𑁫𑁬-𑁬𑁩. 𑀲𑀘𑁆𑀘𑀜𑀸𑀡𑀘𑀢𑀼𑀓𑁆𑀓𑀤𑁆𑀯𑀬𑀦𑀺𑀤𑁆𑀤𑁂𑀲𑁄

𑁧𑁦𑁮. 𑀓𑀣𑀁 𑀧𑀭𑀺𑀜𑁆𑀜𑀝𑁆𑀞𑁂 𑀧𑀜𑁆𑀜𑀸 𑀤𑀼𑀓𑁆𑀔𑁂 𑀜𑀸𑀡𑀁, 𑀧𑀳𑀸𑀦𑀝𑁆𑀞𑁂 𑀧𑀜𑁆𑀜𑀸 𑀲𑀫𑀼𑀤𑀬𑁂 𑀜𑀸𑀡𑀁, 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁂 𑀧𑀜𑁆𑀜𑀸 𑀦𑀺𑀭𑁄𑀥𑁂 𑀜𑀸𑀡𑀁, 𑀪𑀸𑀯𑀦𑀝𑁆𑀞𑁂 𑀧𑀜𑁆𑀜𑀸 𑀫𑀕𑁆𑀕𑁂 𑀜𑀸𑀡𑀁? 𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀧𑀭𑀺𑀜𑁆𑀜𑀸𑀢𑀝𑁆𑀞𑁄; 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑁄 𑀦𑀺𑀤𑀸𑀦𑀝𑁆𑀞𑁄 𑀲𑀜𑁆𑀜𑁄𑀕𑀝𑁆𑀞𑁄 𑀧𑀮𑀺𑀩𑁄𑀥𑀝𑁆𑀞𑁄 𑀧𑀳𑀸𑀦𑀝𑁆𑀞𑁄; 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑁄 𑀯𑀺𑀯𑁂𑀓𑀝𑁆𑀞𑁄 𑀅𑀲𑀗𑁆𑀔𑀢𑀝𑁆𑀞𑁄 𑀅𑀫𑀢𑀝𑁆𑀞𑁄 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁄; 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑁄 𑀳𑁂𑀢𑀼𑀝𑁆𑀞𑁄 𑀤𑀲𑁆𑀲𑀦𑀝𑁆𑀞𑁄 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄 𑀪𑀸𑀯𑀦𑀝𑁆𑀞𑁄. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀭𑀺𑀜𑁆𑀜𑀝𑁆𑀞𑁂 𑀧𑀜𑁆𑀜𑀸 𑀤𑀼𑀓𑁆𑀔𑁂 𑀜𑀸𑀡𑀁, 𑀧𑀳𑀸𑀦𑀝𑁆𑀞𑁂 𑀧𑀜𑁆𑀜𑀸 𑀲𑀫𑀼𑀤𑀬𑁂 𑀜𑀸𑀡𑀁, 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁂 𑀧𑀜𑁆𑀜𑀸 𑀦𑀺𑀭𑁄𑀥𑁂 𑀜𑀸𑀡𑀁, 𑀪𑀸𑀯𑀦𑀝𑁆𑀞𑁂 𑀧𑀜𑁆𑀜𑀸 𑀫𑀕𑁆𑀕𑁂 𑀜𑀸𑀡𑀁’’.

𑁧𑁦𑁯. 𑀓𑀣𑀁 𑀤𑀼𑀓𑁆𑀔𑁂 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁? 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀁 𑀤𑀼𑀓𑁆𑀔𑁂 𑀧𑁂𑀢𑀁 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀧𑁂𑀢𑀁 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀧𑁂𑀢𑀁 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀧𑁂𑀢𑀁 𑀜𑀸𑀡𑀁.

𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑁂 𑀜𑀸𑀡𑀁? 𑀤𑀼𑀓𑁆𑀔𑀁 𑀆𑀭𑀩𑁆𑀪 𑀬𑀸 𑀉𑀧𑁆𑀧𑀚𑁆𑀚𑀢𑀺 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄 𑀲𑀮𑁆𑀮𑀓𑁆𑀔𑀡𑀸 𑀉𑀧𑀮𑀓𑁆𑀔𑀡𑀸 𑀧𑀘𑁆𑀘𑀼𑀧𑀮𑀓𑁆𑀔𑀡𑀸 𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮𑀁 𑀦𑁂𑀧𑀼𑀜𑁆𑀜𑀁 𑀯𑁂𑀪𑀩𑁆𑀬𑀸 𑀘𑀺𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀸 𑀪𑀽𑀭𑀺 𑀫𑁂𑀥𑀸 𑀧𑀭𑀺𑀡𑀸𑀬𑀺𑀓𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀧𑀚𑀜𑁆𑀜𑀁 𑀧𑀢𑁄𑀤𑁄 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀧𑀜𑁆𑀜𑀸𑀲𑀢𑁆𑀣𑀁 𑀧𑀜𑁆𑀜𑀸𑀧𑀸𑀲𑀸𑀤𑁄 𑀧𑀜𑁆𑀜𑀸𑀆𑀮𑁄𑀓𑁄 𑀧𑀜𑁆𑀜𑀸𑀑𑀪𑀸𑀲𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀭𑀢𑀦𑀁 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀤𑀼𑀓𑁆𑀔𑁂 𑀜𑀸𑀡𑀁. 𑀤𑀼𑀓𑁆𑀔𑀲𑀫𑀼𑀤𑀬𑀁 𑀆𑀭𑀩𑁆𑀪…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀁 𑀆𑀭𑀩𑁆𑀪…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀆𑀭𑀩𑁆𑀪 𑀬𑀸 𑀉𑀧𑁆𑀧𑀚𑁆𑀚𑀢𑀺 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀤𑀼𑀓𑁆𑀔𑁂 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁’’.

𑀲𑀘𑁆𑀘𑀜𑀸𑀡𑀘𑀢𑀼𑀓𑁆𑀓𑀤𑁆𑀯𑀬𑀦𑀺𑀤𑁆𑀤𑁂𑀲𑁄 𑀢𑁂𑀲𑀝𑁆𑀞𑀺𑀫𑁄.