𑁧𑁦. 𑀫𑀡𑁆𑀟𑀧𑁂𑀬𑁆𑀬𑀓𑀣𑀸

𑁨𑁩𑁮. ‘‘𑀫𑀡𑁆𑀟𑀧𑁂𑀬𑁆𑀬𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀲𑀢𑁆𑀣𑀸 𑀲𑀫𑁆𑀫𑀼𑀔𑀻𑀪𑀽𑀢𑁄 𑀢𑀺𑀥𑀢𑁆𑀢𑀫𑀡𑁆𑀟𑁄 [𑀢𑀺𑀯𑀺𑀥𑁄 𑀫𑀡𑁆𑀟𑁄 (𑀩𑀳𑀽𑀲𑀼) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸]. 𑀲𑀢𑁆𑀣𑀭𑀺 𑀲𑀫𑁆𑀫𑀼𑀔𑀻𑀪𑀽𑀢𑁂 𑀤𑁂𑀲𑀦𑀸𑀫𑀡𑁆𑀟𑁄, 𑀧𑀝𑀺𑀕𑁆𑀕𑀳𑀫𑀡𑁆𑀟𑁄, 𑀩𑁆𑀭𑀳𑁆𑀫𑀘𑀭𑀺𑀬𑀫𑀡𑁆𑀟𑁄’’.

𑀓𑀢𑀫𑁄 𑀤𑁂𑀲𑀦𑀸𑀫𑀡𑁆𑀟𑁄? 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀆𑀘𑀺𑀓𑁆𑀔𑀦𑀸 𑀤𑁂𑀲𑀦𑀸 𑀧𑀜𑁆𑀜𑀸𑀧𑀦𑀸 𑀧𑀝𑁆𑀞𑀧𑀦𑀸 𑀯𑀺𑀯𑀭𑀡𑀸 𑀯𑀺𑀪𑀚𑀦𑀸 𑀉𑀢𑁆𑀢𑀸𑀦𑀻𑀓𑀫𑁆𑀫𑀁 [𑀉𑀢𑁆𑀢𑀸𑀦𑀺𑀓𑀫𑁆𑀫𑀁 (𑀓.)], 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁…𑀧𑁂… 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁… 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁… 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁… 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁… 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁… 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀆𑀘𑀺𑀓𑁆𑀔𑀦𑀸 𑀤𑁂𑀲𑀦𑀸 𑀧𑀜𑁆𑀜𑀸𑀧𑀦𑀸 𑀧𑀝𑁆𑀞𑀧𑀦𑀸 𑀯𑀺𑀯𑀭𑀡𑀸 𑀯𑀺𑀪𑀚𑀦𑀸 𑀉𑀢𑁆𑀢𑀸𑀦𑀻𑀓𑀫𑁆𑀫𑀁 𑁋 𑀅𑀬𑀁 𑀤𑁂𑀲𑀦𑀸𑀫𑀡𑁆𑀟𑁄.

𑀓𑀢𑀫𑁄 𑀧𑀝𑀺𑀕𑁆𑀕𑀳𑀫𑀡𑁆𑀟𑁄? 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀯𑀺𑀜𑁆𑀜𑀸𑀢𑀸𑀭𑁄 𑁋 𑀅𑀬𑀁 𑀧𑀝𑀺𑀕𑁆𑀕𑀳𑀫𑀡𑁆𑀟𑁄.

𑀓𑀢𑀫𑁄 𑀩𑁆𑀭𑀳𑁆𑀫𑀘𑀭𑀺𑀬𑀫𑀡𑁆𑀟𑁄? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺 𑁋 𑀅𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀫𑀡𑁆𑀟𑁄.

𑁨𑁩𑁯. 𑀅𑀥𑀺𑀫𑁄𑀓𑁆𑀔𑀫𑀡𑁆𑀟𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀅𑀲𑁆𑀲𑀤𑁆𑀥𑀺𑀬𑀁 𑀓𑀲𑀝𑁄; 𑀅𑀲𑁆𑀲𑀤𑁆𑀥𑀺𑀬𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑁄𑀓𑁆𑀔𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀧𑀕𑁆𑀕𑀳𑀫𑀡𑁆𑀟𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀓𑁄𑀲𑀚𑁆𑀚𑀁 𑀓𑀲𑀝𑁄; 𑀓𑁄𑀲𑀚𑁆𑀚𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀕𑁆𑀕𑀳𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀉𑀧𑀝𑁆𑀞𑀸𑀦𑀫𑀡𑁆𑀟𑁄 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀧𑀫𑀸𑀤𑁄 𑀓𑀲𑀝𑁄; 𑀧𑀫𑀸𑀤𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀝𑁆𑀞𑀸𑀦𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀅𑀯𑀺𑀓𑁆𑀔𑁂𑀧𑀫𑀡𑁆𑀟𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀉𑀤𑁆𑀥𑀘𑁆𑀘𑀁 𑀓𑀲𑀝𑁄; 𑀉𑀤𑁆𑀥𑀘𑁆𑀘𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀯𑀺𑀓𑁆𑀔𑁂𑀧𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀤𑀲𑁆𑀲𑀦𑀫𑀡𑁆𑀟𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀅𑀯𑀺𑀚𑁆𑀚𑀁 𑀓𑀲𑀝𑁄; 𑀅𑀯𑀺𑀚𑁆𑀚𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀲𑁆𑀲𑀦𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁.

𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀲𑀤𑁆𑀥𑀸𑀩𑀮𑀁, 𑀅𑀲𑁆𑀲𑀤𑁆𑀥𑀺𑀬𑀁 𑀓𑀲𑀝𑁄; 𑀅𑀲𑁆𑀲𑀤𑁆𑀥𑀺𑀬𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀤𑁆𑀥𑀸𑀩𑀮𑀲𑁆𑀲 𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀓𑁄𑀲𑀚𑁆𑀚𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀯𑀻𑀭𑀺𑀬𑀩𑀮𑀁, 𑀓𑁄𑀲𑀚𑁆𑀚𑀁 𑀓𑀲𑀝𑁄; 𑀓𑁄𑀲𑀚𑁆𑀚𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀯𑀻𑀭𑀺𑀬𑀩𑀮𑀲𑁆𑀲 𑀓𑁄𑀲𑀚𑁆𑀚𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀧𑀫𑀸𑀤𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀲𑀢𑀺𑀩𑀮𑀁, 𑀧𑀫𑀸𑀤𑁄 𑀓𑀲𑀝𑁄; 𑀧𑀫𑀸𑀤𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀢𑀺𑀩𑀮𑀲𑁆𑀲 𑀧𑀫𑀸𑀤𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀉𑀤𑁆𑀥𑀘𑁆𑀘𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀲𑀫𑀸𑀥𑀺𑀩𑀮𑀁, 𑀉𑀤𑁆𑀥𑀘𑁆𑀘𑀁 𑀓𑀲𑀝𑁄; 𑀉𑀤𑁆𑀥𑀘𑁆𑀘𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀫𑀸𑀥𑀺𑀩𑀮𑀲𑁆𑀲 𑀉𑀤𑁆𑀥𑀘𑁆𑀘𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀅𑀯𑀺𑀚𑁆𑀚𑀸𑀬 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀧𑀜𑁆𑀜𑀸𑀩𑀮𑀁, 𑀅𑀯𑀺𑀚𑁆𑀚𑀸 𑀓𑀲𑀝𑁄; 𑀅𑀯𑀺𑀚𑁆𑀚𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀧𑀜𑁆𑀜𑀸𑀩𑀮𑀲𑁆𑀲 𑀅𑀯𑀺𑀚𑁆𑀚𑀸𑀬 𑀅𑀓𑀫𑁆𑀧𑀺𑀬𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁.

𑀉𑀧𑀝𑁆𑀞𑀸𑀦𑀫𑀡𑁆𑀟𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸, 𑀧𑀫𑀸𑀤𑁄 𑀓𑀲𑀝𑁄; 𑀧𑀫𑀸𑀤𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑀝𑁆𑀞𑀸𑀦𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀧𑀯𑀺𑀘𑀬𑀫𑀡𑁆𑀟𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀅𑀯𑀺𑀚𑁆𑀚𑀸 𑀓𑀲𑀝𑁄; 𑀅𑀯𑀺𑀚𑁆𑀚𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀧𑀯𑀺𑀘𑀬𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀧𑀕𑁆𑀕𑀳𑀫𑀡𑁆𑀟𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀓𑁄𑀲𑀚𑁆𑀚𑀁 𑀓𑀲𑀝𑁄; 𑀓𑁄𑀲𑀚𑁆𑀚𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀧𑀕𑁆𑀕𑀳𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀨𑀭𑀡𑀫𑀡𑁆𑀟𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀭𑀺𑀴𑀸𑀳𑁄 𑀓𑀲𑀝𑁄; 𑀧𑀭𑀺𑀴𑀸𑀳𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀨𑀭𑀡𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀉𑀧𑀲𑀫𑀫𑀡𑁆𑀟𑁄 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀤𑀼𑀝𑁆𑀞𑀼𑀮𑁆𑀮𑀁 𑀓𑀲𑀝𑁄; 𑀤𑀼𑀝𑁆𑀞𑀼𑀮𑁆𑀮𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑀲𑀫𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀅𑀯𑀺𑀓𑁆𑀔𑁂𑀧𑀫𑀡𑁆𑀟𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀉𑀤𑁆𑀥𑀘𑁆𑀘𑀁 𑀓𑀲𑀝𑁄; 𑀉𑀤𑁆𑀥𑀘𑁆𑀘𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀅𑀯𑀺𑀓𑁆𑀔𑁂𑀧𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀧𑀝𑀺𑀲𑀗𑁆𑀔𑀸𑀦𑀫𑀡𑁆𑀟𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀅𑀧𑁆𑀧𑀝𑀺𑀲𑀗𑁆𑀔𑀸 𑀓𑀲𑀝𑁄; 𑀅𑀧𑁆𑀧𑀝𑀺𑀲𑀗𑁆𑀔𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀧𑀝𑀺𑀲𑀗𑁆𑀔𑀸𑀦𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁.

𑀤𑀲𑁆𑀲𑀦𑀫𑀡𑁆𑀟𑁄 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀓𑀲𑀝𑁄; 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀤𑀲𑁆𑀲𑀦𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀅𑀪𑀺𑀦𑀺𑀭𑁄𑀧𑀦𑀫𑀡𑁆𑀟𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀓𑀲𑀝𑁄; 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀧𑀭𑀺𑀕𑁆𑀕𑀳𑀫𑀡𑁆𑀟𑁄 𑀲𑀫𑁆𑀫𑀸𑀯𑀸𑀘𑀸, 𑀫𑀺𑀘𑁆𑀙𑀸𑀯𑀸𑀘𑀸 𑀓𑀲𑀝𑁄; 𑀫𑀺𑀘𑁆𑀙𑀸𑀯𑀸𑀘𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀫𑁆𑀫𑀸𑀯𑀸𑀘𑀸𑀬 𑀧𑀭𑀺𑀕𑁆𑀕𑀳𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀲𑀫𑀼𑀝𑁆𑀞𑀸𑀦𑀫𑀡𑁆𑀟𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀓𑀲𑀝𑁄; 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀲𑀫𑀼𑀝𑁆𑀞𑀸𑀦𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀯𑁄𑀤𑀸𑀦𑀫𑀡𑁆𑀟𑁄 𑀲𑀫𑁆𑀫𑀸𑀆𑀚𑀻𑀯𑁄, 𑀫𑀺𑀘𑁆𑀙𑀸𑀆𑀚𑀻𑀯𑁄 𑀓𑀲𑀝𑁄; 𑀫𑀺𑀘𑁆𑀙𑀸𑀆𑀚𑀻𑀯𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀯𑁄𑀤𑀸𑀦𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀧𑀕𑁆𑀕𑀳𑀫𑀡𑁆𑀟𑁄 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀓𑀲𑀝𑁄; 𑀫𑀺𑀘𑁆𑀙𑀸𑀯𑀸𑀬𑀸𑀫𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀧𑀕𑁆𑀕𑀳𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀉𑀧𑀝𑁆𑀞𑀸𑀦𑀫𑀡𑁆𑀟𑁄 𑀲𑀫𑁆𑀫𑀸𑀲𑀢𑀺, 𑀫𑀺𑀘𑁆𑀙𑀸𑀲𑀢𑀺 𑀓𑀲𑀝𑁄; 𑀫𑀺𑀘𑁆𑀙𑀸𑀲𑀢𑀺𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀫𑁆𑀫𑀸𑀲𑀢𑀺𑀬𑀸 𑀉𑀧𑀝𑁆𑀞𑀸𑀦𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁. 𑀅𑀯𑀺𑀓𑁆𑀔𑁂𑀧𑀫𑀡𑁆𑀟𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀫𑀺𑀘𑁆𑀙𑀸𑀲𑀫𑀸𑀥𑀺 𑀓𑀲𑀝𑁄; 𑀫𑀺𑀘𑁆𑀙𑀸𑀲𑀫𑀸𑀥𑀺𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀅𑀯𑀺𑀓𑁆𑀔𑁂𑀧𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑁋 𑀫𑀡𑁆𑀟𑀧𑁂𑀬𑁆𑀬𑀁.

𑁨𑁪𑁦. 𑀅𑀢𑁆𑀣𑀺 𑀫𑀡𑁆𑀟𑁄, 𑀅𑀢𑁆𑀣𑀺 𑀧𑁂𑀬𑁆𑀬𑀁, 𑀅𑀢𑁆𑀣𑀺 𑀓𑀲𑀝𑁄. 𑀅𑀥𑀺𑀫𑁄𑀓𑁆𑀔𑀫𑀡𑁆𑀟𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀅𑀲𑁆𑀲𑀤𑁆𑀥𑀺𑀬𑀁 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀧𑀕𑁆𑀕𑀳𑀫𑀡𑁆𑀟𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀓𑁄𑀲𑀚𑁆𑀚𑀁 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀉𑀧𑀝𑁆𑀞𑀸𑀦𑀫𑀡𑁆𑀟𑁄 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀧𑀫𑀸𑀤𑁄 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀅𑀯𑀺𑀓𑁆𑀔𑁂𑀧𑀫𑀡𑁆𑀟𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀉𑀤𑁆𑀥𑀘𑁆𑀘𑀁 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀤𑀲𑁆𑀲𑀦𑀫𑀡𑁆𑀟𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀅𑀯𑀺𑀚𑁆𑀚𑀸 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁.

𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀲𑀤𑁆𑀥𑀸𑀩𑀮𑀁, 𑀅𑀲𑁆𑀲𑀤𑁆𑀥𑀺𑀬𑀁 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀓𑁄𑀲𑀚𑁆𑀚𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀯𑀻𑀭𑀺𑀬𑀩𑀮𑀁, 𑀓𑁄𑀲𑀚𑁆𑀚𑀁 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀧𑀫𑀸𑀤𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀲𑀢𑀺𑀩𑀮𑀁, 𑀧𑀫𑀸𑀤𑁄 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀉𑀤𑁆𑀥𑀘𑁆𑀘𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀲𑀫𑀸𑀥𑀺𑀩𑀮𑀁, 𑀉𑀤𑁆𑀥𑀘𑁆𑀘𑀁 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀅𑀯𑀺𑀚𑁆𑀚𑀸𑀬 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀧𑀜𑁆𑀜𑀸𑀩𑀮𑀁, 𑀅𑀯𑀺𑀚𑁆𑀚𑀸 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁.

𑀉𑀧𑀝𑁆𑀞𑀸𑀦𑀫𑀡𑁆𑀟𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀫𑀸𑀤𑁄 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀧𑀯𑀺𑀘𑀬𑀫𑀡𑁆𑀟𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀅𑀯𑀺𑀚𑁆𑀚𑀸 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀧𑀕𑁆𑀕𑀳𑀫𑀡𑁆𑀟𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀓𑁄𑀲𑀚𑁆𑀚𑀁 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀨𑀭𑀡𑀫𑀡𑁆𑀟𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀭𑀺𑀴𑀸𑀳𑁄 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀉𑀧𑀲𑀫𑀫𑀡𑁆𑀟𑁄 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀤𑀼𑀝𑁆𑀞𑀼𑀮𑁆𑀮𑀁 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀅𑀯𑀺𑀓𑁆𑀔𑁂𑀧𑀫𑀡𑁆𑀟𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀉𑀤𑁆𑀥𑀘𑁆𑀘𑀁 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀧𑀝𑀺𑀲𑀗𑁆𑀔𑀸𑀦𑀫𑀡𑁆𑀟𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀅𑀧𑀝𑀺𑀲𑀗𑁆𑀔𑀸 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁.

𑀤𑀲𑁆𑀲𑀦𑀫𑀡𑁆𑀟𑁄 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀅𑀪𑀺𑀦𑀺𑀭𑁄𑀧𑀦𑀫𑀡𑁆𑀟𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀧𑀭𑀺𑀕𑁆𑀕𑀳𑀫𑀡𑁆𑀟𑁄 𑀲𑀫𑁆𑀫𑀸𑀯𑀸𑀘𑀸, 𑀫𑀺𑀘𑁆𑀙𑀸𑀯𑀸𑀘𑀸 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀲𑀫𑀼𑀝𑁆𑀞𑀸𑀦𑀫𑀡𑁆𑀟𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀯𑁄𑀤𑀸𑀦𑀫𑀡𑁆𑀟𑁄 𑀲𑀫𑁆𑀫𑀸𑀆𑀚𑀻𑀯𑁄, 𑀫𑀺𑀘𑁆𑀙𑀸𑀆𑀚𑀻𑀯𑁄 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀧𑀕𑁆𑀕𑀳𑀫𑀡𑁆𑀟𑁄 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀉𑀧𑀝𑁆𑀞𑀸𑀦𑀫𑀡𑁆𑀟𑁄 𑀲𑀫𑁆𑀫𑀸𑀲𑀢𑀺, 𑀫𑀺𑀘𑁆𑀙𑀸𑀲𑀢𑀺 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁. 𑀅𑀯𑀺𑀓𑁆𑀔𑁂𑀧𑀫𑀡𑁆𑀟𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀫𑀺𑀘𑁆𑀙𑀸𑀲𑀫𑀸𑀥𑀺 𑀓𑀲𑀝𑁄; 𑀬𑁄 𑀢𑀢𑁆𑀣 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀇𑀤𑀁 𑀧𑁂𑀬𑁆𑀬𑀁.

𑀤𑀲𑁆𑀲𑀦𑀫𑀡𑁆𑀟𑁄 𑀲𑀫𑁆𑀫𑀸𑀤𑀺𑀝𑁆𑀞𑀺… 𑀅𑀪𑀺𑀦𑀺𑀭𑁄𑀧𑀦𑀫𑀡𑁆𑀟𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄… 𑀧𑀭𑀺𑀕𑁆𑀕𑀳𑀫𑀡𑁆𑀟𑁄 𑀲𑀫𑁆𑀫𑀸𑀯𑀸𑀘𑀸… 𑀲𑀫𑀼𑀝𑁆𑀞𑀸𑀦𑀫𑀡𑁆𑀟𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄… 𑀯𑁄𑀤𑀸𑀦𑀫𑀡𑁆𑀟𑁄 𑀲𑀫𑁆𑀫𑀸𑀆𑀚𑀻𑀯𑁄… 𑀧𑀕𑁆𑀕𑀳𑀫𑀡𑁆𑀟𑁄 𑀲𑀫𑁆𑀫𑀸𑀯𑀸𑀬𑀸𑀫𑁄… 𑀉𑀧𑀝𑁆𑀞𑀸𑀦𑀫𑀡𑁆𑀟𑁄 𑀲𑀫𑁆𑀫𑀸𑀲𑀢𑀺… 𑀅𑀯𑀺𑀓𑁆𑀔𑁂𑀧𑀫𑀡𑁆𑀟𑁄 𑀲𑀫𑁆𑀫𑀸𑀲𑀫𑀸𑀥𑀺.

𑀉𑀧𑀝𑁆𑀞𑀸𑀦𑀫𑀡𑁆𑀟𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄… 𑀧𑀯𑀺𑀘𑀬𑀫𑀡𑁆𑀟𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄… 𑀧𑀕𑁆𑀕𑀳𑀫𑀡𑁆𑀟𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄… 𑀨𑀭𑀡𑀫𑀡𑁆𑀟𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄… 𑀉𑀧𑀲𑀫𑀫𑀡𑁆𑀟𑁄 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄… 𑀅𑀯𑀺𑀓𑁆𑀔𑁂𑀧𑀫𑀡𑁆𑀟𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄… 𑀧𑀝𑀺𑀲𑀗𑁆𑀔𑀸𑀦𑀫𑀡𑁆𑀟𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄.

𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀲𑀤𑁆𑀥𑀸𑀩𑀮𑀁… 𑀓𑁄𑀲𑀚𑁆𑀚𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀯𑀻𑀭𑀺𑀬𑀩𑀮𑀁… 𑀧𑀫𑀸𑀤𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀲𑀢𑀺𑀩𑀮𑀁… 𑀉𑀤𑁆𑀥𑀘𑁆𑀘𑁂 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀲𑀫𑀸𑀥𑀺𑀩𑀮𑀁… 𑀅𑀯𑀺𑀚𑁆𑀚𑀸𑀬 𑀅𑀓𑀫𑁆𑀧𑀺𑀬𑀫𑀡𑁆𑀟𑁄 𑀧𑀜𑁆𑀜𑀸𑀩𑀮𑀁.

𑀅𑀥𑀺𑀫𑁄𑀓𑁆𑀔𑀫𑀡𑁆𑀟𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁… 𑀧𑀕𑁆𑀕𑀳𑀫𑀡𑁆𑀟𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁… 𑀉𑀧𑀝𑁆𑀞𑀸𑀦𑀫𑀡𑁆𑀟𑁄 𑀲𑀢𑀺𑀦𑁆𑀤𑁆𑀭𑀺𑀬𑀁… 𑀅𑀯𑀺𑀓𑁆𑀔𑁂𑀧𑀫𑀡𑁆𑀟𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁… 𑀤𑀲𑁆𑀲𑀦𑀫𑀡𑁆𑀟𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁.

𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀸 𑀫𑀡𑁆𑀟𑁄, 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀸 𑀫𑀡𑁆𑀟𑁄, 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸 𑀫𑀡𑁆𑀟𑁄, 𑀳𑁂𑀢𑀼𑀝𑁆𑀞𑁂𑀦 𑀫𑀕𑁆𑀕𑁄 𑀫𑀡𑁆𑀟𑁄, 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀢𑀺𑀧𑀝𑁆𑀞𑀸𑀦𑀸 𑀫𑀡𑁆𑀟𑁄, 𑀧𑀤𑀳𑀦𑀝𑁆𑀞𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀸 𑀫𑀡𑁆𑀟𑁄, 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺𑀧𑀸𑀤𑀸 𑀫𑀡𑁆𑀟𑁄, 𑀢𑀣𑀝𑁆𑀞𑁂𑀦 𑀲𑀘𑁆𑀘𑀸 𑀫𑀡𑁆𑀟𑁄, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑀣𑁄 𑀫𑀡𑁆𑀟𑁄, 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀫𑀡𑁆𑀟𑁄, 𑀏𑀓𑀭𑀲𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀫𑀡𑁆𑀟𑁄, 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀬𑀼𑀕𑀦𑀤𑁆𑀥𑀸 𑀫𑀡𑁆𑀟𑁄, 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀯𑀺𑀲𑀼𑀤𑁆𑀥𑀺 𑀫𑀡𑁆𑀟𑁄, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀫𑀡𑁆𑀟𑁄, 𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀫𑀡𑁆𑀟𑁄, 𑀫𑀼𑀢𑁆𑀢𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑁄 𑀫𑀡𑁆𑀟𑁄, 𑀧𑀝𑀺𑀯𑁂𑀥𑀝𑁆𑀞𑁂𑀦 𑀯𑀺𑀚𑁆𑀚𑀸 𑀫𑀡𑁆𑀟𑁄, 𑀧𑀭𑀺𑀘𑁆𑀘𑀸𑀕𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺 𑀫𑀡𑁆𑀟𑁄, 𑀲𑀫𑀼𑀘𑁆𑀙𑁂𑀤𑀝𑁆𑀞𑁂𑀦 𑀔𑀬𑁂 𑀜𑀸𑀡𑀁 𑀫𑀡𑁆𑀟𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀝𑁆𑀞𑁂𑀦 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁 𑀫𑀡𑁆𑀟𑁄, 𑀙𑀦𑁆𑀤𑁄 𑀫𑀽𑀮𑀝𑁆𑀞𑁂𑀦 𑀫𑀡𑁆𑀟𑁄, 𑀫𑀦𑀲𑀺𑀓𑀸𑀭𑁄 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑀫𑀡𑁆𑀟𑁄, 𑀨𑀲𑁆𑀲𑁄 𑀲𑀫𑁄𑀥𑀸𑀦𑀝𑁆𑀞𑁂𑀦 𑀫𑀡𑁆𑀟𑁄, 𑀯𑁂𑀤𑀦𑀸 𑀲𑀫𑁄𑀲𑀭𑀡𑀝𑁆𑀞𑁂𑀦 𑀫𑀡𑁆𑀟𑁄, 𑀲𑀫𑀸𑀥𑀺 𑀧𑀫𑀼𑀔𑀝𑁆𑀞𑁂𑀦 𑀫𑀡𑁆𑀟𑁄, 𑀲𑀢𑀺 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀫𑀡𑁆𑀟𑁄, 𑀧𑀜𑁆𑀜𑀸 𑀢𑀢𑀼𑀢𑁆𑀢𑀭𑀝𑁆𑀞𑁂𑀦 𑀫𑀡𑁆𑀟𑁄, 𑀯𑀺𑀫𑀼𑀢𑁆𑀢𑀺 𑀲𑀸𑀭𑀝𑁆𑀞𑁂𑀦 𑀫𑀡𑁆𑀟𑁄, 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀫𑀡𑁆𑀟𑁄𑀢𑀺.

𑀘𑀢𑀼𑀢𑁆𑀣𑀪𑀸𑀡𑀯𑀸𑀭𑁄.

𑀫𑀡𑁆𑀟𑀧𑁂𑀬𑁆𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑁄 𑀧𑀞𑀫𑁄.