𑁨. 𑀤𑀺𑀝𑁆𑀞𑀺𑀓𑀣𑀸

𑁧𑁨𑁨. 𑀓𑀸 𑀤𑀺𑀝𑁆𑀞𑀺, 𑀓𑀢𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀺, 𑀓𑀢𑀺 𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺, 𑀓𑀢𑀺 𑀤𑀺𑀝𑁆𑀞𑀺𑀬𑁄, 𑀓𑀢𑀺 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀸, 𑀓𑀢𑀫𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑀲𑀫𑀼𑀕𑁆𑀖𑀸𑀢𑁄𑀢𑀺?

[𑁧] 𑀓𑀸 𑀤𑀺𑀝𑁆𑀞𑀻𑀢𑀺 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. [𑁨] 𑀓𑀢𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀻𑀢𑀺 𑀅𑀝𑁆𑀞 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀺. [𑁩] 𑀓𑀢𑀺 𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀻𑀢𑀺 𑀅𑀝𑁆𑀞𑀸𑀭𑀲 𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺. [𑁪] 𑀓𑀢𑀺 𑀤𑀺𑀝𑁆𑀞𑀺𑀬𑁄𑀢𑀺 𑀲𑁄𑀴𑀲 𑀤𑀺𑀝𑁆𑀞𑀺𑀬𑁄. [𑁫] 𑀓𑀢𑀺 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀸𑀢𑀺 𑀢𑀻𑀡𑀺 𑀲𑀢𑀁 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀸. [𑁬] 𑀓𑀢𑀫𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑀲𑀫𑀼𑀕𑁆𑀖𑀸𑀢𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑀲𑀫𑀼𑀕𑁆𑀖𑀸𑀢𑁄.

𑁧𑁨𑁩. 𑀓𑀣𑀁 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺? [𑀓𑀢𑀺 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀻𑀢𑀺 (𑀲𑁆𑀬𑀸.)] 𑀭𑀽𑀧𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀯𑁂𑀤𑀦𑀁 𑀏𑀢𑀁 𑀫𑀫…𑀧𑁂… 𑀲𑀜𑁆𑀜𑀁 𑀏𑀢𑀁 𑀫𑀫… 𑀲𑀗𑁆𑀔𑀸𑀭𑁂 𑀏𑀢𑀁 𑀫𑀫… 𑀯𑀺𑀜𑁆𑀜𑀸𑀡𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀘𑀓𑁆𑀔𑀼𑀁 𑀏𑀢𑀁 𑀫𑀫…𑀧𑁂… 𑀲𑁄𑀢𑀁 𑀏𑀢𑀁 𑀫𑀫… 𑀖𑀸𑀦𑀁 𑀏𑀢𑀁 𑀫𑀫… 𑀚𑀺𑀯𑁆𑀳𑀁 𑀏𑀢𑀁 𑀫𑀫… 𑀓𑀸𑀬𑀁 𑀏𑀢𑀁 𑀫𑀫… 𑀫𑀦𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀭𑀽𑀧𑁂 [𑀭𑀽𑀧𑀁 (𑀲𑁆𑀬𑀸.) 𑀢𑀣𑀸 𑀧𑀜𑁆𑀘𑀲𑀼 𑀆𑀭𑀫𑁆𑀫𑀡𑁂𑀲𑀼 𑀏𑀓𑀯𑀘𑀦𑁂𑀦] 𑀏𑀢𑀁 𑀫𑀫…𑀧𑁂… 𑀲𑀤𑁆𑀤𑁂 𑀏𑀢𑀁 𑀫𑀫… 𑀕𑀦𑁆𑀥𑁂 𑀏𑀢𑀁 𑀫𑀫… 𑀭𑀲𑁂 𑀏𑀢𑀁 𑀫𑀫… 𑀨𑁄𑀝𑁆𑀞𑀩𑁆𑀩𑁂 𑀏𑀢𑀁 𑀫𑀫… 𑀥𑀫𑁆𑀫𑁂 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀏𑀢𑀁 𑀫𑀫…𑀧𑁂… 𑀲𑁄𑀢𑀯𑀺𑀜𑁆𑀜𑀸𑀡𑀁 𑀏𑀢𑀁 𑀫𑀫… 𑀖𑀸𑀦𑀯𑀺𑀜𑁆𑀜𑀸𑀡𑀁 𑀏𑀢𑀁 𑀫𑀫… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀏𑀢𑀁 𑀫𑀫… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀏𑀢𑀁 𑀫𑀫… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁 𑀏𑀢𑀁 𑀫𑀫…𑀧𑁂… 𑀲𑁄𑀢𑀲𑀫𑁆𑀨𑀲𑁆𑀲𑀁 𑀏𑀢𑀁 𑀫𑀫… 𑀖𑀸𑀦𑀲𑀫𑁆𑀨𑀲𑁆𑀲𑀁 𑀏𑀢𑀁 𑀫𑀫… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀁 𑀏𑀢𑀁 𑀫𑀫… 𑀓𑀸𑀬𑀲𑀫𑁆𑀨𑀲𑁆𑀲𑀁 𑀏𑀢𑀁 𑀫𑀫… 𑀫𑀦𑁄𑀲𑀫𑁆𑀨𑀲𑁆𑀲𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁…𑀧𑁂… 𑀲𑁄𑀢𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁… 𑀖𑀸𑀦𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁… 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺.

𑀭𑀽𑀧𑀲𑀜𑁆𑀜𑀁 𑀏𑀢𑀁 𑀫𑀫…𑀧𑁂… 𑀲𑀤𑁆𑀤𑀲𑀜𑁆𑀜𑀁 𑀏𑀢𑀁 𑀫𑀫… 𑀕𑀦𑁆𑀥𑀲𑀜𑁆𑀜𑀁 𑀏𑀢𑀁 𑀫𑀫… 𑀭𑀲𑀲𑀜𑁆𑀜𑀁 𑀏𑀢𑀁 𑀫𑀫… 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀁 𑀏𑀢𑀁 𑀫𑀫… 𑀥𑀫𑁆𑀫𑀲𑀜𑁆𑀜𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀭𑀽𑀧𑀲𑀜𑁆𑀘𑁂𑀢𑀦𑀁 𑀏𑀢𑀁 𑀫𑀫…𑀧𑁂… 𑀲𑀤𑁆𑀤𑀲𑀜𑁆𑀘𑁂𑀢𑀦𑀁 𑀏𑀢𑀁 𑀫𑀫… 𑀕𑀦𑁆𑀥𑀲𑀜𑁆𑀘𑁂𑀢𑀦𑀁 𑀏𑀢𑀁 𑀫𑀫… 𑀭𑀲𑀲𑀜𑁆𑀘𑁂𑀢𑀦𑀁 𑀏𑀢𑀁 𑀫𑀫… 𑀨𑁄𑀝𑁆𑀞𑀩𑁆𑀩𑀲𑀜𑁆𑀘𑁂𑀢𑀦𑀁 𑀏𑀢𑀁 𑀫𑀫… 𑀥𑀫𑁆𑀫𑀲𑀜𑁆𑀘𑁂𑀢𑀦𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀭𑀽𑀧𑀢𑀡𑁆𑀳𑀁 𑀏𑀢𑀁 𑀫𑀫…𑀧𑁂… 𑀲𑀤𑁆𑀤𑀢𑀡𑁆𑀳𑀁 𑀏𑀢𑀁 𑀫𑀫… 𑀕𑀦𑁆𑀥𑀢𑀡𑁆𑀳𑀁 𑀏𑀢𑀁 𑀫𑀫… 𑀭𑀲𑀢𑀡𑁆𑀳𑀁 𑀏𑀢𑀁 𑀫𑀫… 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀁 𑀏𑀢𑀁 𑀫𑀫… 𑀥𑀫𑁆𑀫𑀢𑀡𑁆𑀳𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀭𑀽𑀧𑀯𑀺𑀢𑀓𑁆𑀓𑀁 𑀏𑀢𑀁 𑀫𑀫…𑀧𑁂… 𑀲𑀤𑁆𑀤𑀯𑀺𑀢𑀓𑁆𑀓𑀁 𑀏𑀢𑀁 𑀫𑀫… 𑀕𑀦𑁆𑀥𑀯𑀺𑀢𑀓𑁆𑀓𑀁 𑀏𑀢𑀁 𑀫𑀫… 𑀭𑀲𑀯𑀺𑀢𑀓𑁆𑀓𑀁 𑀏𑀢𑀁 𑀫𑀫… 𑀨𑁄𑀝𑁆𑀞𑀩𑁆𑀩𑀯𑀺𑀢𑀓𑁆𑀓𑀁 𑀏𑀢𑀁 𑀫𑀫… 𑀥𑀫𑁆𑀫𑀯𑀺𑀢𑀓𑁆𑀓𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀭𑀽𑀧𑀯𑀺𑀘𑀸𑀭𑀁 𑀏𑀢𑀁 𑀫𑀫…𑀧𑁂… 𑀲𑀤𑁆𑀤𑀯𑀺𑀘𑀸𑀭𑀁 𑀏𑀢𑀁 𑀫𑀫… 𑀕𑀦𑁆𑀥𑀯𑀺𑀘𑀸𑀭𑀁 𑀏𑀢𑀁 𑀫𑀫… 𑀭𑀲𑀯𑀺𑀘𑀸𑀭𑀁 𑀏𑀢𑀁 𑀫𑀫… 𑀨𑁄𑀝𑁆𑀞𑀩𑁆𑀩𑀯𑀺𑀘𑀸𑀭𑀁 𑀏𑀢𑀁 𑀫𑀫… 𑀥𑀫𑁆𑀫𑀯𑀺𑀘𑀸𑀭𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺.

𑀧𑀣𑀯𑀻𑀥𑀸𑀢𑀼𑀁 𑀏𑀢𑀁 𑀫𑀫…𑀧𑁂… 𑀆𑀧𑁄𑀥𑀸𑀢𑀼𑀁 𑀏𑀢𑀁 𑀫𑀫… 𑀢𑁂𑀚𑁄𑀥𑀸𑀢𑀼𑀁 𑀏𑀢𑀁 𑀫𑀫… 𑀯𑀸𑀬𑁄𑀥𑀸𑀢𑀼𑀁 𑀏𑀢𑀁 𑀫𑀫… 𑀆𑀓𑀸𑀲𑀥𑀸𑀢𑀼𑀁 𑀏𑀢𑀁 𑀫𑀫… 𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀧𑀣𑀯𑀻𑀓𑀲𑀺𑀡𑀁 𑀏𑀢𑀁 𑀫𑀫…𑀧𑁂… 𑀆𑀧𑁄𑀓𑀲𑀺𑀡𑀁… 𑀢𑁂𑀚𑁄𑀓𑀲𑀺𑀡𑀁… 𑀯𑀸𑀬𑁄𑀓𑀲𑀺𑀡𑀁 … 𑀦𑀻𑀮𑀓𑀲𑀺𑀡𑀁… 𑀧𑀻𑀢𑀓𑀲𑀺𑀡𑀁… 𑀮𑁄𑀳𑀺𑀢𑀓𑀲𑀺𑀡𑀁… 𑀑𑀤𑀸𑀢𑀓𑀲𑀺𑀡𑀁… 𑀆𑀓𑀸𑀲𑀓𑀲𑀺𑀡𑀁… 𑀯𑀺𑀜𑁆𑀜𑀸𑀡𑀓𑀲𑀺𑀡𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺.

𑀓𑁂𑀲𑀁 𑀏𑀢𑀁 𑀫𑀫…𑀧𑁂… 𑀮𑁄𑀫𑀁 𑀏𑀢𑀁 𑀫𑀫… 𑀦𑀔𑀁 𑀏𑀢𑀁 𑀫𑀫… 𑀤𑀦𑁆𑀢𑀁 𑀏𑀢𑀁 𑀫𑀫… 𑀢𑀘𑀁 𑀏𑀢𑀁 𑀫𑀫… 𑀫𑀁𑀲𑀁 𑀏𑀢𑀁 𑀫𑀫… 𑀦𑁆𑀳𑀸𑀭𑀼𑀁 𑀏𑀢𑀁 𑀫𑀫… 𑀅𑀝𑁆𑀞𑀺𑀁 𑀏𑀢𑀁 𑀫𑀫… 𑀅𑀝𑁆𑀞𑀺𑀫𑀺𑀜𑁆𑀚𑀁 𑀏𑀢𑀁 𑀫𑀫… 𑀯𑀓𑁆𑀓𑀁 𑀏𑀢𑀁 𑀫𑀫… 𑀳𑀤𑀬𑀁 𑀏𑀢𑀁 𑀫𑀫… 𑀬𑀓𑀦𑀁 𑀏𑀢𑀁 𑀫𑀫… 𑀓𑀺𑀮𑁄𑀫𑀓𑀁 𑀏𑀢𑀁 𑀫𑀫… 𑀧𑀺𑀳𑀓𑀁 𑀏𑀢𑀁 𑀫𑀫… 𑀧𑀧𑁆𑀨𑀸𑀲𑀁 𑀏𑀢𑀁 𑀫𑀫… 𑀅𑀦𑁆𑀢𑀁 𑀏𑀢𑀁 𑀫𑀫… 𑀅𑀦𑁆𑀢𑀕𑀼𑀡𑀁 𑀏𑀢𑀁 𑀫𑀫… 𑀉𑀤𑀭𑀺𑀬𑀁 𑀏𑀢𑀁 𑀫𑀫… 𑀓𑀭𑀻𑀲𑀁 𑀏𑀢𑀁 𑀫𑀫… 𑀧𑀺𑀢𑁆𑀢𑀁 𑀏𑀢𑀁 𑀫𑀫… 𑀲𑁂𑀫𑁆𑀳𑀁 𑀏𑀢𑀁 𑀫𑀫… 𑀧𑀼𑀩𑁆𑀩𑀁 𑀏𑀢𑀁 𑀫𑀫 … 𑀮𑁄𑀳𑀺𑀢𑀁 𑀏𑀢𑀁 𑀫𑀫… 𑀲𑁂𑀤𑀁 𑀏𑀢𑀁 𑀫𑀫… 𑀫𑁂𑀤𑀁 𑀏𑀢𑀁 𑀫𑀫… 𑀅𑀲𑁆𑀲𑀼𑀁 𑀏𑀢𑀁 𑀫𑀫… 𑀯𑀲𑀁 𑀏𑀢𑀁 𑀫𑀫 … 𑀔𑁂𑀴𑀁 𑀏𑀢𑀁 𑀫𑀫… 𑀲𑀺𑀗𑁆𑀖𑀸𑀡𑀺𑀓𑀁 𑀏𑀢𑀁 𑀫𑀫… 𑀮𑀲𑀺𑀓𑀁 𑀏𑀢𑀁 𑀫𑀫… 𑀫𑀼𑀢𑁆𑀢𑀁 𑀏𑀢𑀁 𑀫𑀫… 𑀫𑀢𑁆𑀣𑀮𑀼𑀗𑁆𑀕𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺.

𑀘𑀓𑁆𑀔𑀸𑀬𑀢𑀦𑀁 𑀏𑀢𑀁 𑀫𑀫…𑀧𑁂… 𑀭𑀽𑀧𑀸𑀬𑀢𑀦𑀁 𑀏𑀢𑀁 𑀫𑀫… 𑀲𑁄𑀢𑀸𑀬𑀢𑀦𑀁 𑀏𑀢𑀁 𑀫𑀫… 𑀲𑀤𑁆𑀤𑀸𑀬𑀢𑀦𑀁 𑀏𑀢𑀁 𑀫𑀫… 𑀖𑀸𑀦𑀸𑀬𑀢𑀦𑀁 𑀏𑀢𑀁 𑀫𑀫… 𑀕𑀦𑁆𑀥𑀸𑀬𑀢𑀦𑀁 𑀏𑀢𑀁 𑀫𑀫… 𑀚𑀺𑀯𑁆𑀳𑀸𑀬𑀢𑀦𑀁 𑀏𑀢𑀁 𑀫𑀫… 𑀭𑀲𑀸𑀬𑀢𑀦𑀁 𑀏𑀢𑀁 𑀫𑀫… 𑀓𑀸𑀬𑀸𑀬𑀢𑀦𑀁 𑀏𑀢𑀁 𑀫𑀫… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀏𑀢𑀁 𑀫𑀫… 𑀫𑀦𑀸𑀬𑀢𑀦𑀁 𑀏𑀢𑀁 𑀫𑀫… 𑀥𑀫𑁆𑀫𑀸𑀬𑀢𑀦𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺.

𑀘𑀓𑁆𑀔𑀼𑀥𑀸𑀢𑀼𑀁 𑀏𑀢𑀁 𑀫𑀫…𑀧𑁂… 𑀭𑀽𑀧𑀥𑀸𑀢𑀼𑀁 𑀏𑀢𑀁 𑀫𑀫… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀏𑀢𑀁 𑀫𑀫… 𑀲𑁄𑀢𑀥𑀸𑀢𑀼𑀁 𑀏𑀢𑀁 𑀫𑀫… 𑀲𑀤𑁆𑀤𑀥𑀸𑀢𑀼𑀁 𑀏𑀢𑀁 𑀫𑀫… 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀏𑀢𑀁 𑀫𑀫… 𑀖𑀸𑀦𑀥𑀸𑀢𑀼𑀁 𑀏𑀢𑀁 𑀫𑀫… 𑀕𑀦𑁆𑀥𑀥𑀸𑀢𑀼𑀁 𑀏𑀢𑀁 𑀫𑀫… 𑀖𑀸𑀦𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀏𑀢𑀁 𑀫𑀫… 𑀚𑀺𑀯𑁆𑀳𑀸𑀥𑀸𑀢𑀼𑀁 𑀏𑀢𑀁 𑀫𑀫… 𑀭𑀲𑀥𑀸𑀢𑀼𑀁 𑀏𑀢𑀁 𑀫𑀫… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀏𑀢𑀁 𑀫𑀫… 𑀓𑀸𑀬𑀥𑀸𑀢𑀼𑀁 𑀏𑀢𑀁 𑀫𑀫… 𑀨𑁄𑀝𑁆𑀞𑀩𑁆𑀩𑀥𑀸𑀢𑀼𑀁 𑀏𑀢𑀁 𑀫𑀫… 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀏𑀢𑀁 𑀫𑀫… 𑀫𑀦𑁄𑀥𑀸𑀢𑀼𑀁 𑀏𑀢𑀁 𑀫𑀫… 𑀥𑀫𑁆𑀫𑀥𑀸𑀢𑀼𑀁 𑀏𑀢𑀁 𑀫𑀫… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺.

𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫…𑀧𑁂… 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀫𑀦𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀲𑀢𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺.

𑀓𑀸𑀫𑀥𑀸𑀢𑀼𑀁 𑀏𑀢𑀁 𑀫𑀫…𑀧𑁂… 𑀭𑀽𑀧𑀥𑀸𑀢𑀼𑀁 𑀏𑀢𑀁 𑀫𑀫… 𑀅𑀭𑀽𑀧𑀥𑀸𑀢𑀼𑀁 𑀏𑀢𑀁 𑀫𑀫… 𑀓𑀸𑀫𑀪𑀯𑀁 𑀏𑀢𑀁 𑀫𑀫… 𑀭𑀽𑀧𑀪𑀯𑀁 𑀏𑀢𑀁 𑀫𑀫… 𑀅𑀭𑀽𑀧𑀪𑀯𑀁 𑀏𑀢𑀁 𑀫𑀫… 𑀲𑀜𑁆𑀜𑀸𑀪𑀯𑀁 𑀏𑀢𑀁 𑀫𑀫… 𑀅𑀲𑀜𑁆𑀜𑀸𑀪𑀯𑀁 𑀏𑀢𑀁 𑀫𑀫… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀁 𑀏𑀢𑀁 𑀫𑀫… 𑀏𑀓𑀯𑁄𑀓𑀸𑀭𑀪𑀯𑀁 𑀏𑀢𑀁 𑀫𑀫… 𑀘𑀢𑀼𑀯𑁄𑀓𑀸𑀭𑀪𑀯𑀁 𑀏𑀢𑀁 𑀫𑀫… 𑀧𑀜𑁆𑀘𑀯𑁄𑀓𑀸𑀭𑀪𑀯𑀁 𑀏𑀢𑀁 𑀫𑀫… 𑀧𑀞𑀫𑀚𑁆𑀛𑀸𑀦𑀁 𑀏𑀢𑀁 𑀫𑀫… 𑀤𑀼𑀢𑀺𑀬𑀚𑁆𑀛𑀸𑀦𑀁 𑀏𑀢𑀁 𑀫𑀫… 𑀢𑀢𑀺𑀬𑀚𑁆𑀛𑀸𑀦𑀁 𑀏𑀢𑀁 𑀫𑀫… 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀏𑀢𑀁 𑀫𑀫… 𑀫𑁂𑀢𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀏𑀢𑀁 𑀫𑀫… 𑀓𑀭𑀼𑀡𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀏𑀢𑀁 𑀫𑀫… 𑀫𑀼𑀤𑀺𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀏𑀢𑀁 𑀫𑀫… 𑀉𑀧𑁂𑀓𑁆𑀔𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀏𑀢𑀁 𑀫𑀫… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀏𑀢𑀁 𑀫𑀫… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀏𑀢𑀁 𑀫𑀫… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀏𑀢𑀁 𑀫𑀫… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺.

𑀅𑀯𑀺𑀚𑁆𑀚𑀁 𑀏𑀢𑀁 𑀫𑀫…𑀧𑁂… 𑀲𑀗𑁆𑀔𑀸𑀭𑁂 𑀏𑀢𑀁 𑀫𑀫… 𑀯𑀺𑀜𑁆𑀜𑀸𑀡𑀁 𑀏𑀢𑀁 𑀫𑀫… 𑀦𑀸𑀫𑀭𑀽𑀧𑀁 𑀏𑀢𑀁 𑀫𑀫… 𑀲𑀴𑀸𑀬𑀢𑀦𑀁 𑀏𑀢𑀁 𑀫𑀫… 𑀨𑀲𑁆𑀲𑀁 𑀏𑀢𑀁 𑀫𑀫… 𑀯𑁂𑀤𑀦𑀁 𑀏𑀢𑀁 𑀫𑀫… 𑀢𑀡𑁆𑀳𑀁 𑀏𑀢𑀁 𑀫𑀫… 𑀉𑀧𑀸𑀤𑀸𑀦𑀁 𑀏𑀢𑀁 𑀫𑀫… 𑀪𑀯𑀁 𑀏𑀢𑀁 𑀫𑀫 … 𑀚𑀸𑀢𑀺𑀁 𑀏𑀢𑀁 𑀫𑀫… 𑀚𑀭𑀸𑀫𑀭𑀡𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀏𑀯𑀁 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺.

𑁧𑁨𑁪. 𑀓𑀢𑀫𑀸𑀦𑀺 𑀅𑀝𑁆𑀞 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀺? 𑀔𑀦𑁆𑀥𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀅𑀯𑀺𑀚𑁆𑀚𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀨𑀲𑁆𑀲𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀲𑀜𑁆𑀜𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀯𑀺𑀢𑀓𑁆𑀓𑁄𑀧𑀺 [𑀯𑀺𑀢𑀓𑁆𑀓𑀸𑀧𑀺 (𑀲𑁆𑀬𑀸.)] 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀧𑀸𑀧𑀫𑀺𑀢𑁆𑀢𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀧𑀭𑀢𑁄𑀖𑁄𑀲𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁.

𑀔𑀦𑁆𑀥𑀸 𑀳𑁂𑀢𑀼 𑀔𑀦𑁆𑀥𑀸 𑀧𑀘𑁆𑀘𑀬𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀉𑀧𑀸𑀤𑀸𑀬 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑁋 𑀏𑀯𑀁 𑀔𑀦𑁆𑀥𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀅𑀯𑀺𑀚𑁆𑀚𑀸 𑀳𑁂𑀢𑀼 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀉𑀧𑀸𑀤𑀸𑀬 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑁋 𑀏𑀯𑀁 𑀅𑀯𑀺𑀚𑁆𑀚𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀨𑀲𑁆𑀲𑁄 𑀳𑁂𑀢𑀼 𑀨𑀲𑁆𑀲𑁄 𑀧𑀘𑁆𑀘𑀬𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀉𑀧𑀸𑀤𑀸𑀬 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑁋 𑀏𑀯𑀁 𑀨𑀲𑁆𑀲𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀲𑀜𑁆𑀜𑀸 𑀳𑁂𑀢𑀼 𑀲𑀜𑁆𑀜𑀸 𑀧𑀘𑁆𑀘𑀬𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀉𑀧𑀸𑀤𑀸𑀬 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑁋 𑀏𑀯𑀁 𑀲𑀜𑁆𑀜𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀯𑀺𑀢𑀓𑁆𑀓𑁄 𑀳𑁂𑀢𑀼 𑀯𑀺𑀢𑀓𑁆𑀓𑁄 𑀧𑀘𑁆𑀘𑀬𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀉𑀧𑀸𑀤𑀸𑀬, 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑁋 𑀏𑀯𑀁 𑀯𑀺𑀢𑀓𑁆𑀓𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀳𑁂𑀢𑀼 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀧𑀘𑁆𑀘𑀬𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀉𑀧𑀸𑀤𑀸𑀬 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑁋 𑀏𑀯𑀁 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀧𑀸𑀧𑀫𑀺𑀢𑁆𑀢𑁄 𑀳𑁂𑀢𑀼 𑀧𑀸𑀧𑀫𑀺𑀢𑁆𑀢𑁄 𑀧𑀘𑁆𑀘𑀬𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀉𑀧𑀸𑀤𑀸𑀬, 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑁋 𑀏𑀯𑀁 𑀧𑀸𑀧𑀫𑀺𑀢𑁆𑀢𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀧𑀭𑀢𑁄𑀖𑁄𑀲𑁄 𑀳𑁂𑀢𑀼 𑀧𑀭𑀢𑁄𑀖𑁄𑀲𑁄 𑀧𑀘𑁆𑀘𑀬𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀉𑀧𑀸𑀤𑀸𑀬 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑁋 𑀏𑀯𑀁 𑀧𑀭𑀢𑁄𑀖𑁄𑀲𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀇𑀫𑀸𑀦𑀺 𑀅𑀝𑁆𑀞 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀺.

𑁧𑁨𑁫. 𑀓𑀢𑀫𑀸𑀦𑀺 𑀅𑀝𑁆𑀞𑀸𑀭𑀲 𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺? 𑀬𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁, 𑀤𑀺𑀝𑁆𑀞𑀺𑀕𑀳𑀦𑀁, 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑀁, 𑀤𑀺𑀝𑁆𑀞𑀺𑀯𑀺𑀲𑀽𑀓𑀁, 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁, 𑀤𑀺𑀝𑁆𑀞𑀺𑀲𑀜𑁆𑀜𑁄𑀚𑀦𑀁, 𑀤𑀺𑀝𑁆𑀞𑀺𑀲𑀮𑁆𑀮𑀁, 𑀤𑀺𑀝𑁆𑀞𑀺𑀲𑀫𑁆𑀩𑀸𑀥𑁄, 𑀤𑀺𑀝𑁆𑀞𑀺𑀧𑀮𑀺𑀩𑁄𑀥𑁄, 𑀤𑀺𑀝𑁆𑀞𑀺𑀩𑀦𑁆𑀥𑀦𑀁, 𑀤𑀺𑀝𑁆𑀞𑀺𑀧𑀧𑀸𑀢𑁄, 𑀤𑀺𑀝𑁆𑀞𑀸𑀦𑀼𑀲𑀬𑁄, 𑀤𑀺𑀝𑁆𑀞𑀺𑀲𑀦𑁆𑀢𑀸𑀧𑁄, 𑀤𑀺𑀝𑁆𑀞𑀺𑀧𑀭𑀺𑀴𑀸𑀳𑁄, 𑀤𑀺𑀝𑁆𑀞𑀺𑀕𑀦𑁆𑀣𑁄, 𑀤𑀺𑀝𑁆𑀞𑀼𑀧𑀸𑀤𑀸𑀦𑀁, 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁄, 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁄 𑁋 𑀇𑀫𑀸𑀦𑀺 𑀅𑀝𑁆𑀞𑀸𑀭𑀲 𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺.

𑁧𑁨𑁬. 𑀓𑀢𑀫𑀸 𑀲𑁄𑀴𑀲 𑀤𑀺𑀝𑁆𑀞𑀺𑀬𑁄? 𑀅𑀲𑁆𑀲𑀸𑀤𑀤𑀺𑀝𑁆𑀞𑀺, 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸 𑀲𑀲𑁆𑀲𑀢𑀤𑀺𑀝𑁆𑀞𑀺, 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺, 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀤𑀺𑀝𑁆𑀞𑀺, 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺, 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺, 𑀲𑀜𑁆𑀜𑁄𑀚𑀦𑀺𑀓𑀸 𑀤𑀺𑀝𑁆𑀞𑀺, 𑀅𑀳𑀦𑁆𑀢𑀺 𑀫𑀸𑀦𑀯𑀺𑀦𑀺𑀩𑀦𑁆𑀥𑀸 𑀤𑀺𑀝𑁆𑀞𑀺, 𑀫𑀫𑀦𑁆𑀢𑀺 𑀫𑀸𑀦𑀯𑀺𑀦𑀺𑀩𑀦𑁆𑀥𑀸 𑀤𑀺𑀝𑁆𑀞𑀺, 𑀅𑀢𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑀺𑀝𑁆𑀞𑀺, 𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑀺𑀝𑁆𑀞𑀺, 𑀪𑀯𑀤𑀺𑀝𑁆𑀞𑀺, 𑀯𑀺𑀪𑀯𑀤𑀺𑀝𑁆𑀞𑀺 𑁋 𑀇𑀫𑀸 𑀲𑁄𑀴𑀲 𑀤𑀺𑀝𑁆𑀞𑀺𑀬𑁄.

𑁧𑁨𑁭. 𑀓𑀢𑀫𑁂 𑀢𑀻𑀡𑀺 𑀲𑀢𑀁 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀸? 𑀅𑀲𑁆𑀲𑀸𑀤𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸𑀬 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸𑀬 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀲𑀜𑁆𑀜𑁄𑀚𑀦𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀅𑀳𑀦𑁆𑀢𑀺 𑀫𑀸𑀦𑀯𑀺𑀦𑀺𑀩𑀦𑁆𑀥𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀫𑀫𑀦𑁆𑀢𑀺 𑀫𑀸𑀦𑀯𑀺𑀦𑀺𑀩𑀦𑁆𑀥𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀅𑀢𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀪𑀯𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀯𑀺𑀪𑀯𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺?

𑀅𑀲𑁆𑀲𑀸𑀤𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀢𑀺𑀁𑀲𑀸𑀬 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀤𑀲𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸𑀬 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀧𑀦𑁆𑀦𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸𑀬 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀜𑁆𑀜𑀸𑀲𑀸𑀬 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀲𑀜𑁆𑀜𑁄𑀚𑀦𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀅𑀳𑀦𑁆𑀢𑀺 𑀫𑀸𑀦𑀯𑀺𑀦𑀺𑀩𑀦𑁆𑀥𑀸𑀬 𑀤𑀺𑀝𑁆𑀞𑀺𑀬𑀸 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀫𑀫𑀦𑁆𑀢𑀺 𑀫𑀸𑀦𑀯𑀺𑀦𑀺𑀩𑀦𑁆𑀥𑀸𑀬 𑀤𑀺𑀝𑁆𑀞𑀺𑀬𑀸 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀅𑀢𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 𑀅𑀝𑁆𑀞𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀪𑀯𑀤𑀺𑀝𑁆𑀞𑀺𑀬𑀸 𑀏𑀓𑁂𑀦 𑀆𑀓𑀸𑀭𑁂𑀦 [𑀏𑀓𑀽𑀦𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀦 (𑀲𑁆𑀬𑀸.)] 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀯𑀺𑀪𑀯𑀤𑀺𑀝𑁆𑀞𑀺𑀬𑀸 𑀏𑀓𑁂𑀦 𑀆𑀓𑀸𑀭𑁂𑀦 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑁧. 𑀅𑀲𑁆𑀲𑀸𑀤𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄

𑁧𑁨𑁮. 𑀅𑀲𑁆𑀲𑀸𑀤𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀜𑁆𑀘𑀢𑀺𑀁𑀲𑀸𑀬 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀬𑀁 𑀭𑀽𑀧𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑁄𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀅𑀲𑁆𑀲𑀸𑀤𑁄, 𑀅𑀲𑁆𑀲𑀸𑀤𑁄 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑁄 𑀅𑀲𑁆𑀲𑀸𑀤𑁄. 𑀬𑀸 𑀘 𑀤𑀺𑀝𑁆𑀞𑀺 𑀬𑁄 𑀘 𑀅𑀲𑁆𑀲𑀸𑀤𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀲𑁆𑀲𑀸𑀤𑀤𑀺𑀝𑁆𑀞𑀺.

𑀅𑀲𑁆𑀲𑀸𑀤𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺. 𑀢𑀸𑀬 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄. 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲 𑀧𑀸𑀧𑀺𑀓𑀸. 𑀬𑁄 𑀤𑀺𑀝𑁆𑀞𑀺𑀬𑀸 𑀭𑀸𑀕𑁄 [𑀬𑀸 𑀤𑀺𑀝𑁆𑀞𑀺 𑀬𑁄 𑀭𑀸𑀕𑁄 (𑀲𑁆𑀬𑀸.)], 𑀲𑁄 𑀦 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀭𑀸𑀕𑁄. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑁄 𑀭𑀸𑀕𑁄. 𑀬𑀸 𑀘 𑀤𑀺𑀝𑁆𑀞𑀺 𑀬𑁄 𑀘 𑀭𑀸𑀕𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀺𑀭𑀸𑀕𑁄. 𑀢𑀸𑀬 𑀘 𑀤𑀺𑀝𑁆𑀞𑀺𑀬𑀸 𑀢𑁂𑀦 𑀘 𑀭𑀸𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀭𑀸𑀕𑀭𑀢𑁆𑀢𑁄. 𑀤𑀺𑀝𑁆𑀞𑀺𑀭𑀸𑀕𑀭𑀢𑁆𑀢𑁂 𑀧𑀼𑀕𑁆𑀕𑀮𑁂 𑀤𑀺𑀦𑁆𑀦𑀁 𑀤𑀸𑀦𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀦 𑀫𑀳𑀸𑀦𑀺𑀲𑀁𑀲𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲 𑀧𑀸𑀧𑀺𑀓𑀸 𑀅𑀲𑁆𑀲𑀸𑀤𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄 𑁋 𑀦𑀺𑀭𑀬𑁄 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀯𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀬𑀜𑁆𑀘𑁂𑀯 𑀓𑀸𑀬𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁, 𑀬𑀜𑁆𑀘 𑀯𑀘𑀻𑀓𑀫𑁆𑀫𑀁…𑀧𑁂… 𑀬𑀜𑁆𑀘 𑀫𑀦𑁄𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁, 𑀬𑀸 𑀘 𑀘𑁂𑀢𑀦𑀸 𑀬𑀸 𑀘 𑀧𑀢𑁆𑀣𑀦𑀸 𑀬𑁄 𑀘 𑀧𑀡𑀺𑀥𑀺 𑀬𑁂 𑀘 𑀲𑀗𑁆𑀔𑀸𑀭𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀦𑀺𑀝𑁆𑀞𑀸𑀬 𑀅𑀓𑀦𑁆𑀢𑀸𑀬 𑀅𑀫𑀦𑀸𑀧𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲 𑀧𑀸𑀧𑀺𑀓𑀸. 𑀲𑁂𑀬𑁆𑀬𑀣𑀸𑀧𑀺 𑀦𑀺𑀫𑁆𑀩𑀩𑀻𑀚𑀁 𑀯𑀸 𑀓𑁄𑀲𑀸𑀢𑀓𑀻𑀩𑀻𑀚𑀁 𑀯𑀸 𑀢𑀺𑀢𑁆𑀢𑀓𑀸𑀮𑀸𑀩𑀼𑀩𑀻𑀚𑀁 𑀯𑀸 𑀅𑀮𑁆𑀮𑀸𑀬 𑀧𑀣𑀯𑀺𑀬𑀸 𑀦𑀺𑀓𑁆𑀔𑀺𑀢𑁆𑀢𑀁 𑀬𑀁 𑀘𑁂𑀯 𑀧𑀣𑀯𑀺𑀭𑀲𑀁 𑀉𑀧𑀸𑀤𑀺𑀬𑀢𑀺, 𑀬𑀜𑁆𑀘 𑀆𑀧𑁄𑀭𑀲𑀁 𑀉𑀧𑀸𑀤𑀺𑀬𑀢𑀺, 𑀲𑀩𑁆𑀩𑀁 𑀢𑀁 𑀢𑀺𑀢𑁆𑀢𑀓𑀢𑁆𑀢𑀸𑀬 𑀓𑀝𑀼𑀓𑀢𑁆𑀢𑀸𑀬 𑀅𑀲𑀸𑀢𑀢𑁆𑀢𑀸𑀬 [𑀅𑀲𑀸𑀭𑀢𑀸𑀬 (𑀲𑁆𑀬𑀸.)] 𑀲𑀁𑀯𑀢𑁆𑀢𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀩𑀻𑀚𑀁 𑀳𑀺𑀲𑁆𑀲 𑀧𑀸𑀧𑀺𑀓𑀁. 𑀏𑀯𑀫𑁂𑀯𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀬𑀜𑁆𑀘𑁂𑀯 𑀓𑀸𑀬𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁, 𑀬𑀜𑁆𑀘 𑀯𑀘𑀻𑀓𑀫𑁆𑀫𑀁…𑀧𑁂… 𑀬𑀜𑁆𑀘 𑀫𑀦𑁄𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁, 𑀬𑀸 𑀘 𑀘𑁂𑀢𑀦𑀸 𑀬𑀸 𑀘 𑀧𑀢𑁆𑀣𑀦𑀸 𑀬𑁄 𑀘 𑀧𑀡𑀺𑀥𑀺 𑀬𑁂 𑀘 𑀲𑀗𑁆𑀔𑀸𑀭𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀦𑀺𑀝𑁆𑀞𑀸𑀬 𑀅𑀓𑀦𑁆𑀢𑀸𑀬 𑀅𑀫𑀦𑀸𑀧𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲 𑀧𑀸𑀧𑀺𑀓𑀸 𑀅𑀲𑁆𑀲𑀸𑀤𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁, 𑀤𑀺𑀝𑁆𑀞𑀺𑀕𑀳𑀦𑀁, 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑀁, 𑀤𑀺𑀝𑁆𑀞𑀺𑀯𑀺𑀲𑀽𑀓𑀁, 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁, 𑀤𑀺𑀝𑁆𑀞𑀺𑀲𑀜𑁆𑀜𑁄𑀚𑀦𑀁, 𑀤𑀺𑀝𑁆𑀞𑀺𑀲𑀮𑁆𑀮𑀁, 𑀤𑀺𑀝𑁆𑀞𑀺𑀲𑀫𑁆𑀩𑀸𑀥𑁄, 𑀤𑀺𑀝𑁆𑀞𑀺𑀧𑀮𑀺𑀩𑁄𑀥𑁄, 𑀤𑀺𑀝𑁆𑀞𑀺𑀩𑀦𑁆𑀥𑀦𑀁, 𑀤𑀺𑀝𑁆𑀞𑀺𑀧𑀧𑀸𑀢𑁄, 𑀤𑀺𑀝𑁆𑀞𑀸𑀦𑀼𑀲𑀬𑁄, 𑀤𑀺𑀝𑁆𑀞𑀺𑀲𑀦𑁆𑀢𑀸𑀧𑁄, 𑀤𑀺𑀝𑁆𑀞𑀺𑀧𑀭𑀺𑀴𑀸𑀳𑁄, 𑀤𑀺𑀝𑁆𑀞𑀺𑀕𑀦𑁆𑀣𑁄, 𑀤𑀺𑀝𑁆𑀞𑀼𑀧𑀸𑀤𑀸𑀦𑀁, 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁄, 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁄 𑁋 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲 𑀲𑀜𑁆𑀜𑁄𑀕𑁄.

𑁧𑁨𑁯. 𑀅𑀢𑁆𑀣𑀺 𑀲𑀜𑁆𑀜𑁄𑀚𑀦𑀸𑀦𑀺 𑀘𑁂𑀯 𑀤𑀺𑀝𑁆𑀞𑀺𑀬𑁄 𑀘, 𑀅𑀢𑁆𑀣𑀺 𑀲𑀜𑁆𑀜𑁄𑀚𑀦𑀸𑀦𑀺 𑀦 𑀘 𑀤𑀺𑀝𑁆𑀞𑀺𑀬𑁄. 𑀓𑀢𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺 𑀘𑁂𑀯 𑀤𑀺𑀝𑁆𑀞𑀺𑀬𑁄 𑀘? 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑁋 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺 𑀘𑁂𑀯 𑀤𑀺𑀝𑁆𑀞𑀺𑀬𑁄 𑀘. 𑀓𑀢𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄? 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀁, 𑀧𑀝𑀺𑀖𑀲𑀜𑁆𑀜𑁄𑀚𑀦𑀁, 𑀫𑀸𑀦𑀲𑀜𑁆𑀜𑁄𑀚𑀦𑀁, 𑀯𑀺𑀘𑀺𑀓𑀺𑀘𑁆𑀙𑀸𑀲𑀜𑁆𑀜𑁄𑀚𑀦𑀁, 𑀪𑀯𑀭𑀸𑀕𑀲𑀜𑁆𑀜𑁄𑀚𑀦𑀁, 𑀇𑀲𑁆𑀲𑀸𑀲𑀜𑁆𑀜𑁄𑀚𑀦𑀁, 𑀫𑀘𑁆𑀙𑀭𑀺𑀬𑀲𑀜𑁆𑀜𑁄𑀚𑀦𑀁, 𑀅𑀦𑀼𑀦𑀬𑀲𑀜𑁆𑀜𑁄𑀚𑀦𑀁, 𑀅𑀯𑀺𑀚𑁆𑀚𑀸𑀲𑀜𑁆𑀜𑁄𑀚𑀦𑀁 𑁋 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄.

𑀬𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘…𑀧𑁂… 𑀬𑀁 𑀲𑀜𑁆𑀜𑀁 𑀧𑀝𑀺𑀘𑁆𑀘…𑀧𑁂… 𑀬𑀁 𑀲𑀗𑁆𑀔𑀸𑀭𑁂 [𑀬𑁂 𑀲𑀗𑁆𑀔𑀸𑀭𑁂 (𑀓.) 𑀲𑀁. 𑀦𑀺. 𑁩.𑁨𑁮 𑀧𑀲𑁆𑀲𑀺𑀢𑀩𑁆𑀩𑀸] 𑀧𑀝𑀺𑀘𑁆𑀘…𑀧𑁂… 𑀬𑀁 𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘… 𑀬𑀁 𑀘𑀓𑁆𑀔𑀼𑀁 𑀧𑀝𑀺𑀘𑁆𑀘… 𑀬𑀁 𑀲𑁄𑀢𑀁 𑀧𑀝𑀺𑀘𑁆𑀘… 𑀬𑀁 𑀖𑀸𑀦𑀁 𑀧𑀝𑀺𑀘𑁆𑀘… 𑀬𑀁 𑀚𑀺𑀯𑁆𑀳𑀁 𑀧𑀝𑀺𑀘𑁆𑀘… 𑀬𑀁 𑀓𑀸𑀬𑀁 𑀧𑀝𑀺𑀘𑁆𑀘… 𑀬𑀁 𑀫𑀦𑀁 𑀧𑀝𑀺𑀘𑁆𑀘… 𑀬𑀁 𑀭𑀽𑀧𑁂 𑀧𑀝𑀺𑀘𑁆𑀘… 𑀬𑀁 𑀲𑀤𑁆𑀤𑁂 𑀧𑀝𑀺𑀘𑁆𑀘… 𑀬𑀁 𑀕𑀦𑁆𑀥𑁂 𑀧𑀝𑀺𑀘𑁆𑀘 … 𑀬𑀁 𑀭𑀲𑁂 𑀧𑀝𑀺𑀘𑁆𑀘… 𑀬𑀁 𑀨𑁄𑀝𑁆𑀞𑀩𑁆𑀩𑁂 𑀧𑀝𑀺𑀘𑁆𑀘… 𑀬𑀁 𑀥𑀫𑁆𑀫𑁂 𑀧𑀝𑀺𑀘𑁆𑀘… 𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘… 𑀬𑀁 𑀲𑁄𑀢𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘… 𑀬𑀁 𑀖𑀸𑀦𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘… 𑀬𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘… 𑀬𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘… 𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘 … 𑀬𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁 𑀧𑀝𑀺𑀘𑁆𑀘… 𑀬𑀁 𑀲𑁄𑀢𑀲𑀫𑁆𑀨𑀲𑁆𑀲𑀁 𑀧𑀝𑀺𑀘𑁆𑀘… 𑀬𑀁 𑀖𑀸𑀦𑀲𑀫𑁆𑀨𑀲𑁆𑀲𑀁 𑀧𑀝𑀺𑀘𑁆𑀘… 𑀬𑀁 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀁 𑀧𑀝𑀺𑀘𑁆𑀘… 𑀬𑀁 𑀓𑀸𑀬𑀲𑀫𑁆𑀨𑀲𑁆𑀲𑀁 𑀧𑀝𑀺𑀘𑁆𑀘… 𑀬𑀁 𑀫𑀦𑁄𑀲𑀫𑁆𑀨𑀲𑁆𑀲𑀁 𑀧𑀝𑀺𑀘𑁆𑀘… 𑀬𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘… 𑀬𑀁 𑀲𑁄𑀢𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘… 𑀬𑀁 𑀖𑀸𑀦𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘… 𑀬𑀁 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘… 𑀬𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘… 𑀬𑀁 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀫𑀦𑁄𑀲𑀫𑁆𑀨𑀲𑁆𑀲𑀚𑀸𑀬 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀅𑀲𑁆𑀲𑀸𑀤𑁄, 𑀅𑀲𑁆𑀲𑀸𑀤𑁄 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑁄 𑀅𑀲𑁆𑀲𑀸𑀤𑁄. 𑀬𑀸 𑀘 𑀤𑀺𑀝𑁆𑀞𑀺 𑀬𑁄 𑀘 𑀅𑀲𑁆𑀲𑀸𑀤𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀲𑁆𑀲𑀸𑀤𑀤𑀺𑀝𑁆𑀞𑀺.

𑀅𑀲𑁆𑀲𑀸𑀤𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺. 𑀢𑀸𑀬 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄. 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲 𑀧𑀸𑀧𑀺𑀓𑀸. 𑀬𑁄 𑀤𑀺𑀝𑁆𑀞𑀺𑀬𑀸 𑀭𑀸𑀕𑁄, 𑀲𑁄 𑀦 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀭𑀸𑀕𑁄. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑁄 𑀭𑀸𑀕𑁄. 𑀬𑀸 𑀘 𑀤𑀺𑀝𑁆𑀞𑀺 𑀬𑁄 𑀘 𑀭𑀸𑀕𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀺𑀭𑀸𑀕𑁄. 𑀢𑀸𑀬 𑀘 𑀤𑀺𑀝𑁆𑀞𑀺𑀬𑀸 𑀢𑁂𑀦 𑀘 𑀭𑀸𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀭𑀸𑀕𑀭𑀢𑁆𑀢𑁄. 𑀤𑀺𑀝𑁆𑀞𑀺𑀭𑀸𑀕𑀭𑀢𑁆𑀢𑁂 𑀧𑀼𑀕𑁆𑀕𑀮𑁂 𑀤𑀺𑀦𑁆𑀦𑀁 𑀤𑀸𑀦𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀦 𑀫𑀳𑀸𑀦𑀺𑀲𑀁𑀲𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲 𑀧𑀸𑀧𑀺𑀓𑀸 𑀅𑀲𑁆𑀲𑀸𑀤𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄 𑁋 𑀦𑀺𑀭𑀬𑁄 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀯𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀬𑀜𑁆𑀘𑁂𑀯 𑀓𑀸𑀬𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁, 𑀬𑀜𑁆𑀘 𑀯𑀘𑀻𑀓𑀫𑁆𑀫𑀁…𑀧𑁂… 𑀬𑀜𑁆𑀘 𑀫𑀦𑁄𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁, 𑀬𑀸 𑀘 𑀘𑁂𑀢𑀦𑀸 𑀬𑀸 𑀘 𑀧𑀢𑁆𑀣𑀦𑀸 𑀬𑁄 𑀘 𑀧𑀡𑀺𑀥𑀺 𑀬𑁂 𑀘 𑀲𑀗𑁆𑀔𑀸𑀭𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀦𑀺𑀝𑁆𑀞𑀸𑀬 𑀅𑀓𑀦𑁆𑀢𑀸𑀬 𑀅𑀫𑀦𑀸𑀧𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲 𑀧𑀸𑀧𑀺𑀓𑀸. 𑀲𑁂𑀬𑁆𑀬𑀣𑀸𑀧𑀺 𑀦𑀺𑀫𑁆𑀩𑀩𑀻𑀚𑀁 𑀯𑀸 𑀓𑁄𑀲𑀸𑀢𑀓𑀻𑀩𑀻𑀚𑀁 𑀯𑀸 𑀢𑀺𑀢𑁆𑀢𑀓𑀸𑀮𑀸𑀩𑀼𑀩𑀻𑀚𑀁 𑀯𑀸 𑀅𑀮𑁆𑀮𑀸𑀬 𑀧𑀣𑀯𑀺𑀬𑀸 𑀦𑀺𑀓𑁆𑀔𑀺𑀢𑁆𑀢𑀁 𑀬𑀜𑁆𑀘𑁂𑀯 𑀧𑀣𑀯𑀺𑀭𑀲𑀁 𑀉𑀧𑀸𑀤𑀺𑀬𑀢𑀺 𑀬𑀜𑁆𑀘 𑀆𑀧𑁄𑀭𑀲𑀁 𑀉𑀧𑀸𑀤𑀺𑀬𑀢𑀺, 𑀲𑀩𑁆𑀩𑀁 𑀢𑀁 𑀢𑀺𑀢𑁆𑀢𑀓𑀢𑁆𑀢𑀸𑀬 𑀓𑀝𑀼𑀓𑀢𑁆𑀢𑀸𑀬 𑀅𑀲𑀸𑀢𑀢𑁆𑀢𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀩𑀻𑀚𑀁 𑀳𑀺𑀲𑁆𑀲 𑀧𑀸𑀧𑀺𑀓𑀁. 𑀏𑀯𑀫𑁂𑀯𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀬𑀜𑁆𑀘𑁂𑀯 𑀓𑀸𑀬𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀜𑁆𑀘 𑀯𑀘𑀻𑀓𑀫𑁆𑀫𑀁…𑀧𑁂… 𑀬𑀜𑁆𑀘 𑀫𑀦𑁄𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁, 𑀬𑀸 𑀘 𑀘𑁂𑀢𑀦𑀸 𑀬𑀸 𑀘 𑀧𑀢𑁆𑀣𑀦𑀸 𑀬𑁄 𑀘 𑀧𑀡𑀺𑀥𑀺 𑀬𑁂 𑀘 𑀲𑀗𑁆𑀔𑀸𑀭𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀦𑀺𑀝𑁆𑀞𑀸𑀬 𑀅𑀓𑀦𑁆𑀢𑀸𑀬 𑀅𑀫𑀦𑀸𑀧𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲 𑀧𑀸𑀧𑀺𑀓𑀸 𑀅𑀲𑁆𑀲𑀸𑀤𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁…𑀧𑁂… 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁄 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁄 𑁋 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲 𑀲𑀜𑁆𑀜𑁄𑀕𑁄.

𑀅𑀢𑁆𑀣𑀺 𑀲𑀜𑁆𑀜𑁄𑀚𑀦𑀸𑀦𑀺 𑀘𑁂𑀯 𑀤𑀺𑀝𑁆𑀞𑀺𑀬𑁄 𑀘, 𑀅𑀢𑁆𑀣𑀺 𑀲𑀜𑁆𑀜𑁄𑀚𑀦𑀸𑀦𑀺 𑀦 𑀘 𑀤𑀺𑀝𑁆𑀞𑀺𑀬𑁄. 𑀓𑀢𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺 𑀘𑁂𑀯 𑀤𑀺𑀝𑁆𑀞𑀺𑀬𑁄 𑀘? 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑁋 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺 𑀘𑁂𑀯 𑀤𑀺𑀝𑁆𑀞𑀺𑀬𑁄 𑀘. 𑀓𑀢𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄? 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀁, 𑀧𑀝𑀺𑀖𑀲𑀜𑁆𑀜𑁄𑀚𑀦𑀁, 𑀫𑀸𑀦𑀲𑀜𑁆𑀜𑁄𑀚𑀦𑀁, 𑀯𑀺𑀘𑀺𑀓𑀺𑀘𑁆𑀙𑀸𑀲𑀜𑁆𑀜𑁄𑀚𑀦𑀁, 𑀪𑀯𑀭𑀸𑀕𑀲𑀜𑁆𑀜𑁄𑀚𑀦𑀁, 𑀇𑀲𑁆𑀲𑀸𑀲𑀜𑁆𑀜𑁄𑀚𑀦𑀁, 𑀫𑀘𑁆𑀙𑀭𑀺𑀬𑀲𑀜𑁆𑀜𑁄𑀚𑀦𑀁, 𑀅𑀦𑀼𑀦𑀬𑀲𑀜𑁆𑀜𑁄𑀚𑀦𑀁, 𑀅𑀯𑀺𑀚𑁆𑀚𑀸𑀲𑀜𑁆𑀜𑁄𑀚𑀦𑀁 𑁋 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀅𑀲𑁆𑀲𑀸𑀤𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀜𑁆𑀘𑀢𑀺𑀁𑀲𑀸𑀬 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑀅𑀲𑁆𑀲𑀸𑀤𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄 𑀧𑀞𑀫𑁄.

𑁨. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄

𑁧𑁩𑁦. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁; 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁.

𑁧𑁩𑁧. 𑀓𑀣𑀁 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀧𑀣𑀯𑀻𑀓𑀲𑀺𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑁋 ‘‘𑀬𑀁 𑀧𑀣𑀯𑀻𑀓𑀲𑀺𑀡𑀁, 𑀲𑁄 𑀅𑀳𑀁; 𑀬𑁄 𑀅𑀳𑀁, 𑀢𑀁 𑀧𑀣𑀯𑀻𑀓𑀲𑀺𑀡’’𑀦𑁆𑀢𑀺. 𑀧𑀣𑀯𑀻𑀓𑀲𑀺𑀡𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 ‘‘𑀬𑀸 𑀅𑀘𑁆𑀘𑀺 𑀲𑁄 𑀯𑀡𑁆𑀡𑁄, 𑀬𑁄 𑀯𑀡𑁆𑀡𑁄 𑀲𑀸 𑀅𑀘𑁆𑀘𑀻’’𑀢𑀺 𑁋 𑀅𑀘𑁆𑀘𑀺𑀜𑁆𑀘 𑀯𑀡𑁆𑀡𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀧𑀣𑀯𑀻𑀓𑀲𑀺𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑁋 ‘‘𑀬𑀁 𑀧𑀣𑀯𑀻𑀓𑀲𑀺𑀡𑀁, 𑀲𑁄 𑀅𑀳𑀁; 𑀬𑁄 𑀅𑀳𑀁, 𑀢𑀁 𑀧𑀣𑀯𑀻𑀓𑀲𑀺𑀡’’𑀦𑁆𑀢𑀺. 𑀧𑀣𑀯𑀻𑀓𑀲𑀺𑀡𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 𑀭𑀽𑀧𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺…𑀧𑁂… 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄.

𑀇𑀥𑁂𑀓𑀘𑁆𑀘𑁄 𑀆𑀧𑁄𑀓𑀲𑀺𑀡𑀁… 𑀢𑁂𑀚𑁄𑀓𑀲𑀺𑀡𑀁… 𑀯𑀸𑀬𑁄𑀓𑀲𑀺𑀡𑀁… 𑀦𑀻𑀮𑀓𑀲𑀺𑀡𑀁… 𑀧𑀻𑀢𑀓𑀲𑀺𑀡𑀁… 𑀮𑁄𑀳𑀺𑀢𑀓𑀲𑀺𑀡𑀁… 𑀑𑀤𑀸𑀢𑀓𑀲𑀺𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑁋 ‘‘𑀬𑀁 𑀑𑀤𑀸𑀢𑀓𑀲𑀺𑀡𑀁, 𑀲𑁄 𑀅𑀳𑀁; 𑀬𑁄 𑀅𑀳𑀁, 𑀢𑀁 𑀑𑀤𑀸𑀢𑀓𑀲𑀺𑀡’’𑀦𑁆𑀢𑀺. 𑀑𑀤𑀸𑀢𑀓𑀲𑀺𑀡𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 ‘‘𑀬𑀸 𑀅𑀘𑁆𑀘𑀺, 𑀲𑁄 𑀯𑀡𑁆𑀡𑁄; 𑀬𑁄 𑀯𑀡𑁆𑀡𑁄, 𑀲𑀸 𑀅𑀘𑁆𑀘𑀻’’𑀢𑀺 𑁋 𑀅𑀘𑁆𑀘𑀺𑀜𑁆𑀘 𑀯𑀡𑁆𑀡𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯 𑀇𑀥𑁂𑀓𑀘𑁆𑀘𑁄…𑀧𑁂… 𑀑𑀤𑀸𑀢𑀓𑀲𑀺𑀡𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 𑀭𑀽𑀧𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀺𑀦𑀸 𑀭𑀽𑀧𑁂𑀦 𑀭𑀽𑀧𑀯𑀸’’𑀢𑀺. 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀭𑀼𑀓𑁆𑀔𑁄 𑀙𑀸𑀬𑀸𑀲𑀫𑁆𑀧𑀦𑁆𑀦𑁄 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀭𑀼𑀓𑁆𑀔𑁄, 𑀅𑀬𑀁 𑀙𑀸𑀬𑀸. 𑀅𑀜𑁆𑀜𑁄 𑀭𑀼𑀓𑁆𑀔𑁄, 𑀅𑀜𑁆𑀜𑀸 𑀙𑀸𑀬𑀸. 𑀲𑁄 𑀔𑁄 𑀧𑀦𑀸𑀬𑀁 𑀭𑀼𑀓𑁆𑀔𑁄 𑀇𑀫𑀸𑀬 𑀙𑀸𑀬𑀸𑀬 𑀙𑀸𑀬𑀸𑀯𑀸’’𑀢𑀺. 𑀙𑀸𑀬𑀸𑀯𑀦𑁆𑀢𑀁 𑀭𑀼𑀓𑁆𑀔𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀅𑀬𑀁 𑀅𑀢𑁆𑀢𑀸 𑀇𑀫𑀺𑀦𑀸 𑀭𑀽𑀧𑁂𑀦 𑀭𑀽𑀧𑀯𑀸’’𑀢𑀺. 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀤𑀼𑀢𑀺𑀬𑀸 𑀭𑀽𑀧𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀅𑀢𑁆𑀢𑀦𑀺 𑀭𑀽𑀧𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀅𑀢𑁆𑀢𑀦𑀺 𑀇𑀤𑀁 𑀭𑀽𑀧’’𑀦𑁆𑀢𑀺. 𑀅𑀢𑁆𑀢𑀦𑀺 𑀭𑀽𑀧𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀧𑀼𑀧𑁆𑀨𑀁 𑀕𑀦𑁆𑀥𑀲𑀫𑁆𑀧𑀦𑁆𑀦𑀁 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀇𑀤𑀁 𑀧𑀼𑀧𑁆𑀨𑀁, 𑀅𑀬𑀁 𑀕𑀦𑁆𑀥𑁄; 𑀅𑀜𑁆𑀜𑀁 𑀧𑀼𑀧𑁆𑀨𑀁, 𑀅𑀜𑁆𑀜𑁄 𑀕𑀦𑁆𑀥𑁄. 𑀲𑁄 𑀔𑁄 𑀧𑀦𑀸𑀬𑀁 𑀕𑀦𑁆𑀥𑁄 𑀇𑀫𑀲𑁆𑀫𑀺𑀁 𑀧𑀼𑀧𑁆𑀨𑁂’’𑀢𑀺. 𑀧𑀼𑀧𑁆𑀨𑀲𑁆𑀫𑀺𑀁 𑀕𑀦𑁆𑀥𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀅𑀢𑁆𑀢𑀦𑀺 𑀇𑀤𑀁 𑀭𑀽𑀧’’𑀦𑁆𑀢𑀺. 𑀅𑀢𑁆𑀢𑀦𑀺 𑀭𑀽𑀧𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀢𑀢𑀺𑀬𑀸 𑀭𑀽𑀧𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀅𑀢𑁆𑀢𑀦𑀺 𑀭𑀽𑀧𑀁 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀲𑁆𑀫𑀺𑀁 𑀭𑀽𑀧𑁂’’𑀢𑀺. 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀫𑀡𑀺 𑀓𑀭𑀡𑁆𑀟𑀓𑁂 𑀧𑀓𑁆𑀔𑀺𑀢𑁆𑀢𑁄 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀫𑀡𑀺, 𑀅𑀬𑀁 𑀓𑀭𑀡𑁆𑀟𑀓𑁄. 𑀅𑀜𑁆𑀜𑁄 𑀫𑀡𑀺, 𑀅𑀜𑁆𑀜𑁄 𑀓𑀭𑀡𑁆𑀟𑀓𑁄. 𑀲𑁄 𑀔𑁄 𑀧𑀦𑀸𑀬𑀁 𑀫𑀡𑀺 𑀇𑀫𑀲𑁆𑀫𑀺𑀁 𑀓𑀭𑀡𑁆𑀟𑀓𑁂’’𑀢𑀺. 𑀓𑀭𑀡𑁆𑀟𑀓𑀲𑁆𑀫𑀺𑀁 𑀫𑀡𑀺𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀲𑁆𑀫𑀺𑀁 𑀭𑀽𑀧𑁂’’𑀢𑀺. 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀘𑀢𑀼𑀢𑁆𑀣𑀸 𑀭𑀽𑀧𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺.

𑁧𑁩𑁨. 𑀓𑀣𑀁 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀲𑁄𑀢𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀖𑀸𑀦𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. ‘‘𑀬𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀲𑁄 𑀅𑀳𑀁, 𑀬𑁄 𑀅𑀳𑀁 𑀲𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸’’𑀢𑀺 𑁋 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 ‘‘𑀬𑀸 𑀅𑀘𑁆𑀘𑀺 𑀲𑁄 𑀯𑀡𑁆𑀡𑁄, 𑀬𑁄 𑀯𑀡𑁆𑀡𑁄 𑀲𑀸 𑀅𑀘𑁆𑀘𑀻’’𑀢𑀺 𑁋 𑀅𑀘𑁆𑀘𑀺𑀜𑁆𑀘 𑀯𑀡𑁆𑀡𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. ‘‘𑀬𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀲𑁄 𑀅𑀳𑀁, 𑀬𑁄 𑀅𑀳𑀁 𑀲𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸’’𑀢𑀺 𑁋 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 𑀯𑁂𑀤𑀦𑀸𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀯𑁂𑀤𑀦𑀸𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀸𑀬 𑀯𑁂𑀤𑀦𑀸𑀬 𑀯𑁂𑀤𑀦𑀸𑀯𑀸’’𑀢𑀺. 𑀯𑁂𑀤𑀦𑀸𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀭𑀼𑀓𑁆𑀔𑁄 𑀙𑀸𑀬𑀸𑀲𑀫𑁆𑀧𑀦𑁆𑀦𑁄 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀭𑀼𑀓𑁆𑀔𑁄, 𑀅𑀬𑀁 𑀙𑀸𑀬𑀸. 𑀅𑀜𑁆𑀜𑁄 𑀭𑀼𑀓𑁆𑀔𑁄, 𑀅𑀜𑁆𑀜𑀸 𑀙𑀸𑀬𑀸. 𑀲𑁄 𑀔𑁄 𑀧𑀦𑀸𑀬𑀁 𑀭𑀼𑀓𑁆𑀔𑁄 𑀇𑀫𑀸𑀬 𑀙𑀸𑀬𑀸𑀬 𑀙𑀸𑀬𑀸𑀯𑀸’’𑀢𑀺. 𑀙𑀸𑀬𑀸𑀯𑀦𑁆𑀢𑀁 𑀭𑀼𑀓𑁆𑀔𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀸𑀬 𑀯𑁂𑀤𑀦𑀸𑀬 𑀯𑁂𑀤𑀦𑀸𑀯𑀸’’𑀢𑀺. 𑀯𑁂𑀤𑀦𑀸𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀤𑀼𑀢𑀺𑀬𑀸 𑀯𑁂𑀤𑀦𑀸𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀯𑁂𑀤𑀦𑀸𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀅𑀢𑁆𑀢𑀦𑀺 𑀯𑁂𑀤𑀦𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀅𑀢𑁆𑀢𑀦𑀺 𑀅𑀬𑀁 𑀯𑁂𑀤𑀦𑀸’’𑀢𑀺. 𑀅𑀢𑁆𑀢𑀦𑀺 𑀯𑁂𑀤𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀧𑀼𑀧𑁆𑀨𑀁 𑀕𑀦𑁆𑀥𑀲𑀫𑁆𑀧𑀦𑁆𑀦𑀁 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀇𑀤𑀁 𑀧𑀼𑀧𑁆𑀨𑀁, 𑀅𑀬𑀁 𑀕𑀦𑁆𑀥𑁄; 𑀅𑀜𑁆𑀜𑀁 𑀧𑀼𑀧𑁆𑀨𑀁, 𑀅𑀜𑁆𑀜𑁄 𑀕𑀦𑁆𑀥𑁄. 𑀲𑁄 𑀔𑁄 𑀧𑀦𑀸𑀬𑀁 𑀕𑀦𑁆𑀥𑁄 𑀇𑀫𑀲𑁆𑀫𑀺𑀁 𑀧𑀼𑀧𑁆𑀨𑁂’’𑀢𑀺. 𑀧𑀼𑀧𑁆𑀨𑀲𑁆𑀫𑀺𑀁 𑀕𑀦𑁆𑀥𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀅𑀢𑁆𑀢𑀦𑀺 𑀅𑀬𑀁 𑀯𑁂𑀤𑀦𑀸’’𑀢𑀺. 𑀅𑀢𑁆𑀢𑀦𑀺 𑀯𑁂𑀤𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀢𑀢𑀺𑀬𑀸 𑀯𑁂𑀤𑀦𑀸𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀅𑀢𑁆𑀢𑀦𑀺 𑀯𑁂𑀤𑀦𑀁 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀯𑁂𑀤𑀦𑀸𑀬 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀸𑀬 𑀯𑁂𑀤𑀦𑀸𑀬𑀸’’𑀢𑀺. 𑀯𑁂𑀤𑀦𑀸𑀬 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀫𑀡𑀺 𑀓𑀭𑀡𑁆𑀟𑀓𑁂 𑀧𑀓𑁆𑀔𑀺𑀢𑁆𑀢𑁄 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀫𑀡𑀺, 𑀅𑀬𑀁 𑀓𑀭𑀡𑁆𑀟𑀓𑁄. 𑀅𑀜𑁆𑀜𑁄 𑀫𑀡𑀺, 𑀅𑀜𑁆𑀜𑁄 𑀓𑀭𑀡𑁆𑀟𑀓𑁄. 𑀲𑁄 𑀔𑁄 𑀧𑀦𑀸𑀬𑀁 𑀫𑀡𑀺 𑀇𑀫𑀲𑁆𑀫𑀺𑀁 𑀓𑀭𑀡𑁆𑀟𑀓𑁂’’𑀢𑀺. 𑀓𑀭𑀡𑁆𑀟𑀓𑀲𑁆𑀫𑀺𑀁 𑀫𑀡𑀺𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀸𑀬 𑀯𑁂𑀤𑀦𑀸𑀬𑀸’’𑀢𑀺. 𑀯𑁂𑀤𑀦𑀸𑀬 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀘𑀢𑀼𑀢𑁆𑀣𑀸 𑀯𑁂𑀤𑀦𑀸𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀯𑁂𑀤𑀦𑀸𑀬 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺.

𑁧𑁩𑁩. 𑀓𑀣𑀁 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁…𑀧𑁂… 𑀲𑁄𑀢𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁… 𑀖𑀸𑀦𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁… 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀬𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀲𑁄 𑀅𑀳𑀁, 𑀬𑁄 𑀅𑀳𑀁 𑀲𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸’’𑀢𑀺. 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 ‘‘𑀬𑀸 𑀅𑀘𑁆𑀘𑀺 𑀲𑁄 𑀯𑀡𑁆𑀡𑁄, 𑀬𑁄 𑀯𑀡𑁆𑀡𑁄 𑀲𑀸 𑀅𑀘𑁆𑀘𑀻’’𑀢𑀺 𑁋 𑀅𑀘𑁆𑀘𑀺𑀜𑁆𑀘 𑀯𑀡𑁆𑀡𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑁋 ‘‘𑀬𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑀲𑁄 𑀅𑀳𑀁, 𑀬𑁄 𑀅𑀳𑀁 𑀲𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸’’𑀢𑀺. 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 𑀲𑀜𑁆𑀜𑀸𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀲𑀜𑁆𑀜𑀸𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀲𑀗𑁆𑀔𑀸𑀭𑁂…𑀧𑁂… 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁… 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀸𑀬 𑀲𑀜𑁆𑀜𑀸𑀬 𑀲𑀜𑁆𑀜𑀸𑀯𑀸’’𑀢𑀺. 𑀲𑀜𑁆𑀜𑀸𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀭𑀼𑀓𑁆𑀔𑁄 𑀙𑀸𑀬𑀸𑀲𑀫𑁆𑀧𑀦𑁆𑀦𑁄 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀭𑀼𑀓𑁆𑀔𑁄, 𑀅𑀬𑀁 𑀙𑀸𑀬𑀸. 𑀅𑀜𑁆𑀜𑁄 𑀭𑀼𑀓𑁆𑀔𑁄, 𑀅𑀜𑁆𑀜𑀸 𑀙𑀸𑀬𑀸. 𑀲𑁄 𑀔𑁄 𑀧𑀦𑀸𑀬𑀁 𑀭𑀼𑀓𑁆𑀔𑁄 𑀇𑀫𑀸𑀬 𑀙𑀸𑀬𑀸𑀬 𑀙𑀸𑀬𑀸𑀯𑀸’’𑀢𑀺. 𑀙𑀸𑀬𑀸𑀯𑀦𑁆𑀢𑀁 𑀭𑀼𑀓𑁆𑀔𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁… 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀸𑀬 𑀲𑀜𑁆𑀜𑀸𑀬 𑀲𑀜𑁆𑀜𑀸𑀯𑀸’’𑀢𑀺. 𑀲𑀜𑁆𑀜𑀸𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀤𑀼𑀢𑀺𑀬𑀸 𑀲𑀜𑁆𑀜𑀸𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀲𑀜𑁆𑀜𑀸𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀅𑀢𑁆𑀢𑀦𑀺 𑀲𑀜𑁆𑀜𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀲𑀗𑁆𑀔𑀸𑀭𑁂…𑀧𑁂… 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁… 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀅𑀢𑁆𑀢𑀦𑀺 𑀅𑀬𑀁 𑀲𑀜𑁆𑀜𑀸’’𑀢𑀺. 𑀅𑀢𑁆𑀢𑀦𑀺 𑀲𑀜𑁆𑀜𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀧𑀼𑀧𑁆𑀨𑀁 𑀕𑀦𑁆𑀥𑀲𑀫𑁆𑀧𑀦𑁆𑀦𑀁 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀇𑀤𑀁 𑀧𑀼𑀧𑁆𑀨𑀁, 𑀅𑀬𑀁 𑀕𑀦𑁆𑀥𑁄. 𑀅𑀜𑁆𑀜𑀁 𑀧𑀼𑀧𑁆𑀨𑀁, 𑀅𑀜𑁆𑀜𑁄 𑀕𑀦𑁆𑀥𑁄. 𑀲𑁄 𑀔𑁄 𑀧𑀦𑀸𑀬𑀁 𑀕𑀦𑁆𑀥𑁄 𑀇𑀫𑀲𑁆𑀫𑀺𑀁 𑀧𑀼𑀧𑁆𑀨𑁂’’𑀢𑀺. 𑀧𑀼𑀧𑁆𑀨𑀲𑁆𑀫𑀺𑀁 𑀕𑀦𑁆𑀥𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁… 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀅𑀢𑁆𑀢𑀦𑀺 𑀅𑀬𑀁 𑀲𑀜𑁆𑀜𑀸’’𑀢𑀺. 𑀅𑀢𑁆𑀢𑀦𑀺 𑀲𑀜𑁆𑀜𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀢𑀢𑀺𑀬𑀸 𑀲𑀜𑁆𑀜𑀸𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀅𑀢𑁆𑀢𑀦𑀺 𑀲𑀜𑁆𑀜𑀁 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀲𑀜𑁆𑀜𑀸𑀬 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀲𑀗𑁆𑀔𑀸𑀭𑁂 …𑀧𑁂… 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁… 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀸𑀬 𑀲𑀜𑁆𑀜𑀸𑀬𑀸’’𑀢𑀺. 𑀲𑀜𑁆𑀜𑀸𑀬 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀫𑀡𑀺 𑀓𑀭𑀡𑁆𑀟𑀓𑁂 𑀧𑀓𑁆𑀔𑀺𑀢𑁆𑀢𑁄 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀫𑀡𑀺, 𑀅𑀬𑀁 𑀓𑀭𑀡𑁆𑀟𑀓𑁄. 𑀅𑀜𑁆𑀜𑁄 𑀫𑀡𑀺, 𑀅𑀜𑁆𑀜𑁄 𑀓𑀭𑀡𑁆𑀟𑀓𑁄. 𑀲𑁄 𑀔𑁄 𑀧𑀦𑀸𑀬𑀁 𑀫𑀡𑀺 𑀇𑀫𑀲𑁆𑀫𑀺𑀁 𑀓𑀭𑀡𑁆𑀟𑀓𑁂’’𑀢𑀺. 𑀓𑀭𑀡𑁆𑀟𑀓𑀲𑁆𑀫𑀺𑀁 𑀫𑀡𑀺𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯 𑀇𑀥𑁂𑀓𑀘𑁆𑀘𑁄 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁… 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀸𑀬 𑀲𑀜𑁆𑀜𑀸𑀬𑀸’’𑀢𑀺. 𑀲𑀜𑁆𑀜𑀸𑀬 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀘𑀢𑀼𑀢𑁆𑀣𑀸 𑀲𑀜𑁆𑀜𑀸𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀲𑀜𑁆𑀜𑀸𑀬 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺.

𑁧𑁩𑁪. 𑀓𑀣𑀁 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁 𑀲𑁄𑀢𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁 𑀖𑀸𑀦𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. ‘‘𑀬𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸, 𑀲𑁄 𑀅𑀳𑀁; 𑀬𑁄 𑀅𑀳𑀁 𑀲𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸’’𑀢𑀺 𑁋 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 ‘‘𑀬𑀸 𑀅𑀘𑁆𑀘𑀺 𑀲𑁄 𑀯𑀡𑁆𑀡𑁄, 𑀬𑁄 𑀯𑀡𑁆𑀡𑁄 𑀲𑀸 𑀅𑀘𑁆𑀘𑀻’’𑀢𑀺 𑁋 𑀅𑀘𑁆𑀘𑀺𑀜𑁆𑀘 𑀯𑀡𑁆𑀡𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. ‘‘𑀬𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸 𑀲𑁄 𑀅𑀳𑀁, 𑀬𑁄 𑀅𑀳𑀁 𑀲𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸’’𑀢𑀺 𑁋 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 𑀲𑀗𑁆𑀔𑀸𑀭𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀲𑀗𑁆𑀔𑀸𑀭𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁… 𑀯𑁂𑀤𑀦𑀁… 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑁂𑀳𑀺 𑀲𑀗𑁆𑀔𑀸𑀭𑁂𑀳𑀺 𑀲𑀗𑁆𑀔𑀸𑀭𑀯𑀸’’𑀢𑀺. 𑀲𑀗𑁆𑀔𑀸𑀭𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀭𑀼𑀓𑁆𑀔𑁄 𑀙𑀸𑀬𑀸𑀲𑀫𑁆𑀧𑀦𑁆𑀦𑁄 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀭𑀼𑀓𑁆𑀔𑁄, 𑀅𑀬𑀁 𑀙𑀸𑀬𑀸. 𑀅𑀜𑁆𑀜𑁄 𑀭𑀼𑀓𑁆𑀔𑁄, 𑀅𑀜𑁆𑀜𑀸 𑀙𑀸𑀬𑀸. 𑀲𑁄 𑀔𑁄 𑀧𑀦𑀸𑀬𑀁 𑀭𑀼𑀓𑁆𑀔𑁄 𑀇𑀫𑀸𑀬 𑀙𑀸𑀬𑀸𑀬 𑀙𑀸𑀬𑀸𑀯𑀸’’𑀢𑀺. 𑀙𑀸𑀬𑀸𑀯𑀦𑁆𑀢𑀁 𑀭𑀼𑀓𑁆𑀔𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯 𑀇𑀥𑁂𑀓𑀘𑁆𑀘𑁄 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁… 𑀯𑁂𑀤𑀦𑀁… 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸. 𑀇𑀫𑁂𑀳𑀺 𑀲𑀗𑁆𑀔𑀸𑀭𑁂𑀳𑀺 𑀲𑀗𑁆𑀔𑀸𑀭𑀯𑀸’’𑀢𑀺. 𑀲𑀗𑁆𑀔𑀸𑀭𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀤𑀼𑀢𑀺𑀬𑀸 𑀲𑀗𑁆𑀔𑀸𑀭𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀲𑀗𑁆𑀔𑀸𑀭𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀅𑀢𑁆𑀢𑀦𑀺 𑀲𑀗𑁆𑀔𑀸𑀭𑁂 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁… 𑀯𑁂𑀤𑀦𑀁… 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀅𑀢𑁆𑀢𑀦𑀺 𑀇𑀫𑁂 𑀲𑀗𑁆𑀔𑀸𑀭𑀸’’𑀢𑀺. 𑀅𑀢𑁆𑀢𑀦𑀺 𑀲𑀗𑁆𑀔𑀸𑀭𑁂 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀧𑀼𑀧𑁆𑀨𑀁 𑀕𑀦𑁆𑀥𑀲𑀫𑁆𑀧𑀦𑁆𑀦𑀁 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀇𑀤𑀁 𑀧𑀼𑀧𑁆𑀨𑀁, 𑀅𑀬𑀁 𑀕𑀦𑁆𑀥𑁄; 𑀅𑀜𑁆𑀜𑀁 𑀧𑀼𑀧𑁆𑀨𑀁, 𑀅𑀜𑁆𑀜𑁄 𑀕𑀦𑁆𑀥𑁄. 𑀲𑁄 𑀔𑁄 𑀧𑀦𑀸𑀬𑀁 𑀕𑀦𑁆𑀥𑁄 𑀇𑀫𑀲𑁆𑀫𑀺𑀁 𑀧𑀼𑀧𑁆𑀨𑁂’’𑀢𑀺. 𑀧𑀼𑀧𑁆𑀨𑀲𑁆𑀫𑀺𑀁 𑀕𑀦𑁆𑀥𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁… 𑀯𑁂𑀤𑀦𑀁… 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀅𑀢𑁆𑀢𑀦𑀺 𑀇𑀫𑁂 𑀲𑀗𑁆𑀔𑀸𑀭𑀸’’𑀢𑀺. 𑀅𑀢𑁆𑀢𑀦𑀺 𑀲𑀗𑁆𑀔𑀸𑀭𑁂 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀢𑀢𑀺𑀬𑀸 𑀲𑀗𑁆𑀔𑀸𑀭𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀅𑀢𑁆𑀢𑀦𑀺 𑀲𑀗𑁆𑀔𑀸𑀭𑁂 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀲𑀗𑁆𑀔𑀸𑀭𑁂𑀲𑀼 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁… 𑀯𑁂𑀤𑀦𑀁… 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑁂𑀲𑀼 𑀲𑀗𑁆𑀔𑀸𑀭𑁂𑀲𑀽’’𑀢𑀺. 𑀲𑀗𑁆𑀔𑀸𑀭𑁂𑀲𑀼 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀫𑀡𑀺 𑀓𑀭𑀡𑁆𑀟𑀓𑁂 𑀧𑀓𑁆𑀔𑀺𑀢𑁆𑀢𑁄 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀫𑀡𑀺, 𑀅𑀬𑀁 𑀓𑀭𑀡𑁆𑀟𑀓𑁄. 𑀅𑀜𑁆𑀜𑁄 𑀫𑀡𑀺, 𑀅𑀜𑁆𑀜𑁄 𑀓𑀭𑀡𑁆𑀟𑀓𑁄. 𑀲𑁄 𑀔𑁄 𑀧𑀦𑀸𑀬𑀁 𑀫𑀡𑀺 𑀇𑀫𑀲𑁆𑀫𑀺𑀁 𑀓𑀭𑀡𑁆𑀟𑀓𑁂’’𑀢𑀺. 𑀓𑀭𑀡𑁆𑀟𑀓𑀲𑁆𑀫𑀺𑀁 𑀫𑀡𑀺𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯 𑀇𑀥𑁂𑀓𑀘𑁆𑀘𑁄 𑀯𑀺𑀜𑁆𑀜𑀸𑀡𑀁… 𑀭𑀽𑀧𑀁… 𑀯𑁂𑀤𑀦𑀁… 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑁂𑀲𑀼 𑀲𑀗𑁆𑀔𑀸𑀭𑁂𑀲𑀽’’𑀢𑀺. 𑀲𑀗𑁆𑀔𑀸𑀭𑁂𑀲𑀼 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀘𑀢𑀼𑀢𑁆𑀣𑀸 𑀲𑀗𑁆𑀔𑀸𑀭𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀲𑀗𑁆𑀔𑀸𑀭𑁂𑀲𑀼 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺.

𑁧𑁩𑁫. 𑀓𑀣𑀁 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁… 𑀲𑁄𑀢𑀯𑀺𑀜𑁆𑀜𑀸𑀡𑀁… 𑀖𑀸𑀦𑀯𑀺𑀜𑁆𑀜𑀸𑀡𑀁… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀓𑀸𑀬𑀯𑀺𑀜𑁆𑀜𑀸𑀡𑀁… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. ‘‘𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀲𑁄 𑀅𑀳𑀁; 𑀬𑁄 𑀅𑀳𑀁, 𑀢𑀁 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺 𑁋 𑀫𑀦𑁄𑀯𑀺𑀜𑁆𑀜𑀸𑀡𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 ‘‘𑀬𑀸 𑀅𑀘𑁆𑀘𑀺 𑀲𑁄 𑀯𑀡𑁆𑀡𑁄, 𑀬𑁄 𑀯𑀡𑁆𑀡𑁄 𑀲𑀸 𑀅𑀘𑁆𑀘𑀻’’𑀢𑀺 𑁋 𑀅𑀘𑁆𑀘𑀺𑀜𑁆𑀘 𑀯𑀡𑁆𑀡𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀫𑀦𑁄𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. ‘‘𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀲𑁄 𑀅𑀳𑀁; 𑀬𑁄 𑀅𑀳𑀁 𑀢𑀁 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺 𑁋 𑀫𑀦𑁄𑀯𑀺𑀜𑁆𑀜𑀸𑀡𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 𑀯𑀺𑀜𑁆𑀜𑀸𑀡𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀭𑀽𑀧𑀁… 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀺𑀦𑀸 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀡𑀯𑀸’’𑀢𑀺. 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀭𑀼𑀓𑁆𑀔𑁄 𑀙𑀸𑀬𑀸𑀲𑀫𑁆𑀧𑀦𑁆𑀦𑁄 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀭𑀼𑀓𑁆𑀔𑁄, 𑀅𑀬𑀁 𑀙𑀸𑀬𑀸. 𑀅𑀜𑁆𑀜𑁄 𑀭𑀼𑀓𑁆𑀔𑁄, 𑀅𑀜𑁆𑀜𑀸 𑀙𑀸𑀬𑀸. 𑀲𑁄 𑀔𑁄 𑀧𑀦𑀸𑀬𑀁 𑀭𑀼𑀓𑁆𑀔𑁄 𑀇𑀫𑀸𑀬 𑀙𑀸𑀬𑀸𑀬 𑀙𑀸𑀬𑀸𑀯𑀸’’𑀢𑀺. 𑀙𑀸𑀬𑀸𑀯𑀦𑁆𑀢𑀁 𑀭𑀼𑀓𑁆𑀔𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀭𑀽𑀧𑀁… 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀺𑀦𑀸 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀡𑀯𑀸’’𑀢𑀺. 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀤𑀼𑀢𑀺𑀬𑀸 𑀯𑀺𑀜𑁆𑀜𑀸𑀡𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀅𑀢𑁆𑀢𑀦𑀺 𑀯𑀺𑀜𑁆𑀜𑀸𑀡𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀭𑀽𑀧𑀁… 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀅𑀢𑁆𑀢𑀦𑀺 𑀇𑀤𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺. 𑀅𑀢𑁆𑀢𑀦𑀺 𑀯𑀺𑀜𑁆𑀜𑀸𑀡𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀧𑀼𑀧𑁆𑀨𑀁 𑀕𑀦𑁆𑀥𑀲𑀫𑁆𑀧𑀦𑁆𑀦𑀁 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀇𑀤𑀁 𑀧𑀼𑀧𑁆𑀨𑀁, 𑀅𑀬𑀁 𑀕𑀦𑁆𑀥𑁄; 𑀅𑀜𑁆𑀜𑀁 𑀧𑀼𑀧𑁆𑀨𑀁, 𑀅𑀜𑁆𑀜𑁄 𑀕𑀦𑁆𑀥𑁄. 𑀲𑁄 𑀔𑁄 𑀧𑀦𑀸𑀬𑀁 𑀕𑀦𑁆𑀥𑁄 𑀇𑀫𑀲𑁆𑀫𑀺𑀁 𑀧𑀼𑀧𑁆𑀨𑁂’’𑀢𑀺. 𑀧𑀼𑀧𑁆𑀨𑀲𑁆𑀫𑀺𑀁 𑀕𑀦𑁆𑀥𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀭𑀽𑀧𑀁… 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀅𑀢𑁆𑀢𑀦𑀺 𑀇𑀤𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺. 𑀅𑀢𑁆𑀢𑀦𑀺 𑀯𑀺𑀜𑁆𑀜𑀸𑀡𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀢𑀢𑀺𑀬𑀸 𑀯𑀺𑀜𑁆𑀜𑀸𑀡𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀅𑀢𑁆𑀢𑀦𑀺 𑀯𑀺𑀜𑁆𑀜𑀸𑀡𑀁 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀭𑀽𑀧𑀁… 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀲𑁆𑀫𑀺𑀁 𑀯𑀺𑀜𑁆𑀜𑀸𑀡𑁂’’𑀢𑀺. 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀫𑀡𑀺 𑀓𑀭𑀡𑁆𑀟𑀓𑁂 𑀧𑀓𑁆𑀔𑀺𑀢𑁆𑀢𑁄 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀫𑀡𑀺, 𑀅𑀬𑀁 𑀓𑀭𑀡𑁆𑀟𑀓𑁄. 𑀅𑀜𑁆𑀜𑁄 𑀫𑀡𑀺, 𑀅𑀜𑁆𑀜𑁄 𑀓𑀭𑀡𑁆𑀟𑀓𑁄. 𑀲𑁄 𑀔𑁄 𑀧𑀦𑀸𑀬𑀁 𑀫𑀡𑀺 𑀇𑀫𑀲𑁆𑀫𑀺𑀁 𑀓𑀭𑀡𑁆𑀟𑀓𑁂’’𑀢𑀺. 𑀓𑀭𑀡𑁆𑀟𑀓𑀲𑁆𑀫𑀺𑀁 𑀫𑀡𑀺𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀭𑀽𑀧𑀁… 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀲𑁆𑀫𑀺𑀁 𑀯𑀺𑀜𑁆𑀜𑀸𑀡𑁂’’𑀢𑀺. 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀘𑀢𑀼𑀢𑁆𑀣𑀸 𑀯𑀺𑀜𑁆𑀜𑀸𑀡𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄 𑀤𑀼𑀢𑀺𑀬𑁄.

𑁩. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄

𑁧𑁩𑁬. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀤𑀲𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺 𑁋 𑀯𑀢𑁆𑀣𑀼 [𑀯𑀢𑁆𑀣𑀼𑀁 (𑀲𑁆𑀬𑀸.) 𑀏𑀯𑀫𑀼𑀧𑀭𑀺𑀧𑀺]. 𑀏𑀯𑀁𑀯𑀸𑀤𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 [𑀫𑀺𑀘𑁆𑀙𑀸𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 (𑀲𑁆𑀬𑀸.)] 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 𑀫𑀺𑀘𑁆𑀙𑀸𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. ‘‘𑀦𑀢𑁆𑀣𑀺 𑀬𑀺𑀝𑁆𑀞’’𑀦𑁆𑀢𑀺 𑁋 𑀯𑀢𑁆𑀣𑀼…𑀧𑁂… ‘‘𑀦𑀢𑁆𑀣𑀺 𑀳𑀼𑀢’’𑀦𑁆𑀢𑀺 𑁋 𑀯𑀢𑁆𑀣𑀼… ‘‘𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀢𑀺 𑁋 𑀯𑀢𑁆𑀣𑀼… ‘‘𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄’’𑀢𑀺 𑁋 𑀯𑀢𑁆𑀣𑀼… ‘‘𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄’’𑀢𑀺 𑁋 𑀯𑀢𑁆𑀣𑀼… ‘‘𑀦𑀢𑁆𑀣𑀺 𑀫𑀸𑀢𑀸’’𑀢𑀺 𑁋 𑀯𑀢𑁆𑀣𑀼… ‘‘𑀦𑀢𑁆𑀣𑀺 𑀧𑀺𑀢𑀸’’𑀢𑀺 𑁋 𑀯𑀢𑁆𑀣𑀼… ‘‘𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑁋 𑀯𑀢𑁆𑀣𑀼… ‘‘𑀦𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 [𑀲𑀫𑀕𑁆𑀕𑀢𑀸 (𑀓.)] 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸, 𑀬𑁂 𑀇𑀫𑀜𑁆𑀘 𑀮𑁄𑀓𑀁, 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’’𑀢𑀺 𑁋 𑀯𑀢𑁆𑀣𑀼. 𑀏𑀯𑀁𑀯𑀸𑀤𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀤𑀲𑀫𑀸 𑀫𑀺𑀘𑁆𑀙𑀸𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀤𑀲𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄 𑀢𑀢𑀺𑀬𑁄.

𑁪. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄

𑁧𑁩𑁭. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁.

𑀓𑀣𑀁 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀧𑀣𑀯𑀻𑀓𑀲𑀺𑀡𑀁…𑀧𑁂… 𑀑𑀤𑀸𑀢𑀓𑀲𑀺𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. ‘‘𑀬𑀁 𑀑𑀤𑀸𑀢𑀓𑀲𑀺𑀡𑀁, 𑀲𑁄 𑀅𑀳𑀁; 𑀬𑁄 𑀅𑀳𑀁, 𑀢𑀁 𑀑𑀤𑀸𑀢𑀓𑀲𑀺𑀡’’𑀦𑁆𑀢𑀺 𑁋 𑀑𑀤𑀸𑀢𑀓𑀲𑀺𑀡𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄…𑀧𑁂… 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀑𑀤𑀸𑀢𑀓𑀲𑀺𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺…𑀧𑁂… 𑀅𑀬𑀁 𑀧𑀞𑀫𑀸 𑀭𑀽𑀧𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄 𑀘𑀢𑀼𑀢𑁆𑀣𑁄.

𑁫. 𑀲𑀲𑁆𑀲𑀢𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄

𑁧𑁩𑁮. 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸𑀬 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀦𑁆𑀦𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁…𑀧𑁂… 𑀲𑀜𑁆𑀜𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁… 𑀲𑀗𑁆𑀔𑀸𑀭𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁… 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁.

𑀓𑀣𑀁 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸. 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀺𑀦𑀸 𑀭𑀽𑀧𑁂𑀦 𑀭𑀽𑀧𑀯𑀸’’𑀢𑀺. 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀭𑀼𑀓𑁆𑀔𑁄 𑀙𑀸𑀬𑀸𑀲𑀫𑁆𑀧𑀦𑁆𑀦𑁄 𑀅𑀲𑁆𑀲. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀭𑀼𑀓𑁆𑀔𑁄, 𑀅𑀬𑀁 𑀙𑀸𑀬𑀸; 𑀅𑀜𑁆𑀜𑁄 𑀭𑀼𑀓𑁆𑀔𑁄, 𑀅𑀜𑁆𑀜𑀸 𑀙𑀸𑀬𑀸. 𑀲𑁄 𑀔𑁄 𑀧𑀦𑀸𑀬𑀁 𑀭𑀼𑀓𑁆𑀔𑁄 𑀇𑀫𑀸𑀬 𑀙𑀸𑀬𑀸𑀬 𑀙𑀸𑀬𑀸𑀯𑀸’’𑀢𑀺. 𑀙𑀸𑀬𑀸𑀯𑀦𑁆𑀢𑀁 𑀭𑀼𑀓𑁆𑀔𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀯𑁂𑀤𑀦𑀁…𑀧𑁂… 𑀅𑀬𑀁 𑀧𑀞𑀫𑀸 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀲𑀲𑁆𑀲𑀢𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸𑀬 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀦𑁆𑀦𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑀲𑀲𑁆𑀲𑀢𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄 𑀧𑀜𑁆𑀘𑀫𑁄.

𑁬. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄

𑁧𑁩𑁯. 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸𑀬 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺.

𑀓𑀣𑀁 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀧𑀣𑀯𑀻𑀓𑀲𑀺𑀡𑀁…𑀧𑁂… 𑀑𑀤𑀸𑀢𑀓𑀲𑀺𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. ‘‘𑀬𑀁 𑀑𑀤𑀸𑀢𑀓𑀲𑀺𑀡𑀁, 𑀲𑁄 𑀅𑀳𑀁; 𑀬𑁄 𑀅𑀳𑀁, 𑀢𑀁 𑀑𑀤𑀸𑀢𑀓𑀲𑀺𑀡’’𑀦𑁆𑀢𑀺 𑁋 𑀑𑀤𑀸𑀢𑀓𑀲𑀺𑀡𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄…𑀧𑁂… 𑀅𑀬𑀁 𑀧𑀞𑀫𑀸 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸𑀬 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄 𑀙𑀝𑁆𑀞𑁄.

𑁭. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄

𑁧𑁪𑁦. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀜𑁆𑀜𑀸𑀲𑀸𑀬 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? ‘‘𑀅𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸… ‘‘𑀅𑀦𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸… ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸… ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸… ‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺…𑀧𑁂… 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺… ‘‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺… ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺?

‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺…𑀧𑁂… ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

[𑀓] ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀭𑀽𑀧𑀁 𑀮𑁄𑀓𑁄 𑀘𑁂𑀯 𑀲𑀲𑁆𑀲𑀢𑀁 𑀘𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 …𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄.

𑀯𑁂𑀤𑀦𑀸 𑀮𑁄𑀓𑁄 𑀘𑁂𑀯 𑀲𑀲𑁆𑀲𑀢𑀸 𑀘𑀸𑀢𑀺…𑀧𑁂… 𑀲𑀜𑁆𑀜𑀸 𑀮𑁄𑀓𑁄 𑀘𑁂𑀯 𑀲𑀲𑁆𑀲𑀢𑀸 𑀘𑀸𑀢𑀺…𑀧𑁂… 𑀲𑀗𑁆𑀔𑀸𑀭𑀸 𑀮𑁄𑀓𑁄 𑀘𑁂𑀯 𑀲𑀲𑁆𑀲𑀢𑀸 𑀘𑀸𑀢𑀺…𑀧𑁂… 𑀯𑀺𑀜𑁆𑀜𑀸𑀡𑀁 𑀮𑁄𑀓𑁄 𑀘𑁂𑀯 𑀲𑀲𑁆𑀲𑀢𑀜𑁆𑀘𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀜𑁆𑀘𑀫𑀻 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

[𑀔] ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀭𑀽𑀧𑀁 𑀮𑁄𑀓𑁄 𑀘𑁂𑀯 𑀅𑀲𑀲𑁆𑀲𑀢𑀜𑁆𑀘𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺…𑀧𑁂… 𑀅𑀬𑀁 𑀧𑀞𑀫𑀸 ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄.

𑀯𑁂𑀤𑀦𑀸 𑀮𑁄𑀓𑁄 𑀘𑁂𑀯 𑀅𑀲𑀲𑁆𑀲𑀢𑀸 𑀘𑀸𑀢𑀺…𑀧𑁂… 𑀲𑀜𑁆𑀜𑀸 𑀮𑁄𑀓𑁄 𑀘𑁂𑀯 𑀅𑀲𑀲𑁆𑀲𑀢𑀸 𑀘𑀸𑀢𑀺…𑀧𑁂… 𑀲𑀗𑁆𑀔𑀸𑀭𑀸 𑀮𑁄𑀓𑁄 𑀘𑁂𑀯 𑀅𑀲𑀲𑁆𑀲𑀢𑀸 𑀘𑀸𑀢𑀺…𑀧𑁂… 𑀯𑀺𑀜𑁆𑀜𑀸𑀡𑀁 𑀮𑁄𑀓𑁄 𑀘𑁂𑀯 𑀅𑀲𑀲𑁆𑀲𑀢𑀜𑁆𑀘𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

[𑀕] ‘‘𑀅𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀇𑀥𑁂𑀓𑀘𑁆𑀘𑁄 𑀧𑀭𑀺𑀢𑁆𑀢𑀁 𑀑𑀓𑀸𑀲𑀁 𑀦𑀻𑀮𑀓𑀢𑁄 𑀨𑀭𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀦𑁆𑀢𑀯𑀸 𑀅𑀬𑀁 𑀮𑁄𑀓𑁄 𑀧𑀭𑀺𑀯𑀝𑀼𑀫𑁄’’𑀢𑀺. 𑀅𑀦𑁆𑀢𑀲𑀜𑁆𑀜𑀻 𑀳𑁄𑀢𑀺. 𑀬𑀁 𑀨𑀭𑀢𑀺, 𑀢𑀁 𑀯𑀢𑁆𑀣𑀼 𑀘𑁂𑀯 𑀮𑁄𑀓𑁄 𑀘. 𑀬𑁂𑀦 𑀨𑀭𑀢𑀺, 𑀲𑁄 𑀅𑀢𑁆𑀢𑀸 𑀘𑁂𑀯 𑀮𑁄𑀓𑁄 𑀘𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 ‘‘𑀅𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄.

𑀇𑀥𑁂𑀓𑀘𑁆𑀘𑁄 𑀧𑀭𑀺𑀢𑁆𑀢𑀁 𑀑𑀓𑀸𑀲𑀁 𑀧𑀻𑀢𑀓𑀢𑁄 𑀨𑀭𑀢𑀺… 𑀮𑁄𑀳𑀺𑀢𑀓𑀢𑁄 𑀨𑀭𑀢𑀺… 𑀑𑀤𑀸𑀢𑀓𑀢𑁄 𑀨𑀭𑀢𑀺… 𑀑𑀪𑀸𑀲𑀓𑀢𑁄 𑀨𑀭𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀦𑁆𑀢𑀯𑀸 𑀅𑀬𑀁 𑀮𑁄𑀓𑁄 𑀧𑀭𑀺𑀯𑀝𑀼𑀫𑁄’’𑀢𑀺. 𑀅𑀦𑁆𑀢𑀲𑀜𑁆𑀜𑀻 𑀳𑁄𑀢𑀺. 𑀬𑀁 𑀨𑀭𑀢𑀺 𑀢𑀁 𑀯𑀢𑁆𑀣𑀼 𑀘𑁂𑀯 𑀮𑁄𑀓𑁄 𑀘. 𑀬𑁂𑀦 𑀨𑀭𑀢𑀺 𑀲𑁄 𑀅𑀢𑁆𑀢𑀸 𑀘𑁂𑀯 𑀮𑁄𑀓𑁄 𑀘𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺…𑀧𑁂… 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

[𑀖] ‘‘𑀅𑀦𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀇𑀥𑁂𑀓𑀘𑁆𑀘𑁄 𑀯𑀺𑀧𑀼𑀮𑀁 𑀑𑀓𑀸𑀲𑀁 𑀦𑀻𑀮𑀓𑀢𑁄 𑀨𑀭𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀦𑀦𑁆𑀢𑀯𑀸 𑀅𑀬𑀁 𑀮𑁄𑀓𑁄 𑀅𑀧𑀭𑀺𑀬𑀦𑁆𑀢𑁄’’𑀢𑀺. 𑀅𑀦𑀦𑁆𑀢𑀲𑀜𑁆𑀜𑀻 𑀳𑁄𑀢𑀺. 𑀬𑀁 𑀨𑀭𑀢𑀺 𑀢𑀁 𑀯𑀢𑁆𑀣𑀼 𑀘𑁂𑀯 𑀮𑁄𑀓𑁄 𑀘; 𑀬𑁂𑀦 𑀨𑀭𑀢𑀺 𑀲𑁄 𑀅𑀢𑁆𑀢𑀸 𑀘𑁂𑀯 𑀮𑁄𑀓𑁄 𑀘𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 ‘‘𑀅𑀦𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄.

𑀇𑀥𑁂𑀓𑀘𑁆𑀘𑁄 𑀯𑀺𑀧𑀼𑀮𑀁 𑀑𑀓𑀸𑀲𑀁 𑀧𑀻𑀢𑀓𑀢𑁄 𑀨𑀭𑀢𑀺… 𑀮𑁄𑀳𑀺𑀢𑀓𑀢𑁄 𑀨𑀭𑀢𑀺… 𑀑𑀤𑀸𑀢𑀓𑀢𑁄 𑀨𑀭𑀢𑀺… 𑀑𑀪𑀸𑀲𑀓𑀢𑁄 𑀨𑀭𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀦𑀦𑁆𑀢𑀯𑀸 𑀅𑀬𑀁 𑀮𑁄𑀓𑁄 𑀅𑀧𑀭𑀺𑀬𑀦𑁆𑀢𑁄’’𑀢𑀺. 𑀅𑀦𑀦𑁆𑀢𑀲𑀜𑁆𑀜𑀻 𑀳𑁄𑀢𑀺. 𑀬𑀁 𑀨𑀭𑀢𑀺 𑀢𑀁 𑀯𑀢𑁆𑀣𑀼 𑀘𑁂𑀯 𑀮𑁄𑀓𑁄 𑀘; 𑀬𑁂𑀦 𑀨𑀭𑀢𑀺 𑀲𑁄 𑀅𑀢𑁆𑀢𑀸 𑀘𑁂𑀯 𑀮𑁄𑀓𑁄 𑀘𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺…𑀧𑁂… 𑀅𑀦𑀦𑁆𑀢𑀯𑀸 𑀮𑁄𑀓𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

[𑀗] ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀭𑀽𑀧𑀁 𑀚𑀻𑀯𑀜𑁆𑀘𑁂𑀯 𑀲𑀭𑀻𑀭𑀜𑁆𑀘; 𑀬𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁, 𑀬𑀁 𑀲𑀭𑀻𑀭𑀁 𑀢𑀁 𑀚𑀻𑀯𑀦𑁆𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄.

𑀯𑁂𑀤𑀦𑀸 𑀚𑀻𑀯𑀸 𑀘𑁂𑀯 𑀲𑀭𑀻𑀭𑀁 𑀘… 𑀲𑀜𑁆𑀜𑀸 𑀚𑀻𑀯𑀸 𑀘𑁂𑀯 𑀲𑀭𑀻𑀭𑀁 𑀘… 𑀲𑀗𑁆𑀔𑀸𑀭𑀸 𑀚𑀻𑀯𑀸 𑀘𑁂𑀯 𑀲𑀭𑀻𑀭𑀁 𑀘… 𑀯𑀺𑀜𑁆𑀜𑀸𑀡𑀁 𑀚𑀻𑀯𑀜𑁆𑀘𑁂𑀯 𑀲𑀭𑀻𑀭𑀜𑁆𑀘; 𑀬𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁, 𑀬𑀁 𑀲𑀭𑀻𑀭𑀁 𑀢𑀁 𑀚𑀻𑀯𑀦𑁆𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺…𑀧𑁂… ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

[𑀘] ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀭𑀽𑀧𑀁 𑀲𑀭𑀻𑀭𑀁, 𑀦 𑀚𑀻𑀯𑀁; 𑀚𑀻𑀯𑀁 𑀦 𑀲𑀭𑀻𑀭𑀁. 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄.

𑀯𑁂𑀤𑀦𑀸 𑀲𑀭𑀻𑀭𑀁, 𑀦 𑀚𑀻𑀯𑀁… 𑀲𑀜𑁆𑀜𑀸 𑀲𑀭𑀻𑀭𑀁, 𑀦 𑀚𑀻𑀯𑀁… 𑀲𑀗𑁆𑀔𑀸𑀭𑀸 𑀲𑀭𑀻𑀭𑀁, 𑀦 𑀚𑀻𑀯𑀁… 𑀯𑀺𑀜𑁆𑀜𑀸𑀡𑀁 𑀲𑀭𑀻𑀭𑀁, 𑀦 𑀚𑀻𑀯𑀁; 𑀚𑀻𑀯𑀁 𑀦 𑀲𑀭𑀻𑀭𑀁. 𑀅𑀜𑁆𑀜𑀁 𑀚𑀻𑀯𑀁, 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺…𑀧𑁂… 𑀅𑀜𑁆𑀜𑀁 𑀚𑀻𑀯𑀁, 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

[𑀙] ‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀭𑀽𑀧𑀁 𑀇𑀥𑁂𑀯 𑀫𑀭𑀡𑀥𑀫𑁆𑀫𑀁. 𑀢𑀣𑀸𑀕𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀳𑁄𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀺 𑀉𑀧𑁆𑀧𑀚𑁆𑀚𑀢𑀺𑀧𑀺 𑀦𑀺𑀩𑁆𑀩𑀢𑁆𑀢𑀢𑀺𑀧𑀻𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 ‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄.

𑀯𑁂𑀤𑀦𑀸 𑀇𑀥𑁂𑀯 𑀫𑀭𑀡𑀥𑀫𑁆𑀫𑀸…𑀧𑁂… 𑀲𑀜𑁆𑀜𑀸 𑀇𑀥𑁂𑀯 𑀫𑀭𑀡𑀥𑀫𑁆𑀫𑀸… 𑀲𑀗𑁆𑀔𑀸𑀭𑀸 𑀇𑀥𑁂𑀯 𑀫𑀭𑀡𑀥𑀫𑁆𑀫𑀸… 𑀯𑀺𑀜𑁆𑀜𑀸𑀡𑀁 𑀇𑀥𑁂𑀯 𑀫𑀭𑀡𑀥𑀫𑁆𑀫𑀁. 𑀢𑀣𑀸𑀕𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀳𑁄𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀺 𑀉𑀧𑁆𑀧𑀚𑁆𑀚𑀢𑀺𑀧𑀺 𑀦𑀺𑀩𑁆𑀩𑀢𑁆𑀢𑀢𑀺𑀧𑀻𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺…𑀧𑁂… ‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

[𑀚] ‘‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀭𑀽𑀧𑀁 𑀇𑀥𑁂𑀯 𑀫𑀭𑀡𑀥𑀫𑁆𑀫𑀁. 𑀢𑀣𑀸𑀕𑀢𑁄𑀧𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺; 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 ‘‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄.

𑀯𑁂𑀤𑀦𑀸 𑀇𑀥𑁂𑀯 𑀫𑀭𑀡𑀥𑀫𑁆𑀫𑀸…𑀧𑁂… 𑀲𑀜𑁆𑀜𑀸 𑀇𑀥𑁂𑀯 𑀫𑀭𑀡𑀥𑀫𑁆𑀫𑀸… 𑀲𑀗𑁆𑀔𑀸𑀭𑀸 𑀇𑀥𑁂𑀯 𑀫𑀭𑀡𑀥𑀫𑁆𑀫𑀸… 𑀯𑀺𑀜𑁆𑀜𑀸𑀡𑀁 𑀇𑀥𑁂𑀯 𑀫𑀭𑀡𑀥𑀫𑁆𑀫𑀁. 𑀢𑀣𑀸𑀕𑀢𑁄𑀧𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺. ‘‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺…𑀧𑁂… ‘‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

[𑀛] ‘‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀭𑀽𑀧𑀁 𑀇𑀥𑁂𑀯 𑀫𑀭𑀡𑀥𑀫𑁆𑀫𑀁. 𑀢𑀣𑀸𑀕𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀳𑁄𑀢𑀺 𑀘 𑀦 𑀘 𑀳𑁄𑀢𑀻𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 ‘‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺 𑀦 𑀘 𑀤𑀺𑀝𑁆𑀞𑀺𑀬𑁄.

𑀯𑁂𑀤𑀦𑀸 𑀇𑀥𑁂𑀯 𑀫𑀭𑀡𑀥𑀫𑁆𑀫𑀸…𑀧𑁂… 𑀲𑀜𑁆𑀜𑀸 𑀇𑀥𑁂𑀯 𑀫𑀭𑀡𑀥𑀫𑁆𑀫𑀸… 𑀲𑀗𑁆𑀔𑀸𑀭𑀸 𑀇𑀥𑁂𑀯 𑀫𑀭𑀡𑀥𑀫𑁆𑀫𑀸… 𑀯𑀺𑀜𑁆𑀜𑀸𑀡𑀁 𑀇𑀥𑁂𑀯 𑀫𑀭𑀡𑀥𑀫𑁆𑀫𑀁. 𑀢𑀣𑀸𑀕𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀳𑁄𑀢𑀺 𑀘 𑀦 𑀘 𑀳𑁄𑀢𑀻𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺…𑀧𑁂… ‘‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

[𑀜] ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀭𑀽𑀧𑀁 𑀇𑀥𑁂𑀯 𑀫𑀭𑀡𑀥𑀫𑁆𑀫𑀁. 𑀢𑀣𑀸𑀕𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀻𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺, 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄.

𑀯𑁂𑀤𑀦𑀸 𑀇𑀥𑁂𑀯 𑀫𑀭𑀡𑀥𑀫𑁆𑀫𑀸…𑀧𑁂… 𑀲𑀜𑁆𑀜𑀸 𑀇𑀥𑁂𑀯 𑀫𑀭𑀡𑀥𑀫𑁆𑀫𑀸… 𑀲𑀗𑁆𑀔𑀸𑀭𑀸 𑀇𑀥𑁂𑀯 𑀫𑀭𑀡𑀥𑀫𑁆𑀫𑀸… 𑀯𑀺𑀜𑁆𑀜𑀸𑀡𑀁 𑀇𑀥𑁂𑀯 𑀫𑀭𑀡𑀥𑀫𑁆𑀫𑀁. 𑀢𑀣𑀸𑀕𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀻𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺. 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑁄 𑀅𑀦𑁆𑀢𑁄 𑀕𑀳𑀺𑀢𑁄𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀜𑁆𑀘𑀫𑀻 ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀧𑀜𑁆𑀜𑀸𑀲𑀸𑀬 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄 𑀲𑀢𑁆𑀢𑀫𑁄.

𑁮. 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄

𑁧𑁪𑁧. 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸, 𑀘𑀢𑁆𑀢𑀸𑀭𑁄 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸, 𑀘𑀢𑁆𑀢𑀸𑀭𑁄 𑀅𑀦𑁆𑀢𑀸𑀦𑀦𑁆𑀢𑀺𑀓𑀸, 𑀘𑀢𑁆𑀢𑀸𑀭𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸, 𑀤𑁆𑀯𑁂 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸 𑁋 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄 𑀅𑀝𑁆𑀞𑀫𑁄.

𑁯. 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄

𑁧𑁪𑁨. 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸, 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸, 𑀧𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 𑁋 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄 𑀦𑀯𑀫𑁄.

𑁧𑁦-𑁧𑁨. 𑀲𑀜𑁆𑀜𑁄𑀚𑀦𑀺𑀓𑀸𑀤𑀺𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄

𑁧𑁪𑁩. 𑀲𑀜𑁆𑀜𑁄𑀚𑀦𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀬𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁…𑀧𑁂… 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁄 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁄 𑁋 𑀲𑀜𑁆𑀜𑁄𑀚𑀦𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑁧𑁪𑁪. ‘‘𑀅𑀳’’𑀦𑁆𑀢𑀺 𑁋 𑀫𑀸𑀦𑀯𑀺𑀦𑀺𑀩𑀦𑁆𑀥𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀘𑀓𑁆𑀔𑀼 𑀅𑀳𑀦𑁆𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄. 𑀅𑀳𑀦𑁆𑀢𑀺 𑁋 𑀫𑀸𑀦𑀯𑀺𑀦𑀺𑀩𑀦𑁆𑀥𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 ‘‘𑀅𑀳’’𑀦𑁆𑀢𑀺 𑁋 𑀫𑀸𑀦𑀯𑀺𑀦𑀺𑀩𑀦𑁆𑀥𑀸 𑀤𑀺𑀝𑁆𑀞𑀺. 𑀫𑀸𑀦𑀯𑀺𑀦𑀺𑀩𑀦𑁆𑀥𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄.

𑀲𑁄𑀢𑀁 𑀅𑀳𑀦𑁆𑀢𑀺…𑀧𑁂… 𑀖𑀸𑀦𑀁 𑀅𑀳𑀦𑁆𑀢𑀺…𑀧𑁂… 𑀚𑀺𑀯𑁆𑀳𑀸 𑀅𑀳𑀦𑁆𑀢𑀺…𑀧𑁂… 𑀓𑀸𑀬𑁄 𑀅𑀳𑀦𑁆𑀢𑀺…𑀧𑁂… 𑀫𑀦𑁄 𑀅𑀳𑀦𑁆𑀢𑀺…𑀧𑁂… 𑀭𑀽𑀧𑀸 𑀅𑀳𑀦𑁆𑀢𑀺…𑀧𑁂… 𑀥𑀫𑁆𑀫𑀸 𑀅𑀳𑀦𑁆𑀢𑀺… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀅𑀳𑀦𑁆𑀢𑀺…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀅𑀳𑀦𑁆𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄. 𑀅𑀳𑀦𑁆𑀢𑀺 𑁋 𑀫𑀸𑀦𑀯𑀺𑀦𑀺𑀩𑀦𑁆𑀥𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀅𑀝𑁆𑀞𑀸𑀭𑀲𑀫𑀻 ‘‘𑀅𑀳’’𑀦𑁆𑀢𑀺 𑁋 𑀫𑀸𑀦𑀯𑀺𑀦𑀺𑀩𑀦𑁆𑀥𑀸 𑀤𑀺𑀝𑁆𑀞𑀺. 𑀫𑀸𑀦𑀯𑀺𑀦𑀺𑀩𑀦𑁆𑀥𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. ‘‘𑀅𑀳’’𑀦𑁆𑀢𑀺 𑁋 𑀫𑀸𑀦𑀯𑀺𑀦𑀺𑀩𑀦𑁆𑀥𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑁧𑁪𑁫. ‘‘𑀫𑀫’’𑀦𑁆𑀢𑀺 𑁋 𑀫𑀸𑀦𑀯𑀺𑀦𑀺𑀩𑀦𑁆𑀥𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀘𑀓𑁆𑀔𑀼 𑀫𑀫𑀦𑁆𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄. 𑀫𑀫𑀦𑁆𑀢𑀺 𑁋 𑀫𑀸𑀦𑀯𑀺𑀦𑀺𑀩𑀦𑁆𑀥𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 ‘‘𑀫𑀫’’𑀦𑁆𑀢𑀺 𑁋 𑀫𑀸𑀦𑀯𑀺𑀦𑀺𑀩𑀦𑁆𑀥𑀸 𑀤𑀺𑀝𑁆𑀞𑀺. 𑀫𑀸𑀦𑀯𑀺𑀦𑀺𑀩𑀦𑁆𑀥𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄.

𑀲𑁄𑀢𑀁 𑀫𑀫𑀦𑁆𑀢𑀺…𑀧𑁂… 𑀖𑀸𑀦𑀁 𑀫𑀫𑀦𑁆𑀢𑀺…𑀧𑁂… 𑀚𑀺𑀯𑁆𑀳𑀸 𑀫𑀫𑀦𑁆𑀢𑀺…𑀧𑁂… 𑀓𑀸𑀬𑁄 𑀫𑀫𑀦𑁆𑀢𑀺…𑀧𑁂… 𑀫𑀦𑁄 𑀫𑀫𑀦𑁆𑀢𑀺…𑀧𑁂… 𑀭𑀽𑀧𑀸 𑀫𑀫𑀦𑁆𑀢𑀺…𑀧𑁂… 𑀥𑀫𑁆𑀫𑀸 𑀫𑀫𑀦𑁆𑀢𑀺…𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀫𑀫𑀦𑁆𑀢𑀺…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀫𑀫𑀦𑁆𑀢𑀺 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄. 𑀫𑀫𑀦𑁆𑀢𑀺 𑀫𑀸𑀦𑀯𑀺𑀦𑀺𑀩𑀦𑁆𑀥𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀅𑀝𑁆𑀞𑀸𑀭𑀲𑀫𑀻 ‘‘𑀫𑀫’’𑀦𑁆𑀢𑀺 𑁋 𑀫𑀸𑀦𑀯𑀺𑀦𑀺𑀩𑀦𑁆𑀥𑀸 𑀤𑀺𑀝𑁆𑀞𑀺. 𑀫𑀸𑀦𑀯𑀺𑀦𑀺𑀩𑀦𑁆𑀥𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. ‘‘𑀫𑀫’’𑀦𑁆𑀢𑀺 𑁋 𑀫𑀸𑀦𑀯𑀺𑀦𑀺𑀩𑀦𑁆𑀥𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑀲𑀜𑁆𑀜𑁄𑀚𑀦𑀺𑀓𑀸𑀤𑀺𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄 𑀤𑁆𑀯𑀸𑀤𑀲𑀫𑁄.

𑁧𑁩. 𑀅𑀢𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄

𑁧𑁪𑁬. 𑀅𑀢𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁…𑀧𑁂… 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁…𑀧𑁂….

𑀓𑀣𑀁 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀧𑀣𑀯𑀻𑀓𑀲𑀺𑀡𑀁…𑀧𑁂… 𑀑𑀤𑀸𑀢𑀓𑀲𑀺𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. ‘‘𑀬𑀁 𑀑𑀤𑀸𑀢𑀓𑀲𑀺𑀡𑀁, 𑀲𑁄 𑀅𑀳𑀁; 𑀬𑁄 𑀅𑀳𑀁, 𑀢𑀁 𑀑𑀤𑀸𑀢𑀓𑀲𑀺𑀡’’𑀦𑁆𑀢𑀺 𑁋 𑀑𑀤𑀸𑀢𑀓𑀲𑀺𑀡𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 ‘‘𑀬𑀸 𑀅𑀘𑁆𑀘𑀺, 𑀲𑁄 𑀯𑀡𑁆𑀡𑁄; 𑀬𑁄 𑀯𑀡𑁆𑀡𑁄, 𑀲𑀸 𑀅𑀘𑁆𑀘𑀻’’𑀢𑀺 𑁋 𑀅𑀘𑁆𑀘𑀺𑀜𑁆𑀘 𑀯𑀡𑁆𑀡𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀑𑀤𑀸𑀢𑀓𑀲𑀺𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀅𑀬𑀁 𑀧𑀞𑀫𑀸 𑀭𑀽𑀧𑀯𑀢𑁆𑀣𑀼𑀓𑀸 𑀅𑀢𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑀺𑀝𑁆𑀞𑀺. 𑀅𑀢𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀏𑀯𑀁 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀅𑀢𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑀅𑀢𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄 𑀢𑁂𑀭𑀲𑀫𑁄.

𑁧𑁪. 𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄

𑁧𑁪𑁭. 𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺? 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑁋 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸, 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀧𑀞𑀫𑀸 𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑀺𑀝𑁆𑀞𑀺. 𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄.

𑀅𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺…𑀧𑁂… 𑀲𑀲𑁆𑀲𑀢𑁄 𑀘 𑀅𑀲𑀲𑁆𑀲𑀢𑁄 𑀘 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺…𑀧𑁂… 𑀦𑁂𑀯 𑀲𑀲𑁆𑀲𑀢𑁄 𑀦𑀸𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺… 𑀅𑀦𑁆𑀢𑀯𑀸 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺… 𑀅𑀦𑀦𑁆𑀢𑀯𑀸 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺… 𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑀯𑀸 𑀘 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺… 𑀦𑁂𑀯 𑀅𑀦𑁆𑀢𑀯𑀸 𑀦 𑀅𑀦𑀦𑁆𑀢𑀯𑀸 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺 𑀦 𑀯𑀢𑁆𑀣𑀼, 𑀯𑀢𑁆𑀣𑀼 𑀦 𑀤𑀺𑀝𑁆𑀞𑀺. 𑀅𑀜𑁆𑀜𑀸 𑀤𑀺𑀝𑁆𑀞𑀺, 𑀅𑀜𑁆𑀜𑀁 𑀯𑀢𑁆𑀣𑀼. 𑀬𑀸 𑀘 𑀤𑀺𑀝𑁆𑀞𑀺 𑀬𑀜𑁆𑀘 𑀯𑀢𑁆𑀣𑀼 𑁋 𑀅𑀬𑀁 𑀅𑀝𑁆𑀞𑀫𑀻 𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑀺𑀝𑁆𑀞𑀺. 𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 …𑀧𑁂… 𑀇𑀫𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺, 𑀦 𑀘 𑀤𑀺𑀝𑁆𑀞𑀺𑀬𑁄. 𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺.

𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄 𑀘𑀼𑀤𑁆𑀤𑀲𑀫𑁄.

𑁧𑁫-𑁧𑁬. 𑀪𑀯-𑀯𑀺𑀪𑀯𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄

𑁧𑁪𑁮. 𑀑𑀮𑀻𑀬𑀦𑀸𑀪𑀺𑀦𑀺𑀯𑁂𑀲𑁄 𑀪𑀯𑀤𑀺𑀝𑁆𑀞𑀺. 𑀅𑀢𑀺𑀥𑀸𑀯𑀦𑀸𑀪𑀺𑀦𑀺𑀯𑁂𑀲𑁄 𑀯𑀺𑀪𑀯𑀤𑀺𑀝𑁆𑀞𑀺. 𑀅𑀲𑁆𑀲𑀸𑀤𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀢𑀺𑀁𑀲𑀸𑀬 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀓𑀢𑀺 𑀪𑀯𑀤𑀺𑀝𑁆𑀞𑀺𑀬𑁄, 𑀓𑀢𑀺 𑀯𑀺𑀪𑀯𑀤𑀺𑀝𑁆𑀞𑀺𑀬𑁄? 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀓𑀢𑀺 𑀪𑀯𑀤𑀺𑀝𑁆𑀞𑀺𑀬𑁄 𑀓𑀢𑀺 𑀯𑀺𑀪𑀯𑀤𑀺𑀝𑁆𑀞𑀺𑀬𑁄…𑀧𑁂… 𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 𑀅𑀝𑁆𑀞𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀓𑀢𑀺 𑀪𑀯𑀤𑀺𑀝𑁆𑀞𑀺𑀬𑁄 𑀓𑀢𑀺 𑀯𑀺𑀪𑀯𑀤𑀺𑀝𑁆𑀞𑀺𑀬𑁄?

𑀅𑀲𑁆𑀲𑀸𑀤𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀢𑀺𑀁𑀲𑀸𑀬 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀺𑀬𑀸 𑀪𑀯𑀤𑀺𑀝𑁆𑀞𑀺𑀬𑁄, 𑀲𑀺𑀬𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀧𑀦𑁆𑀦𑀭𑀲 𑀪𑀯𑀤𑀺𑀝𑁆𑀞𑀺𑀬𑁄, 𑀧𑀜𑁆𑀘 𑀯𑀺𑀪𑀯𑀤𑀺𑀝𑁆𑀞𑀺𑀬𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀤𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀩𑁆𑀩𑀸𑀯 𑀢𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀧𑀦𑁆𑀦𑀭𑀲 𑀪𑀯𑀤𑀺𑀝𑁆𑀞𑀺𑀬𑁄, 𑀧𑀜𑁆𑀘 𑀯𑀺𑀪𑀯𑀤𑀺𑀝𑁆𑀞𑀺𑀬𑁄. 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸𑀬 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀧𑀦𑁆𑀦𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀩𑁆𑀩𑀸𑀯 𑀢𑀸 𑀪𑀯𑀤𑀺𑀝𑁆𑀞𑀺𑀬𑁄. 𑀲𑀓𑁆𑀓𑀸𑀬𑀯𑀢𑁆𑀣𑀼𑀓𑀸𑀬 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀩𑁆𑀩𑀸𑀯 𑀢𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄.

‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀩𑁆𑀩𑀸𑀯 𑀢𑀸 𑀪𑀯𑀤𑀺𑀝𑁆𑀞𑀺𑀬𑁄. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀩𑁆𑀩𑀸𑀯 𑀢𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄. ‘‘𑀅𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀺𑀬𑀸 𑀪𑀯𑀤𑀺𑀝𑁆𑀞𑀺𑀬𑁄, 𑀲𑀺𑀬𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄. ‘‘𑀅𑀦𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀺𑀬𑀸 𑀪𑀯𑀤𑀺𑀝𑁆𑀞𑀺𑀬𑁄, 𑀲𑀺𑀬𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄. ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀩𑁆𑀩𑀸𑀯 𑀢𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄. ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀩𑁆𑀩𑀸𑀯 𑀢𑀸 𑀪𑀯𑀤𑀺𑀝𑁆𑀞𑀺𑀬𑁄. ‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀩𑁆𑀩𑀸𑀯 𑀢𑀸 𑀪𑀯𑀤𑀺𑀝𑁆𑀞𑀺𑀬𑁄. ‘‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀩𑁆𑀩𑀸𑀯 𑀢𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄. ‘‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀺𑀬𑀸 𑀪𑀯𑀤𑀺𑀝𑁆𑀞𑀺𑀬𑁄, 𑀲𑀺𑀬𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄 ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑁋 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀺𑀬𑀸 𑀪𑀯𑀤𑀺𑀝𑁆𑀞𑀺𑀬𑁄, 𑀲𑀺𑀬𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄.

𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀺𑀬𑀸 𑀪𑀯𑀤𑀺𑀝𑁆𑀞𑀺𑀬𑁄, 𑀲𑀺𑀬𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄. 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀘𑀢𑀼𑀘𑀢𑁆𑀢𑀸𑀭𑀻𑀲𑀸𑀬 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀺𑀬𑀸 𑀪𑀯𑀤𑀺𑀝𑁆𑀞𑀺𑀬𑁄, 𑀲𑀺𑀬𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄. 𑀲𑀜𑁆𑀜𑁄𑀚𑀦𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀺𑀬𑀸 𑀪𑀯𑀤𑀺𑀝𑁆𑀞𑀺𑀬𑁄, 𑀲𑀺𑀬𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄. 𑀅𑀳𑀦𑁆𑀢𑀺 𑁋 𑀫𑀸𑀦𑀯𑀺𑀦𑀺𑀩𑀦𑁆𑀥𑀸𑀬 𑀤𑀺𑀝𑁆𑀞𑀺𑀬𑀸 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀩𑁆𑀩𑀸𑀯 𑀢𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄. 𑀫𑀫𑀦𑁆𑀢𑀺 𑁋 𑀫𑀸𑀦𑀯𑀺𑀦𑀺𑀩𑀦𑁆𑀥𑀸𑀬 𑀤𑀺𑀝𑁆𑀞𑀺𑀬𑀸 𑀅𑀝𑁆𑀞𑀸𑀭𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀩𑁆𑀩𑀸𑀯 𑀢𑀸 𑀪𑀯𑀤𑀺𑀝𑁆𑀞𑀺𑀬𑁄. 𑀅𑀢𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀧𑀦𑁆𑀦𑀭𑀲 𑀪𑀯𑀤𑀺𑀝𑁆𑀞𑀺𑀬𑁄, 𑀧𑀜𑁆𑀘 𑀯𑀺𑀪𑀯𑀤𑀺𑀝𑁆𑀞𑀺𑀬𑁄. 𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 𑀅𑀝𑁆𑀞𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀦𑀺𑀯𑁂𑀲𑁄 𑀲𑀺𑀬𑀸 𑀪𑀯𑀤𑀺𑀝𑁆𑀞𑀺𑀬𑁄, 𑀲𑀺𑀬𑀸 𑀯𑀺𑀪𑀯𑀤𑀺𑀝𑁆𑀞𑀺𑀬𑁄.

𑀲𑀩𑁆𑀩𑀸𑀯 𑀢𑀸 𑀤𑀺𑀝𑁆𑀞𑀺𑀬𑁄 𑀅𑀲𑁆𑀲𑀸𑀤𑀤𑀺𑀝𑁆𑀞𑀺𑀬𑁄. 𑀲𑀩𑁆𑀩𑀸𑀯 𑀢𑀸 𑀤𑀺𑀝𑁆𑀞𑀺𑀬𑁄 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑁄. 𑀲𑀩𑁆𑀩𑀸𑀯 𑀢𑀸 𑀤𑀺𑀝𑁆𑀞𑀺𑀬𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄. 𑀲𑀩𑁆𑀩𑀸𑀯 𑀢𑀸 𑀤𑀺𑀝𑁆𑀞𑀺𑀬𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑁄. 𑀲𑀩𑁆𑀩𑀸𑀯 𑀢𑀸 𑀤𑀺𑀝𑁆𑀞𑀺𑀬𑁄 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺𑀬𑁄. 𑀲𑀩𑁆𑀩𑀸𑀯 𑀢𑀸 𑀤𑀺𑀝𑁆𑀞𑀺𑀬𑁄 𑀲𑀜𑁆𑀜𑁄𑀚𑀦𑀺𑀓𑀸 𑀤𑀺𑀝𑁆𑀞𑀺𑀬𑁄. 𑀲𑀩𑁆𑀩𑀸𑀯 𑀢𑀸 𑀤𑀺𑀝𑁆𑀞𑀺𑀬𑁄 𑀅𑀢𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑀺𑀝𑁆𑀞𑀺𑀬𑁄.

𑀪𑀯𑀜𑁆𑀘 𑀤𑀺𑀝𑁆𑀞𑀺𑀁 𑀯𑀺𑀪𑀯𑀜𑁆𑀘 𑀤𑀺𑀝𑁆𑀞𑀺𑀁, 𑀏𑀢𑀁 𑀤𑁆𑀯𑀬𑀁 𑀢𑀓𑁆𑀓𑀺𑀓𑀸 𑀦𑀺𑀲𑁆𑀲𑀺𑀢𑀸𑀲𑁂;

𑀢𑁂𑀲𑀁 𑀦𑀺𑀭𑁄𑀥𑀫𑁆𑀳𑀺 𑀦 𑀳𑀢𑁆𑀣𑀺 𑀜𑀸𑀡𑀁, 𑀬𑀢𑁆𑀣𑀸𑀬𑀁 𑀮𑁄𑀓𑁄 𑀯𑀺𑀧𑀭𑀻𑀢𑀲𑀜𑁆𑀜𑀻𑀢𑀺.

𑁧𑁪𑁯. ‘‘𑀤𑁆𑀯𑀻𑀳𑀺, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀕𑀢𑁂𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑀸 𑀤𑁂𑀯𑀫𑀦𑀼𑀲𑁆𑀲𑀸 𑀑𑀮𑀻𑀬𑀦𑁆𑀢𑀺 [𑀑𑀮𑀺𑀬𑀦𑁆𑀢𑀺 (𑀲𑁆𑀬𑀸. 𑀓.) 𑀇𑀢𑀺𑀯𑀼. 𑁪𑁯 𑀧𑀲𑁆𑀲𑀺𑀢𑀩𑁆𑀩𑀸] 𑀏𑀓𑁂, 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂; 𑀘𑀓𑁆𑀔𑀼𑀫𑀦𑁆𑀢𑁄 𑀘 𑀧𑀲𑁆𑀲𑀦𑁆𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀑𑀮𑀻𑀬𑀦𑁆𑀢𑀺 𑀏𑀓𑁂? 𑀪𑀯𑀸𑀭𑀸𑀫𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀫𑀦𑀼𑀲𑁆𑀲𑀸 𑀪𑀯𑀭𑀢𑀸 𑀪𑀯𑀲𑀫𑁆𑀫𑀼𑀤𑀺𑀢𑀸. 𑀢𑁂𑀲𑀁 𑀪𑀯𑀦𑀺𑀭𑁄𑀥𑀸𑀬 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦 𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀑𑀮𑀻𑀬𑀦𑁆𑀢𑀺 𑀏𑀓𑁂.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂? 𑀪𑀯𑁂𑀦𑁂𑀯 𑀔𑁄 𑀧𑀦𑁂𑀓𑁂 𑀅𑀝𑁆𑀝𑀻𑀬𑀫𑀸𑀦𑀸 [𑀅𑀝𑁆𑀝𑀺𑀬𑀫𑀸𑀦𑀸 (𑀲𑁆𑀬𑀸. 𑀓.) 𑀇𑀢𑀺𑀯𑀼. 𑁪𑁯 𑀧𑀲𑁆𑀲𑀺𑀢𑀩𑁆𑀩𑀸] 𑀳𑀭𑀸𑀬𑀫𑀸𑀦𑀸 𑀚𑀺𑀕𑀼𑀘𑁆𑀙𑀫𑀸𑀦𑀸 𑀯𑀺𑀪𑀯𑀁 𑀅𑀪𑀺𑀦𑀦𑁆𑀤𑀦𑁆𑀢𑀺 𑁋 ‘‘𑀬𑀢𑁄 𑀓𑀺𑀭, 𑀪𑁄, 𑀅𑀬𑀁 𑀅𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀁 𑀏𑀢𑀁 𑀬𑀸𑀣𑀸𑀯𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀫𑀦𑁆𑀢𑁄 𑀘 𑀧𑀲𑁆𑀲𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀽𑀢𑀁 𑀪𑀽𑀢𑀢𑁄 𑀧𑀲𑁆𑀲𑀢𑀺. 𑀪𑀽𑀢𑀁 𑀪𑀽𑀢𑀢𑁄 𑀤𑀺𑀲𑁆𑀯𑀸 𑀪𑀽𑀢𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀫𑀦𑁆𑀢𑁄 𑀘 𑀧𑀲𑁆𑀲𑀦𑁆𑀢𑀺.

‘‘𑀬𑁄 [𑀅𑀬𑀁 𑀕𑀸𑀣𑀸 𑀇𑀢𑀺𑀯𑀼. 𑁪𑁯 𑀤𑀺𑀲𑁆𑀲𑀢𑀺] 𑀪𑀽𑀢𑀁 𑀪𑀽𑀢𑀢𑁄 𑀤𑀺𑀲𑁆𑀯𑀸, 𑀪𑀽𑀢𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀬𑀣𑀸𑀪𑀽𑀢𑁂𑀥𑀺𑀫𑀼𑀘𑁆𑀘𑀢𑀺, 𑀪𑀯𑀢𑀡𑁆𑀳𑀸 𑀧𑀭𑀺𑀓𑁆𑀔𑀬𑀸.

‘‘𑀲 𑀯𑁂 𑀪𑀽𑀢𑀧𑀭𑀺𑀜𑁆𑀜𑀸𑀢𑁄, 𑀯𑀻𑀢𑀢𑀡𑁆𑀳𑁄 𑀪𑀯𑀸𑀪𑀯𑁂;

𑀪𑀽𑀢𑀲𑁆𑀲 𑀯𑀺𑀪𑀯𑀸 𑀪𑀺𑀓𑁆𑀔𑀼, 𑀦𑀸𑀕𑀘𑁆𑀙𑀢𑀺 𑀧𑀼𑀦𑀩𑁆𑀪𑀯’’𑀦𑁆𑀢𑀺.

𑁧𑁫𑁦. 𑀢𑀬𑁄 𑀧𑀼𑀕𑁆𑀕𑀮𑀸 𑀯𑀺𑀧𑀦𑁆𑀦𑀤𑀺𑀝𑁆𑀞𑀻, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀫𑁆𑀧𑀦𑁆𑀦𑀤𑀺𑀝𑁆𑀞𑀻. 𑀓𑀢𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀯𑀺𑀧𑀦𑁆𑀦𑀤𑀺𑀝𑁆𑀞𑀻? 𑀢𑀺𑀢𑁆𑀣𑀺𑀬𑁄 𑀘, 𑀢𑀺𑀢𑁆𑀣𑀺𑀬𑀲𑀸𑀯𑀓𑁄 𑀘, 𑀬𑁄 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑁋 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀯𑀺𑀧𑀦𑁆𑀦𑀤𑀺𑀝𑁆𑀞𑀻.

𑀓𑀢𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀫𑁆𑀧𑀦𑁆𑀦𑀤𑀺𑀝𑁆𑀞𑀻? 𑀢𑀣𑀸𑀕𑀢𑁄 𑀘, 𑀢𑀣𑀸𑀕𑀢𑀲𑀸𑀯𑀓𑁄 𑀘, 𑀬𑁄 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑁋 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀫𑁆𑀧𑀦𑁆𑀦𑀤𑀺𑀝𑁆𑀞𑀻.

‘‘𑀓𑁄𑀥𑀦𑁄 𑀉𑀧𑀦𑀸𑀳𑀻 𑀘, 𑀧𑀸𑀧𑀫𑀓𑁆𑀔𑀻 𑀘 𑀬𑁄 𑀦𑀭𑁄;

𑀯𑀺𑀧𑀦𑁆𑀦𑀤𑀺𑀝𑁆𑀞𑀺 𑀫𑀸𑀬𑀸𑀯𑀻, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺’’ [𑀇𑀫𑁂 (𑀲𑁆𑀬𑀸.) 𑀲𑀼. 𑀦𑀺. 𑁧𑁧𑁬 𑀧𑀲𑁆𑀲𑀺𑀢𑀩𑁆𑀩𑀸].

𑀅𑀓𑁆𑀓𑁄𑀥𑀦𑁄 𑀅𑀦𑀼𑀧𑀦𑀸𑀳𑀻, 𑀯𑀺𑀲𑀼𑀤𑁆𑀥𑁄 [𑀅𑀫𑀓𑁆𑀔𑀻 (𑀲𑁆𑀬𑀸.) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀲𑀼𑀤𑁆𑀥𑀢𑀁 𑀕𑀢𑁄;

𑀲𑀫𑁆𑀧𑀦𑁆𑀦𑀤𑀺𑀝𑁆𑀞𑀺 𑀫𑁂𑀥𑀸𑀯𑀻, 𑀢𑀁 𑀚𑀜𑁆𑀜𑀸 𑀅𑀭𑀺𑀬𑁄 𑀇𑀢𑀻𑀢𑀺.

𑀢𑀺𑀲𑁆𑀲𑁄 𑀯𑀺𑀧𑀦𑁆𑀦𑀤𑀺𑀝𑁆𑀞𑀺𑀬𑁄, 𑀢𑀺𑀲𑁆𑀲𑁄 𑀲𑀫𑁆𑀧𑀦𑁆𑀦𑀤𑀺𑀝𑁆𑀞𑀺𑀬𑁄. 𑀓𑀢𑀫𑀸 𑀢𑀺𑀲𑁆𑀲𑁄 𑀯𑀺𑀧𑀦𑁆𑀦𑀤𑀺𑀝𑁆𑀞𑀺𑀬𑁄? 𑀏𑀢𑀁 𑀫𑀫𑀸𑀢𑀺 𑁋 𑀯𑀺𑀧𑀦𑁆𑀦𑀤𑀺𑀝𑁆𑀞𑀺. 𑀏𑀲𑁄𑀳𑀫𑀲𑁆𑀫𑀻𑀢𑀺 𑁋 𑀯𑀺𑀧𑀦𑁆𑀦𑀤𑀺𑀝𑁆𑀞𑀺. 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀯𑀺𑀧𑀦𑁆𑀦𑀤𑀺𑀝𑁆𑀞𑀺. 𑀇𑀫𑀸 𑀢𑀺𑀲𑁆𑀲𑁄 𑀯𑀺𑀧𑀦𑁆𑀦𑀤𑀺𑀝𑁆𑀞𑀺𑀬𑁄.

𑀓𑀢𑀫𑀸 𑀢𑀺𑀲𑁆𑀲𑁄 𑀲𑀫𑁆𑀧𑀦𑁆𑀦𑀤𑀺𑀝𑁆𑀞𑀺𑀬𑁄? 𑀦𑁂𑀢𑀁 𑀫𑀫𑀸𑀢𑀺 𑁋 𑀲𑀫𑁆𑀧𑀦𑁆𑀦𑀤𑀺𑀝𑁆𑀞𑀺. 𑀦𑁂𑀲𑁄𑀳𑀫𑀲𑁆𑀫𑀻𑀢𑀺 𑁋 𑀲𑀫𑁆𑀧𑀦𑁆𑀦𑀤𑀺𑀝𑁆𑀞𑀺. 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺 𑁋 𑀲𑀫𑁆𑀧𑀦𑁆𑀦𑀤𑀺𑀝𑁆𑀞𑀺. 𑀇𑀫𑀸 𑀢𑀺𑀲𑁆𑀲𑁄 𑀲𑀫𑁆𑀧𑀦𑁆𑀦𑀤𑀺𑀝𑁆𑀞𑀺𑀬𑁄.

𑀏𑀢𑀁 𑀫𑀫𑀸𑀢𑀺 𑁋 𑀓𑀸 𑀤𑀺𑀝𑁆𑀞𑀺, 𑀓𑀢𑀺 𑀤𑀺𑀝𑁆𑀞𑀺𑀬𑁄, 𑀓𑀢𑀫𑀦𑁆𑀢𑀸𑀦𑀼𑀕𑁆𑀕𑀳𑀺𑀢𑀸 𑀢𑀸 𑀤𑀺𑀝𑁆𑀞𑀺𑀬𑁄? 𑀏𑀲𑁄𑀳𑀫𑀲𑁆𑀫𑀻𑀢𑀺 𑁋 𑀓𑀸 𑀤𑀺𑀝𑁆𑀞𑀺, 𑀓𑀢𑀺 𑀤𑀺𑀝𑁆𑀞𑀺𑀬𑁄, 𑀓𑀢𑀫𑀦𑁆𑀢𑀸𑀦𑀼𑀕𑁆𑀕𑀳𑀺𑀢𑀸 𑀢𑀸 𑀤𑀺𑀝𑁆𑀞𑀺𑀬𑁄? 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀓𑀸 𑀤𑀺𑀝𑁆𑀞𑀺, 𑀓𑀢𑀺 𑀤𑀺𑀝𑁆𑀞𑀺𑀬𑁄, 𑀓𑀢𑀫𑀦𑁆𑀢𑀸𑀦𑀼𑀕𑁆𑀕𑀳𑀺𑀢𑀸 𑀢𑀸 𑀤𑀺𑀝𑁆𑀞𑀺𑀬𑁄?

𑀏𑀢𑀁 𑀫𑀫𑀸𑀢𑀺 𑁋 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀝𑁆𑀞𑀸𑀭𑀲 𑀤𑀺𑀝𑁆𑀞𑀺𑀬𑁄. 𑀧𑀼𑀩𑁆𑀩𑀦𑁆𑀢𑀸𑀦𑀼𑀕𑁆𑀕𑀳𑀺𑀢𑀸 𑀢𑀸 𑀤𑀺𑀝𑁆𑀞𑀺𑀬𑁄. 𑀏𑀲𑁄𑀳𑀫𑀲𑁆𑀫𑀻𑀢𑀺 𑁋 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺. 𑀘𑀢𑀼𑀘𑀢𑁆𑀢𑀸𑀭𑀻𑀲𑀁 𑀤𑀺𑀝𑁆𑀞𑀺𑀬𑁄. 𑀅𑀧𑀭𑀦𑁆𑀢𑀸𑀦𑀼𑀕𑁆𑀕𑀳𑀺𑀢𑀸 𑀢𑀸 𑀤𑀺𑀝𑁆𑀞𑀺𑀬𑁄. 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑁋 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑁆𑀧𑀫𑀼𑀔𑀸𑀦𑀺 [𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑁆𑀧𑀫𑀼𑀔𑁂𑀦 (𑀲𑁆𑀬𑀸.)] 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀸𑀦𑀼𑀕𑁆𑀕𑀳𑀺𑀢𑀸 𑀢𑀸 𑀤𑀺𑀝𑁆𑀞𑀺𑀬𑁄.

𑁧𑁫𑁧. ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀫𑀬𑀺 𑀦𑀺𑀝𑁆𑀞𑀁 𑀕𑀢𑀸, 𑀲𑀩𑁆𑀩𑁂 𑀢𑁂 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀸. 𑀢𑁂𑀲𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸, 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸. 𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸? 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀲𑁆𑀲, 𑀓𑁄𑀮𑀁𑀓𑁄𑀮𑀲𑁆𑀲, 𑀏𑀓𑀩𑀻𑀚𑀺𑀲𑁆𑀲, 𑀲𑀓𑀤𑀸𑀕𑀸𑀫𑀺𑀲𑁆𑀲, 𑀬𑁄 𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀭𑀳𑀸 𑁋 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸.

‘‘𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸? 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀉𑀤𑁆𑀥𑀁𑀲𑁄𑀢𑀲𑁆𑀲, 𑀅𑀓𑀦𑀺𑀝𑁆𑀞𑀕𑀸𑀫𑀺𑀦𑁄 𑁋 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸.

‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀫𑀬𑀺 𑀦𑀺𑀝𑁆𑀞𑀁 𑀕𑀢𑀸, 𑀲𑀩𑁆𑀩𑁂 𑀢𑁂 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀸. 𑀢𑁂𑀲𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀸𑀦𑀁 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸, 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸.

‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀫𑀬𑀺 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀸, 𑀲𑀩𑁆𑀩𑁂 𑀢𑁂 𑀲𑁄𑀢𑀸𑀧𑀦𑁆𑀦𑀸. 𑀢𑁂𑀲𑀁 𑀲𑁄𑀢𑀸𑀧𑀦𑁆𑀦𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸, 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸. 𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸? 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀲𑁆𑀲, 𑀓𑁄𑀮𑀁𑀓𑁄𑀮𑀲𑁆𑀲, 𑀏𑀓𑀩𑀻𑀚𑀺𑀲𑁆𑀲, 𑀲𑀓𑀤𑀸𑀕𑀸𑀫𑀺𑀲𑁆𑀲, 𑀬𑁄 𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀭𑀳𑀸 𑁋 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸.

‘‘𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸? 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀉𑀤𑁆𑀥𑀁𑀲𑁄𑀢𑀲𑁆𑀲, 𑀅𑀓𑀦𑀺𑀝𑁆𑀞𑀕𑀸𑀫𑀺𑀦𑁄 𑁋 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸.

‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀫𑀬𑀺 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀸, 𑀲𑀩𑁆𑀩𑁂 𑀢𑁂 𑀲𑁄𑀢𑀸𑀧𑀦𑁆𑀦𑀸. 𑀢𑁂𑀲𑀁 𑀲𑁄𑀢𑀸𑀧𑀦𑁆𑀦𑀸𑀦𑀁 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸. 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸𑀢𑀺’’.

𑀪𑀯𑀯𑀺𑀪𑀯𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄 𑀲𑁄𑀴𑀲𑀫𑁄.

𑀤𑀺𑀝𑁆𑀞𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.