𑁩. 𑀉𑀧𑀓𑁆𑀓𑀺𑀮𑁂𑀲𑀜𑀸𑀡𑀦𑀺𑀤𑁆𑀤𑁂𑀲𑁄

𑀧𑀞𑀫𑀘𑁆𑀙𑀓𑁆𑀓𑀁

𑁧𑁫𑁪. 𑀇𑀫𑁂𑀳𑀺 𑀘 𑀧𑀦 𑀦𑀻𑀯𑀭𑀡𑁂𑀳𑀺 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀲𑁄𑀴𑀲𑀯𑀢𑁆𑀣𑀼𑀓𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀁 𑀪𑀸𑀯𑀬𑀢𑁄 𑀔𑀡𑀺𑀓𑀲𑀫𑁄𑀥𑀸𑀦𑀸 𑀓𑀢𑀫𑁂 𑀅𑀝𑁆𑀞𑀸𑀭𑀲 𑀉𑀧𑀓𑁆𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀅𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄 𑀅𑀚𑁆𑀛𑀢𑁆𑀢𑀯𑀺𑀓𑁆𑀔𑁂𑀧𑀕𑀢𑀁 𑀘𑀺𑀢𑁆𑀢𑀁 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀧𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄 𑀩𑀳𑀺𑀤𑁆𑀥𑀸𑀯𑀺𑀓𑁆𑀔𑁂𑀧𑀕𑀢𑀁 𑀘𑀺𑀢𑁆𑀢𑀁 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀅𑀲𑁆𑀲𑀸𑀲𑀧𑀝𑀺𑀓𑀗𑁆𑀔𑀦𑀸 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸𑀘𑀭𑀺𑀬𑀸 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀧𑀲𑁆𑀲𑀸𑀲𑀧𑀝𑀺𑀓𑀗𑁆𑀔𑀦𑀸 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸𑀘𑀭𑀺𑀬𑀸 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀅𑀲𑁆𑀲𑀸𑀲𑁂𑀦𑀸𑀪𑀺𑀢𑀼𑀦𑁆𑀦𑀲𑁆𑀲 𑀧𑀲𑁆𑀲𑀸𑀲𑀧𑀝𑀺𑀮𑀸𑀪𑁂 𑀫𑀼𑀘𑁆𑀙𑀦𑀸 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀧𑀲𑁆𑀲𑀸𑀲𑁂𑀦𑀸𑀪𑀺𑀢𑀼𑀦𑁆𑀦𑀲𑁆𑀲 𑀅𑀲𑁆𑀲𑀸𑀲𑀧𑀝𑀺𑀮𑀸𑀪𑁂 𑀫𑀼𑀘𑁆𑀙𑀦𑀸 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄.

𑀅𑀦𑀼𑀕𑀘𑁆𑀙𑀦𑀸 𑀘 𑀅𑀲𑁆𑀲𑀸𑀲𑀁, 𑀧𑀲𑁆𑀲𑀸𑀲𑀁 𑀅𑀦𑀼𑀕𑀘𑁆𑀙𑀦𑀸;

𑀲𑀢𑀺 𑀅𑀚𑁆𑀛𑀢𑁆𑀢𑀯𑀺𑀓𑁆𑀔𑁂𑀧𑀸, 𑀓𑀗𑁆𑀔𑀦𑀸 𑀩𑀳𑀺𑀤𑁆𑀥𑀸𑀯𑀺𑀓𑁆𑀔𑁂𑀧𑀧𑀢𑁆𑀣𑀦𑀸 [𑀯𑀺𑀓𑁆𑀔𑁂𑀧𑀧𑀦𑁆𑀣𑀦𑀸 (𑀲𑁆𑀬𑀸.)].

𑀅𑀲𑁆𑀲𑀸𑀲𑁂𑀦𑀸𑀪𑀺𑀢𑀼𑀦𑁆𑀦𑀲𑁆𑀲, 𑀧𑀲𑁆𑀲𑀸𑀲𑀧𑀝𑀺𑀮𑀸𑀪𑁂 𑀫𑀼𑀘𑁆𑀙𑀦𑀸;

𑀧𑀲𑁆𑀲𑀸𑀲𑁂𑀦𑀸𑀪𑀺𑀢𑀼𑀦𑁆𑀦𑀲𑁆𑀲, 𑀅𑀲𑁆𑀲𑀸𑀲𑀧𑀝𑀺𑀮𑀸𑀪𑁂 𑀫𑀼𑀘𑁆𑀙𑀦𑀸.

𑀙 𑀏𑀢𑁂 𑀉𑀧𑀓𑁆𑀓𑀺𑀮𑁂𑀲𑀸, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲;

𑀬𑁂𑀳𑀺 𑀯𑀺𑀓𑁆𑀔𑀺𑀧𑁆𑀧𑀫𑀸𑀦𑀲𑁆𑀲 [𑀯𑀺𑀓𑀫𑁆𑀧𑀫𑀸𑀦𑀲𑁆𑀲 (𑀲𑁆𑀬𑀸.)], 𑀦𑁄 𑀘 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺;

𑀯𑀺𑀫𑁄𑀓𑁆𑀔𑀁 𑀅𑀧𑁆𑀧𑀚𑀸𑀦𑀦𑁆𑀢𑀸, 𑀢𑁂 𑀳𑁄𑀦𑁆𑀢𑀺 𑀧𑀭𑀧𑀢𑁆𑀢𑀺𑀬𑀸𑀢𑀺.

𑀤𑀼𑀢𑀺𑀬𑀘𑁆𑀙𑀓𑁆𑀓𑀁

𑁧𑁫𑁫. 𑀦𑀺𑀫𑀺𑀢𑁆𑀢𑀁 𑀆𑀯𑀚𑁆𑀚𑀢𑁄 𑀅𑀲𑁆𑀲𑀸𑀲𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀺 𑁋 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀅𑀲𑁆𑀲𑀸𑀲𑀁 𑀆𑀯𑀚𑁆𑀚𑀢𑁄 𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀺 𑁋 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀦𑀺𑀫𑀺𑀢𑁆𑀢𑀁 𑀆𑀯𑀚𑁆𑀚𑀢𑁄 𑀧𑀲𑁆𑀲𑀸𑀲𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀺 𑁋 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀧𑀲𑁆𑀲𑀸𑀲𑀁 𑀆𑀯𑀚𑁆𑀚𑀢𑁄 𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀺 𑁋 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀅𑀲𑁆𑀲𑀸𑀲𑀁 𑀆𑀯𑀚𑁆𑀚𑀢𑁄 𑀧𑀲𑁆𑀲𑀸𑀲𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀺 𑁋 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀧𑀲𑁆𑀲𑀸𑀲𑀁 𑀆𑀯𑀚𑁆𑀚𑀢𑁄 𑀅𑀲𑁆𑀲𑀸𑀲𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀺 𑁋 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄.

𑀦𑀺𑀫𑀺𑀢𑁆𑀢𑀁 𑀆𑀯𑀚𑁆𑀚𑀫𑀸𑀦𑀲𑁆𑀲, 𑀅𑀲𑁆𑀲𑀸𑀲𑁂 𑀯𑀺𑀓𑁆𑀔𑀺𑀧𑀢𑁂 𑀫𑀦𑁄;

𑀅𑀲𑁆𑀲𑀸𑀲𑀁 𑀆𑀯𑀚𑁆𑀚𑀫𑀸𑀦𑀲𑁆𑀲, 𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀺.

𑀦𑀺𑀫𑀺𑀢𑁆𑀢𑀁 𑀆𑀯𑀚𑁆𑀚𑀫𑀸𑀦𑀲𑁆𑀲, 𑀧𑀲𑁆𑀲𑀸𑀲𑁂 𑀯𑀺𑀓𑁆𑀔𑀺𑀧𑀢𑁂 𑀫𑀦𑁄;

𑀧𑀲𑁆𑀲𑀸𑀲𑀁 𑀆𑀯𑀚𑁆𑀚𑀫𑀸𑀦𑀲𑁆𑀲, 𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀺.

𑀅𑀲𑁆𑀲𑀸𑀲𑀁 𑀆𑀯𑀚𑁆𑀚𑀫𑀸𑀦𑀲𑁆𑀲, 𑀧𑀲𑁆𑀲𑀸𑀲𑁂 𑀯𑀺𑀓𑁆𑀔𑀺𑀧𑀢𑁂 𑀫𑀦𑁄;

𑀧𑀲𑁆𑀲𑀸𑀲𑀁 𑀆𑀯𑀚𑁆𑀚𑀫𑀸𑀦𑀲𑁆𑀲, 𑀅𑀲𑁆𑀲𑀸𑀲𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀺.

𑀙 𑀏𑀢𑁂 𑀉𑀧𑀓𑁆𑀓𑀺𑀮𑁂𑀲𑀸, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲;

𑀬𑁂𑀳𑀺 𑀯𑀺𑀓𑁆𑀔𑀺𑀧𑁆𑀧𑀫𑀸𑀦𑀲𑁆𑀲, 𑀦𑁄 𑀘 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺;

𑀯𑀺𑀫𑁄𑀓𑁆𑀔𑀁 𑀅𑀧𑁆𑀧𑀚𑀸𑀦𑀦𑁆𑀢𑀸, 𑀢𑁂 𑀳𑁄𑀦𑁆𑀢𑀺 𑀧𑀭𑀧𑀢𑁆𑀢𑀺𑀬𑀸𑀢𑀺.

𑀢𑀢𑀺𑀬𑀘𑁆𑀙𑀓𑁆𑀓𑀁

𑁧𑁫𑁬. 𑀅𑀢𑀻𑀢𑀸𑀦𑀼𑀥𑀸𑀯𑀦𑀁 𑀘𑀺𑀢𑁆𑀢𑀁 𑀯𑀺𑀓𑁆𑀔𑁂𑀧𑀸𑀦𑀼𑀧𑀢𑀺𑀢𑀁 𑁋 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀅𑀦𑀸𑀕𑀢𑀧𑀝𑀺𑀓𑀗𑁆𑀔𑀦𑀁 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀺𑀢𑀁 𑁋 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀮𑀻𑀦𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀦𑀼𑀧𑀢𑀺𑀢𑀁 𑁋 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀅𑀢𑀺𑀧𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀸𑀦𑀼𑀧𑀢𑀺𑀢𑀁 𑁋 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀅𑀪𑀺𑀦𑀢𑀁 𑀘𑀺𑀢𑁆𑀢𑀁 𑀭𑀸𑀕𑀸𑀦𑀼𑀧𑀢𑀺𑀢𑀁 𑁋 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄. 𑀅𑀧𑀦𑀢𑀁 𑀘𑀺𑀢𑁆𑀢𑀁 𑀩𑁆𑀬𑀸𑀧𑀸𑀤𑀸𑀦𑀼𑀧𑀢𑀺𑀢𑀁 𑁋 𑀲𑀫𑀸𑀥𑀺𑀲𑁆𑀲 𑀧𑀭𑀺𑀧𑀦𑁆𑀣𑁄.

𑀅𑀢𑀻𑀢𑀸𑀦𑀼𑀥𑀸𑀯𑀦𑀁 𑀘𑀺𑀢𑁆𑀢𑀁, 𑀅𑀦𑀸𑀕𑀢𑀧𑀝𑀺𑀓𑀗𑁆𑀔𑀦𑀁 𑀮𑀻𑀦𑀁;

𑀅𑀢𑀺𑀧𑀕𑁆𑀕𑀳𑀺𑀢𑀁 𑀅𑀪𑀺𑀦𑀢𑀁, 𑀅𑀧𑀦𑀢𑀁 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺.

𑀙 𑀏𑀢𑁂 𑀉𑀧𑀓𑁆𑀓𑀺𑀮𑁂𑀲𑀸, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲;

𑀬𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑀗𑁆𑀓𑀧𑁆𑀧𑁄, 𑀅𑀥𑀺𑀘𑀺𑀢𑁆𑀢𑀁 𑀦𑀧𑁆𑀧𑀚𑀸𑀦𑀸𑀢𑀻𑀢𑀺.

𑁧𑁫𑁭. 𑀅𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄 𑀅𑀚𑁆𑀛𑀢𑁆𑀢𑀁 𑀯𑀺𑀓𑁆𑀔𑁂𑀧𑀕𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀧𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄 𑀩𑀳𑀺𑀤𑁆𑀥𑀸𑀯𑀺𑀓𑁆𑀔𑁂𑀧𑀕𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀅𑀲𑁆𑀲𑀸𑀲𑀧𑀝𑀺𑀓𑀗𑁆𑀔𑀦𑀸𑀬 𑀦𑀺𑀓𑀦𑁆𑀢𑀺𑀬𑀸 𑀢𑀡𑁆𑀳𑀸𑀘𑀭𑀺𑀬𑀸𑀬 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀧𑀲𑁆𑀲𑀸𑀲𑀧𑀝𑀺𑀓𑀗𑁆𑀔𑀦𑀸𑀬 𑀦𑀺𑀓𑀦𑁆𑀢𑀺𑀬𑀸 𑀢𑀡𑁆𑀳𑀸𑀘𑀭𑀺𑀬𑀸𑀬 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀅𑀲𑁆𑀲𑀸𑀲𑁂𑀦𑀸𑀪𑀺𑀢𑀼𑀦𑁆𑀦𑀲𑁆𑀲 𑀧𑀲𑁆𑀲𑀸𑀲𑀧𑀝𑀺𑀮𑀸𑀪𑁂 𑀫𑀼𑀘𑁆𑀙𑀺𑀢𑀢𑁆𑀢𑀸 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀧𑀲𑁆𑀲𑀸𑀲𑁂𑀦𑀸𑀪𑀺𑀢𑀼𑀦𑁆𑀦𑀲𑁆𑀲 𑀅𑀲𑁆𑀲𑀸𑀲𑀧𑀝𑀺𑀮𑀸𑀪𑁂 𑀫𑀼𑀘𑁆𑀙𑀺𑀢𑀢𑁆𑀢𑀸 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀦𑀺𑀫𑀺𑀢𑁆𑀢𑀁 𑀆𑀯𑀚𑁆𑀚𑀢𑁄 𑀅𑀲𑁆𑀲𑀸𑀲𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀺𑀢𑀢𑁆𑀢𑀸 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀅𑀲𑁆𑀲𑀸𑀲𑀁 𑀆𑀯𑀚𑁆𑀚𑀢𑁄 𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀺𑀢𑀢𑁆𑀢𑀸 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀦𑀺𑀫𑀺𑀢𑁆𑀢𑀁 𑀆𑀯𑀚𑁆𑀚𑀢𑁄 𑀧𑀲𑁆𑀲𑀸𑀲𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀺𑀢𑀢𑁆𑀢𑀸 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀧𑀲𑁆𑀲𑀸𑀲𑀁 𑀆𑀯𑀚𑁆𑀚𑀢𑁄 𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀺𑀢𑀢𑁆𑀢𑀸 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀅𑀲𑁆𑀲𑀸𑀲𑀁 𑀆𑀯𑀚𑁆𑀚𑀢𑁄 𑀧𑀲𑁆𑀲𑀸𑀲𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀺𑀢𑀢𑁆𑀢𑀸 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀧𑀲𑁆𑀲𑀸𑀲𑀁 𑀆𑀯𑀚𑁆𑀚𑀢𑁄 𑀅𑀲𑁆𑀲𑀸𑀲𑁂 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀺𑀢𑀢𑁆𑀢𑀸 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀅𑀢𑀻𑀢𑀸𑀦𑀼𑀥𑀸𑀯𑀦𑁂𑀦 𑀘𑀺𑀢𑁆𑀢𑁂𑀦 𑀯𑀺𑀓𑁆𑀔𑁂𑀧𑀸𑀦𑀼𑀧𑀢𑀺𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀅𑀦𑀸𑀕𑀢𑀧𑀝𑀺𑀓𑀗𑁆𑀔𑀦𑁂𑀦 𑀘𑀺𑀢𑁆𑀢𑁂𑀦 𑀯𑀺𑀓𑀫𑁆𑀧𑀺𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀮𑀻𑀦𑁂𑀦 𑀘𑀺𑀢𑁆𑀢𑁂𑀦 𑀓𑁄𑀲𑀚𑁆𑀚𑀸𑀦𑀼𑀧𑀢𑀺𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀅𑀢𑀺𑀧𑀕𑁆𑀕𑀳𑀺𑀢𑁂𑀦 𑀘𑀺𑀢𑁆𑀢𑁂𑀦 𑀉𑀤𑁆𑀥𑀘𑁆𑀘𑀸𑀦𑀼𑀧𑀢𑀺𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀅𑀪𑀺𑀦𑀢𑁂𑀦 𑀘𑀺𑀢𑁆𑀢𑁂𑀦 𑀭𑀸𑀕𑀸𑀦𑀼𑀧𑀢𑀺𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀅𑀧𑀦𑀢𑁂𑀦 𑀘𑀺𑀢𑁆𑀢𑁂𑀦 𑀩𑁆𑀬𑀸𑀧𑀸𑀤𑀸𑀦𑀼𑀧𑀢𑀺𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘.

𑀆𑀦𑀸𑀧𑀸𑀦𑀲𑁆𑀲𑀢𑀺 𑀬𑀲𑁆𑀲, 𑀧𑀭𑀺𑀧𑀼𑀡𑁆𑀡𑀸 𑀅𑀪𑀸𑀯𑀺𑀢𑀸;

𑀓𑀸𑀬𑁄𑀧𑀺 𑀇𑀜𑁆𑀚𑀺𑀢𑁄 𑀳𑁄𑀢𑀺, 𑀘𑀺𑀢𑁆𑀢𑀫𑁆𑀧𑀺 𑀳𑁄𑀢𑀺 𑀇𑀜𑁆𑀚𑀺𑀢𑀁;

𑀓𑀸𑀬𑁄𑀧𑀺 𑀨𑀦𑁆𑀤𑀺𑀢𑁄 𑀳𑁄𑀢𑀺, 𑀘𑀺𑀢𑁆𑀢𑀫𑁆𑀧𑀺 𑀳𑁄𑀢𑀺 𑀨𑀦𑁆𑀤𑀺𑀢𑀁.

𑀆𑀦𑀸𑀧𑀸𑀦𑀲𑁆𑀲𑀢𑀺 𑀬𑀲𑁆𑀲, 𑀧𑀭𑀺𑀧𑀼𑀡𑁆𑀡𑀸 𑀲𑀼𑀪𑀸𑀯𑀺𑀢𑀸;

𑀓𑀸𑀬𑁄𑀧𑀺 𑀅𑀦𑀺𑀜𑁆𑀚𑀺𑀢𑁄 𑀳𑁄𑀢𑀺, 𑀘𑀺𑀢𑁆𑀢𑀫𑁆𑀧𑀺 𑀳𑁄𑀢𑀺 𑀅𑀦𑀺𑀜𑁆𑀚𑀺𑀢𑀁;

𑀓𑀸𑀬𑁄𑀧𑀺 𑀅𑀨𑀦𑁆𑀤𑀺𑀢𑁄 𑀳𑁄𑀢𑀺, 𑀘𑀺𑀢𑁆𑀢𑀫𑁆𑀧𑀺 𑀳𑁄𑀢𑀺 𑀅𑀨𑀦𑁆𑀤𑀺𑀢𑀦𑁆𑀢𑀺.

𑀇𑀫𑁂𑀳𑀺 𑀘 𑀧𑀦 𑀦𑀻𑀯𑀭𑀡𑁂𑀳𑀺 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀲𑁄𑀴𑀲𑀯𑀢𑁆𑀣𑀼𑀓𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀁 𑀪𑀸𑀯𑀬𑀢𑁄 𑀔𑀡𑀺𑀓𑀲𑀫𑁄𑀥𑀸𑀦𑀸 𑀇𑀫𑁂 𑀅𑀝𑁆𑀞𑀸𑀭𑀲 𑀉𑀧𑀓𑁆𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀉𑀧𑀓𑁆𑀓𑀺𑀮𑁂𑀲𑀜𑀸𑀡𑀦𑀺𑀤𑁆𑀤𑁂𑀲𑁄 𑀢𑀢𑀺𑀬𑁄.