𑁪. 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑀺𑀤𑁆𑀤𑁂𑀲𑁄

𑁪𑁫. 𑀓𑀣𑀁 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁? 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑀝𑁆𑀞𑀺𑀢𑀺 𑀘 𑀧𑀯𑀢𑁆𑀢𑀝𑁆𑀞𑀺𑀢𑀺 𑀘 𑀦𑀺𑀫𑀺𑀢𑁆𑀢𑀝𑁆𑀞𑀺𑀢𑀺 𑀘 𑀆𑀬𑀽𑀳𑀦𑀝𑁆𑀞𑀺𑀢𑀺 𑀘 𑀲𑀜𑁆𑀜𑁄𑀕𑀝𑁆𑀞𑀺𑀢𑀺 𑀘 𑀧𑀮𑀺𑀩𑁄𑀥𑀝𑁆𑀞𑀺𑀢𑀺 𑀘 𑀲𑀫𑀼𑀤𑀬𑀝𑁆𑀞𑀺𑀢𑀺 𑀘 𑀳𑁂𑀢𑀼𑀝𑁆𑀞𑀺𑀢𑀺 𑀘 𑀧𑀘𑁆𑀘𑀬𑀝𑁆𑀞𑀺𑀢𑀺 𑀘. 𑀇𑀫𑁂𑀳𑀺 𑀦𑀯𑀳𑀸𑀓𑀸𑀭𑁂𑀳𑀺 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄, 𑀲𑀗𑁆𑀔𑀸𑀭𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁… 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑀝𑁆𑀞𑀺𑀢𑀺 𑀘 𑀧𑀯𑀢𑁆𑀢𑀝𑁆𑀞𑀺𑀢𑀺 𑀘 𑀦𑀺𑀫𑀺𑀢𑁆𑀢𑀝𑁆𑀞𑀺𑀢𑀺 𑀘 𑀆𑀬𑀽𑀳𑀦𑀝𑁆𑀞𑀺𑀢𑀺 𑀘 𑀲𑀜𑁆𑀜𑁄𑀕𑀝𑁆𑀞𑀺𑀢𑀺 𑀘 𑀧𑀮𑀺𑀩𑁄𑀥𑀝𑁆𑀞𑀺𑀢𑀺 𑀘 𑀲𑀫𑀼𑀤𑀬𑀝𑁆𑀞𑀺𑀢𑀺 𑀘 𑀳𑁂𑀢𑀼𑀝𑁆𑀞𑀺𑀢𑀺 𑀘 𑀧𑀘𑁆𑀘𑀬𑀝𑁆𑀞𑀺𑀢𑀺 𑀘. 𑀇𑀫𑁂𑀳𑀺 𑀦𑀯𑀳𑀸𑀓𑀸𑀭𑁂𑀳𑀺 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄, 𑀲𑀗𑁆𑀔𑀸𑀭𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁.

𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀲𑁆𑀲…𑀧𑁂… 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀲𑁆𑀲… 𑀦𑀸𑀫𑀭𑀽𑀧𑀁 𑀲𑀴𑀸𑀬𑀢𑀦𑀲𑁆𑀲… 𑀲𑀴𑀸𑀬𑀢𑀦𑀁 𑀨𑀲𑁆𑀲𑀲𑁆𑀲… 𑀨𑀲𑁆𑀲𑁄 𑀯𑁂𑀤𑀦𑀸𑀬… 𑀯𑁂𑀤𑀦𑀸 𑀢𑀡𑁆𑀳𑀸𑀬… 𑀢𑀡𑁆𑀳𑀸 𑀉𑀧𑀸𑀤𑀸𑀦𑀲𑁆𑀲… 𑀉𑀧𑀸𑀤𑀸𑀦𑀁 𑀪𑀯𑀲𑁆𑀲… 𑀪𑀯𑁄 𑀚𑀸𑀢𑀺𑀬𑀸… 𑀚𑀸𑀢𑀺 𑀚𑀭𑀸𑀫𑀭𑀡𑀲𑁆𑀲 𑀉𑀧𑁆𑀧𑀸𑀤𑀝𑁆𑀞𑀺𑀢𑀺 𑀘 𑀧𑀯𑀢𑁆𑀢𑀝𑁆𑀞𑀺𑀢𑀺 𑀘 𑀦𑀺𑀫𑀺𑀢𑁆𑀢𑀝𑁆𑀞𑀺𑀢𑀺 𑀘 𑀆𑀬𑀽𑀳𑀦𑀝𑁆𑀞𑀺𑀢𑀺 𑀘 𑀲𑀜𑁆𑀜𑁄𑀕𑀝𑁆𑀞𑀺𑀢𑀺 𑀘 𑀧𑀮𑀺𑀩𑁄𑀥𑀝𑁆𑀞𑀺𑀢𑀺 𑀘 𑀲𑀫𑀼𑀤𑀬𑀝𑁆𑀞𑀺𑀢𑀺 𑀘 𑀳𑁂𑀢𑀼𑀝𑁆𑀞𑀺𑀢𑀺 𑀘 𑀧𑀘𑁆𑀘𑀬𑀝𑁆𑀞𑀺𑀢𑀺 𑀘. 𑀇𑀫𑁂𑀳𑀺 𑀦𑀯𑀳𑀸𑀓𑀸𑀭𑁂𑀳𑀺 𑀚𑀸𑀢𑀺 𑀧𑀘𑁆𑀘𑀬𑁄, 𑀚𑀭𑀸𑀫𑀭𑀡𑀁 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀁. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁… 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀚𑀸𑀢𑀺 𑀚𑀭𑀸𑀫𑀭𑀡𑀲𑁆𑀲 𑀉𑀧𑁆𑀧𑀸𑀤𑀝𑁆𑀞𑀺𑀢𑀺 𑀘 𑀧𑀯𑀢𑁆𑀢𑀝𑁆𑀞𑀺𑀢𑀺 𑀘 𑀦𑀺𑀫𑀺𑀢𑁆𑀢𑀝𑁆𑀞𑀺𑀢𑀺 𑀘 𑀆𑀬𑀽𑀳𑀦𑀝𑁆𑀞𑀺𑀢𑀺 𑀘 𑀲𑀜𑁆𑀜𑁄𑀕𑀝𑁆𑀞𑀺𑀢𑀺 𑀘 𑀧𑀮𑀺𑀩𑁄𑀥𑀝𑁆𑀞𑀺𑀢𑀺 𑀘 𑀲𑀫𑀼𑀤𑀬𑀝𑁆𑀞𑀺𑀢𑀺 𑀘 𑀳𑁂𑀢𑀼𑀝𑁆𑀞𑀺𑀢𑀺 𑀘 𑀧𑀘𑁆𑀘𑀬𑀝𑁆𑀞𑀺𑀢𑀺 𑀘. 𑀇𑀫𑁂𑀳𑀺 𑀦𑀯𑀳𑀸𑀓𑀸𑀭𑁂𑀳𑀺 𑀚𑀸𑀢𑀺 𑀧𑀘𑁆𑀘𑀬𑁄, 𑀚𑀭𑀸𑀫𑀭𑀡𑀁 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀁. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁.

𑁪𑁬. 𑀅𑀯𑀺𑀚𑁆𑀚𑀸 𑀳𑁂𑀢𑀼, 𑀲𑀗𑁆𑀔𑀸𑀭𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁… 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀅𑀯𑀺𑀚𑁆𑀚𑀸 𑀳𑁂𑀢𑀼, 𑀲𑀗𑁆𑀔𑀸𑀭𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁.

𑀲𑀗𑁆𑀔𑀸𑀭𑀸 𑀳𑁂𑀢𑀼, 𑀯𑀺𑀜𑁆𑀜𑀸𑀡𑀁 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀳𑁂𑀢𑀼, 𑀦𑀸𑀫𑀭𑀽𑀧𑀁 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀁… 𑀦𑀸𑀫𑀭𑀽𑀧𑀁 𑀳𑁂𑀢𑀼, 𑀲𑀴𑀸𑀬𑀢𑀦𑀁 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀁… 𑀲𑀴𑀸𑀬𑀢𑀦𑀁 𑀳𑁂𑀢𑀼, 𑀨𑀲𑁆𑀲𑁄 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑁄… 𑀨𑀲𑁆𑀲𑁄 𑀳𑁂𑀢𑀼, 𑀯𑁂𑀤𑀦𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸… 𑀯𑁂𑀤𑀦𑀸 𑀳𑁂𑀢𑀼, 𑀢𑀡𑁆𑀳𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸… 𑀢𑀡𑁆𑀳𑀸 𑀳𑁂𑀢𑀼, 𑀉𑀧𑀸𑀤𑀸𑀦𑀁 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀁… 𑀉𑀧𑀸𑀤𑀸𑀦𑀁 𑀳𑁂𑀢𑀼, 𑀪𑀯𑁄 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑁄… 𑀪𑀯𑁄 𑀳𑁂𑀢𑀼, 𑀚𑀸𑀢𑀺 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸… 𑀚𑀸𑀢𑀺 𑀳𑁂𑀢𑀼, 𑀚𑀭𑀸𑀫𑀭𑀡𑀁 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀁. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁… 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀚𑀸𑀢𑀺 𑀳𑁂𑀢𑀼, 𑀚𑀭𑀸𑀫𑀭𑀡𑀁 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀁. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁.

𑀅𑀯𑀺𑀚𑁆𑀚𑀸 𑀧𑀝𑀺𑀘𑁆𑀘𑀸, 𑀲𑀗𑁆𑀔𑀸𑀭𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁… 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀅𑀯𑀺𑀚𑁆𑀚𑀸 𑀧𑀝𑀺𑀘𑁆𑀘𑀸, 𑀲𑀗𑁆𑀔𑀸𑀭𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁.

𑀲𑀗𑁆𑀔𑀸𑀭𑀸 𑀧𑀝𑀺𑀘𑁆𑀘𑀸, 𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘𑀸, 𑀦𑀸𑀫𑀭𑀽𑀧𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁… 𑀦𑀸𑀫𑀭𑀽𑀧𑀁 𑀧𑀝𑀺𑀘𑁆𑀘𑀸, 𑀲𑀴𑀸𑀬𑀢𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁… 𑀲𑀴𑀸𑀬𑀢𑀦𑀁 𑀧𑀝𑀺𑀘𑁆𑀘𑀸, 𑀨𑀲𑁆𑀲𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄… 𑀨𑀲𑁆𑀲𑁄 𑀧𑀝𑀺𑀘𑁆𑀘𑀸, 𑀯𑁂𑀤𑀦𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸… 𑀯𑁂𑀤𑀦𑀸 𑀧𑀝𑀺𑀘𑁆𑀘𑀸, 𑀢𑀡𑁆𑀳𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸… 𑀢𑀡𑁆𑀳𑀸 𑀧𑀝𑀺𑀘𑁆𑀘𑀸, 𑀉𑀧𑀸𑀤𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁… 𑀉𑀧𑀸𑀤𑀸𑀦𑀁 𑀧𑀝𑀺𑀘𑁆𑀘𑀸, 𑀪𑀯𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄… 𑀪𑀯𑁄 𑀧𑀝𑀺𑀘𑁆𑀘𑀸, 𑀚𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸… 𑀚𑀸𑀢𑀺 𑀧𑀝𑀺𑀘𑁆𑀘𑀸, 𑀚𑀭𑀸𑀫𑀭𑀡𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁… 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀚𑀸𑀢𑀺 𑀧𑀝𑀺𑀘𑁆𑀘𑀸, 𑀚𑀭𑀸𑀫𑀭𑀡𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁.

𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄, 𑀲𑀗𑁆𑀔𑀸𑀭𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁… 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄, 𑀲𑀗𑁆𑀔𑀸𑀭𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁.

𑀲𑀗𑁆𑀔𑀸𑀭𑀸 𑀧𑀘𑁆𑀘𑀬𑀸, 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑁄, 𑀦𑀸𑀫𑀭𑀽𑀧𑀁 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀁… 𑀦𑀸𑀫𑀭𑀽𑀧𑀁 𑀧𑀘𑁆𑀘𑀬𑁄, 𑀲𑀴𑀸𑀬𑀢𑀦𑀁 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀁… 𑀲𑀴𑀸𑀬𑀢𑀦𑀁 𑀧𑀘𑁆𑀘𑀬𑁄, 𑀨𑀲𑁆𑀲𑁄 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑁄… 𑀨𑀲𑁆𑀲𑁄 𑀧𑀘𑁆𑀘𑀬𑁄, 𑀯𑁂𑀤𑀦𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸… 𑀯𑁂𑀤𑀦𑀸 𑀧𑀘𑁆𑀘𑀬𑁄, 𑀢𑀡𑁆𑀳𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸… 𑀢𑀡𑁆𑀳𑀸 𑀧𑀘𑁆𑀘𑀬𑁄, 𑀉𑀧𑀸𑀤𑀸𑀦𑀁 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀁… 𑀉𑀧𑀸𑀤𑀸𑀦𑀁 𑀧𑀘𑁆𑀘𑀬𑁄, 𑀪𑀯𑁄 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑁄… 𑀪𑀯𑁄 𑀧𑀘𑁆𑀘𑀬𑁄, 𑀚𑀸𑀢𑀺 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸… 𑀚𑀸𑀢𑀺 𑀧𑀘𑁆𑀘𑀬𑁄, 𑀚𑀭𑀸𑀫𑀭𑀡𑀁 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀁. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁… 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀚𑀸𑀢𑀺 𑀧𑀘𑁆𑀘𑀬𑁄, 𑀚𑀭𑀸𑀫𑀭𑀡𑀁 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀁. 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑁋 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁.

𑁪𑁭. 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸, 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸, 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸, 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀁, 𑀘𑁂𑀢𑀦𑀸 𑀪𑀯𑁄. 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀇𑀥 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸. 𑀇𑀥 𑀧𑀝𑀺𑀲𑀦𑁆𑀥𑀺 𑀯𑀺𑀜𑁆𑀜𑀸𑀡𑀁, 𑀑𑀓𑁆𑀓𑀦𑁆𑀢𑀺 𑀦𑀸𑀫𑀭𑀽𑀧𑀁, 𑀧𑀲𑀸𑀤𑁄 𑀆𑀬𑀢𑀦𑀁, 𑀨𑀼𑀝𑁆𑀞𑁄 𑀨𑀲𑁆𑀲𑁄, 𑀯𑁂𑀤𑀬𑀺𑀢𑀁 𑀯𑁂𑀤𑀦𑀸. 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀇𑀥𑀼𑀧𑀧𑀢𑁆𑀢𑀺𑀪𑀯𑀲𑁆𑀫𑀺𑀁 𑀧𑀼𑀭𑁂𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀸. 𑀇𑀥 𑀧𑀭𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸, 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸, 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀁, 𑀘𑁂𑀢𑀦𑀸 𑀪𑀯𑁄. 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀇𑀥 𑀓𑀫𑁆𑀫𑀪𑀯𑀲𑁆𑀫𑀺𑀁 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸. 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺 𑀯𑀺𑀜𑁆𑀜𑀸𑀡𑀁, 𑀑𑀓𑁆𑀓𑀦𑁆𑀢𑀺 𑀦𑀸𑀫𑀭𑀽𑀧𑀁, 𑀧𑀲𑀸𑀤𑁄 𑀆𑀬𑀢𑀦𑀁, 𑀨𑀼𑀝𑁆𑀞𑁄 𑀨𑀲𑁆𑀲𑁄, 𑀯𑁂𑀤𑀬𑀺𑀢𑀁 𑀯𑁂𑀤𑀦𑀸. 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀆𑀬𑀢𑀺𑀁 𑀉𑀧𑀧𑀢𑁆𑀢𑀺𑀪𑀯𑀲𑁆𑀫𑀺𑀁 𑀇𑀥 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀸. 𑀇𑀢𑀺𑀫𑁂 𑀘𑀢𑀼𑀲𑀗𑁆𑀔𑁂𑀧𑁂 𑀢𑀬𑁄 𑀅𑀤𑁆𑀥𑁂 𑀢𑀺𑀲𑀦𑁆𑀥𑀺𑀁 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀅𑀜𑁆𑀜𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁’’.

𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑀺𑀤𑁆𑀤𑁂𑀲𑁄 𑀘𑀢𑀼𑀢𑁆𑀣𑁄.