𑁬. 𑀉𑀤𑀬𑀩𑁆𑀩𑀬𑀜𑀸𑀡𑀦𑀺𑀤𑁆𑀤𑁂𑀲𑁄

𑁪𑁯. 𑀓𑀣𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑁂 𑀧𑀜𑁆𑀜𑀸 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑁂 𑀜𑀸𑀡𑀁? 𑀚𑀸𑀢𑀁 𑀭𑀽𑀧𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀉𑀤𑀬𑁄, 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀯𑀬𑁄, 𑀅𑀦𑀼𑀧𑀲𑁆𑀲𑀦𑀸 𑀜𑀸𑀡𑀁. 𑀚𑀸𑀢𑀸 𑀯𑁂𑀤𑀦𑀸…𑀧𑁂… 𑀚𑀸𑀢𑀸 𑀲𑀜𑁆𑀜𑀸… 𑀚𑀸𑀢𑀸 𑀲𑀗𑁆𑀔𑀸𑀭𑀸… 𑀚𑀸𑀢𑀁 𑀯𑀺𑀜𑁆𑀜𑀸𑀡𑀁… 𑀚𑀸𑀢𑀁 𑀘𑀓𑁆𑀔𑀼…𑀧𑁂… 𑀚𑀸𑀢𑁄 𑀪𑀯𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀉𑀤𑀬𑁄, 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀯𑀬𑁄, 𑀅𑀦𑀼𑀧𑀲𑁆𑀲𑀦𑀸 𑀜𑀸𑀡𑀁.

𑁫𑁦. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺, 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺, 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺? 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀧𑀜𑁆𑀘𑀯𑀻𑀲𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺, 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀧𑀜𑁆𑀘𑀯𑀻𑀲𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺; 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑁄 𑀧𑀜𑁆𑀜𑀸𑀲 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺.

𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺, 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺, 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺? 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲…𑀧𑁂… 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲…𑀧𑁂… 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺, 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺, 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺? 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺, 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺; 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑁄 𑀤𑀲 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲…𑀧𑁂… 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲… 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺, 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺; 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑁄 𑀤𑀲 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺.

𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺? 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄𑀢𑀺 𑁋 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀢𑀡𑁆𑀳𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄𑀢𑀺 𑁋 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀓𑀫𑁆𑀫𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄𑀢𑀺 𑁋 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄𑀢𑀺 𑁋 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺.

𑀯𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺? 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄𑀢𑀺 𑁋 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀢𑀡𑁆𑀳𑀸𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄𑀢𑀺 𑁋 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀓𑀫𑁆𑀫𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄𑀢𑀺 𑁋 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀆𑀳𑀸𑀭𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄𑀢𑀺 𑁋 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺. 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀤𑀲 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺.

𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺? 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄𑀢𑀺 𑁋 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀢𑀡𑁆𑀳𑀸𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄𑀢𑀺 𑁋 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀓𑀫𑁆𑀫𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄𑀢𑀺 𑁋 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄𑀢𑀺 𑁋 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺.

𑀯𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺? 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄𑀢𑀺 𑁋 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀢𑀡𑁆𑀳𑀸𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄𑀢𑀺 𑁋 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀓𑀫𑁆𑀫𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄𑀢𑀺 𑁋 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄𑀢𑀺 𑁋 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺. 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀤𑀲 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺.

𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲…𑀧𑁂… 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺? 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑁄𑀢𑀺 𑁋 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀢𑀡𑁆𑀳𑀸𑀲𑀫𑀼𑀤𑀬𑀸 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑁄𑀢𑀺𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀓𑀫𑁆𑀫𑀲𑀫𑀼𑀤𑀬𑀸 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑁄𑀢𑀺 𑁋 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀦𑀸𑀫𑀭𑀽𑀧𑀲𑀫𑀼𑀤𑀬𑀸 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑁄𑀢𑀺 𑁋 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺.

𑀯𑀬𑀁 𑀧𑀲𑁆𑀲𑀦𑁆𑀢𑁄 𑀓𑀢𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺? 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄𑀢𑀺 𑁋 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀢𑀡𑁆𑀳𑀸𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄𑀢𑀺 𑁋 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀓𑀫𑁆𑀫𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄𑀢𑀺 𑁋 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄𑀢𑀺 𑁋 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺. 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀤𑀲 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺.

𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘𑀯𑀻𑀲𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺, 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘𑀯𑀻𑀲𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺, 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀜𑀸𑀲 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑁂 𑀧𑀜𑁆𑀜𑀸 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑁂 𑀜𑀸𑀡𑀁’’. 𑀭𑀽𑀧𑀓𑁆𑀔𑀦𑁆𑀥𑁄 [𑀭𑀽𑀧𑀓𑁆𑀔𑀦𑁆𑀥𑀸 (𑀲𑁆𑀬𑀸.)] 𑀆𑀳𑀸𑀭𑀲𑀫𑀼𑀤𑀬𑁄. 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸 𑁋 𑀢𑀬𑁄 [𑀲𑀗𑁆𑀔𑀸𑀭𑀸𑀢𑀺 𑀲𑁂𑀲𑀸 (𑀲𑁆𑀬𑀸.)] 𑀔𑀦𑁆𑀥𑀸 𑀨𑀲𑁆𑀲𑀲𑀫𑀼𑀤𑀬𑀸. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀦𑀸𑀫𑀭𑀽𑀧𑀲𑀫𑀼𑀤𑀬𑁄.

𑀉𑀤𑀬𑀩𑁆𑀩𑀬𑀜𑀸𑀡𑀦𑀺𑀤𑁆𑀤𑁂𑀲𑁄 𑀙𑀝𑁆𑀞𑁄.