𑁮. 𑀆𑀤𑀻𑀦𑀯𑀜𑀸𑀡𑀦𑀺𑀤𑁆𑀤𑁂𑀲𑁄

𑁫𑁩. 𑀓𑀣𑀁 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁? 𑀉𑀧𑁆𑀧𑀸𑀤𑁄 𑀪𑀬𑀦𑁆𑀢𑀺 𑁋 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁. 𑀧𑀯𑀢𑁆𑀢𑀁 𑀪𑀬𑀦𑁆𑀢𑀺 𑁋 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁. 𑀦𑀺𑀫𑀺𑀢𑁆𑀢𑀁 𑀪𑀬𑀦𑁆𑀢𑀺…𑀧𑁂… 𑀆𑀬𑀽𑀳𑀦𑀸 𑀪𑀬𑀦𑁆𑀢𑀺…𑀧𑁂… 𑀧𑀝𑀺𑀲𑀦𑁆𑀥𑀺 𑀪𑀬𑀦𑁆𑀢𑀺… 𑀕𑀢𑀺 𑀪𑀬𑀦𑁆𑀢𑀺… 𑀦𑀺𑀩𑁆𑀩𑀢𑁆𑀢𑀺 𑀪𑀬𑀦𑁆𑀢𑀺… 𑀉𑀧𑀧𑀢𑁆𑀢𑀺 𑀪𑀬𑀦𑁆𑀢𑀺… 𑀚𑀸𑀢𑀺 𑀪𑀬𑀦𑁆𑀢𑀺… 𑀚𑀭𑀸 𑀪𑀬𑀦𑁆𑀢𑀺… 𑀩𑁆𑀬𑀸𑀥𑀺 𑀪𑀬𑀦𑁆𑀢𑀺 … 𑀫𑀭𑀡𑀁 𑀪𑀬𑀦𑁆𑀢𑀺… 𑀲𑁄𑀓𑁄 𑀪𑀬𑀦𑁆𑀢𑀺… 𑀧𑀭𑀺𑀤𑁂𑀯𑁄 𑀪𑀬𑀦𑁆𑀢𑀺… 𑀉𑀧𑀸𑀬𑀸𑀲𑁄 𑀪𑀬𑀦𑁆𑀢𑀺 𑁋 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁.

𑀅𑀦𑀼𑀧𑁆𑀧𑀸𑀤𑁄 𑀔𑁂𑀫𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀅𑀧𑁆𑀧𑀯𑀢𑁆𑀢𑀁 𑀔𑁂𑀫𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁…𑀧𑁂… 𑀅𑀦𑀼𑀧𑀸𑀬𑀸𑀲𑁄 𑀔𑁂𑀫𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁.

𑀉𑀧𑁆𑀧𑀸𑀤𑁄 𑀪𑀬𑀁, 𑀅𑀦𑀼𑀧𑁆𑀧𑀸𑀤𑁄 𑀔𑁂𑀫𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀧𑀯𑀢𑁆𑀢𑀁 𑀪𑀬𑀁, 𑀅𑀧𑁆𑀧𑀯𑀢𑁆𑀢𑀁 𑀔𑁂𑀫𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁…𑀧𑁂… 𑀉𑀧𑀸𑀬𑀸𑀲𑁄 𑀪𑀬𑀁, 𑀅𑀦𑀼𑀧𑀸𑀬𑀸𑀲𑁄 𑀔𑁂𑀫𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁.

𑀉𑀧𑁆𑀧𑀸𑀤𑁄 𑀤𑀼𑀓𑁆𑀔𑀦𑁆𑀢𑀺 𑁋 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁. 𑀧𑀯𑀢𑁆𑀢𑀁 𑀤𑀼𑀓𑁆𑀔𑀦𑁆𑀢𑀺 𑁋 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁…𑀧𑁂… 𑀉𑀧𑀸𑀬𑀸𑀲𑁄 𑀤𑀼𑀓𑁆𑀔𑀦𑁆𑀢𑀺 𑁋 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁.

𑀅𑀦𑀼𑀧𑁆𑀧𑀸𑀤𑁄 𑀲𑀼𑀔𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀅𑀧𑁆𑀧𑀯𑀢𑁆𑀢𑀁 𑀲𑀼𑀔𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁…𑀧𑁂… 𑀅𑀦𑀼𑀧𑀸𑀬𑀸𑀲𑁄 𑀲𑀼𑀔𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁.

𑀉𑀧𑁆𑀧𑀸𑀤𑁄 𑀤𑀼𑀓𑁆𑀔𑀁, 𑀅𑀦𑀼𑀧𑁆𑀧𑀸𑀤𑁄 𑀲𑀼𑀔𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀧𑀯𑀢𑁆𑀢𑀁 𑀤𑀼𑀓𑁆𑀔𑀁, 𑀅𑀧𑁆𑀧𑀯𑀢𑁆𑀢𑀁 𑀲𑀼𑀔𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁…𑀧𑁂… 𑀉𑀧𑀸𑀬𑀸𑀲𑁄 𑀤𑀼𑀓𑁆𑀔𑀁, 𑀅𑀦𑀼𑀧𑀸𑀬𑀸𑀲𑁄 𑀲𑀼𑀔𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁.

𑀉𑀧𑁆𑀧𑀸𑀤𑁄 𑀲𑀸𑀫𑀺𑀲𑀦𑁆𑀢𑀺 𑁋 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁. 𑀧𑀯𑀢𑁆𑀢𑀁 𑀲𑀸𑀫𑀺𑀲𑀦𑁆𑀢𑀺 𑁋 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁…𑀧𑁂… 𑀉𑀧𑀸𑀬𑀸𑀲𑁄 𑀲𑀸𑀫𑀺𑀲𑀦𑁆𑀢𑀺 𑁋 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁.

𑀅𑀦𑀼𑀧𑁆𑀧𑀸𑀤𑁄 𑀦𑀺𑀭𑀸𑀫𑀺𑀲𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀅𑀧𑁆𑀧𑀯𑀢𑁆𑀢𑀁 𑀦𑀺𑀭𑀸𑀫𑀺𑀲𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁…𑀧𑁂… 𑀅𑀦𑀼𑀧𑀸𑀬𑀸𑀲𑁄 𑀦𑀺𑀭𑀸𑀫𑀺𑀲𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁.

𑀉𑀧𑁆𑀧𑀸𑀤𑁄 𑀲𑀸𑀫𑀺𑀲𑀁, 𑀅𑀦𑀼𑀧𑁆𑀧𑀸𑀤𑁄 𑀦𑀺𑀭𑀸𑀫𑀺𑀲𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀧𑀯𑀢𑁆𑀢𑀁 𑀲𑀸𑀫𑀺𑀲𑀁, 𑀅𑀧𑁆𑀧𑀯𑀢𑁆𑀢𑀁 𑀦𑀺𑀭𑀸𑀫𑀺𑀲𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁…𑀧𑁂… 𑀉𑀧𑀸𑀬𑀸𑀲𑁄 𑀲𑀸𑀫𑀺𑀲𑀁, 𑀅𑀦𑀼𑀧𑀸𑀬𑀸𑀲𑁄 𑀦𑀺𑀭𑀸𑀫𑀺𑀲𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁.

𑀉𑀧𑁆𑀧𑀸𑀤𑁄 𑀲𑀗𑁆𑀔𑀸𑀭𑀸𑀢𑀺 𑁋 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁. 𑀧𑀯𑀢𑁆𑀢𑀁 𑀲𑀗𑁆𑀔𑀸𑀭𑀸𑀢𑀺 𑁋 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁…𑀧𑁂… 𑀉𑀧𑀸𑀬𑀸𑀲𑁄 𑀲𑀗𑁆𑀔𑀸𑀭𑀸𑀢𑀺 𑁋 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁.

𑀅𑀦𑀼𑀧𑁆𑀧𑀸𑀤𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀅𑀧𑁆𑀧𑀯𑀢𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁…𑀧𑁂… 𑀅𑀦𑀼𑀧𑀸𑀬𑀸𑀲𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁.

𑀉𑀧𑁆𑀧𑀸𑀤𑁄 𑀲𑀗𑁆𑀔𑀸𑀭𑀸, 𑀅𑀦𑀼𑀧𑁆𑀧𑀸𑀤𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀧𑀯𑀢𑁆𑀢𑀁 𑀲𑀗𑁆𑀔𑀸𑀭𑀸, 𑀅𑀧𑁆𑀧𑀯𑀢𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁…𑀧𑁂… 𑀉𑀧𑀸𑀬𑀸𑀲𑁄 𑀲𑀗𑁆𑀔𑀸𑀭𑀸, 𑀅𑀦𑀼𑀧𑀸𑀬𑀸𑀲𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁.

𑀉𑀧𑁆𑀧𑀸𑀤𑀜𑁆𑀘 𑀧𑀯𑀢𑁆𑀢𑀜𑁆𑀘, 𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀔𑀦𑁆𑀢𑀺 𑀧𑀲𑁆𑀲𑀢𑀺;

𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁, 𑀜𑀸𑀡𑀁 𑀆𑀤𑀻𑀦𑀯𑁂 𑀇𑀤𑀁.

𑀅𑀦𑀼𑀧𑁆𑀧𑀸𑀤𑀁 𑀅𑀧𑁆𑀧𑀯𑀢𑁆𑀢𑀁, 𑀅𑀦𑀺𑀫𑀺𑀢𑁆𑀢𑀁 𑀲𑀼𑀔𑀦𑁆𑀢𑀺 𑀘;

𑀅𑀦𑀸𑀬𑀽𑀳𑀦𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀁, 𑀜𑀸𑀡𑀁 𑀲𑀦𑁆𑀢𑀺𑀧𑀤𑁂 𑀇𑀤𑀁.

𑀇𑀤𑀁 𑀆𑀤𑀻𑀦𑀯𑁂 𑀜𑀸𑀡𑀁, 𑀧𑀜𑁆𑀘𑀞𑀸𑀦𑁂𑀲𑀼 𑀚𑀸𑀬𑀢𑀺;

𑀧𑀜𑁆𑀘𑀞𑀸𑀦𑁂 𑀲𑀦𑁆𑀢𑀺𑀧𑀤𑁂, 𑀤𑀲 𑀜𑀸𑀡𑁂 𑀧𑀚𑀸𑀦𑀸𑀢𑀺;

𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 𑀓𑀼𑀲𑀮𑀢𑀸, 𑀦𑀸𑀦𑀸𑀤𑀺𑀝𑁆𑀞𑀻𑀲𑀼 𑀦 𑀓𑀫𑁆𑀧𑀢𑀻𑀢𑀺.

𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀆𑀤𑀻𑀦𑀯𑁂 𑀜𑀸𑀡𑀁’’.

𑀆𑀤𑀻𑀦𑀯𑀜𑀸𑀡𑀦𑀺𑀤𑁆𑀤𑁂𑀲𑁄 𑀅𑀝𑁆𑀞𑀫𑁄.