𑁧𑁦. 𑀕𑁄𑀢𑁆𑀭𑀪𑀼𑀜𑀸𑀡𑀦𑀺𑀤𑁆𑀤𑁂𑀲𑁄

𑁫𑁯. 𑀓𑀣𑀁 𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑁂 𑀧𑀜𑁆𑀜𑀸 𑀕𑁄𑀢𑁆𑀭𑀪𑀼𑀜𑀸𑀡𑀁? 𑀉𑀧𑁆𑀧𑀸𑀤𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀧𑀯𑀢𑁆𑀢𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀦𑀺𑀫𑀺𑀢𑁆𑀢𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀆𑀬𑀽𑀳𑀦𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀧𑀝𑀺𑀲𑀦𑁆𑀥𑀺𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀕𑀢𑀺𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀦𑀺𑀩𑁆𑀩𑀢𑁆𑀢𑀺𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀉𑀧𑀧𑀢𑁆𑀢𑀺𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀚𑀸𑀢𑀺𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀚𑀭𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀩𑁆𑀬𑀸𑀥𑀺𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀫𑀭𑀡𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀲𑁄𑀓𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀧𑀭𑀺𑀤𑁂𑀯𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀉𑀧𑀸𑀬𑀸𑀲𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀅𑀦𑀼𑀧𑁆𑀧𑀸𑀤𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀅𑀧𑁆𑀧𑀯𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼…𑀧𑁂… 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼.

𑀉𑀧𑁆𑀧𑀸𑀤𑀁 𑀅𑀪𑀺𑀪𑀼𑀬𑁆𑀬𑀺𑀢𑁆𑀯𑀸 𑀅𑀦𑀼𑀧𑁆𑀧𑀸𑀤𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀧𑀯𑀢𑁆𑀢𑀁 𑀅𑀪𑀺𑀪𑀼𑀬𑁆𑀬𑀺𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀦𑀺𑀫𑀺𑀢𑁆𑀢𑀁 𑀅𑀪𑀺𑀪𑀼𑀬𑁆𑀬𑀺𑀢𑁆𑀯𑀸 𑀅𑀦𑀺𑀫𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼 …𑀧𑁂… 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀅𑀪𑀺𑀪𑀼𑀬𑁆𑀬𑀺𑀢𑁆𑀯𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼.

𑀉𑀧𑁆𑀧𑀸𑀤𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀧𑀯𑀢𑁆𑀢𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀦𑀺𑀫𑀺𑀢𑁆𑀢𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀆𑀬𑀽𑀳𑀦𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀧𑀝𑀺𑀲𑀦𑁆𑀥𑀺𑀬𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀕𑀢𑀺𑀬𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀦𑀺𑀩𑁆𑀩𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀉𑀧𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀚𑀸𑀢𑀺𑀬𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀚𑀭𑀸𑀬 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀩𑁆𑀬𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀫𑀭𑀡𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀲𑁄𑀓𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀧𑀭𑀺𑀤𑁂𑀯𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀉𑀧𑀸𑀬𑀸𑀲𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸 𑀯𑀼𑀝𑁆𑀞𑀸𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀅𑀦𑀼𑀧𑁆𑀧𑀸𑀤𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀅𑀧𑁆𑀧𑀯𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼…𑀧𑁂… 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼.

𑀉𑀧𑁆𑀧𑀸𑀤𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 [𑀯𑀼𑀝𑁆𑀞𑀺𑀢𑁆𑀯𑀸 (𑀲𑁆𑀬𑀸. 𑀓.)] 𑀅𑀦𑀼𑀧𑁆𑀧𑀸𑀤𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀧𑀯𑀢𑁆𑀢𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀦𑀺𑀫𑀺𑀢𑁆𑀢𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀦𑀺𑀫𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀆𑀬𑀽𑀳𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀦𑀸𑀬𑀽𑀳𑀦𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀧𑀝𑀺𑀲𑀦𑁆𑀥𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀕𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀕𑀢𑀺𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀦𑀺𑀩𑁆𑀩𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀦𑀺𑀩𑁆𑀩𑀢𑁆𑀢𑀺𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀉𑀧𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀦𑀼𑀧𑀧𑀢𑁆𑀢𑀺𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀚𑀸𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀚𑀸𑀢𑀺𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀚𑀭𑀸𑀬 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀚𑀭𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀩𑁆𑀬𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀩𑁆𑀬𑀸𑀥𑀺𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀫𑀭𑀡𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀫𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀲𑁄𑀓𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀲𑁄𑀓𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀧𑀭𑀺𑀤𑁂𑀯𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀧𑀭𑀺𑀤𑁂𑀯𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀉𑀧𑀸𑀬𑀸𑀲𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀦𑀼𑀧𑀸𑀬𑀸𑀲𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼.

𑀉𑀧𑁆𑀧𑀸𑀤𑀸 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀧𑀯𑀢𑁆𑀢𑀸 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼…𑀧𑁂… 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀅𑀦𑀼𑀧𑁆𑀧𑀸𑀤𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀅𑀧𑁆𑀧𑀯𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼…𑀧𑁂… 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼.

𑀉𑀧𑁆𑀧𑀸𑀤𑀸 𑀯𑀺𑀯𑀝𑁆𑀝𑀺𑀢𑁆𑀯𑀸 𑀅𑀦𑀼𑀧𑁆𑀧𑀸𑀤𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀧𑀯𑀢𑁆𑀢𑀸 𑀯𑀺𑀯𑀝𑁆𑀝𑀺𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼…𑀧𑁂… 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸 𑀯𑀺𑀯𑀝𑁆𑀝𑀺𑀢𑁆𑀯𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼.

𑁬𑁦. 𑀓𑀢𑀺 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸 𑀲𑀫𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀓𑀢𑀺 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀅𑀝𑁆𑀞 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸 𑀲𑀫𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀤𑀲 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀓𑀢𑀫𑁂 𑀅𑀝𑁆𑀞 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸 𑀲𑀫𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀧𑀞𑀫𑀁 𑀛𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀦𑀻𑀯𑀭𑀡𑁂 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀤𑀼𑀢𑀺𑀬𑀁 𑀛𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀢𑀢𑀺𑀬𑀁 𑀛𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀻𑀢𑀺𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀲𑀼𑀔𑀤𑀼𑀓𑁆𑀔𑁂 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀭𑀽𑀧𑀲𑀜𑁆𑀜𑀁 𑀧𑀝𑀺𑀖𑀲𑀜𑁆𑀜𑀁 𑀦𑀸𑀦𑀢𑁆𑀢𑀲𑀜𑁆𑀜𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀇𑀫𑁂 𑀅𑀝𑁆𑀞 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸 𑀲𑀫𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀓𑀢𑀫𑁂 𑀤𑀲 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁 𑀕𑀢𑀺𑀁 𑀦𑀺𑀩𑁆𑀩𑀢𑁆𑀢𑀺𑀁 𑀉𑀧𑀧𑀢𑁆𑀢𑀺𑀁 𑀚𑀸𑀢𑀺𑀁 𑀚𑀭𑀁 𑀩𑁆𑀬𑀸𑀥𑀺𑀁 𑀫𑀭𑀡𑀁 𑀲𑁄𑀓𑀁 𑀧𑀭𑀺𑀤𑁂𑀯𑀁 𑀉𑀧𑀸𑀬𑀸𑀲𑀁 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁…𑀧𑁂… 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬…𑀧𑁂… 𑀲𑀓𑀤𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬… 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬… 𑀅𑀦𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬… 𑀅𑀭𑀳𑀢𑁆𑀢𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁 𑀕𑀢𑀺𑀁 𑀦𑀺𑀩𑁆𑀩𑀢𑁆𑀢𑀺𑀁 𑀉𑀧𑀧𑀢𑁆𑀢𑀺𑀁 𑀚𑀸𑀢𑀺𑀁 𑀚𑀭𑀁 𑀩𑁆𑀬𑀸𑀥𑀺𑀁 𑀫𑀭𑀡𑀁 𑀲𑁄𑀓𑀁 𑀧𑀭𑀺𑀤𑁂𑀯𑀁 𑀉𑀧𑀸𑀬𑀸𑀲𑀁 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬… 𑀲𑀼𑀜𑁆𑀜𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬… 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁…𑀧𑁂… 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀕𑁄𑀢𑁆𑀭𑀪𑀼. 𑀇𑀫𑁂 𑀤𑀲 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀓𑀢𑀺 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸 𑀓𑀼𑀲𑀮𑀸, 𑀓𑀢𑀺 𑀅𑀓𑀼𑀲𑀮𑀸, 𑀓𑀢𑀺 𑀅𑀩𑁆𑀬𑀸𑀓𑀢𑀸? 𑀧𑀦𑁆𑀦𑀭𑀲 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸 𑀓𑀼𑀲𑀮𑀸, 𑀢𑀬𑁄 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸. 𑀦𑀢𑁆𑀣𑀺 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸 𑀅𑀓𑀼𑀲𑀮𑀸𑀢𑀺.

𑀲𑀸𑀫𑀺𑀲𑀜𑁆𑀘 𑀦𑀺𑀭𑀸𑀫𑀺𑀲𑀁, 𑀧𑀡𑀺𑀳𑀺𑀢𑀜𑁆𑀘 𑀅𑀧𑁆𑀧𑀡𑀺𑀳𑀺𑀢𑀁;

𑀲𑀜𑁆𑀜𑀼𑀢𑁆𑀢𑀜𑁆𑀘 𑀯𑀺𑀲𑀜𑁆𑀜𑀼𑀢𑁆𑀢𑀁, 𑀯𑀼𑀝𑁆𑀞𑀺𑀢𑀜𑁆𑀘 𑀅𑀯𑀼𑀝𑁆𑀞𑀺𑀢𑀁.

𑀅𑀝𑁆𑀞 𑀲𑀫𑀸𑀥𑀺𑀲𑁆𑀲 𑀧𑀘𑁆𑀘𑀬𑀸, 𑀤𑀲 𑀜𑀸𑀡𑀲𑁆𑀲 𑀕𑁄𑀘𑀭𑀸;

𑀅𑀝𑁆𑀞𑀸𑀭𑀲 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸, 𑀢𑀺𑀡𑁆𑀡𑀁 𑀯𑀺𑀫𑁄𑀓𑁆𑀔𑀸𑀦 𑀧𑀘𑁆𑀘𑀬𑀸.

𑀇𑀫𑁂 𑀅𑀝𑁆𑀞𑀸𑀭𑀲𑀸𑀓𑀸𑀭𑀸, 𑀧𑀜𑁆𑀜𑀸 𑀬𑀲𑁆𑀲 𑀧𑀭𑀺𑀘𑁆𑀘𑀺𑀢𑀸;

𑀓𑀼𑀲𑀮𑁄 𑀯𑀺𑀯𑀝𑁆𑀝𑁂 𑀯𑀼𑀝𑁆𑀞𑀸𑀦𑁂, 𑀦𑀸𑀦𑀸𑀤𑀺𑀝𑁆𑀞𑀻𑀲𑀼 𑀦 𑀓𑀫𑁆𑀧𑀢𑀻𑀢𑀺.

𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑁂 𑀧𑀜𑁆𑀜𑀸 𑀕𑁄𑀢𑁆𑀭𑀪𑀼𑀜𑀸𑀡𑀁’’.

𑀕𑁄𑀢𑁆𑀭𑀪𑀼𑀜𑀸𑀡𑀦𑀺𑀤𑁆𑀤𑁂𑀲𑁄 𑀤𑀲𑀫𑁄.