫𑀼𑀕𑁆𑀕𑀢𑀸 𑀳𑁄𑀦𑁆𑀢𑀺, 𑀲𑀼𑀯𑀺𑀫𑀼𑀢𑁆𑀢𑀸 𑀳𑁄𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀚𑁄𑀢𑁂𑀦𑁆𑀢𑀺 𑀧𑀢𑀸𑀧𑁂𑀦𑁆𑀢𑀺.