𑁬𑁪-𑁬𑁭. 𑀲𑀼𑀤𑁆𑀥𑀺𑀓𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀦𑀺𑀤𑁆𑀤𑁂𑀲𑁄

𑁧𑁧𑁦. 𑀓𑀣𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁? 𑀅𑀢𑁆𑀣𑁂𑀲𑀼 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑁂𑀲𑀼 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀦𑀺𑀭𑀼𑀢𑁆𑀢𑀻𑀲𑀼 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀧𑀝𑀺𑀪𑀸𑀦𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀅𑀢𑁆𑀣𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀥𑀫𑁆𑀫𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀦𑀺𑀭𑀼𑀢𑁆𑀢𑀺𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀧𑀝𑀺𑀪𑀸𑀦𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀅𑀢𑁆𑀣𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀥𑀫𑁆𑀫𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀧𑀝𑀺𑀪𑀸𑀦𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁.

𑀅𑀢𑁆𑀣𑀲𑀮𑁆𑀮𑀓𑁆𑀔𑀡𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀥𑀫𑁆𑀫𑀲𑀮𑁆𑀮𑀓𑁆𑀔𑀡𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀦𑀺𑀭𑀼𑀢𑁆𑀢𑀺𑀲𑀮𑁆𑀮𑀓𑁆𑀔𑀡𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀧𑀝𑀺𑀪𑀸𑀦𑀲𑀮𑁆𑀮𑀓𑁆𑀔𑀡𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁. 𑀅𑀢𑁆𑀣𑀽𑀧𑀮𑀓𑁆𑀔𑀡𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀥𑀫𑁆𑀫𑀽𑀧𑀮𑀓𑁆𑀔𑀡𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀦𑀺𑀭𑀼𑀢𑁆𑀢𑀽𑀧𑀮𑀓𑁆𑀔𑀡𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀧𑀝𑀺𑀪𑀸𑀦𑀽𑀧𑀮𑀓𑁆𑀔𑀡𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁.

𑀅𑀢𑁆𑀣𑀧𑁆𑀧𑀪𑁂𑀤𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀥𑀫𑁆𑀫𑀧𑁆𑀧𑀪𑁂𑀤𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀦𑀺𑀭𑀼𑀢𑁆𑀢𑀺𑀧𑁆𑀧𑀪𑁂𑀤𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀧𑀝𑀺𑀪𑀸𑀦𑀧𑁆𑀧𑀪𑁂𑀤𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁. 𑀅𑀢𑁆𑀣𑀧𑁆𑀧𑀪𑀸𑀯𑀦𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀥𑀫𑁆𑀫𑀧𑁆𑀧𑀪𑀸𑀯𑀦𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀦𑀺𑀭𑀼𑀢𑁆𑀢𑀺𑀧𑁆𑀧𑀪𑀸𑀯𑀦𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀧𑀝𑀺𑀪𑀸𑀦𑀧𑁆𑀧𑀪𑀸𑀯𑀦𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁.

𑀅𑀢𑁆𑀣𑀚𑁄𑀢𑀦𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀥𑀫𑁆𑀫𑀚𑁄𑀢𑀦𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀦𑀺𑀭𑀼𑀢𑁆𑀢𑀺𑀚𑁄𑀢𑀦𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀧𑀝𑀺𑀪𑀸𑀦𑀚𑁄𑀢𑀦𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁. 𑀅𑀢𑁆𑀣𑀯𑀺𑀭𑁄𑀘𑀦𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀥𑀫𑁆𑀫𑀯𑀺𑀭𑁄𑀘𑀦𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀦𑀺𑀭𑀼𑀢𑁆𑀢𑀺𑀯𑀺𑀭𑁄𑀘𑀦𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀧𑀝𑀺𑀪𑀸𑀦𑀯𑀺𑀭𑁄𑀘𑀦𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁. 𑀅𑀢𑁆𑀣𑀧𑁆𑀧𑀓𑀸𑀲𑀦𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀥𑀫𑁆𑀫𑀧𑁆𑀧𑀓𑀸𑀲𑀦𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀦𑀺𑀭𑀼𑀢𑁆𑀢𑀺𑀧𑁆𑀧𑀓𑀸𑀲𑀦𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀧𑀝𑀺𑀪𑀸𑀦𑀧𑁆𑀧𑀓𑀸𑀲𑀦𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀲𑀼𑀤𑁆𑀥𑀺𑀓𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀦𑀺𑀤𑁆𑀤𑁂𑀲𑁄 𑀲𑀢𑁆𑀢𑀲𑀝𑁆𑀞𑀺𑀫𑁄.