𑁫. 𑀲𑀲𑁆𑀲𑀢𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄

𑁧𑁩𑁮. 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸𑀬 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀦𑁆𑀦𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁…𑀧𑁂… 𑀲𑀜𑁆𑀜𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁… 𑀲𑀗𑁆𑀔𑀸𑀭𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁… 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁.

𑀓𑀣𑀁 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀺𑀦𑀸 𑀭𑀽𑀧𑁂𑀦 𑀭𑀽𑀧𑀯𑀸’’𑀢𑀺. 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀭𑀼𑀓𑁆𑀔𑁄 𑀙𑀸𑀬𑀸𑀲𑀫𑁆𑀧𑀦𑁆𑀦𑁄 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀭𑀼𑀓𑁆𑀔𑁄, 𑀅𑀬𑀁 𑀙𑀸𑀬𑀸; 𑀅𑀜𑁆𑀜𑁄 𑀭𑀼𑀓𑁆𑀔𑁄, 𑀅𑀜𑁆𑀜𑀸 𑀙𑀸𑀬𑀸. 𑀲𑁄 𑀔𑁄 𑀧𑀦𑀸𑀬𑀁 𑀭𑀼𑀓𑁆𑀔𑁄 𑀇𑀫𑀸𑀬 𑀙𑀸𑀬𑀸𑀬 𑀙𑀸𑀬𑀸𑀯𑀸’’𑀢𑀺. 𑀙𑀸𑀬𑀸𑀯𑀦𑁆𑀢𑀁 𑀭𑀼𑀓𑁆𑀔𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀯𑁂𑀤𑀦𑀁…𑀧𑁂… 𑀅𑀬𑀁 𑀧𑀞𑀫𑀸 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀲𑀲𑁆𑀲𑀢𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸𑀬 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀦𑁆𑀦𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑀲𑀲𑁆𑀲𑀢𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄 𑀧𑀜𑁆𑀘𑀫𑁄.