𑁫. 𑀲𑀫𑁆𑀫𑀲𑀦𑀜𑀸𑀡𑀦𑀺𑀤𑁆𑀤𑁂𑀲𑁄

𑁪𑁮. 𑀓𑀣𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁?

𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑁂𑀢𑀺 𑀏𑀓𑀁 𑀲𑀫𑁆𑀫𑀲𑀦𑀁, 𑀤𑀼𑀓𑁆𑀔𑀢𑁄 𑀯𑀯𑀢𑁆𑀣𑁂𑀢𑀺 𑀏𑀓𑀁 𑀲𑀫𑁆𑀫𑀲𑀦𑀁, 𑀅𑀦𑀢𑁆𑀢𑀢𑁄 𑀯𑀯𑀢𑁆𑀣𑁂𑀢𑀺 𑀏𑀓𑀁 𑀲𑀫𑁆𑀫𑀲𑀦𑀁.

𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀸 𑀓𑀸𑀘𑀺 𑀲𑀜𑁆𑀜𑀸… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑁂𑀢𑀺 𑀏𑀓𑀁 𑀲𑀫𑁆𑀫𑀲𑀦𑀁, 𑀤𑀼𑀓𑁆𑀔𑀢𑁄 𑀯𑀯𑀢𑁆𑀣𑁂𑀢𑀺 𑀏𑀓𑀁 𑀲𑀫𑁆𑀫𑀲𑀦𑀁, 𑀅𑀦𑀢𑁆𑀢𑀢𑁄 𑀯𑀯𑀢𑁆𑀣𑁂𑀢𑀺 𑀏𑀓𑀁 𑀲𑀫𑁆𑀫𑀲𑀦𑀁.

𑀘𑀓𑁆𑀔𑀼𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑁂𑀢𑀺 𑀏𑀓𑀁 𑀲𑀫𑁆𑀫𑀲𑀦𑀁, 𑀤𑀼𑀓𑁆𑀔𑀢𑁄 𑀯𑀯𑀢𑁆𑀣𑁂𑀢𑀺 𑀏𑀓𑀁 𑀲𑀫𑁆𑀫𑀲𑀦𑀁, 𑀅𑀦𑀢𑁆𑀢𑀢𑁄 𑀯𑀯𑀢𑁆𑀣𑁂𑀢𑀺 𑀏𑀓𑀁 𑀲𑀫𑁆𑀫𑀲𑀦𑀁.

𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦, 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁. 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀲𑀗𑁆𑀔𑀸𑀭𑀸…𑀧𑁂… 𑀯𑀺𑀜𑁆𑀜𑀸𑀡𑀁…𑀧𑁂… 𑀘𑀓𑁆𑀔𑀼…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦, 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦, 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁.

𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁. 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁.

𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁, 𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡𑀦𑁆𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁… 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁, 𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡𑀦𑁆𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁. 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀅𑀲𑀢𑀺…𑀧𑁂… 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀅𑀲𑀢𑀺…𑀧𑁂… 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀅𑀲𑀢𑀺…𑀧𑁂… 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀅𑀲𑀢𑀺…𑀧𑁂… 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀅𑀲𑀢𑀺…𑀧𑁂… 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀅𑀲𑀢𑀺…𑀧𑁂… 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀅𑀲𑀢𑀺…𑀧𑁂… 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀅𑀲𑀢𑀺…𑀧𑁂… 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀅𑀲𑀢𑀺…𑀧𑁂… 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀅𑀲𑀢𑀺 𑀅𑀯𑀺𑀚𑁆𑀚𑀸𑀬 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁… 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀅𑀲𑀢𑀺 𑀅𑀯𑀺𑀚𑁆𑀚𑀸𑀬 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀲𑀫𑁆𑀫𑀲𑀦𑁂 𑀜𑀸𑀡𑀁’’.

𑀲𑀫𑁆𑀫𑀲𑀦𑀜𑀸𑀡𑀦𑀺𑀤𑁆𑀤𑁂𑀲𑁄 𑀧𑀜𑁆𑀘𑀫𑁄.