𑁫𑁧. 𑀲𑁄𑀢𑀥𑀸𑀢𑀼𑀯𑀺𑀲𑀼𑀤𑁆𑀥𑀺𑀜𑀸𑀡𑀦𑀺𑀤𑁆𑀤𑁂𑀲𑁄

𑁧𑁦𑁩. 𑀓𑀣𑀁 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀯𑀲𑁂𑀦 𑀦𑀸𑀦𑀢𑁆𑀢𑁂𑀓𑀢𑁆𑀢𑀲𑀤𑁆𑀤𑀦𑀺𑀫𑀺𑀢𑁆𑀢𑀸𑀦𑀁 𑀧𑀭𑀺𑀬𑁄𑀕𑀸𑀳𑀡𑁂 𑀧𑀜𑁆𑀜𑀸 𑀲𑁄𑀢𑀥𑀸𑀢𑀼𑀯𑀺𑀲𑀼𑀤𑁆𑀥𑀺𑀜𑀸𑀡𑀁? 𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺…𑀧𑁂… 𑀯𑀻𑀭𑀺𑀬𑀲𑀫𑀸𑀥𑀺… 𑀘𑀺𑀢𑁆𑀢𑀲𑀫𑀸𑀥𑀺… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀲𑁄 𑀇𑀫𑁂𑀲𑀼 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀘𑀺𑀢𑁆𑀢𑀁 𑀧𑀭𑀺𑀪𑀸𑀯𑁂𑀢𑀺 𑀧𑀭𑀺𑀤𑀫𑁂𑀢𑀺, 𑀫𑀼𑀤𑀼𑀁 𑀓𑀭𑁄𑀢𑀺 𑀓𑀫𑁆𑀫𑀦𑀺𑀬𑀁. 𑀲𑁄 𑀇𑀫𑁂𑀲𑀼 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀘𑀺𑀢𑁆𑀢𑀁 𑀧𑀭𑀺𑀪𑀸𑀯𑁂𑀢𑁆𑀯𑀸 𑀧𑀭𑀺𑀤𑀫𑁂𑀢𑁆𑀯𑀸, 𑀫𑀼𑀤𑀼𑀁 𑀓𑀭𑀺𑀢𑁆𑀯𑀸 𑀓𑀫𑁆𑀫𑀦𑀺𑀬𑀁 𑀤𑀽𑀭𑁂𑀧𑀺 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀲𑀦𑁆𑀢𑀺𑀓𑁂𑀧𑀺 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀑𑀴𑀸𑀭𑀺𑀓𑀸𑀦𑀫𑁆𑀧𑀺 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀲𑀼𑀔𑀼𑀫𑀸𑀦𑀫𑁆𑀧𑀺 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀲𑀡𑁆𑀳𑀲𑀡𑁆𑀳𑀸𑀦𑀫𑁆𑀧𑀺 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀧𑀼𑀭𑀢𑁆𑀣𑀺𑀫𑀸𑀬𑀧𑀺 𑀤𑀺𑀲𑀸𑀬 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀧𑀘𑁆𑀙𑀺𑀫𑀸𑀬𑀧𑀺 𑀤𑀺𑀲𑀸𑀬 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀉𑀢𑁆𑀢𑀭𑀸𑀬𑀧𑀺 𑀤𑀺𑀲𑀸𑀬 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀤𑀓𑁆𑀔𑀺𑀡𑀸𑀬𑀧𑀺 𑀤𑀺𑀲𑀸𑀬 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀧𑀼𑀭𑀢𑁆𑀣𑀺𑀫𑀸𑀬𑀧𑀺 𑀅𑀦𑀼𑀤𑀺𑀲𑀸𑀬 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀧𑀘𑁆𑀙𑀺𑀫𑀸𑀬𑀧𑀺 𑀅𑀦𑀼𑀤𑀺𑀲𑀸𑀬 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀉𑀢𑁆𑀢𑀭𑀸𑀬𑀧𑀺 𑀅𑀦𑀼𑀤𑀺𑀲𑀸𑀬 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀤𑀓𑁆𑀔𑀺𑀡𑀸𑀬𑀧𑀺 𑀅𑀦𑀼𑀤𑀺𑀲𑀸𑀬 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀳𑁂𑀝𑁆𑀞𑀺𑀫𑀸𑀬𑀧𑀺 𑀤𑀺𑀲𑀸𑀬 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀉𑀧𑀭𑀺𑀫𑀸𑀬𑀧𑀺 𑀤𑀺𑀲𑀸𑀬 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺. 𑀲𑁄 𑀢𑀣𑀸𑀪𑀸𑀯𑀺𑀢𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀲𑀼𑀤𑁆𑀥𑁂𑀦 𑀧𑀭𑀺𑀬𑁄𑀤𑀸𑀢𑁂𑀦 𑀲𑁄𑀢𑀥𑀸𑀢𑀼𑀯𑀺𑀲𑀼𑀤𑁆𑀥𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀉𑀪𑁄 𑀲𑀤𑁆𑀤𑁂 𑀲𑀼𑀡𑀸𑀢𑀺 𑁋 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀯𑀲𑁂𑀦 𑀦𑀸𑀦𑀢𑁆𑀢𑁂𑀓𑀢𑁆𑀢𑀲𑀤𑁆𑀤𑀦𑀺𑀫𑀺𑀢𑁆𑀢𑀸𑀦𑀁 𑀧𑀭𑀺𑀬𑁄𑀕𑀸𑀳𑀡𑁂 𑀧𑀜𑁆𑀜𑀸 𑀲𑁄𑀢𑀥𑀸𑀢𑀼𑀯𑀺𑀲𑀼𑀤𑁆𑀥𑀺𑀜𑀸𑀡𑀁’’.

𑀲𑁄𑀢𑀥𑀸𑀢𑀼𑀯𑀺𑀲𑀼𑀤𑁆𑀥𑀺𑀜𑀸𑀡𑀦𑀺𑀤𑁆𑀤𑁂𑀲𑁄 𑀏𑀓𑀧𑀜𑁆𑀜𑀸𑀲𑀫𑁄.