𑁫𑁦. 𑀇𑀤𑁆𑀥𑀺𑀯𑀺𑀥𑀜𑀸𑀡𑀦𑀺𑀤𑁆𑀤𑁂𑀲𑁄

𑁧𑁦𑁧. 𑀓𑀣𑀁 𑀓𑀸𑀬𑀫𑁆𑀧𑀺 𑀘𑀺𑀢𑁆𑀢𑀫𑁆𑀧𑀺 𑀏𑀓𑀯𑀯𑀢𑁆𑀣𑀸𑀦𑀢𑀸 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀇𑀚𑁆𑀛𑀦𑀝𑁆𑀞𑁂 𑀧𑀜𑁆𑀜𑀸 𑀇𑀤𑁆𑀥𑀺𑀯𑀺𑀥𑁂 𑀜𑀸𑀡𑀁? 𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀘𑀺𑀢𑁆𑀢𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀲𑁄 𑀇𑀫𑁂𑀲𑀼 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀘𑀺𑀢𑁆𑀢𑀁 𑀧𑀭𑀺𑀪𑀸𑀯𑁂𑀢𑀺 𑀧𑀭𑀺𑀤𑀫𑁂𑀢𑀺, 𑀫𑀼𑀤𑀼𑀁 𑀓𑀭𑁄𑀢𑀺 𑀓𑀫𑁆𑀫𑀦𑀺𑀬𑀁. 𑀲𑁄 𑀇𑀫𑁂𑀲𑀼 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀘𑀺𑀢𑁆𑀢𑀁 𑀧𑀭𑀺𑀪𑀸𑀯𑁂𑀢𑁆𑀯𑀸 𑀧𑀭𑀺𑀤𑀫𑁂𑀢𑁆𑀯𑀸 𑀫𑀼𑀤𑀼𑀁 𑀓𑀭𑀺𑀢𑁆𑀯𑀸 𑀓𑀫𑁆𑀫𑀦𑀺𑀬𑀁 𑀓𑀸𑀬𑀫𑁆𑀧𑀺 𑀘𑀺𑀢𑁆𑀢𑁂 𑀲𑀫𑁄𑀤𑀳𑀢𑀺, 𑀘𑀺𑀢𑁆𑀢𑀫𑁆𑀧𑀺 𑀓𑀸𑀬𑁂 𑀲𑀫𑁄𑀤𑀳𑀢𑀺, 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀢𑀺, 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀧𑀭𑀺𑀡𑀸𑀫𑁂𑀢𑀺, 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀺, 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀅𑀥𑀺𑀝𑁆𑀞𑀸𑀢𑀺; 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀓𑀸𑀬𑁂 𑀑𑀓𑁆𑀓𑀫𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀲𑁄 𑀢𑀣𑀸𑀪𑀸𑀯𑀺𑀢𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀲𑀼𑀤𑁆𑀥𑁂𑀦 𑀧𑀭𑀺𑀬𑁄𑀤𑀸𑀢𑁂𑀦 𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺.

𑁧𑁦𑁨. 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺; 𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀁; 𑀢𑀺𑀭𑁄𑀓𑀼𑀝𑁆𑀝𑀁 [𑀢𑀺𑀭𑁄𑀓𑀼𑀟𑁆𑀟𑀁 (𑀲𑁆𑀬𑀸.)] 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂; 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂; 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁; 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀢𑀺 [𑀘𑀗𑁆𑀓𑀫𑀢𑀺 (𑀲𑁆𑀬𑀸.) 𑀤𑀻. 𑀦𑀺. 𑁧.𑁨𑁩𑁮 𑀧𑀲𑁆𑀲𑀺𑀢𑀩𑁆𑀩𑀸] 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀸𑀫𑀲𑀢𑀺 [𑀧𑀭𑀺𑀫𑀲𑀢𑀺 (𑀲𑁆𑀬𑀸.)] 𑀧𑀭𑀺𑀫𑀚𑁆𑀚𑀢𑀺; 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀓𑀸𑀬𑀫𑁆𑀧𑀺 𑀘𑀺𑀢𑁆𑀢𑀫𑁆𑀧𑀺 𑀏𑀓𑀯𑀯𑀢𑁆𑀣𑀸𑀦𑀢𑀸 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀇𑀚𑁆𑀛𑀦𑀝𑁆𑀞𑁂 𑀧𑀜𑁆𑀜𑀸 𑀇𑀤𑁆𑀥𑀺𑀯𑀺𑀥𑁂 𑀜𑀸𑀡𑀁’’.

𑀇𑀤𑁆𑀥𑀺𑀯𑀺𑀥𑀜𑀸𑀡𑀦𑀺𑀤𑁆𑀤𑁂𑀲𑁄 𑀧𑀜𑁆𑀜𑀸𑀲𑀫𑁄.