𑁯. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀦𑀺𑀤𑁆𑀤𑁂𑀲𑁄

𑁫𑁪. 𑀓𑀣𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 [𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 (𑀓.)] 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁? 𑀉𑀧𑁆𑀧𑀸𑀤𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 [𑀉𑀧𑁆𑀧𑀸𑀤𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸… (𑀲𑁆𑀬𑀸.)] 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁, 𑀧𑀯𑀢𑁆𑀢𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁, 𑀦𑀺𑀫𑀺𑀢𑁆𑀢𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸…𑀧𑁂… 𑀆𑀬𑀽𑀳𑀦𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸… 𑀧𑀝𑀺𑀲𑀦𑁆𑀥𑀺𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸… 𑀕𑀢𑀺𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸… 𑀦𑀺𑀩𑁆𑀩𑀢𑁆𑀢𑀺𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸… 𑀉𑀧𑀧𑀢𑁆𑀢𑀺𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸… 𑀚𑀸𑀢𑀺𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸… 𑀚𑀭𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸… 𑀩𑁆𑀬𑀸𑀥𑀺𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸… 𑀫𑀭𑀡𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸… 𑀲𑁄𑀓𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸… 𑀧𑀭𑀺𑀤𑁂𑀯𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸…𑀧𑁂… 𑀉𑀧𑀸𑀬𑀸𑀲𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁.

𑀉𑀧𑁆𑀧𑀸𑀤𑁄 𑀤𑀼𑀓𑁆𑀔𑀦𑁆𑀢𑀺 𑁋 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀧𑀯𑀢𑁆𑀢𑀁 𑀤𑀼𑀓𑁆𑀔𑀦𑁆𑀢𑀺 𑁋 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁…𑀧𑁂… 𑀉𑀧𑀸𑀬𑀸𑀲𑁄 𑀤𑀼𑀓𑁆𑀔𑀦𑁆𑀢𑀺 𑁋 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁.

𑀉𑀧𑁆𑀧𑀸𑀤𑁄 𑀪𑀬𑀦𑁆𑀢𑀺 𑁋 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀧𑀯𑀢𑁆𑀢𑀁 𑀪𑀬𑀦𑁆𑀢𑀺 𑁋 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁…𑀧𑁂… 𑀉𑀧𑀸𑀬𑀸𑀲𑁄 𑀪𑀬𑀦𑁆𑀢𑀺 𑁋 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁.

𑀉𑀧𑁆𑀧𑀸𑀤𑁄 𑀲𑀸𑀫𑀺𑀲𑀦𑁆𑀢𑀺 𑁋 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀧𑀯𑀢𑁆𑀢𑀁 𑀲𑀸𑀫𑀺𑀲𑀦𑁆𑀢𑀺 𑁋 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁…𑀧𑁂… 𑀉𑀧𑀸𑀬𑀸𑀲𑁄 𑀲𑀸𑀫𑀺𑀲𑀦𑁆𑀢𑀺 𑁋 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁.

𑀉𑀧𑁆𑀧𑀸𑀤𑁄 𑀲𑀗𑁆𑀔𑀸𑀭𑀸𑀢𑀺 𑁋 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀧𑀯𑀢𑁆𑀢𑀁 𑀲𑀗𑁆𑀔𑀸𑀭𑀸𑀢𑀺 𑁋 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁…𑀧𑁂… 𑀉𑀧𑀸𑀬𑀸𑀲𑁄 𑀲𑀗𑁆𑀔𑀸𑀭𑀸𑀢𑀺 𑁋 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁.

𑀉𑀧𑁆𑀧𑀸𑀤𑁄 𑀲𑀗𑁆𑀔𑀸𑀭𑀸, 𑀢𑁂 𑀲𑀗𑁆𑀔𑀸𑀭𑁂 𑀅𑀚𑁆𑀛𑀼𑀧𑁂𑀓𑁆𑀔𑀢𑀻𑀢𑀺 𑁋 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸. 𑀬𑁂 𑀘 𑀲𑀗𑁆𑀔𑀸𑀭𑀸 𑀬𑀸 𑀘 𑀉𑀧𑁂𑀓𑁆𑀔𑀸 𑀉𑀪𑁄𑀧𑁂𑀢𑁂 𑀲𑀗𑁆𑀔𑀸𑀭𑀸, 𑀢𑁂 𑀲𑀗𑁆𑀔𑀸𑀭𑁂 𑀅𑀚𑁆𑀛𑀼𑀧𑁂𑀓𑁆𑀔𑀢𑀻𑀢𑀺 𑁋 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸. 𑀧𑀯𑀢𑁆𑀢𑀁 𑀲𑀗𑁆𑀔𑀸𑀭𑀸…𑀧𑁂… 𑀦𑀺𑀫𑀺𑀢𑁆𑀢𑀁 𑀲𑀗𑁆𑀔𑀸𑀭𑀸… 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸… 𑀧𑀝𑀺𑀲𑀦𑁆𑀥𑀺 𑀲𑀗𑁆𑀔𑀸𑀭𑀸… 𑀕𑀢𑀺 𑀲𑀗𑁆𑀔𑀸𑀭𑀸… 𑀦𑀺𑀩𑁆𑀩𑀢𑁆𑀢𑀺 𑀲𑀗𑁆𑀔𑀸𑀭𑀸… 𑀉𑀧𑀧𑀢𑁆𑀢𑀺 𑀲𑀗𑁆𑀔𑀸𑀭𑀸… 𑀚𑀸𑀢𑀺 𑀲𑀗𑁆𑀔𑀸𑀭𑀸… 𑀚𑀭𑀸 𑀲𑀗𑁆𑀔𑀸𑀭𑀸… 𑀩𑁆𑀬𑀸𑀥𑀺 𑀲𑀗𑁆𑀔𑀸𑀭𑀸… 𑀫𑀭𑀡𑀁 𑀲𑀗𑁆𑀔𑀸𑀭𑀸… 𑀲𑁄𑀓𑁄 𑀲𑀗𑁆𑀔𑀸𑀭𑀸… 𑀧𑀭𑀺𑀤𑁂𑀯𑁄 𑀲𑀗𑁆𑀔𑀸𑀭𑀸…𑀧𑁂… 𑀉𑀧𑀸𑀬𑀸𑀲𑁄 𑀲𑀗𑁆𑀔𑀸𑀭𑀸, 𑀢𑁂 𑀲𑀗𑁆𑀔𑀸𑀭𑁂 𑀅𑀚𑁆𑀛𑀼𑀧𑁂𑀓𑁆𑀔𑀢𑀻𑀢𑀺 𑁋 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸. 𑀬𑁂 𑀘 𑀲𑀗𑁆𑀔𑀸𑀭𑀸 𑀬𑀸 𑀘 𑀉𑀧𑁂𑀓𑁆𑀔𑀸 𑀉𑀪𑁄𑀧𑁂𑀢𑁂 𑀲𑀗𑁆𑀔𑀸𑀭𑀸, 𑀢𑁂 𑀲𑀗𑁆𑀔𑀸𑀭𑁂 𑀅𑀚𑁆𑀛𑀼𑀧𑁂𑀓𑁆𑀔𑀢𑀻𑀢𑀺 𑁋 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸.

𑁫𑁫. 𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺? 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺? 𑀲𑁂𑀓𑁆𑀔𑀲𑁆𑀲 𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺? 𑀯𑀻𑀢𑀭𑀸𑀕𑀲𑁆𑀲 𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺? 𑀧𑀼𑀣𑀼𑀚𑁆𑀚𑀦𑀲𑁆𑀲 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺. 𑀲𑁂𑀓𑁆𑀔𑀲𑁆𑀲 𑀢𑀻𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺. 𑀯𑀻𑀢𑀭𑀸𑀕𑀲𑁆𑀲 𑀢𑀻𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺.

𑀧𑀼𑀣𑀼𑀚𑁆𑀚𑀦𑀲𑁆𑀲 𑀓𑀢𑀫𑁂𑀳𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺? 𑀧𑀼𑀣𑀼𑀚𑁆𑀚𑀦𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺 𑀯𑀸 𑀯𑀺𑀧𑀲𑁆𑀲𑀢𑀺 𑀯𑀸. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀇𑀫𑁂𑀳𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺. 𑀲𑁂𑀓𑁆𑀔𑀲𑁆𑀲 𑀓𑀢𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺? 𑀲𑁂𑀓𑁆𑀔𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺 𑀯𑀸 𑀯𑀺𑀧𑀲𑁆𑀲𑀢𑀺 𑀯𑀸 𑀧𑀝𑀺𑀲𑀗𑁆𑀔𑀸𑀬 𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺. 𑀲𑁂𑀓𑁆𑀔𑀲𑁆𑀲 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺. 𑀯𑀻𑀢𑀭𑀸𑀕𑀲𑁆𑀲 𑀓𑀢𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺? 𑀯𑀻𑀢𑀭𑀸𑀕𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀯𑀺𑀧𑀲𑁆𑀲𑀢𑀺 𑀯𑀸 𑀧𑀝𑀺𑀲𑀗𑁆𑀔𑀸𑀬 𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀤𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀲𑀼𑀜𑁆𑀜𑀢𑀯𑀺𑀳𑀸𑀭𑁂𑀦 𑀯𑀸 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑁂𑀦 𑀯𑀸 𑀅𑀧𑁆𑀧𑀡𑀺𑀳𑀺𑀢𑀯𑀺𑀳𑀸𑀭𑁂𑀦 𑀯𑀸 𑀯𑀺𑀳𑀭𑀢𑀺. 𑀯𑀻𑀢𑀭𑀸𑀕𑀲𑁆𑀲 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺.

𑁫𑁬. 𑀓𑀣𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘 𑀲𑁂𑀓𑁆𑀔𑀲𑁆𑀲 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀏𑀓𑀢𑁆𑀢𑀁 𑀳𑁄𑀢𑀺? 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑁄 𑀘𑀺𑀢𑁆𑀢𑀁 𑀓𑀺𑀮𑀺𑀲𑁆𑀲𑀢𑀺, 𑀪𑀸𑀯𑀦𑀸𑀬 𑀧𑀭𑀺𑀧𑀦𑁆𑀣𑁄 𑀳𑁄𑀢𑀺, 𑀧𑀝𑀺𑀯𑁂𑀥𑀲𑁆𑀲 𑀅𑀦𑁆𑀢𑀭𑀸𑀬𑁄 𑀳𑁄𑀢𑀺, 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑁂𑀓𑁆𑀔𑀲𑁆𑀲𑀧𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑁄 𑀘𑀺𑀢𑁆𑀢𑀁 𑀓𑀺𑀮𑀺𑀲𑁆𑀲𑀢𑀺, 𑀪𑀸𑀯𑀦𑀸𑀬 𑀧𑀭𑀺𑀧𑀦𑁆𑀣𑁄 𑀳𑁄𑀢𑀺, 𑀉𑀢𑁆𑀢𑀭𑀺𑀧𑀝𑀺𑀯𑁂𑀥𑀲𑁆𑀲 𑀅𑀦𑁆𑀢𑀭𑀸𑀬𑁄 𑀳𑁄𑀢𑀺, 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘 𑀲𑁂𑀓𑁆𑀔𑀲𑁆𑀲 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀏𑀓𑀢𑁆𑀢𑀁 𑀳𑁄𑀢𑀺 𑀅𑀪𑀺𑀦𑀦𑁆𑀤𑀝𑁆𑀞𑁂𑀦.

𑀓𑀣𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘 𑀲𑁂𑀓𑁆𑀔𑀲𑁆𑀲 𑀘 𑀯𑀻𑀢𑀭𑀸𑀕𑀲𑁆𑀲 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀏𑀓𑀢𑁆𑀢𑀁 𑀳𑁄𑀢𑀺? 𑀧𑀼𑀣𑀼𑀚𑁆𑀚𑀦𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀅𑀦𑀺𑀘𑁆𑀘𑀢𑁄𑀧𑀺 𑀤𑀼𑀓𑁆𑀔𑀢𑁄𑀧𑀺 𑀅𑀦𑀢𑁆𑀢𑀢𑁄𑀧𑀺 𑀯𑀺𑀧𑀲𑁆𑀲𑀢𑀺. 𑀲𑁂𑀓𑁆𑀔𑁄𑀧𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀅𑀦𑀺𑀘𑁆𑀘𑀢𑁄𑀧𑀺 𑀤𑀼𑀓𑁆𑀔𑀢𑁄𑀧𑀺 𑀅𑀦𑀢𑁆𑀢𑀢𑁄𑀧𑀺 𑀯𑀺𑀧𑀲𑁆𑀲𑀢𑀺. 𑀯𑀻𑀢𑀭𑀸𑀕𑁄𑀧𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀅𑀦𑀺𑀘𑁆𑀘𑀢𑁄𑀧𑀺 𑀤𑀼𑀓𑁆𑀔𑀢𑁄𑀧𑀺 𑀅𑀦𑀢𑁆𑀢𑀢𑁄𑀧𑀺 𑀯𑀺𑀧𑀲𑁆𑀲𑀢𑀺. 𑀏𑀯𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘 𑀲𑁂𑀓𑁆𑀔𑀲𑁆𑀲 𑀘 𑀯𑀻𑀢𑀭𑀸𑀕𑀲𑁆𑀲 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀏𑀓𑀢𑁆𑀢𑀁 𑀳𑁄𑀢𑀺 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦.

𑀓𑀣𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘 𑀲𑁂𑀓𑁆𑀔𑀲𑁆𑀲 𑀘 𑀯𑀻𑀢𑀭𑀸𑀕𑀲𑁆𑀲 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀦𑀸𑀦𑀢𑁆𑀢𑀁 𑀳𑁄𑀢𑀺? 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀓𑀼𑀲𑀮𑀸 𑀳𑁄𑀢𑀺. 𑀲𑁂𑀓𑁆𑀔𑀲𑁆𑀲𑀧𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀓𑀼𑀲𑀮𑀸 𑀳𑁄𑀢𑀺. 𑀯𑀻𑀢𑀭𑀸𑀕𑀲𑁆𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀅𑀩𑁆𑀬𑀸𑀓𑀢𑀸 𑀳𑁄𑀢𑀺. 𑀏𑀯𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘 𑀲𑁂𑀓𑁆𑀔𑀲𑁆𑀲 𑀘 𑀯𑀻𑀢𑀭𑀸𑀕𑀲𑁆𑀲 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀦𑀸𑀦𑀢𑁆𑀢𑀁 𑀳𑁄𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀝𑁆𑀞𑁂𑀦.

𑀓𑀣𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘 𑀲𑁂𑀓𑁆𑀔𑀲𑁆𑀲 𑀘 𑀯𑀻𑀢𑀭𑀸𑀕𑀲𑁆𑀲 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀦𑀸𑀦𑀢𑁆𑀢𑀁 𑀳𑁄𑀢𑀺? 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀓𑀺𑀜𑁆𑀘𑀺𑀓𑀸𑀮𑁂 𑀲𑀼𑀯𑀺𑀤𑀺𑀢𑀸 𑀳𑁄𑀢𑀺, 𑀓𑀺𑀜𑁆𑀘𑀺𑀓𑀸𑀮𑁂 𑀦 𑀲𑀼𑀯𑀺𑀤𑀺𑀢𑀸 𑀳𑁄𑀢𑀺. 𑀲𑁂𑀓𑁆𑀔𑀲𑁆𑀲𑀧𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀓𑀺𑀜𑁆𑀘𑀺𑀓𑀸𑀮𑁂 𑀲𑀼𑀯𑀺𑀤𑀺𑀢𑀸 𑀳𑁄𑀢𑀺, 𑀓𑀺𑀜𑁆𑀘𑀺𑀓𑀸𑀮𑁂 𑀦 𑀲𑀼𑀯𑀺𑀤𑀺𑀢𑀸 𑀳𑁄𑀢𑀺. 𑀯𑀻𑀢𑀭𑀸𑀕𑀲𑁆𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀅𑀘𑁆𑀘𑀦𑁆𑀢𑀁 𑀲𑀼𑀯𑀺𑀤𑀺𑀢𑀸 𑀳𑁄𑀢𑀺. 𑀏𑀯𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘 𑀲𑁂𑀓𑁆𑀔𑀲𑁆𑀲 𑀘 𑀯𑀻𑀢𑀭𑀸𑀕𑀲𑁆𑀲 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀦𑀸𑀦𑀢𑁆𑀢𑀁 𑀳𑁄𑀢𑀺 𑀯𑀺𑀤𑀺𑀢𑀝𑁆𑀞𑁂𑀦 𑀘 𑀅𑀯𑀺𑀤𑀺𑀢𑀝𑁆𑀞𑁂𑀦 𑀘.

𑀓𑀣𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘 𑀲𑁂𑀓𑁆𑀔𑀲𑁆𑀲 𑀘 𑀯𑀻𑀢𑀭𑀸𑀕𑀲𑁆𑀲 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀦𑀸𑀦𑀢𑁆𑀢𑀁 𑀳𑁄𑀢𑀺? 𑀧𑀼𑀣𑀼𑀚𑁆𑀚𑀦𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀅𑀢𑀺𑀢𑁆𑀢𑀢𑁆𑀢𑀸 𑀯𑀺𑀧𑀲𑁆𑀲𑀢𑀺. 𑀲𑁂𑀓𑁆𑀔𑁄𑀧𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀅𑀢𑀺𑀢𑁆𑀢𑀢𑁆𑀢𑀸 𑀯𑀺𑀧𑀲𑁆𑀲𑀢𑀺. 𑀯𑀻𑀢𑀭𑀸𑀕𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀢𑀺𑀢𑁆𑀢𑀢𑁆𑀢𑀸 𑀯𑀺𑀧𑀲𑁆𑀲𑀢𑀺. 𑀏𑀯𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘 𑀲𑁂𑀓𑁆𑀔𑀲𑁆𑀲 𑀘 𑀯𑀻𑀢𑀭𑀸𑀕𑀲𑁆𑀲 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀦𑀸𑀦𑀢𑁆𑀢𑀁 𑀳𑁄𑀢𑀺 𑀢𑀺𑀢𑁆𑀢𑀝𑁆𑀞𑁂𑀦 𑀘 𑀅𑀢𑀺𑀢𑁆𑀢𑀝𑁆𑀞𑁂𑀦 𑀘.

𑀓𑀣𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘 𑀲𑁂𑀓𑁆𑀔𑀲𑁆𑀲 𑀘 𑀯𑀻𑀢𑀭𑀸𑀕𑀲𑁆𑀲 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀦𑀸𑀦𑀢𑁆𑀢𑀁 𑀳𑁄𑀢𑀺? 𑀧𑀼𑀣𑀼𑀚𑁆𑀚𑀦𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀧𑀲𑁆𑀲𑀢𑀺. 𑀲𑁂𑀓𑁆𑀔𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀢𑀺𑀡𑁆𑀡𑀁 𑀲𑀜𑁆𑀜𑁄𑀚𑀦𑀸𑀦𑀁 𑀧𑀳𑀻𑀦𑀢𑁆𑀢𑀸 𑀉𑀢𑁆𑀢𑀭𑀺𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀧𑀲𑁆𑀲𑀢𑀺. 𑀯𑀻𑀢𑀭𑀸𑀕𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀬 𑀯𑀺𑀧𑀲𑁆𑀲𑀢𑀺. 𑀏𑀯𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘 𑀲𑁂𑀓𑁆𑀔𑀲𑁆𑀲 𑀘 𑀯𑀻𑀢𑀭𑀸𑀕𑀲𑁆𑀲 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀦𑀸𑀦𑀢𑁆𑀢𑀁 𑀳𑁄𑀢𑀺 𑀧𑀳𑀻𑀦𑀝𑁆𑀞𑁂𑀦 𑀘 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀘.

𑀓𑀣𑀁 𑀲𑁂𑀓𑁆𑀔𑀲𑁆𑀲 𑀘 𑀯𑀻𑀢𑀭𑀸𑀕𑀲𑁆𑀲 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀦𑀸𑀦𑀢𑁆𑀢𑀁 𑀳𑁄𑀢𑀺? 𑀲𑁂𑀓𑁆𑀔𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺 𑀯𑀸 𑀯𑀺𑀧𑀲𑁆𑀲𑀢𑀺 𑀯𑀸 𑀧𑀝𑀺𑀲𑀗𑁆𑀔𑀸𑀬 𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺. 𑀯𑀻𑀢𑀭𑀸𑀕𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀯𑀺𑀧𑀲𑁆𑀲𑀢𑀺 𑀯𑀸 𑀧𑀝𑀺𑀲𑀗𑁆𑀔𑀸𑀬 𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀤𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀲𑀼𑀜𑁆𑀜𑀢𑀯𑀺𑀳𑀸𑀭𑁂𑀦 𑀯𑀸 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑁂𑀦 𑀯𑀸 𑀅𑀧𑁆𑀧𑀡𑀺𑀳𑀺𑀢𑀯𑀺𑀳𑀸𑀭𑁂𑀦 𑀯𑀸 𑀯𑀺𑀳𑀭𑀢𑀺. 𑀏𑀯𑀁 𑀲𑁂𑀓𑁆𑀔𑀲𑁆𑀲 𑀘 𑀯𑀻𑀢𑀭𑀸𑀕𑀲𑁆𑀲 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄 𑀦𑀸𑀦𑀢𑁆𑀢𑀁 𑀳𑁄𑀢𑀺 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀝𑁆𑀞𑁂𑀦.

𑁫𑁭. 𑀓𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀲𑀫𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀓𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀅𑀝𑁆𑀞 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀲𑀫𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀤𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀓𑀢𑀫𑀸 𑀅𑀝𑁆𑀞 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀲𑀫𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀧𑀞𑀫𑀁 𑀛𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀦𑀻𑀯𑀭𑀡𑁂 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀤𑀼𑀢𑀺𑀬𑀁 𑀛𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀢𑀢𑀺𑀬𑀁 𑀛𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀻𑀢𑀺𑀁 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀲𑀼𑀔𑀤𑀼𑀓𑁆𑀔𑁂 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀭𑀽𑀧𑀲𑀜𑁆𑀜𑀁 𑀧𑀝𑀺𑀖𑀲𑀜𑁆𑀜𑀁 𑀦𑀸𑀦𑀢𑁆𑀢𑀲𑀜𑁆𑀜𑀁 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀇𑀫𑀸 𑀅𑀝𑁆𑀞 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀲𑀫𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀓𑀢𑀫𑀸 𑀤𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁 𑀕𑀢𑀺𑀁 𑀦𑀺𑀩𑁆𑀩𑀢𑁆𑀢𑀺𑀁 𑀉𑀧𑀧𑀢𑁆𑀢𑀺𑀁 𑀚𑀸𑀢𑀺𑀁 𑀚𑀭𑀁 𑀩𑁆𑀬𑀸𑀥𑀺𑀁 𑀫𑀭𑀡𑀁 𑀲𑁄𑀓𑀁 𑀧𑀭𑀺𑀤𑁂𑀯𑀁 𑀉𑀧𑀸𑀬𑀸𑀲𑀁 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁…𑀧𑁂… 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬…𑀧𑁂… 𑀲𑀓𑀤𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬…𑀧𑁂… 𑀅𑀦𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬 …𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁 𑀕𑀢𑀺𑀁 𑀦𑀺𑀩𑁆𑀩𑀢𑁆𑀢𑀺𑀁 𑀉𑀧𑀧𑀢𑁆𑀢𑀺𑀁 𑀚𑀸𑀢𑀺𑀁 𑀚𑀭𑀁 𑀩𑁆𑀬𑀸𑀥𑀺𑀁 𑀫𑀭𑀡𑀁 𑀲𑁄𑀓𑀁 𑀧𑀭𑀺𑀤𑁂𑀯𑀁 𑀉𑀧𑀸𑀬𑀸𑀲𑀁 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬…𑀧𑁂… 𑀲𑀼𑀜𑁆𑀜𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬…𑀧𑁂… 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁…𑀧𑁂… 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁. 𑀇𑀫𑀸 𑀤𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

𑁫𑁮. 𑀓𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀓𑀼𑀲𑀮𑀸, 𑀓𑀢𑀺 𑀅𑀓𑀼𑀲𑀮𑀸, 𑀓𑀢𑀺 𑀅𑀩𑁆𑀬𑀸𑀓𑀢𑀸? 𑀧𑀦𑁆𑀦𑀭𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀓𑀼𑀲𑀮𑀸, 𑀢𑀺𑀲𑁆𑀲𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀅𑀩𑁆𑀬𑀸𑀓𑀢𑀸. 𑀦𑀢𑁆𑀣𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀅𑀓𑀼𑀲𑀮𑀸.

𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸, 𑀅𑀝𑁆𑀞 𑀘𑀺𑀢𑁆𑀢𑀲𑁆𑀲 𑀕𑁄𑀘𑀭𑀸;

𑀧𑀼𑀣𑀼𑀚𑁆𑀚𑀦𑀲𑁆𑀲 𑀤𑁆𑀯𑁂 𑀳𑁄𑀦𑁆𑀢𑀺, 𑀢𑀬𑁄 𑀲𑁂𑀓𑁆𑀔𑀲𑁆𑀲 𑀕𑁄𑀘𑀭𑀸;

𑀢𑀬𑁄 𑀘 𑀯𑀻𑀢𑀭𑀸𑀕𑀲𑁆𑀲, 𑀬𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀝𑁆𑀝𑀢𑀺.

𑀅𑀝𑁆𑀞 𑀲𑀫𑀸𑀥𑀺𑀲𑁆𑀲 𑀧𑀘𑁆𑀘𑀬𑀸, 𑀤𑀲 𑀜𑀸𑀡𑀲𑁆𑀲 𑀕𑁄𑀘𑀭𑀸;

𑀅𑀝𑁆𑀞𑀸𑀭𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸, 𑀢𑀺𑀡𑁆𑀡𑀁 𑀯𑀺𑀫𑁄𑀓𑁆𑀔𑀸𑀦 𑀧𑀘𑁆𑀘𑀬𑀸.

𑀇𑀫𑁂 𑀅𑀝𑁆𑀞𑀸𑀭𑀲𑀸𑀓𑀸𑀭𑀸, 𑀧𑀜𑁆𑀜𑀸 𑀬𑀲𑁆𑀲 𑀧𑀭𑀺𑀘𑁆𑀘𑀺𑀢𑀸;

𑀓𑀼𑀲𑀮𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼, 𑀦𑀸𑀦𑀸𑀤𑀺𑀝𑁆𑀞𑀻𑀲𑀼 𑀦 𑀓𑀫𑁆𑀧𑀢𑀻𑀢𑀺.

𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁’’.

𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀦𑀺𑀤𑁆𑀤𑁂𑀲𑁄 𑀦𑀯𑀫𑁄.