𑁩𑁮. 𑀯𑀻𑀭𑀺𑀬𑀸𑀭𑀫𑁆𑀪𑀜𑀸𑀡𑀦𑀺𑀤𑁆𑀤𑁂𑀲𑁄

𑁮𑁯. 𑀓𑀣𑀁 𑀅𑀲𑀮𑁆𑀮𑀻𑀦𑀢𑁆𑀢𑀧𑀳𑀺𑀢𑀢𑁆𑀢𑀧𑀕𑁆𑀕𑀳𑀝𑁆𑀞𑁂 𑀧𑀜𑁆𑀜𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀜𑀸𑀡𑀁? 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀅𑀲𑀮𑁆𑀮𑀻𑀦𑀢𑁆𑀢𑀧𑀳𑀺𑀢𑀢𑁆𑀢𑀧𑀕𑁆𑀕𑀳𑀝𑁆𑀞𑁂 𑀧𑀜𑁆𑀜𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀜𑀸𑀡𑀁. 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀅𑀲𑀮𑁆𑀮𑀻𑀦𑀢𑁆𑀢𑀧𑀳𑀺𑀢𑀢𑁆𑀢𑀧𑀕𑁆𑀕𑀳𑀝𑁆𑀞𑁂 𑀧𑀜𑁆𑀜𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀜𑀸𑀡𑀁. 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀅𑀲𑀮𑁆𑀮𑀻𑀦𑀢𑁆𑀢𑀧𑀳𑀺𑀢𑀢𑁆𑀢𑀧𑀕𑁆𑀕𑀳𑀝𑁆𑀞𑁂 𑀧𑀜𑁆𑀜𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀜𑀸𑀡𑀁. 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀅𑀲𑀮𑁆𑀮𑀻𑀦𑀢𑁆𑀢𑀧𑀳𑀺𑀢𑀢𑁆𑀢𑀧𑀕𑁆𑀕𑀳𑀝𑁆𑀞𑁂 𑀧𑀜𑁆𑀜𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀜𑀸𑀡𑀁.

𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀅𑀦𑀼𑀧𑁆𑀧𑀸𑀤𑀸𑀬 𑀅𑀲𑀮𑁆𑀮𑀻𑀦𑀢𑁆𑀢𑀧𑀳𑀺𑀢𑀢𑁆𑀢𑀧𑀕𑁆𑀕𑀳𑀝𑁆𑀞𑁂 𑀧𑀜𑁆𑀜𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀜𑀸𑀡𑀁. 𑀉𑀧𑁆𑀧𑀦𑁆𑀦𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬 𑀅𑀲𑀮𑁆𑀮𑀻𑀦𑀢𑁆𑀢𑀧𑀳𑀺𑀢𑀢𑁆𑀢𑀧𑀕𑁆𑀕𑀳𑀝𑁆𑀞𑁂 𑀧𑀜𑁆𑀜𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀜𑀸𑀡𑀁. 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑁆𑀲 𑀉𑀧𑁆𑀧𑀸𑀤𑀸𑀬 𑀅𑀲𑀮𑁆𑀮𑀻𑀦𑀢𑁆𑀢𑀧𑀳𑀺𑀢𑀢𑁆𑀢𑀧𑀕𑁆𑀕𑀳𑀝𑁆𑀞𑁂 𑀧𑀜𑁆𑀜𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀜𑀸𑀡𑀁. 𑀉𑀧𑁆𑀧𑀦𑁆𑀦𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀅𑀲𑀮𑁆𑀮𑀻𑀦𑀢𑁆𑀢𑀧𑀳𑀺𑀢𑀢𑁆𑀢𑀧𑀕𑁆𑀕𑀳𑀝𑁆𑀞𑁂 𑀧𑀜𑁆𑀜𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀜𑀸𑀡𑀁…𑀧𑁂….

𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀅𑀲𑀮𑁆𑀮𑀻𑀦𑀢𑁆𑀢𑀧𑀳𑀺𑀢𑀢𑁆𑀢𑀧𑀕𑁆𑀕𑀳𑀝𑁆𑀞𑁂 𑀧𑀜𑁆𑀜𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀜𑀸𑀡𑀁. 𑀉𑀧𑁆𑀧𑀦𑁆𑀦𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸𑀬 𑀅𑀲𑀮𑁆𑀮𑀻𑀦𑀢𑁆𑀢𑀧𑀳𑀺𑀢𑀢𑁆𑀢𑀧𑀕𑁆𑀕𑀳𑀝𑁆𑀞𑁂 𑀧𑀜𑁆𑀜𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀜𑀸𑀡𑀁…𑀧𑁂… 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀅𑀲𑀮𑁆𑀮𑀻𑀦𑀢𑁆𑀢𑀧𑀳𑀺𑀢𑀢𑁆𑀢𑀧𑀕𑁆𑀕𑀳𑀝𑁆𑀞𑁂 𑀧𑀜𑁆𑀜𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀜𑀸𑀡𑀁. 𑀉𑀧𑁆𑀧𑀦𑁆𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀅𑀲𑀮𑁆𑀮𑀻𑀦𑀢𑁆𑀢𑀧𑀳𑀺𑀢𑀢𑁆𑀢𑀧𑀕𑁆𑀕𑀳𑀝𑁆𑀞𑁂 𑀧𑀜𑁆𑀜𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀜𑀸𑀡𑀁. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀲𑀮𑁆𑀮𑀻𑀦𑀢𑁆𑀢𑀧𑀳𑀺𑀢𑀢𑁆𑀢𑀧𑀕𑁆𑀕𑀳𑀝𑁆𑀞𑁂 𑀧𑀜𑁆𑀜𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀜𑀸𑀡𑀁’’.

𑀯𑀻𑀭𑀺𑀬𑀸𑀭𑀫𑁆𑀪𑀜𑀸𑀡𑀦𑀺𑀤𑁆𑀤𑁂𑀲𑁄 𑀅𑀝𑁆𑀞𑀢𑀺𑀁𑀲𑀢𑀺𑀫𑁄.