𑁪𑁪-𑁪𑁯. 𑀙𑀯𑀺𑀯𑀝𑁆𑀝𑀜𑀸𑀡𑀦𑀺𑀤𑁆𑀤𑁂𑀲𑁄

𑁯𑁫. 𑀓𑀣𑀁 𑀅𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀲𑀜𑁆𑀜𑀸𑀯𑀺𑀯𑀝𑁆𑀝𑁂 𑀜𑀸𑀡𑀁? 𑀦𑁂𑀓𑁆𑀔𑀫𑁆𑀫𑀸𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀓𑀸𑀫𑀘𑁆𑀙𑀦𑁆𑀤𑀢𑁄 𑀲𑀜𑁆𑀜𑀸𑀬 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀅𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀲𑀜𑁆𑀜𑀸𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀅𑀩𑁆𑀬𑀸𑀧𑀸𑀤𑀸𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀩𑁆𑀬𑀸𑀧𑀸𑀤𑀢𑁄 𑀲𑀜𑁆𑀜𑀸𑀬 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀅𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀲𑀜𑁆𑀜𑀸𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀆𑀮𑁄𑀓𑀲𑀜𑁆𑀜𑀸𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀣𑀺𑀦𑀫𑀺𑀤𑁆𑀥𑀢𑁄 𑀲𑀜𑁆𑀜𑀸𑀬 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀅𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀲𑀜𑁆𑀜𑀸𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀅𑀯𑀺𑀓𑁆𑀔𑁂𑀧𑀸𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀉𑀤𑁆𑀥𑀘𑁆𑀘𑀢𑁄 𑀲𑀜𑁆𑀜𑀸𑀬 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀅𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀲𑀜𑁆𑀜𑀸𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀥𑀫𑁆𑀫𑀯𑀯𑀢𑁆𑀣𑀸𑀦𑀸𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀜𑁆𑀜𑀸𑀬 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀅𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀲𑀜𑁆𑀜𑀸𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀜𑀸𑀡𑀸𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀅𑀯𑀺𑀚𑁆𑀚𑀸𑀬 𑀲𑀜𑁆𑀜𑀸𑀬 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀅𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀲𑀜𑁆𑀜𑀸𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀧𑀸𑀫𑁄𑀚𑁆𑀚𑀸𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀅𑀭𑀢𑀺𑀬𑀸 𑀲𑀜𑁆𑀜𑀸𑀬 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀅𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀲𑀜𑁆𑀜𑀸𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀧𑀞𑀫𑀚𑁆𑀛𑀸𑀦𑀸𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀦𑀻𑀯𑀭𑀡𑁂𑀳𑀺 𑀲𑀜𑁆𑀜𑀸𑀬 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀅𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀲𑀜𑁆𑀜𑀸𑀯𑀺𑀯𑀝𑁆𑀝𑁂 𑀜𑀸𑀡𑀁…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀸𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀲𑀜𑁆𑀜𑀸𑀬 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀅𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀲𑀜𑁆𑀜𑀸𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀥𑀺𑀧𑀢𑀢𑁆𑀢𑀸 𑀧𑀜𑁆𑀜𑀸 𑀲𑀜𑁆𑀜𑀸𑀯𑀺𑀯𑀝𑁆𑀝𑁂 𑀜𑀸𑀡𑀁’’.

𑁯𑁬. 𑀓𑀣𑀁 𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀘𑁂𑀢𑁄𑀯𑀺𑀯𑀝𑁆𑀝𑁂 𑀜𑀸𑀡𑀁? 𑀓𑀸𑀫𑀘𑁆𑀙𑀦𑁆𑀤𑁄 𑀦𑀸𑀦𑀢𑁆𑀢𑀁, 𑀦𑁂𑀓𑁆𑀔𑀫𑁆𑀫𑀁 𑀏𑀓𑀢𑁆𑀢𑀁. 𑀦𑁂𑀓𑁆𑀔𑀫𑁆𑀫𑁂𑀓𑀢𑁆𑀢𑀁 𑀘𑁂𑀢𑀬𑀢𑁄 𑀓𑀸𑀫𑀘𑁆𑀙𑀦𑁆𑀤𑀢𑁄 𑀘𑀺𑀢𑁆𑀢𑀁 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀘𑁂𑀢𑁄𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀩𑁆𑀬𑀸𑀧𑀸𑀤𑁄 𑀦𑀸𑀦𑀢𑁆𑀢𑀁, 𑀅𑀩𑁆𑀬𑀸𑀧𑀸𑀤𑁄 𑀏𑀓𑀢𑁆𑀢𑀁. 𑀅𑀩𑁆𑀬𑀸𑀧𑀸𑀤𑁂𑀓𑀢𑁆𑀢𑀁 𑀘𑁂𑀢𑀬𑀢𑁄 𑀩𑁆𑀬𑀸𑀧𑀸𑀤𑀢𑁄 𑀘𑀺𑀢𑁆𑀢𑀁 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀘𑁂𑀢𑁄𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀣𑀺𑀦𑀫𑀺𑀤𑁆𑀥𑀁 𑀦𑀸𑀦𑀢𑁆𑀢𑀁, 𑀆𑀮𑁄𑀓𑀲𑀜𑁆𑀜𑀸 𑀏𑀓𑀢𑁆𑀢𑀁. 𑀆𑀮𑁄𑀓𑀲𑀜𑁆𑀜𑁂𑀓𑀢𑁆𑀢𑀁 𑀘𑁂𑀢𑀬𑀢𑁄 𑀣𑀺𑀦𑀫𑀺𑀤𑁆𑀥𑀢𑁄 𑀘𑀺𑀢𑁆𑀢𑀁 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀘𑁂𑀢𑁄𑀯𑀺𑀯𑀝𑁆𑀝𑁂 𑀜𑀸𑀡𑀁…𑀧𑁂… 𑀲𑀩𑁆𑀩𑀓𑀺𑀮𑁂𑀲𑀸 𑀦𑀸𑀦𑀢𑁆𑀢𑀁, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀏𑀓𑀢𑁆𑀢𑀁. 𑀅𑀭𑀳𑀢𑁆𑀢𑀫𑀕𑁆𑀕𑁂𑀓𑀢𑁆𑀢𑀁 𑀘𑁂𑀢𑀬𑀢𑁄 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀘𑁂𑀢𑁄𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀘𑁂𑀢𑁄𑀯𑀺𑀯𑀝𑁆𑀝𑁂 𑀜𑀸𑀡𑀁’’.

𑁯𑁭. 𑀓𑀣𑀁 𑀅𑀥𑀺𑀝𑁆𑀞𑀸𑀦𑁂 𑀧𑀜𑁆𑀜𑀸 𑀘𑀺𑀢𑁆𑀢𑀯𑀺𑀯𑀝𑁆𑀝𑁂 𑀜𑀸𑀡𑀁? 𑀓𑀸𑀫𑀘𑁆𑀙𑀦𑁆𑀤𑀁 𑀧𑀚𑀳𑀦𑁆𑀢𑁄 𑀦𑁂𑀓𑁆𑀔𑀫𑁆𑀫𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀻𑀢𑀺 𑁋 𑀅𑀥𑀺𑀝𑁆𑀞𑀸𑀦𑁂 𑀧𑀜𑁆𑀜𑀸 𑀘𑀺𑀢𑁆𑀢𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀩𑁆𑀬𑀸𑀧𑀸𑀤𑀁 𑀧𑀚𑀳𑀦𑁆𑀢𑁄 𑀅𑀩𑁆𑀬𑀸𑀧𑀸𑀤𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀻𑀢𑀺 𑁋 𑀅𑀥𑀺𑀝𑁆𑀞𑀸𑀦𑁂 𑀧𑀜𑁆𑀜𑀸 𑀘𑀺𑀢𑁆𑀢𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀣𑀺𑀦𑀫𑀺𑀤𑁆𑀥𑀁 𑀧𑀚𑀳𑀦𑁆𑀢𑁄 𑀆𑀮𑁄𑀓𑀲𑀜𑁆𑀜𑀸𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀻𑀢𑀺 𑁋 𑀅𑀥𑀺𑀝𑁆𑀞𑀸𑀦𑁂 𑀧𑀜𑁆𑀜𑀸 𑀘𑀺𑀢𑁆𑀢𑀯𑀺𑀯𑀝𑁆𑀝𑁂 𑀜𑀸𑀡𑀁…𑀧𑁂… 𑀲𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀻𑀢𑀺 𑁋 𑀅𑀥𑀺𑀝𑁆𑀞𑀸𑀦𑁂 𑀧𑀜𑁆𑀜𑀸 𑀘𑀺𑀢𑁆𑀢𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀥𑀺𑀝𑁆𑀞𑀸𑀦𑁂 𑀧𑀜𑁆𑀜𑀸 𑀘𑀺𑀢𑁆𑀢𑀯𑀺𑀯𑀝𑁆𑀝𑁂 𑀜𑀸𑀡𑀁’’.

𑁯𑁮. 𑀓𑀣𑀁 𑀲𑀼𑀜𑁆𑀜𑀢𑁂 𑀧𑀜𑁆𑀜𑀸 𑀜𑀸𑀡𑀯𑀺𑀯𑀝𑁆𑀝𑁂 𑀜𑀸𑀡𑀁? ‘‘𑀘𑀓𑁆𑀔𑀼 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸’’𑀢𑀺 𑀬𑀣𑀸𑀪𑀽𑀢𑀁 𑀚𑀸𑀦𑀢𑁄 [𑀧𑀚𑀸𑀦𑀢𑁄 (𑀲𑁆𑀬𑀸.)] 𑀧𑀲𑁆𑀲𑀢𑁄 𑀘𑀓𑁆𑀔𑀸𑀪𑀺𑀦𑀺𑀯𑁂𑀲𑀢𑁄 [𑀓𑀸𑀫𑀸𑀪𑀺𑀦𑀺𑀯𑁂𑀲𑀢𑁄 (𑀲𑁆𑀬𑀸.) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀜𑀸𑀡𑀁 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀲𑀼𑀜𑁆𑀜𑀢𑁂 𑀧𑀜𑁆𑀜𑀸 𑀜𑀸𑀡𑀯𑀺𑀯𑀝𑁆𑀝𑁂 𑀜𑀸𑀡𑀁. ‘‘𑀲𑁄𑀢𑀁 𑀲𑀼𑀜𑁆𑀜𑀁…𑀧𑁂… 𑀖𑀸𑀦𑀁 𑀲𑀼𑀜𑁆𑀜𑀁… 𑀚𑀺𑀯𑁆𑀳𑀸 𑀲𑀼𑀜𑁆𑀜𑀸… 𑀓𑀸𑀬𑁄 𑀲𑀼𑀜𑁆𑀜𑁄… 𑀫𑀦𑁄 𑀲𑀼𑀜𑁆𑀜𑁄 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸’’𑀢𑀺 𑀬𑀣𑀸𑀪𑀽𑀢𑀁 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀫𑀦𑀸𑀪𑀺𑀦𑀺𑀯𑁂𑀲𑀢𑁄 𑀜𑀸𑀡𑀁 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀲𑀼𑀜𑁆𑀜𑀢𑁂 𑀧𑀜𑁆𑀜𑀸 𑀜𑀸𑀡𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀲𑀼𑀜𑁆𑀜𑀢𑁂 𑀧𑀜𑁆𑀜𑀸 𑀜𑀸𑀡𑀯𑀺𑀯𑀝𑁆𑀝𑁂 𑀜𑀸𑀡𑀁’’.

𑁯𑁯. 𑀓𑀣𑀁 𑀯𑁄𑀲𑀕𑁆𑀕𑁂 𑀧𑀜𑁆𑀜𑀸 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁂 𑀜𑀸𑀡𑀁? 𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀁 𑀯𑁄𑀲𑀚𑁆𑀚𑀢𑀻𑀢𑀺 𑁋 𑀯𑁄𑀲𑀕𑁆𑀕𑁂 𑀧𑀜𑁆𑀜𑀸 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀅𑀩𑁆𑀬𑀸𑀧𑀸𑀤𑁂𑀦 𑀩𑁆𑀬𑀸𑀧𑀸𑀤𑀁 𑀯𑁄𑀲𑀚𑁆𑀚𑀢𑀻𑀢𑀺 𑁋 𑀯𑁄𑀲𑀕𑁆𑀕𑁂 𑀧𑀜𑁆𑀜𑀸 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀆𑀮𑁄𑀓𑀲𑀜𑁆𑀜𑀸𑀬 𑀣𑀺𑀦𑀫𑀺𑀤𑁆𑀥𑀁 𑀯𑁄𑀲𑀚𑁆𑀚𑀢𑀻𑀢𑀺 𑁋 𑀯𑁄𑀲𑀕𑁆𑀕𑁂 𑀧𑀜𑁆𑀜𑀸 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀅𑀯𑀺𑀓𑁆𑀔𑁂𑀧𑁂𑀦 𑀉𑀤𑁆𑀥𑀘𑁆𑀘𑀁 𑀯𑁄𑀲𑀚𑁆𑀚𑀢𑀻𑀢𑀺 𑁋 𑀯𑁄𑀲𑀕𑁆𑀕𑁂 𑀧𑀜𑁆𑀜𑀸 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀥𑀫𑁆𑀫𑀯𑀯𑀢𑁆𑀣𑀸𑀦𑁂𑀦 𑀯𑀺𑀘𑀺𑀓𑀺𑀘𑁆𑀙𑀁 𑀯𑁄𑀲𑀚𑁆𑀚𑀢𑀻𑀢𑀺 𑁋 𑀯𑁄𑀲𑀕𑁆𑀕𑁂 𑀧𑀜𑁆𑀜𑀸 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁂 𑀜𑀸𑀡𑀁…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀯𑁄𑀲𑀚𑁆𑀚𑀢𑀻𑀢𑀺 𑁋 𑀯𑁄𑀲𑀕𑁆𑀕𑁂 𑀧𑀜𑁆𑀜𑀸 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀯𑁄𑀲𑀕𑁆𑀕𑁂 𑀧𑀜𑁆𑀜𑀸 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁂 𑀜𑀸𑀡𑀁’’.

𑁧𑁦𑁦. 𑀓𑀣𑀁 𑀢𑀣𑀝𑁆𑀞𑁂 𑀧𑀜𑁆𑀜𑀸 𑀲𑀘𑁆𑀘𑀯𑀺𑀯𑀝𑁆𑀝𑁂 𑀜𑀸𑀡𑀁? 𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑀁 𑀲𑀗𑁆𑀔𑀢𑀝𑁆𑀞𑀁 𑀲𑀦𑁆𑀢𑀸𑀧𑀝𑁆𑀞𑀁 𑀯𑀺𑀧𑀭𑀺𑀡𑀸𑀫𑀝𑁆𑀞𑀁 𑀧𑀭𑀺𑀚𑀸𑀦𑀦𑁆𑀢𑁄 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀢𑀣𑀝𑁆𑀞𑁂 𑀧𑀜𑁆𑀜𑀸 𑀲𑀘𑁆𑀘𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑀁 𑀦𑀺𑀤𑀸𑀦𑀝𑁆𑀞𑀁 𑀲𑀜𑁆𑀜𑁄𑀕𑀝𑁆𑀞𑀁 𑀧𑀮𑀺𑀩𑁄𑀥𑀝𑁆𑀞𑀁 𑀧𑀚𑀳𑀦𑁆𑀢𑁄 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀢𑀣𑀝𑁆𑀞𑁂 𑀧𑀜𑁆𑀜𑀸 𑀲𑀘𑁆𑀘𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑀁 𑀯𑀺𑀯𑁂𑀓𑀝𑁆𑀞𑀁 𑀅𑀲𑀗𑁆𑀔𑀢𑀝𑁆𑀞𑀁 𑀅𑀫𑀢𑀝𑁆𑀞𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀢𑀣𑀝𑁆𑀞𑁂 𑀧𑀜𑁆𑀜𑀸 𑀲𑀘𑁆𑀘𑀯𑀺𑀯𑀝𑁆𑀝𑁂 𑀜𑀸𑀡𑀁. 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑀁 𑀳𑁂𑀢𑀼𑀝𑁆𑀞𑀁 𑀤𑀲𑁆𑀲𑀦𑀝𑁆𑀞𑀁 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑀁 𑀪𑀸𑀯𑁂𑀦𑁆𑀢𑁄 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀢𑀣𑀝𑁆𑀞𑁂 𑀧𑀜𑁆𑀜𑀸 𑀲𑀘𑁆𑀘𑀯𑀺𑀯𑀝𑁆𑀝𑁂 𑀜𑀸𑀡𑀁.

𑀲𑀜𑁆𑀜𑀸𑀯𑀺𑀯𑀝𑁆𑀝𑁄, 𑀘𑁂𑀢𑁄𑀯𑀺𑀯𑀝𑁆𑀝𑁄, 𑀘𑀺𑀢𑁆𑀢𑀯𑀺𑀯𑀝𑁆𑀝𑁄, 𑀜𑀸𑀡𑀯𑀺𑀯𑀝𑁆𑀝𑁄, 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄, 𑀲𑀘𑁆𑀘𑀯𑀺𑀯𑀝𑁆𑀝𑁄. 𑀲𑀜𑁆𑀚𑀸𑀦𑀦𑁆𑀢𑁄 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀯𑀝𑁆𑀝𑁄. 𑀘𑁂𑀢𑀬𑀦𑁆𑀢𑁄 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀘𑁂𑀢𑁄𑀯𑀺𑀯𑀝𑁆𑀝𑁄. 𑀯𑀺𑀚𑀸𑀦𑀦𑁆𑀢𑁄 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀘𑀺𑀢𑁆𑀢𑀯𑀺𑀯𑀝𑁆𑀝𑁄. 𑀜𑀸𑀡𑀁 𑀓𑀭𑁄𑀦𑁆𑀢𑁄 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀜𑀸𑀡𑀯𑀺𑀯𑀝𑁆𑀝𑁄. 𑀯𑁄𑀲𑀚𑁆𑀚𑀦𑁆𑀢𑁄 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄. 𑀢𑀣𑀝𑁆𑀞𑁂 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀲𑀘𑁆𑀘𑀯𑀺𑀯𑀝𑁆𑀝𑁄.

𑀬𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄, 𑀢𑀢𑁆𑀣 𑀘𑁂𑀢𑁄𑀯𑀺𑀯𑀝𑁆𑀝𑁄. 𑀬𑀢𑁆𑀣 𑀘𑁂𑀢𑁄𑀯𑀺𑀯𑀝𑁆𑀝𑁄, 𑀢𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄. 𑀬𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄 𑀢𑀢𑁆𑀣 𑀘𑀺𑀢𑁆𑀢𑀯𑀺𑀯𑀝𑁆𑀝𑁄. 𑀬𑀢𑁆𑀣 𑀘𑀺𑀢𑁆𑀢𑀯𑀺𑀯𑀝𑁆𑀝𑁄, 𑀢𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄. 𑀬𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄 𑀘𑀺𑀢𑁆𑀢𑀯𑀺𑀯𑀝𑁆𑀝𑁄, 𑀢𑀢𑁆𑀣 𑀜𑀸𑀡𑀯𑀺𑀯𑀝𑁆𑀝𑁄. 𑀬𑀢𑁆𑀣 𑀜𑀸𑀡𑀯𑀺𑀯𑀝𑁆𑀝𑁄, 𑀢𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄 𑀘𑀺𑀢𑁆𑀢𑀯𑀺𑀯𑀝𑁆𑀝𑁄. 𑀬𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄 𑀘𑀺𑀢𑁆𑀢𑀯𑀺𑀯𑀝𑁆𑀝𑁄 𑀜𑀸𑀡𑀯𑀺𑀯𑀝𑁆𑀝𑁄, 𑀢𑀢𑁆𑀣 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄. 𑀬𑀢𑁆𑀣 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄, 𑀢𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄 𑀘𑀺𑀢𑁆𑀢𑀯𑀺𑀯𑀝𑁆𑀝𑁄 𑀜𑀸𑀡𑀯𑀺𑀯𑀝𑁆𑀝𑁄. 𑀬𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄 𑀘𑀺𑀢𑁆𑀢𑀯𑀺𑀯𑀝𑁆𑀝𑁄 𑀜𑀸𑀡𑀯𑀺𑀯𑀝𑁆𑀝𑁄 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄, 𑀢𑀢𑁆𑀣 𑀲𑀘𑁆𑀘𑀯𑀺𑀯𑀝𑁆𑀝𑁄. 𑀬𑀢𑁆𑀣 𑀲𑀘𑁆𑀘𑀯𑀺𑀯𑀝𑁆𑀝𑁄, 𑀢𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄 𑀘𑀺𑀢𑁆𑀢𑀯𑀺𑀯𑀝𑁆𑀝𑁄 𑀜𑀸𑀡𑀯𑀺𑀯𑀝𑁆𑀝𑁄 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀢𑀣𑀝𑁆𑀞𑁂 𑀧𑀜𑁆𑀜𑀸 𑀲𑀘𑁆𑀘𑀯𑀺𑀯𑀝𑁆𑀝𑁂 𑀜𑀸𑀡𑀁’’.

𑀙𑀯𑀺𑀯𑀝𑁆𑀝𑀜𑀸𑀡𑀦𑀺𑀤𑁆𑀤𑁂𑀲𑁄 𑀦𑀯𑀘𑀢𑁆𑀢𑀸𑀮𑀻𑀲𑀫𑁄.