𑁪. 𑀯𑁄𑀤𑀸𑀦𑀜𑀸𑀡𑀦𑀺𑀤𑁆𑀤𑁂𑀲𑁄

𑁧𑁫𑁮. 𑀓𑀢𑀫𑀸𑀦𑀺 𑀢𑁂𑀭𑀲 𑀯𑁄𑀤𑀸𑀦𑁂 𑀜𑀸𑀡𑀸𑀦𑀺? 𑀅𑀢𑀻𑀢𑀸𑀦𑀼𑀥𑀸𑀯𑀦𑀁 𑀘𑀺𑀢𑁆𑀢𑀁 𑀯𑀺𑀓𑁆𑀔𑁂𑀧𑀸𑀦𑀼𑀧𑀢𑀺𑀢𑀁; 𑀢𑀁 𑀯𑀺𑀯𑀚𑁆𑀚𑀬𑀺𑀢𑁆𑀯𑀸 𑀏𑀓𑀝𑁆𑀞𑀸𑀦𑁂 𑀲𑀫𑀸𑀤𑀳𑀢𑀺 𑁋 𑀏𑀯𑀫𑁆𑀧𑀺 𑀘𑀺𑀢𑁆𑀢𑀁 𑀦 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺. 𑀅𑀦𑀸𑀕𑀢𑀧𑀝𑀺𑀓𑀗𑁆𑀔𑀦𑀁 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀺𑀢𑀁; 𑀢𑀁 𑀯𑀺𑀯𑀚𑁆𑀚𑀬𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀥𑀺𑀫𑁄𑀘𑁂𑀢𑀺 𑁋 𑀏𑀯𑀫𑁆𑀧𑀺 𑀘𑀺𑀢𑁆𑀢𑀁 𑀦 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺. 𑀮𑀻𑀦𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀦𑀼𑀧𑀢𑀺𑀢𑀁; 𑀢𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑁄𑀲𑀚𑁆𑀚𑀁 𑀧𑀚𑀳𑀢𑀺 𑁋 𑀏𑀯𑀫𑁆𑀧𑀺 𑀘𑀺𑀢𑁆𑀢𑀁 𑀦 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺. 𑀅𑀢𑀺𑀧𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀸𑀦𑀼𑀧𑀢𑀺𑀢𑀁; 𑀢𑀁 𑀯𑀺𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀉𑀤𑁆𑀥𑀘𑁆𑀘𑀁 𑀧𑀚𑀳𑀢𑀺 𑁋 𑀏𑀯𑀫𑁆𑀧𑀺 𑀘𑀺𑀢𑁆𑀢𑀁 𑀦 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺. 𑀅𑀪𑀺𑀦𑀢𑀁 𑀘𑀺𑀢𑁆𑀢𑀁 𑀭𑀸𑀕𑀸𑀦𑀼𑀧𑀢𑀺𑀢𑀁; 𑀢𑀁 𑀲𑀫𑁆𑀧𑀚𑀸𑀦𑁄 𑀳𑀼𑀢𑁆𑀯𑀸 𑀭𑀸𑀕𑀁 𑀧𑀚𑀳𑀢𑀺 𑁋 𑀏𑀯𑀫𑁆𑀧𑀺 𑀘𑀺𑀢𑁆𑀢𑀁 𑀦 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺. 𑀅𑀧𑀦𑀢𑀁 𑀘𑀺𑀢𑁆𑀢𑀁 𑀩𑁆𑀬𑀸𑀧𑀸𑀤𑀸𑀦𑀼𑀧𑀢𑀺𑀢𑀁; 𑀢𑀁 𑀲𑀫𑁆𑀧𑀚𑀸𑀦𑁄 𑀳𑀼𑀢𑁆𑀯𑀸 𑀩𑁆𑀬𑀸𑀧𑀸𑀤𑀁 𑀧𑀚𑀳𑀢𑀺 𑁋 𑀏𑀯𑀫𑁆𑀧𑀺 𑀘𑀺𑀢𑁆𑀢𑀁 𑀦 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺. 𑀇𑀫𑁂𑀳𑀺 𑀙𑀳𑀺 𑀞𑀸𑀦𑁂𑀳𑀺 𑀧𑀭𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀧𑀭𑀺𑀬𑁄𑀤𑀸𑀢𑀁 𑀏𑀓𑀢𑁆𑀢𑀕𑀢𑀁 𑀳𑁄𑀢𑀺.

𑀓𑀢𑀫𑁂 𑀢𑁂 𑀏𑀓𑀢𑁆𑀢𑀸? 𑀤𑀸𑀦𑀯𑁄𑀲𑀕𑁆𑀕𑀼𑀧𑀝𑁆𑀞𑀸𑀦𑁂𑀓𑀢𑁆𑀢𑀁, 𑀲𑀫𑀣𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀦𑁂𑀓𑀢𑁆𑀢𑀁, 𑀯𑀬𑀮𑀓𑁆𑀔𑀡𑀼𑀧𑀝𑁆𑀞𑀸𑀦𑁂𑀓𑀢𑁆𑀢𑀁, 𑀦𑀺𑀭𑁄𑀥𑀼𑀧𑀝𑁆𑀞𑀸𑀦𑁂𑀓𑀢𑁆𑀢𑀁. 𑀤𑀸𑀦𑀯𑁄𑀲𑀕𑁆𑀕𑀼𑀧𑀝𑁆𑀞𑀸𑀦𑁂𑀓𑀢𑁆𑀢𑀁 𑀘𑀸𑀕𑀸𑀥𑀺𑀫𑀼𑀢𑁆𑀢𑀸𑀦𑀁, 𑀲𑀫𑀣𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀦𑁂𑀓𑀢𑁆𑀢𑀜𑁆𑀘 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀸𑀦𑀁, 𑀯𑀬𑀮𑀓𑁆𑀔𑀡𑀼𑀧𑀝𑁆𑀞𑀸𑀦𑁂𑀓𑀢𑁆𑀢𑀜𑁆𑀘 𑀯𑀺𑀧𑀲𑁆𑀲𑀓𑀸𑀦𑀁, 𑀦𑀺𑀭𑁄𑀥𑀼𑀧𑀝𑁆𑀞𑀸𑀦𑁂𑀓𑀢𑁆𑀢𑀜𑁆𑀘 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑁋 𑀇𑀫𑁂𑀳𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀏𑀓𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀧𑀓𑁆𑀔𑀦𑁆𑀤𑀜𑁆𑀘𑁂𑀯 𑀳𑁄𑀢𑀺, 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀺𑀢𑀜𑁆𑀘, 𑀜𑀸𑀡𑁂𑀦 𑀘 𑀲𑀫𑁆𑀧𑀳𑀁𑀲𑀺𑀢𑀁.

𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀓𑁄 𑀆𑀤𑀺, 𑀓𑀺𑀁 𑀫𑀚𑁆𑀛𑁂, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁? 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺. 𑀆𑀤𑀺𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀆𑀤𑀺𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀬𑁄 𑀢𑀲𑁆𑀲 𑀧𑀭𑀺𑀧𑀦𑁆𑀣𑁄 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀬𑀜𑁆𑀘 𑀧𑀭𑀺𑀧𑀦𑁆𑀣𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀬𑀜𑁆𑀘 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀬𑀜𑁆𑀘 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺. 𑀆𑀤𑀺𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀞𑀫𑀁 𑀛𑀸𑀦𑀁 𑀆𑀤𑀺𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘’’.

𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂. 𑀫𑀚𑁆𑀛𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀫𑀚𑁆𑀛𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀲𑀫𑀣𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀬𑀜𑁆𑀘 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀬𑀜𑁆𑀘 𑀲𑀫𑀣𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀬𑀜𑁆𑀘 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 𑁋 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂. 𑀫𑀚𑁆𑀛𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀞𑀫𑀁 𑀛𑀸𑀦𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘’’.

𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀧𑀭𑀺𑀬𑁄𑀲𑀸𑀦𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀧𑀭𑀺𑀬𑁄𑀲𑀸𑀦𑀲𑁆𑀲 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀦𑀺. 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀆𑀲𑁂𑀯𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀧𑀭𑀺𑀬𑁄𑀲𑀸𑀦𑀲𑁆𑀲 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀞𑀫𑀁 𑀛𑀸𑀦𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘’’. 𑀏𑀯𑀁 𑀢𑀺𑀯𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀓𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀯𑀺𑀢𑀓𑁆𑀓𑀲𑀫𑁆𑀧𑀦𑁆𑀦𑀜𑁆𑀘𑁂𑀯 𑀳𑁄𑀢𑀺 𑀯𑀺𑀘𑀸𑀭𑀲𑀫𑁆𑀧𑀦𑁆𑀦𑀜𑁆𑀘 𑀧𑀻𑀢𑀺𑀲𑀫𑁆𑀧𑀦𑁆𑀦𑀜𑁆𑀘 𑀲𑀼𑀔𑀲𑀫𑁆𑀧𑀦𑁆𑀦𑀜𑁆𑀘 𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀜𑁆𑀘 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀜𑁆𑀘 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀜𑁆𑀘 𑀲𑀢𑀺𑀲𑀫𑁆𑀧𑀦𑁆𑀦𑀜𑁆𑀘 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀜𑁆𑀘 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀜𑁆𑀘.

𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀓𑁄 𑀆𑀤𑀺, 𑀓𑀺𑀁 𑀫𑀚𑁆𑀛𑁂, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁? 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁…𑀧𑁂… 𑀏𑀯𑀁 𑀢𑀺𑀯𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀓𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀧𑀻𑀢𑀺𑀲𑀫𑁆𑀧𑀦𑁆𑀦𑀜𑁆𑀘𑁂𑀯 𑀳𑁄𑀢𑀺 𑀲𑀼𑀔𑀲𑀫𑁆𑀧𑀦𑁆𑀦𑀜𑁆𑀘 𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀜𑁆𑀘 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀜𑁆𑀘 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀜𑁆𑀘 𑀲𑀢𑀺𑀲𑀫𑁆𑀧𑀦𑁆𑀦𑀜𑁆𑀘 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀜𑁆𑀘 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀜𑁆𑀘.

𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀓𑁄 𑀆𑀤𑀺, 𑀓𑀺𑀁 𑀫𑀚𑁆𑀛𑁂, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁…𑀧𑁂… 𑀏𑀯𑀁 𑀢𑀺𑀯𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀓𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀲𑀼𑀔𑀲𑀫𑁆𑀧𑀦𑁆𑀦𑀜𑁆𑀘𑁂𑀯 𑀳𑁄𑀢𑀺 𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀜𑁆𑀘 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀜𑁆𑀘 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀜𑁆𑀘 𑀲𑀢𑀺𑀲𑀫𑁆𑀧𑀦𑁆𑀦𑀜𑁆𑀘 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀜𑁆𑀘 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀜𑁆𑀘.

𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀓𑁄 𑀆𑀤𑀺, 𑀓𑀺𑀁 𑀫𑀚𑁆𑀛𑁂, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁…𑀧𑁂… 𑀏𑀯𑀁 𑀢𑀺𑀯𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀓𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘 𑀉𑀧𑁂𑀓𑁆𑀔𑀸𑀲𑀫𑁆𑀧𑀦𑁆𑀦𑀜𑁆𑀘𑁂𑀯 𑀳𑁄𑀢𑀺 𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀜𑁆𑀘 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀜𑁆𑀘 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀜𑁆𑀘 𑀲𑀢𑀺𑀲𑀫𑁆𑀧𑀦𑁆𑀦𑀜𑁆𑀘 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀜𑁆𑀘 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀜𑁆𑀘.

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸…𑀧𑁂… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀓𑁄 𑀆𑀤𑀺, 𑀓𑀺𑀁 𑀫𑀚𑁆𑀛𑁂, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁…𑀧𑁂… 𑀏𑀯𑀁 𑀢𑀺𑀯𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀓𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀉𑀧𑁂𑀓𑁆𑀔𑀸𑀲𑀫𑁆𑀧𑀦𑁆𑀦𑀜𑁆𑀘𑁂𑀯 𑀳𑁄𑀢𑀺 𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀁 𑀘…𑀧𑁂… 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀜𑁆𑀘.

𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀓𑁄 𑀆𑀤𑀺, 𑀓𑀺𑀁 𑀫𑀚𑁆𑀛𑁂, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁…𑀧𑁂… 𑀏𑀯𑀁 𑀢𑀺𑀯𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀓𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀯𑀺𑀢𑀓𑁆𑀓𑀲𑀫𑁆𑀧𑀦𑁆𑀦𑀜𑁆𑀘𑁂𑀯 𑀳𑁄𑀢𑀺 𑀯𑀺𑀘𑀸𑀭𑀲𑀫𑁆𑀧𑀦𑁆𑀦𑀜𑁆𑀘 𑀧𑀻𑀢𑀺𑀲𑀫𑁆𑀧𑀦𑁆𑀦𑀜𑁆𑀘 𑀲𑀼𑀔𑀲𑀫𑁆𑀧𑀦𑁆𑀦𑀜𑁆𑀘 𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀜𑁆𑀘 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀜𑁆𑀘 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀜𑁆𑀘 𑀲𑀢𑀺𑀲𑀫𑁆𑀧𑀦𑁆𑀦𑀜𑁆𑀘 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀜𑁆𑀘 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀜𑁆𑀘. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬…𑀧𑁂… 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬… 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬… 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬… 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬… 𑀔𑀬𑀸𑀦𑀼𑀧𑀲𑁆𑀲𑀦𑀸𑀬… 𑀯𑀬𑀸𑀦𑀼𑀧𑀲𑁆𑀲𑀦𑀸𑀬… 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑀸𑀬… 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬… 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀬… 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀬… 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬… 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀸𑀬… 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀬… 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀬… 𑀯𑀺𑀯𑀝𑁆𑀝𑀦𑀸𑀦𑀼𑀧𑀲𑁆𑀲𑀦𑀸𑀬… 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀜𑁆𑀘.

𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲…𑀧𑁂… 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲… 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲… 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀓𑁄 𑀆𑀤𑀺, 𑀓𑀺𑀁 𑀫𑀚𑁆𑀛𑁂, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁? 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺. 𑀆𑀤𑀺𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀆𑀤𑀺𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀬𑁄 𑀢𑀲𑁆𑀲 𑀧𑀭𑀺𑀧𑀦𑁆𑀣𑁄 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀬𑀜𑁆𑀘 𑀧𑀭𑀺𑀧𑀦𑁆𑀣𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀬𑀜𑁆𑀘 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀬𑀜𑁆𑀘 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑁋 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺. 𑀆𑀤𑀺𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀭𑀳𑀢𑁆𑀢𑀫𑀕𑁆𑀕𑁄 𑀆𑀤𑀺𑀓𑀮𑁆𑀬𑀸𑀡𑁄 𑀘𑁂𑀯 𑀳𑁄𑀢𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀘’’.

𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂. 𑀫𑀚𑁆𑀛𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀫𑀚𑁆𑀛𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀲𑀫𑀣𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀬𑀜𑁆𑀘 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀬𑀜𑁆𑀘 𑀲𑀫𑀣𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀬𑀜𑁆𑀘 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀭𑀳𑀢𑁆𑀢𑀫𑀕𑁆𑀕𑁄 𑀫𑀚𑁆𑀛𑁂𑀓𑀮𑁆𑀬𑀸𑀡𑁄 𑀘𑁂𑀯 𑀳𑁄𑀢𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀘’’.

𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀧𑀭𑀺𑀬𑁄𑀲𑀸𑀦𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀧𑀭𑀺𑀬𑁄𑀲𑀸𑀦𑀲𑁆𑀲 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀦𑀺. 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀆𑀲𑁂𑀯𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸. 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀧𑀭𑀺𑀬𑁄𑀲𑀸𑀦𑀲𑁆𑀲 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀭𑀳𑀢𑁆𑀢𑀫𑀕𑁆𑀕𑁄 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄 𑀘𑁂𑀯 𑀳𑁄𑀢𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀘’’. 𑀏𑀯𑀁 𑀢𑀺𑀯𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀓𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀯𑀺𑀢𑀓𑁆𑀓𑀲𑀫𑁆𑀧𑀦𑁆𑀦𑀜𑁆𑀘𑁂𑀯 𑀳𑁄𑀢𑀺 𑀯𑀺𑀘𑀸𑀭𑀲𑀫𑁆𑀧𑀦𑁆𑀦𑀜𑁆𑀘 𑀧𑀻𑀢𑀺𑀲𑀫𑁆𑀧𑀦𑁆𑀦𑀜𑁆𑀘 𑀲𑀼𑀔𑀲𑀫𑁆𑀧𑀦𑁆𑀦𑀜𑁆𑀘 𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀜𑁆𑀘 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀜𑁆𑀘 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀜𑁆𑀘 𑀲𑀢𑀺𑀲𑀫𑁆𑀧𑀦𑁆𑀦𑀜𑁆𑀘 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀜𑁆𑀘 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀜𑁆𑀘.

𑁧𑁫𑁯. 𑀦𑀺𑀫𑀺𑀢𑁆𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀅𑀦𑀸𑀭𑀫𑁆𑀫𑀡𑀫𑁂𑀓𑀘𑀺𑀢𑁆𑀢𑀲𑁆𑀲;

𑀅𑀚𑀸𑀦𑀢𑁄 𑀘 𑀢𑀬𑁄 𑀥𑀫𑁆𑀫𑁂, 𑀪𑀸𑀯𑀦𑀸 𑀦𑀼𑀧𑀮𑀩𑁆𑀪𑀢𑀺.

𑀦𑀺𑀫𑀺𑀢𑁆𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀅𑀦𑀸𑀭𑀫𑁆𑀫𑀡𑀫𑁂𑀓𑀘𑀺𑀢𑁆𑀢𑀲𑁆𑀲;

𑀚𑀸𑀦𑀢𑁄 𑀘 𑀢𑀬𑁄 𑀥𑀫𑁆𑀫𑁂, 𑀪𑀸𑀯𑀦𑀸 𑀉𑀧𑀮𑀩𑁆𑀪𑀢𑀻𑀢𑀺.

𑀓𑀣𑀁 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀏𑀓𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀸 𑀦 𑀳𑁄𑀦𑁆𑀢𑀺, 𑀦 𑀘𑀺𑀫𑁂 𑀢𑀬𑁄 𑀥𑀫𑁆𑀫𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀦 𑀘 𑀘𑀺𑀢𑁆𑀢𑀁 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺, 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀺? 𑀲𑁂𑀬𑁆𑀬𑀣𑀸𑀧𑀺 𑀭𑀼𑀓𑁆𑀔𑁄 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀦𑀺𑀓𑁆𑀔𑀺𑀢𑁆𑀢𑁄. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀓𑀓𑀘𑁂𑀦 𑀙𑀺𑀦𑁆𑀤𑁂𑀬𑁆𑀬. 𑀭𑀼𑀓𑁆𑀔𑁂 𑀨𑀼𑀝𑁆𑀞𑀓𑀓𑀘𑀤𑀦𑁆𑀢𑀸𑀦𑀁 𑀯𑀲𑁂𑀦 𑀧𑀼𑀭𑀺𑀲𑀲𑁆𑀲 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺; 𑀦 𑀆𑀕𑀢𑁂 𑀯𑀸 𑀕𑀢𑁂 𑀯𑀸 𑀓𑀓𑀘𑀤𑀦𑁆𑀢𑁂 𑀫𑀦𑀲𑀺 𑀓𑀭𑁄𑀢𑀺. 𑀦 𑀆𑀕𑀢𑀸 𑀯𑀸 𑀕𑀢𑀸 𑀯𑀸 𑀓𑀓𑀘𑀤𑀦𑁆𑀢𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺. 𑀬𑀣𑀸 𑀭𑀼𑀓𑁆𑀔𑁄 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀦𑀺𑀓𑁆𑀔𑀺𑀢𑁆𑀢𑁄. 𑀏𑀯𑀁 𑀉𑀧𑀦𑀺𑀩𑀦𑁆𑀥𑀦𑀸 𑀦𑀺𑀫𑀺𑀢𑁆𑀢𑀁. 𑀬𑀣𑀸 𑀓𑀓𑀘𑀤𑀦𑁆𑀢𑀸, 𑀏𑀯𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸. 𑀬𑀣𑀸 𑀭𑀼𑀓𑁆𑀔𑁂 𑀨𑀼𑀝𑁆𑀞𑀓𑀓𑀘𑀤𑀦𑁆𑀢𑀸𑀦𑀁 𑀯𑀲𑁂𑀦 𑀧𑀼𑀭𑀺𑀲𑀲𑁆𑀲 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀦 𑀆𑀕𑀢𑁂 𑀯𑀸 𑀕𑀢𑁂 𑀯𑀸 𑀓𑀓𑀘𑀤𑀦𑁆𑀢𑁂 𑀫𑀦𑀲𑀺 𑀓𑀭𑁄𑀢𑀺, 𑀦 𑀆𑀕𑀢𑀸 𑀯𑀸 𑀕𑀢𑀸 𑀯𑀸 𑀓𑀓𑀘𑀤𑀦𑁆𑀢𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺. 𑀏𑀯𑀫𑁂𑀯𑀁 𑀪𑀺𑀓𑁆𑀔𑀼 𑀦𑀸𑀲𑀺𑀓𑀕𑁆𑀕𑁂 𑀯𑀸 𑀫𑀼𑀔𑀦𑀺𑀫𑀺𑀢𑁆𑀢𑁂 𑀯𑀸 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀦 𑀆𑀕𑀢𑁂 𑀯𑀸 𑀕𑀢𑁂 𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀫𑀦𑀲𑀺 𑀓𑀭𑁄𑀢𑀺, 𑀦 𑀆𑀕𑀢𑀸 𑀯𑀸 𑀕𑀢𑀸 𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺. 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀺 𑀧𑀥𑀸𑀦𑀜𑁆𑀘.

𑀓𑀢𑀫𑀁 𑀧𑀥𑀸𑀦𑀁? 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺 𑁋 𑀇𑀤𑀁 𑀧𑀥𑀸𑀦𑀁. 𑀓𑀢𑀫𑁄 𑀧𑀬𑁄𑀕𑁄? 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀯𑀺𑀢𑀓𑁆𑀓𑀸 𑀯𑀽𑀧𑀲𑀫𑀦𑁆𑀢𑀺 𑁋 𑀅𑀬𑀁 𑀧𑀬𑁄𑀕𑁄. 𑀓𑀢𑀫𑁄 𑀯𑀺𑀲𑁂𑀲𑁄? 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀲𑀜𑁆𑀜𑁄𑀚𑀦𑀸 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺 [𑀅𑀦𑀼𑀲𑀬𑀸 𑀩𑁆𑀬𑀸𑀲𑀦𑁆𑀢𑀺 (𑀲𑁆𑀬𑀸.)]. 𑀅𑀬𑀁 𑀯𑀺𑀲𑁂𑀲𑁄. 𑀏𑀯𑀁 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀏𑀓𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀸 𑀦 𑀳𑁄𑀦𑁆𑀢𑀺, 𑀦 𑀘𑀺𑀫𑁂 𑀢𑀬𑁄 𑀥𑀫𑁆𑀫𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀦 𑀘 𑀘𑀺𑀢𑁆𑀢𑀁 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺, 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀺.

𑁧𑁬𑁦. 𑀆𑀦𑀸𑀧𑀸𑀦𑀲𑁆𑀲𑀢𑀺 𑀬𑀲𑁆𑀲, 𑀧𑀭𑀺𑀧𑀼𑀡𑁆𑀡𑀸 𑀲𑀼𑀪𑀸𑀯𑀺𑀢𑀸;

𑀅𑀦𑀼𑀧𑀼𑀩𑁆𑀩𑀁 𑀧𑀭𑀺𑀘𑀺𑀢𑀸, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸;

𑀲𑁄 𑀇𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸𑀢𑀺.

𑀆𑀦𑀦𑁆𑀢𑀺 𑀅𑀲𑁆𑀲𑀸𑀲𑁄, 𑀦𑁄 𑀧𑀲𑁆𑀲𑀸𑀲𑁄. 𑀅𑀧𑀸𑀦𑀦𑁆𑀢𑀺 [𑀅𑀧𑀸𑀦𑀦𑁆𑀢𑀺 (𑀓.)] 𑀧𑀲𑁆𑀲𑀸𑀲𑁄, 𑀦𑁄 𑀅𑀲𑁆𑀲𑀸𑀲𑁄. 𑀅𑀲𑁆𑀲𑀸𑀲𑀯𑀲𑁂𑀦 𑀉𑀧𑀝𑁆𑀞𑀸𑀦𑀁 𑀲𑀢𑀺, 𑀧𑀲𑁆𑀲𑀸𑀲𑀯𑀲𑁂𑀦 𑀉𑀧𑀝𑁆𑀞𑀸𑀦𑀁 𑀲𑀢𑀺.

𑀬𑁄 𑀅𑀲𑁆𑀲𑀲𑀢𑀺 𑀢𑀲𑁆𑀲𑀼𑀧𑀝𑁆𑀞𑀸𑀢𑀺, 𑀬𑁄 𑀧𑀲𑁆𑀲𑀲𑀢𑀺 𑀢𑀲𑁆𑀲𑀼𑀧𑀝𑁆𑀞𑀸𑀢𑀺. 𑀧𑀭𑀺𑀧𑀼𑀡𑁆𑀡𑀸𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀧𑀭𑀺𑀧𑀼𑀡𑁆𑀡𑀸, 𑀧𑀭𑀺𑀯𑀸𑀭𑀝𑁆𑀞𑁂𑀦 𑀧𑀭𑀺𑀧𑀼𑀡𑁆𑀡𑀸, 𑀧𑀭𑀺𑀧𑀽𑀭𑀝𑁆𑀞𑁂𑀦 𑀧𑀭𑀺𑀧𑀼𑀡𑁆𑀡𑀸. 𑀲𑀼𑀪𑀸𑀯𑀺𑀢𑀸𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸 𑁋 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸, 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸. 𑀢𑀲𑁆𑀲𑀺𑀫𑁂 𑀘𑀢𑁆𑀢𑀸𑀭𑁄 𑀪𑀸𑀯𑀦𑀝𑁆𑀞𑀸 𑀬𑀸𑀦𑀻𑀓𑀢𑀸 𑀳𑁄𑀦𑁆𑀢𑀺 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸.

𑀬𑀸𑀦𑀻𑀓𑀢𑀸𑀢𑀺 𑀬𑀢𑁆𑀣 𑀬𑀢𑁆𑀣 𑀆𑀓𑀗𑁆𑀔𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀲𑀺𑀧𑁆𑀧𑀢𑁆𑀢𑁄 𑀳𑁄𑀢𑀺 𑀩𑀮𑀧𑁆𑀧𑀢𑁆𑀢𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄. 𑀢𑀲𑁆𑀲 𑀫𑁂 𑀢𑁂 𑀥𑀫𑁆𑀫𑀸 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀸 [𑀆𑀯𑀚𑁆𑀚𑀦𑀧𑀝𑀺𑀩𑀦𑁆𑀥𑀸 (𑀓.) 𑀏𑀯𑀫𑀻𑀤𑀺𑀲𑁂𑀲𑀼 𑀧𑀤𑁂𑀲𑀼] 𑀳𑁄𑀦𑁆𑀢𑀺 𑀆𑀓𑀗𑁆𑀔𑀧𑀝𑀺𑀩𑀤𑁆𑀥𑀸 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀝𑀺𑀩𑀤𑁆𑀥𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀬𑀸𑀦𑀻𑀓𑀢𑀸’’𑀢𑀺. 𑀯𑀢𑁆𑀣𑀼𑀓𑀢𑀸𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀘𑀺𑀢𑁆𑀢𑀁 𑀲𑁆𑀯𑀸𑀥𑀺𑀝𑁆𑀞𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀢𑀺 𑀲𑀼𑀧𑀝𑁆𑀞𑀺𑀢𑀸 𑀳𑁄𑀢𑀺. 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀯𑀸 𑀧𑀦 𑀯𑀢𑁆𑀣𑀼𑀲𑁆𑀫𑀺𑀁 𑀲𑀢𑀺 𑀲𑀽𑀧𑀝𑁆𑀞𑀺𑀢𑀸 [𑀲𑀼𑀧𑀝𑁆𑀞𑀺𑀢𑀸 (𑀓.)] 𑀳𑁄𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀘𑀺𑀢𑁆𑀢𑀁 𑀲𑁆𑀯𑀸𑀥𑀺𑀝𑁆𑀞𑀺𑀢𑀁 𑀳𑁄𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀯𑀢𑁆𑀣𑀼𑀓𑀢𑀸’’𑀢𑀺. 𑀅𑀦𑀼𑀝𑁆𑀞𑀺𑀢𑀸𑀢𑀺 𑀯𑀢𑁆𑀣𑀼𑀲𑁆𑀫𑀺𑀁 𑀬𑁂𑀦 𑀬𑁂𑀦 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀢𑁂𑀦 𑀢𑁂𑀦 𑀲𑀢𑀺 𑀅𑀦𑀼𑀧𑀭𑀺𑀯𑀢𑁆𑀢𑀢𑀺. 𑀬𑁂𑀦 𑀬𑁂𑀦 𑀯𑀸 𑀧𑀦 𑀲𑀢𑀺 𑀅𑀦𑀼𑀧𑀭𑀺𑀯𑀢𑁆𑀢𑀢𑀺 𑀢𑁂𑀦 𑀢𑁂𑀦 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀦𑀼𑀝𑁆𑀞𑀺𑀢𑀸’’𑀢𑀺. 𑀧𑀭𑀺𑀘𑀺𑀢𑀸𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀧𑀭𑀺𑀘𑀺𑀢𑀸, 𑀧𑀭𑀺𑀯𑀸𑀭𑀝𑁆𑀞𑁂𑀦 𑀧𑀭𑀺𑀘𑀺𑀢𑀸, 𑀧𑀭𑀺𑀧𑀽𑀭𑀝𑁆𑀞𑁂𑀦 𑀧𑀭𑀺𑀘𑀺𑀢𑀸. 𑀲𑀢𑀺𑀬𑀸 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀚𑀺𑀦𑀸𑀢𑀺 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀭𑀺𑀘𑀺𑀢𑀸’’𑀢𑀺. 𑀲𑀼𑀲𑀫𑀸𑀭𑀤𑁆𑀥𑀸𑀢𑀺 𑀘𑀢𑁆𑀢𑀸𑀭𑁄 𑀲𑀼𑀲𑀫𑀸𑀭𑀤𑁆𑀥𑀸 𑁋 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀲𑀼𑀲𑀫𑀸𑀭𑀤𑁆𑀥𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀲𑀼𑀲𑀫𑀸𑀭𑀤𑁆𑀥𑀸, 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀲𑀼𑀲𑀫𑀸𑀭𑀤𑁆𑀥𑀸, 𑀢𑀧𑁆𑀧𑀘𑁆𑀘𑀦𑀻𑀓𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀼𑀲𑀫𑀽𑀳𑀢𑀢𑁆𑀢𑀸 [𑀲𑀼𑀲𑀫𑀼𑀳𑀢𑀢𑁆𑀢𑀸 (𑀓.)] 𑀲𑀼𑀲𑀫𑀸𑀭𑀤𑁆𑀥𑀸.

𑁧𑁬𑁧. 𑀲𑀼𑀲𑀫𑀦𑁆𑀢𑀺 𑀅𑀢𑁆𑀣𑀺 𑀲𑀫𑀁, 𑀅𑀢𑁆𑀣𑀺 𑀲𑀼𑀲𑀫𑀁. 𑀓𑀢𑀫𑀁 𑀲𑀫𑀁? 𑀬𑁂 𑀢𑀢𑁆𑀣 𑀚𑀸𑀢𑀸 𑀅𑀦𑀯𑀚𑁆𑀚𑀸 𑀓𑀼𑀲𑀮𑀸 𑀩𑁄𑀥𑀺𑀧𑀓𑁆𑀔𑀺𑀬𑀸 𑁋 𑀇𑀤𑀁 𑀲𑀫𑀁. 𑀓𑀢𑀫𑀁 𑀲𑀼𑀲𑀫𑀁? 𑀬𑀁 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀁 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁 𑁋 𑀇𑀤𑀁 𑀲𑀼𑀲𑀫𑀁. 𑀇𑀢𑀺 𑀇𑀤𑀜𑁆𑀘 𑀲𑀫𑀁 𑀇𑀤𑀜𑁆𑀘 𑀲𑀼𑀲𑀫𑀁 𑀜𑀸𑀢𑀁 𑀳𑁄𑀢𑀺 𑀤𑀺𑀝𑁆𑀞𑀁 𑀯𑀺𑀤𑀺𑀢𑀁 𑀲𑀘𑁆𑀙𑀺𑀓𑀢𑀁 𑀨𑀲𑁆𑀲𑀺𑀢𑀁 𑀧𑀜𑁆𑀜𑀸𑀬. 𑀆𑀭𑀤𑁆𑀥𑀁 𑀳𑁄𑀢𑀺 𑀯𑀻𑀭𑀺𑀬𑀁 𑀅𑀲𑀮𑁆𑀮𑀻𑀦𑀁, 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀽𑀴𑀸 [𑀅𑀧𑀫𑀼𑀝𑁆𑀞𑀸 (𑀲𑁆𑀬𑀸.)], 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀲𑀼𑀲𑀫𑀸𑀭𑀤𑁆𑀥𑀸’’𑀢𑀺.

𑀅𑀦𑀼𑀧𑀼𑀩𑁆𑀩𑀁 𑀧𑀭𑀺𑀘𑀺𑀢𑀸𑀢𑀺 𑀤𑀻𑀖𑀁 𑀅𑀲𑁆𑀲𑀸𑀲𑀯𑀲𑁂𑀦 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀧𑀭𑀺𑀘𑀺𑀢𑀸, 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀅𑀦𑀼𑀧𑀭𑀺𑀘𑀺𑀢𑀸. 𑀤𑀻𑀖𑀁 𑀧𑀲𑁆𑀲𑀸𑀲𑀯𑀲𑁂𑀦 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀧𑀭𑀺𑀘𑀺𑀢𑀸, 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀅𑀦𑀼𑀧𑀭𑀺𑀘𑀺𑀢𑀸. 𑀭𑀲𑁆𑀲𑀁 𑀅𑀲𑁆𑀲𑀸𑀲𑀯𑀲𑁂𑀦 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀧𑀭𑀺𑀘𑀺𑀢𑀸, 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀅𑀦𑀼𑀧𑀭𑀺𑀘𑀺𑀢𑀸. 𑀭𑀲𑁆𑀲𑀁 𑀧𑀲𑁆𑀲𑀸𑀲𑀯𑀲𑁂𑀦 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀧𑀭𑀺𑀘𑀺𑀢𑀸, 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀅𑀦𑀼𑀧𑀭𑀺𑀘𑀺𑀢𑀸…𑀧𑁂… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀅𑀲𑁆𑀲𑀸𑀲𑀯𑀲𑁂𑀦 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀧𑀭𑀺𑀘𑀺𑀢𑀸, 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀅𑀦𑀼𑀧𑀭𑀺𑀘𑀺𑀢𑀸. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀧𑀲𑁆𑀲𑀸𑀲𑀯𑀲𑁂𑀦 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀧𑀭𑀺𑀘𑀺𑀢𑀸, 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀅𑀦𑀼𑀧𑀭𑀺𑀘𑀺𑀢𑀸. 𑀲𑀩𑁆𑀩𑀸𑀧𑀺 𑀲𑁄𑀴𑀲𑀯𑀢𑁆𑀣𑀼𑀓𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑁄 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀘𑀺𑀢𑀸 𑀘𑁂𑀯 𑀳𑁄𑀦𑁆𑀢𑀺 𑀅𑀦𑀼𑀧𑀭𑀺𑀘𑀺𑀢𑀸 𑀘. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀦𑀼𑀧𑀼𑀩𑁆𑀩𑀧𑀭𑀺𑀘𑀺𑀢𑀸’’𑀢𑀺.

𑀬𑀣𑀸𑀢𑀺 𑀤𑀲 𑀬𑀣𑀢𑁆𑀣𑀸 𑁋 𑀅𑀢𑁆𑀢𑀤𑀫𑀣𑀢𑁆𑀣𑁄 𑀬𑀣𑀢𑁆𑀣𑁄, 𑀅𑀢𑁆𑀢𑀲𑀫𑀣𑀢𑁆𑀣𑁄 𑀬𑀣𑀢𑁆𑀣𑁄, 𑀅𑀢𑁆𑀢𑀧𑀭𑀺𑀦𑀺𑀩𑁆𑀩𑀸𑀧𑀦𑀢𑁆𑀣𑁄 𑀬𑀣𑀢𑁆𑀣𑁄, 𑀅𑀪𑀺𑀜𑁆𑀜𑀢𑁆𑀣𑁄 𑀬𑀣𑀢𑁆𑀣𑁄, 𑀧𑀭𑀺𑀜𑁆𑀜𑀢𑁆𑀣𑁄 𑀬𑀣𑀢𑁆𑀣𑁄, 𑀧𑀳𑀸𑀦𑀢𑁆𑀣𑁄 𑀬𑀣𑀢𑁆𑀣𑁄, 𑀪𑀸𑀯𑀦𑀢𑁆𑀣𑁄 𑀬𑀣𑀢𑁆𑀣𑁄, 𑀲𑀘𑁆𑀙𑀺𑀓𑀺𑀭𑀺𑀬𑀢𑁆𑀣𑁄 𑀬𑀣𑀢𑁆𑀣𑁄, 𑀲𑀘𑁆𑀘𑀸𑀪𑀺𑀲𑀫𑀬𑀢𑁆𑀣𑁄 𑀬𑀣𑀢𑁆𑀣𑁄, 𑀦𑀺𑀭𑁄𑀥𑁂 𑀧𑀢𑀺𑀝𑁆𑀞𑀸𑀧𑀓𑀢𑁆𑀣𑁄 𑀬𑀣𑀢𑁆𑀣𑁄.

𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺, 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀁.

𑁧𑁬𑁨. 𑀩𑀼𑀤𑁆𑀥𑁄𑀢𑀺 𑀓𑁂𑀦𑀝𑁆𑀞𑁂𑀦 𑀩𑀼𑀤𑁆𑀥𑁄? 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑁋 𑀩𑀼𑀤𑁆𑀥𑁄. 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑁋 𑀩𑀼𑀤𑁆𑀥𑁄. 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀼𑀤𑁆𑀥𑁄. 𑀲𑀩𑁆𑀩𑀤𑀲𑁆𑀲𑀸𑀯𑀺𑀢𑀸𑀬 𑀩𑀼𑀤𑁆𑀥𑁄. 𑀅𑀦𑀜𑁆𑀜𑀦𑁂𑀬𑁆𑀬𑀢𑀸𑀬 𑀩𑀼𑀤𑁆𑀥𑁄. 𑀯𑀺𑀲𑀯𑀺𑀢𑀸𑀬 [𑀯𑀺𑀓𑀢𑀺𑀢𑀸𑀬 (𑀲𑁆𑀬𑀸.)] 𑀩𑀼𑀤𑁆𑀥𑁄. 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄. 𑀦𑀺𑀭𑀼𑀧𑀮𑁂𑀧𑀲𑀗𑁆𑀔𑀸𑀢𑁂𑀦 [𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀦 (𑀲𑁆𑀬𑀸.)] 𑀩𑀼𑀤𑁆𑀥𑁄. 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑁋 𑀩𑀼𑀤𑁆𑀥𑁄. 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑁋 𑀩𑀼𑀤𑁆𑀥𑁄. 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑁋 𑀩𑀼𑀤𑁆𑀥𑁄. 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑁋 𑀩𑀼𑀤𑁆𑀥𑁄. 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑁋 𑀩𑀼𑀤𑁆𑀥𑁄. 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑁋 𑀩𑀼𑀤𑁆𑀥𑁄. 𑀅𑀩𑀼𑀤𑁆𑀥𑀺𑀯𑀺𑀳𑀢𑀢𑁆𑀢𑀸 𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀸 𑁋 𑀩𑀼𑀤𑁆𑀥𑁄. 𑀩𑀼𑀤𑁆𑀥𑁄𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁. 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑁋 𑀩𑀼𑀤𑁆𑀥𑁄𑀢𑀺. 𑀤𑁂𑀲𑀺𑀢𑀸𑀢𑀺 𑀅𑀢𑁆𑀢𑀤𑀫𑀣𑀢𑁆𑀣𑁄 𑀬𑀣𑀢𑁆𑀣𑁄 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑁄, 𑀅𑀢𑁆𑀢𑀲𑀫𑀣𑀢𑁆𑀣𑁄 𑀬𑀣𑀢𑁆𑀣𑁄 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑁄, 𑀅𑀢𑁆𑀢𑀧𑀭𑀺𑀦𑀺𑀩𑁆𑀩𑀸𑀧𑀦𑀢𑁆𑀣𑁄 𑀬𑀣𑀢𑁆𑀣𑁄 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑁄…𑀧𑁂… 𑀦𑀺𑀭𑁄𑀥𑁂 𑀧𑀢𑀺𑀝𑁆𑀞𑀸𑀧𑀓𑀢𑁆𑀣𑁄 𑀬𑀣𑀢𑁆𑀣𑁄 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑁄.

𑀲𑁄𑀢𑀺 𑀕𑀳𑀝𑁆𑀞𑁄 𑀯𑀸 𑀳𑁄𑀢𑀺 𑀧𑀩𑁆𑀩𑀚𑀺𑀢𑁄 𑀯𑀸. 𑀮𑁄𑀓𑁄𑀢𑀺. 𑀔𑀦𑁆𑀥𑀮𑁄𑀓𑁄 𑀥𑀸𑀢𑀼𑀮𑁄𑀓𑁄 𑀆𑀬𑀢𑀦𑀮𑁄𑀓𑁄 𑀯𑀺𑀧𑀢𑁆𑀢𑀺𑀪𑀯𑀮𑁄𑀓𑁄 𑀯𑀺𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄 𑀲𑀫𑁆𑀧𑀢𑁆𑀢𑀺𑀪𑀯𑀮𑁄𑀓𑁄 𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄. 𑀏𑀓𑁄 𑀮𑁄𑀓𑁄 𑁋 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸…𑀧𑁂… 𑀅𑀝𑁆𑀞𑀸𑀭𑀲 𑀮𑁄𑀓𑀸 𑁋 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄. 𑀧𑀪𑀸𑀲𑁂𑀢𑀻𑀢𑀺 𑀅𑀢𑁆𑀢𑀤𑀫𑀣𑀢𑁆𑀣𑀁 𑀬𑀣𑀢𑁆𑀣𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸. 𑀲𑁄 𑀇𑀫𑀁 𑀮𑁄𑀓𑀁 𑀑𑀪𑀸𑀲𑁂𑀢𑀺 𑀪𑀸𑀲𑁂𑀢𑀺 𑀧𑀪𑀸𑀲𑁂𑀢𑀺. 𑀅𑀢𑁆𑀢𑀲𑀫𑀣𑀢𑁆𑀣𑀁 𑀬𑀣𑀢𑁆𑀣𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸. 𑀲𑁄 𑀇𑀫𑀁 𑀮𑁄𑀓𑀁 𑀑𑀪𑀸𑀲𑁂𑀢𑀺 𑀪𑀸𑀲𑁂𑀢𑀺 𑀧𑀪𑀸𑀲𑁂𑀢𑀺. 𑀅𑀢𑁆𑀢𑀧𑀭𑀺𑀦𑀺𑀩𑁆𑀩𑀸𑀧𑀦𑀢𑁆𑀣𑀁 𑀬𑀣𑀢𑁆𑀣𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸. 𑀲𑁄 𑀇𑀫𑀁 𑀮𑁄𑀓𑀁 𑀑𑀪𑀸𑀲𑁂𑀢𑀺 𑀪𑀸𑀲𑁂𑀢𑀺 𑀧𑀪𑀸𑀲𑁂𑀢𑀺…𑀧𑁂… 𑀦𑀺𑀭𑁄𑀥𑁂 𑀧𑀢𑀺𑀝𑁆𑀞𑀸𑀧𑀓𑀢𑁆𑀣𑀁 𑀬𑀣𑀢𑁆𑀣𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸. 𑀲𑁄 𑀇𑀫𑀁 𑀮𑁄𑀓𑀁 𑀑𑀪𑀸𑀲𑁂𑀢𑀺 𑀪𑀸𑀲𑁂𑀢𑀺 𑀧𑀪𑀸𑀲𑁂𑀢𑀺.

𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸𑀢𑀺 𑀬𑀣𑀸 𑀅𑀩𑁆𑀪𑀸, 𑀏𑀯𑀁 𑀓𑀺𑀮𑁂𑀲𑀸. 𑀬𑀣𑀸 𑀘𑀦𑁆𑀤𑁄, 𑀏𑀯𑀁 𑀅𑀭𑀺𑀬𑀜𑀸𑀡𑀁. 𑀬𑀣𑀸 𑀘𑀦𑁆𑀤𑀺𑀫𑀸 𑀤𑁂𑀯𑀧𑀼𑀢𑁆𑀢𑁄, 𑀏𑀯𑀁 𑀪𑀺𑀓𑁆𑀔𑀼. 𑀬𑀣𑀸 𑀘𑀦𑁆𑀤𑁄 𑀅𑀩𑁆𑀪𑀸 𑀫𑀼𑀢𑁆𑀢𑁄 𑀫𑀳𑀺𑀓𑀸 𑀫𑀼𑀢𑁆𑀢𑁄 𑀥𑀽𑀫𑀭𑀚𑀸 𑀫𑀼𑀢𑁆𑀢𑁄 𑀭𑀸𑀳𑀼𑀕𑀳𑀡𑀸 [𑀭𑀸𑀳𑀼𑀧𑀸𑀡𑀸 (𑀲𑁆𑀬𑀸.)] 𑀯𑀺𑀧𑁆𑀧𑀫𑀼𑀢𑁆𑀢𑁄 𑀪𑀸𑀲𑀢𑁂 𑀘 𑀢𑀧𑀢𑁂 𑀘 𑀯𑀺𑀭𑁄𑀘𑀢𑁂 [𑀯𑀺𑀭𑁄𑀘𑀢𑀺 (𑀲𑁆𑀬𑀸.)] 𑀘, 𑀏𑀯𑀫𑁂𑀯𑀁 𑀪𑀺𑀓𑁆𑀔𑀼 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑁄 𑀪𑀸𑀲𑀢𑁂 𑀘 𑀢𑀧𑀢𑁂 𑀘 𑀯𑀺𑀭𑁄𑀘𑀢𑁂 𑀘. 𑀢𑁂𑀦 𑀯𑀼𑀘𑁆𑀘𑀢𑀺 𑁋 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸𑀢𑀺. 𑀇𑀫𑀸𑀦𑀺 𑀢𑁂𑀭𑀲 𑀯𑁄𑀤𑀸𑀦𑁂 𑀜𑀸𑀡𑀸𑀦𑀺.

𑀯𑁄𑀤𑀸𑀦𑀜𑀸𑀡𑀦𑀺𑀤𑁆𑀤𑁂𑀲𑁄 𑀘𑀢𑀼𑀢𑁆𑀣𑁄.

𑀪𑀸𑀡𑀯𑀸𑀭𑁄.