𑁩𑁯. 𑀅𑀢𑁆𑀣𑀲𑀦𑁆𑀤𑀲𑁆𑀲𑀦𑀜𑀸𑀡𑀦𑀺𑀤𑁆𑀤𑁂𑀲𑁄

𑁯𑁦. 𑀓𑀣𑀁 𑀦𑀸𑀦𑀸𑀥𑀫𑁆𑀫𑀧𑁆𑀧𑀓𑀸𑀲𑀦𑀢𑀸 𑀧𑀜𑁆𑀜𑀸 𑀅𑀢𑁆𑀣𑀲𑀦𑁆𑀤𑀲𑁆𑀲𑀦𑁂 𑀜𑀸𑀡𑀁? 𑀦𑀸𑀦𑀸𑀥𑀫𑁆𑀫𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸, 𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀅𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸.

𑀧𑀓𑀸𑀲𑀦𑀢𑀸𑀢𑀺 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀧𑀓𑀸𑀲𑁂𑀢𑀺, 𑀭𑀽𑀧𑀁 𑀤𑀼𑀓𑁆𑀔𑀢𑁄 𑀧𑀓𑀸𑀲𑁂𑀢𑀺, 𑀭𑀽𑀧𑀁 𑀅𑀦𑀢𑁆𑀢𑀢𑁄 𑀧𑀓𑀸𑀲𑁂𑀢𑀺. 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀢𑁄 𑀧𑀓𑀸𑀲𑁂𑀢𑀺, 𑀚𑀭𑀸𑀫𑀭𑀡𑀁 𑀤𑀼𑀓𑁆𑀔𑀢𑁄 𑀧𑀓𑀸𑀲𑁂𑀢𑀺, 𑀚𑀭𑀸𑀫𑀭𑀡𑀁 𑀅𑀦𑀢𑁆𑀢𑀢𑁄 𑀧𑀓𑀸𑀲𑁂𑀢𑀺.

𑀅𑀢𑁆𑀣𑀲𑀦𑁆𑀤𑀲𑁆𑀲𑀦𑁂𑀢𑀺 𑀓𑀸𑀫𑀘𑁆𑀙𑀦𑁆𑀤𑀁 𑀧𑀚𑀳𑀦𑁆𑀢𑁄 𑀦𑁂𑀓𑁆𑀔𑀫𑁆𑀫𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑀺. 𑀩𑁆𑀬𑀸𑀧𑀸𑀤𑀁 𑀧𑀚𑀳𑀦𑁆𑀢𑁄 𑀅𑀩𑁆𑀬𑀸𑀧𑀸𑀤𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑀺. 𑀣𑀺𑀦𑀫𑀺𑀤𑁆𑀥𑀁 𑀧𑀚𑀳𑀦𑁆𑀢𑁄 𑀆𑀮𑁄𑀓𑀲𑀜𑁆𑀜𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑀺. 𑀉𑀤𑁆𑀥𑀘𑁆𑀘𑀁 𑀧𑀚𑀳𑀦𑁆𑀢𑁄 𑀅𑀯𑀺𑀓𑁆𑀔𑁂𑀧𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑀺. 𑀯𑀺𑀘𑀺𑀓𑀺𑀘𑁆𑀙𑀁 𑀧𑀚𑀳𑀦𑁆𑀢𑁄 𑀥𑀫𑁆𑀫𑀯𑀯𑀢𑁆𑀣𑀸𑀦𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑀺. 𑀅𑀯𑀺𑀚𑁆𑀚𑀁 𑀧𑀚𑀳𑀦𑁆𑀢𑁄 𑀜𑀸𑀡𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑀺. 𑀅𑀭𑀢𑀺𑀁 𑀧𑀚𑀳𑀦𑁆𑀢𑁄 𑀧𑀸𑀫𑁄𑀚𑁆𑀚𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑀺. 𑀦𑀻𑀯𑀭𑀡𑁂 𑀧𑀚𑀳𑀦𑁆𑀢𑁄 𑀧𑀞𑀫𑀛𑀸𑀦𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑀺 …𑀧𑁂… 𑀲𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑀺. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀦𑀸𑀦𑀸𑀥𑀫𑁆𑀫𑀧𑀓𑀸𑀲𑀦𑀢𑀸 𑀧𑀜𑁆𑀜𑀸 𑀅𑀢𑁆𑀣𑀲𑀦𑁆𑀤𑀲𑁆𑀲𑀦𑁂 𑀜𑀸𑀡𑀁’’.

𑀅𑀢𑁆𑀣𑀲𑀦𑁆𑀤𑀲𑁆𑀲𑀦𑀜𑀸𑀡𑀦𑀺𑀤𑁆𑀤𑁂𑀲𑁄 𑀦𑀯𑀢𑀺𑀁𑀲𑀢𑀺𑀫𑁄.