𑁩𑁭. 𑀲𑀮𑁆𑀮𑁂𑀔𑀝𑁆𑀞𑀜𑀸𑀡𑀦𑀺𑀤𑁆𑀤𑁂𑀲𑁄

𑁮𑁮. 𑀓𑀣𑀁 𑀧𑀼𑀣𑀼𑀦𑀸𑀦𑀢𑁆𑀢𑁂𑀓𑀢𑁆𑀢𑀢𑁂𑀚𑀧𑀭𑀺𑀬𑀸𑀤𑀸𑀦𑁂 𑀧𑀜𑁆𑀜𑀸 𑀲𑀮𑁆𑀮𑁂𑀔𑀝𑁆𑀞𑁂 [𑀧𑀼𑀣𑀼𑀦𑀸𑀦𑀢𑁆𑀢𑁂𑀓𑀢𑁆𑀢𑀢𑁂𑀚𑀧𑀭𑀺𑀬𑀸𑀤𑀸𑀦𑁂 (𑀓.)] 𑀜𑀸𑀡𑀁? 𑀧𑀼𑀣𑀽𑀢𑀺 𑁋 𑀭𑀸𑀕𑁄 𑀧𑀼𑀣𑀼, 𑀤𑁄𑀲𑁄 𑀧𑀼𑀣𑀼, 𑀫𑁄𑀳𑁄 𑀧𑀼𑀣𑀼, 𑀓𑁄𑀥𑁄…𑀧𑁂… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀇𑀲𑁆𑀲𑀸… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀸… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑁄… 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄… 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑀸… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑀸.

𑀦𑀸𑀦𑀢𑁆𑀢𑁂𑀓𑀢𑁆𑀢𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑁄 𑀦𑀸𑀦𑀢𑁆𑀢𑀁, 𑀦𑁂𑀓𑁆𑀔𑀫𑁆𑀫𑀁 𑀏𑀓𑀢𑁆𑀢𑀁. 𑀩𑁆𑀬𑀸𑀧𑀸𑀤𑁄 𑀦𑀸𑀦𑀢𑁆𑀢𑀁, 𑀅𑀩𑁆𑀬𑀸𑀧𑀸𑀤𑁄 𑀏𑀓𑀢𑁆𑀢𑀁. 𑀣𑀺𑀦𑀫𑀺𑀤𑁆𑀥𑀁 𑀦𑀸𑀦𑀢𑁆𑀢𑀁, 𑀆𑀮𑁄𑀓𑀲𑀜𑁆𑀜𑀸 𑀏𑀓𑀢𑁆𑀢𑀁. 𑀉𑀤𑁆𑀥𑀘𑁆𑀘𑀁 𑀦𑀸𑀦𑀢𑁆𑀢𑀁, 𑀅𑀯𑀺𑀓𑁆𑀔𑁂𑀧𑁄 𑀏𑀓𑀢𑁆𑀢𑀁. 𑀯𑀺𑀘𑀺𑀓𑀺𑀘𑁆𑀙𑀸 𑀦𑀸𑀦𑀢𑁆𑀢𑀁, 𑀥𑀫𑁆𑀫𑀯𑀯𑀢𑁆𑀣𑀸𑀦𑀁 𑀏𑀓𑀢𑁆𑀢𑀁. 𑀅𑀯𑀺𑀚𑁆𑀚𑀸 𑀦𑀸𑀦𑀢𑁆𑀢𑀁, 𑀜𑀸𑀡𑀁 𑀏𑀓𑀢𑁆𑀢𑀁. 𑀅𑀭𑀢𑀺 𑀦𑀸𑀦𑀢𑁆𑀢𑀁, 𑀧𑀸𑀫𑁄𑀚𑁆𑀚𑀁 𑀏𑀓𑀢𑁆𑀢𑀁. 𑀦𑀻𑀯𑀭𑀡𑀸 𑀦𑀸𑀦𑀢𑁆𑀢𑀁, 𑀧𑀞𑀫𑀁 𑀛𑀸𑀦𑀁 𑀏𑀓𑀢𑁆𑀢𑀁…𑀧𑁂… 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀦𑀸𑀦𑀢𑁆𑀢𑀁, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀏𑀓𑀢𑁆𑀢𑀁.

𑀢𑁂𑀚𑁄𑀢𑀺 𑀧𑀜𑁆𑀘 𑀢𑁂𑀚𑀸 𑁋 𑀘𑀭𑀡𑀢𑁂𑀚𑁄, 𑀕𑀼𑀡𑀢𑁂𑀚𑁄, 𑀧𑀜𑁆𑀜𑀸𑀢𑁂𑀚𑁄, 𑀧𑀼𑀜𑁆𑀜𑀢𑁂𑀚𑁄, 𑀥𑀫𑁆𑀫𑀢𑁂𑀚𑁄. 𑀘𑀭𑀡𑀢𑁂𑀚𑁂𑀦 𑀢𑁂𑀚𑀺𑀢𑀢𑁆𑀢𑀸 𑀤𑀼𑀲𑁆𑀲𑀻𑀮𑁆𑀬𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀕𑀼𑀡𑀢𑁂𑀚𑁂𑀦 𑀢𑁂𑀚𑀺𑀢𑀢𑁆𑀢𑀸 𑀅𑀕𑀼𑀡𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀧𑀜𑁆𑀜𑀸𑀢𑁂𑀚𑁂𑀦 𑀢𑁂𑀚𑀺𑀢𑀢𑁆𑀢𑀸 𑀤𑀼𑀧𑁆𑀧𑀜𑁆𑀜𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀧𑀼𑀜𑁆𑀜𑀢𑁂𑀚𑁂𑀦 𑀢𑁂𑀚𑀺𑀢𑀢𑁆𑀢𑀸 𑀅𑀧𑀼𑀜𑁆𑀜𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀥𑀫𑁆𑀫𑀢𑁂𑀚𑁂𑀦 𑀢𑁂𑀚𑀺𑀢𑀢𑁆𑀢𑀸 𑀅𑀥𑀫𑁆𑀫𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑀢𑀺.

𑀲𑀮𑁆𑀮𑁂𑀔𑁄𑀢𑀺 𑀓𑀸𑀫𑀘𑁆𑀙𑀦𑁆𑀤𑁄 𑀅𑀲𑀮𑁆𑀮𑁂𑀔𑁄, 𑀦𑁂𑀓𑁆𑀔𑀫𑁆𑀫𑀁 𑀲𑀮𑁆𑀮𑁂𑀔𑁄. 𑀩𑁆𑀬𑀸𑀧𑀸𑀤𑁄 𑀅𑀲𑀮𑁆𑀮𑁂𑀔𑁄, 𑀅𑀩𑁆𑀬𑀸𑀧𑀸𑀤𑁄 𑀲𑀮𑁆𑀮𑁂𑀔𑁄. 𑀣𑀺𑀦𑀫𑀺𑀤𑁆𑀥𑀁 𑀅𑀲𑀮𑁆𑀮𑁂𑀔𑁄, 𑀆𑀮𑁄𑀓𑀲𑀜𑁆𑀜𑀸 𑀲𑀮𑁆𑀮𑁂𑀔𑁄. 𑀉𑀤𑁆𑀥𑀘𑁆𑀘𑀁 𑀅𑀲𑀮𑁆𑀮𑁂𑀔𑁄, 𑀅𑀯𑀺𑀓𑁆𑀔𑁂𑀧𑁄 𑀲𑀮𑁆𑀮𑁂𑀔𑁄. 𑀯𑀺𑀘𑀺𑀓𑀺𑀘𑁆𑀙𑀸 𑀅𑀲𑀮𑁆𑀮𑁂𑀔𑁄, 𑀥𑀫𑁆𑀫𑀯𑀯𑀢𑁆𑀣𑀸𑀦𑀁 𑀲𑀮𑁆𑀮𑁂𑀔𑁄. 𑀅𑀯𑀺𑀚𑁆𑀚𑀸 𑀅𑀲𑀮𑁆𑀮𑁂𑀔𑁄, 𑀜𑀸𑀡𑀁 𑀲𑀮𑁆𑀮𑁂𑀔𑁄. 𑀅𑀭𑀢𑀺 𑀅𑀲𑀮𑁆𑀮𑁂𑀔𑁄, 𑀧𑀸𑀫𑁄𑀚𑁆𑀚𑀁 𑀲𑀮𑁆𑀮𑁂𑀔𑁄. 𑀦𑀻𑀯𑀭𑀡𑀸 𑀅𑀲𑀮𑁆𑀮𑁂𑀔𑁄, 𑀧𑀞𑀫𑀁 𑀛𑀸𑀦𑀁 𑀲𑀮𑁆𑀮𑁂𑀔𑁄…𑀧𑁂… 𑀲𑀩𑁆𑀩𑀓𑀺𑀮𑁂𑀲𑀸 𑀅𑀲𑀮𑁆𑀮𑁂𑀔𑁄, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀲𑀮𑁆𑀮𑁂𑀔𑁄. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀼𑀣𑀼𑀦𑀸𑀦𑀢𑁆𑀢𑀢𑁂𑀚𑀧𑀭𑀺𑀬𑀸𑀤𑀸𑀦𑁂 𑀧𑀜𑁆𑀜𑀸 𑀲𑀮𑁆𑀮𑁂𑀔𑀝𑁆𑀞𑁂 𑀜𑀸𑀡𑀁’’.

𑀲𑀮𑁆𑀮𑁂𑀔𑀝𑁆𑀞𑀜𑀸𑀡𑀦𑀺𑀤𑁆𑀤𑁂𑀲𑁄 𑀲𑀢𑁆𑀢𑀢𑀺𑀁𑀲𑀢𑀺𑀫𑁄.