𑁩𑁨. 𑀆𑀦𑀦𑁆𑀢𑀭𑀺𑀓𑀲𑀫𑀸𑀥𑀺𑀜𑀸𑀡𑀦𑀺𑀤𑁆𑀤𑁂𑀲𑁄

𑁮𑁦. 𑀓𑀣𑀁 𑀅𑀯𑀺𑀓𑁆𑀔𑁂𑀧𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀆𑀲𑀯𑀲𑀫𑀼𑀘𑁆𑀙𑁂𑀤𑁂 𑀧𑀜𑁆𑀜𑀸 𑀆𑀦𑀦𑁆𑀢𑀭𑀺𑀓𑀲𑀫𑀸𑀥𑀺𑀫𑁆𑀳𑀺 𑀜𑀸𑀡𑀁? 𑀦𑁂𑀓𑁆𑀔𑀫𑁆𑀫𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺. 𑀢𑀲𑁆𑀲 𑀲𑀫𑀸𑀥𑀺𑀲𑁆𑀲 𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺 𑀜𑀸𑀡𑀁. 𑀢𑁂𑀦 𑀜𑀸𑀡𑁂𑀦 𑀆𑀲𑀯𑀸 𑀔𑀻𑀬𑀦𑁆𑀢𑀺. 𑀇𑀢𑀺 𑀧𑀞𑀫𑀁 𑀲𑀫𑀣𑁄, 𑀧𑀘𑁆𑀙𑀸 𑀜𑀸𑀡𑀁. 𑀢𑁂𑀦 𑀜𑀸𑀡𑁂𑀦 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀯𑀺𑀓𑁆𑀔𑁂𑀧𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀆𑀲𑀯𑀲𑀫𑀼𑀘𑁆𑀙𑁂𑀤𑁂 𑀧𑀜𑁆𑀜𑀸 𑀆𑀦𑀦𑁆𑀢𑀭𑀺𑀓𑀲𑀫𑀸𑀥𑀺𑀫𑁆𑀳𑀺 𑀜𑀸𑀡𑀁’’.

𑀆𑀲𑀯𑀸𑀢𑀺 𑀓𑀢𑀫𑁂 𑀢𑁂 𑀆𑀲𑀯𑀸? 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀤𑀺𑀝𑁆𑀞𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄. 𑀓𑀢𑁆𑀣𑁂𑀢𑁂 𑀆𑀲𑀯𑀸 𑀔𑀻𑀬𑀦𑁆𑀢𑀺? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀅𑀦𑀯𑀲𑁂𑀲𑁄 𑀤𑀺𑀝𑁆𑀞𑀸𑀲𑀯𑁄 𑀔𑀻𑀬𑀢𑀺, 𑀅𑀧𑀸𑀬𑀕𑀫𑀦𑀻𑀬𑁄 𑀓𑀸𑀫𑀸𑀲𑀯𑁄 𑀔𑀻𑀬𑀢𑀺, 𑀅𑀧𑀸𑀬𑀕𑀫𑀦𑀻𑀬𑁄 𑀪𑀯𑀸𑀲𑀯𑁄 𑀔𑀻𑀬𑀢𑀺, 𑀅𑀧𑀸𑀬𑀕𑀫𑀦𑀻𑀬𑁄 𑀅𑀯𑀺𑀚𑁆𑀚𑀸𑀲𑀯𑁄 𑀔𑀻𑀬𑀢𑀺. 𑀏𑀢𑁆𑀣𑁂𑀢𑁂 𑀆𑀲𑀯𑀸 𑀔𑀻𑀬𑀦𑁆𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀑𑀴𑀸𑀭𑀺𑀓𑁄 𑀓𑀸𑀫𑀸𑀲𑀯𑁄 𑀔𑀻𑀬𑀢𑀺, 𑀢𑀤𑁂𑀓𑀝𑁆𑀞𑁄 𑀪𑀯𑀸𑀲𑀯𑁄 𑀔𑀻𑀬𑀢𑀺, 𑀢𑀤𑁂𑀓𑀝𑁆𑀞𑁄 𑀅𑀯𑀺𑀚𑁆𑀚𑀸𑀲𑀯𑁄 𑀔𑀻𑀬𑀢𑀺. 𑀏𑀢𑁆𑀣𑁂𑀢𑁂 𑀆𑀲𑀯𑀸 𑀔𑀻𑀬𑀦𑁆𑀢𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀦𑀯𑀲𑁂𑀲𑁄 𑀓𑀸𑀫𑀸𑀲𑀯𑁄 𑀔𑀻𑀬𑀢𑀺, 𑀢𑀤𑁂𑀓𑀝𑁆𑀞𑁄 𑀪𑀯𑀸𑀲𑀯𑁄 𑀔𑀻𑀬𑀢𑀺, 𑀢𑀤𑁂𑀓𑀝𑁆𑀞𑁄 𑀅𑀯𑀺𑀚𑁆𑀚𑀸𑀲𑀯𑁄 𑀔𑀻𑀬𑀢𑀺. 𑀏𑀢𑁆𑀣𑁂𑀢𑁂 𑀆𑀲𑀯𑀸 𑀔𑀻𑀬𑀦𑁆𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀦𑀯𑀲𑁂𑀲𑁄 𑀪𑀯𑀸𑀲𑀯𑁄 𑀔𑀻𑀬𑀢𑀺, 𑀅𑀦𑀯𑀲𑁂𑀲𑁄 𑀅𑀯𑀺𑀚𑁆𑀚𑀸𑀲𑀯𑁄 𑀔𑀻𑀬𑀢𑀺. 𑀏𑀢𑁆𑀣𑁂𑀢𑁂 𑀆𑀲𑀯𑀸 𑀔𑀻𑀬𑀦𑁆𑀢𑀺.

𑀅𑀩𑁆𑀬𑀸𑀧𑀸𑀤𑀯𑀲𑁂𑀦 …𑀧𑁂… 𑀆𑀮𑁄𑀓𑀲𑀜𑁆𑀜𑀸𑀯𑀲𑁂𑀦… 𑀅𑀯𑀺𑀓𑁆𑀔𑁂𑀧𑀯𑀲𑁂𑀦… 𑀥𑀫𑁆𑀫𑀯𑀯𑀢𑁆𑀣𑀸𑀦𑀯𑀲𑁂𑀦… 𑀜𑀸𑀡𑀯𑀲𑁂𑀦… 𑀧𑀸𑀫𑁄𑀚𑁆𑀚𑀯𑀲𑁂𑀦… 𑀧𑀞𑀫𑀚𑁆𑀛𑀸𑀦𑀯𑀲𑁂𑀦… 𑀤𑀼𑀢𑀺𑀬𑀚𑁆𑀛𑀸𑀦𑀯𑀲𑁂𑀦… 𑀢𑀢𑀺𑀬𑀚𑁆𑀛𑀸𑀦𑀯𑀲𑁂𑀦… 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀯𑀲𑁂𑀦… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀯𑀲𑁂𑀦… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀯𑀲𑁂𑀦… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀯𑀲𑁂𑀦… 𑀧𑀣𑀯𑀻𑀓𑀲𑀺𑀡𑀯𑀲𑁂𑀦… 𑀆𑀧𑁄𑀓𑀲𑀺𑀡𑀯𑀲𑁂𑀦 … 𑀢𑁂𑀚𑁄𑀓𑀲𑀺𑀡𑀯𑀲𑁂𑀦… 𑀯𑀸𑀬𑁄𑀓𑀲𑀺𑀡𑀯𑀲𑁂𑀦… 𑀦𑀻𑀮𑀓𑀲𑀺𑀡𑀯𑀲𑁂𑀦… 𑀧𑀻𑀢𑀓𑀲𑀺𑀡𑀯𑀲𑁂𑀦… 𑀮𑁄𑀳𑀺𑀢𑀓𑀲𑀺𑀡𑀯𑀲𑁂𑀦… 𑀑𑀤𑀸𑀢𑀓𑀲𑀺𑀡𑀯𑀲𑁂𑀦… 𑀆𑀓𑀸𑀲𑀓𑀲𑀺𑀡𑀯𑀲𑁂𑀦… 𑀯𑀺𑀜𑁆𑀜𑀸𑀡𑀓𑀲𑀺𑀡𑀯𑀲𑁂𑀦… 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀯𑀲𑁂𑀦… 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀯𑀲𑁂𑀦… 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀯𑀲𑁂𑀦… 𑀲𑀻𑀮𑀸𑀦𑀼𑀲𑁆𑀲𑀢𑀺𑀯𑀲𑁂𑀦… 𑀘𑀸𑀕𑀸𑀦𑀼𑀲𑁆𑀲𑀢𑀺𑀯𑀲𑁂𑀦… 𑀤𑁂𑀯𑀢𑀸𑀦𑀼𑀲𑁆𑀲𑀢𑀺𑀯𑀲𑁂𑀦… 𑀆𑀦𑀸𑀧𑀸𑀦𑀲𑁆𑀲𑀢𑀺𑀯𑀲𑁂𑀦… 𑀫𑀭𑀡𑀲𑁆𑀲𑀢𑀺𑀯𑀲𑁂𑀦… 𑀓𑀸𑀬𑀕𑀢𑀸𑀲𑀢𑀺𑀯𑀲𑁂𑀦… 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀯𑀲𑁂𑀦… 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀯𑀲𑁂𑀦… 𑀯𑀺𑀦𑀻𑀮𑀓𑀲𑀜𑁆𑀜𑀸𑀯𑀲𑁂𑀦… 𑀯𑀺𑀧𑀼𑀩𑁆𑀩𑀓𑀲𑀜𑁆𑀜𑀸𑀯𑀲𑁂𑀦… 𑀯𑀺𑀘𑁆𑀙𑀺𑀤𑁆𑀤𑀓𑀲𑀜𑁆𑀜𑀸𑀯𑀲𑁂𑀦… 𑀯𑀺𑀓𑁆𑀔𑀸𑀬𑀺𑀢𑀓𑀲𑀜𑁆𑀜𑀸𑀯𑀲𑁂𑀦… 𑀯𑀺𑀓𑁆𑀔𑀺𑀢𑁆𑀢𑀓𑀲𑀜𑁆𑀜𑀸𑀯𑀲𑁂𑀦… 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀲𑀜𑁆𑀜𑀸𑀯𑀲𑁂𑀦 … 𑀮𑁄𑀳𑀺𑀢𑀓𑀲𑀜𑁆𑀜𑀸𑀯𑀲𑁂𑀦… 𑀧𑀼𑀴𑀯𑀓𑀲𑀜𑁆𑀜𑀸𑀯𑀲𑁂𑀦… 𑀅𑀝𑁆𑀞𑀺𑀓𑀲𑀜𑁆𑀜𑀸𑀯𑀲𑁂𑀦.

𑁮𑁧. 𑀤𑀻𑀖𑀁 𑀅𑀲𑁆𑀲𑀸𑀲𑀯𑀲𑁂𑀦…𑀧𑁂… 𑀤𑀻𑀖𑀁 𑀧𑀲𑁆𑀲𑀸𑀲𑀯𑀲𑁂𑀦… 𑀭𑀲𑁆𑀲𑀁 𑀅𑀲𑁆𑀲𑀸𑀲𑀯𑀲𑁂𑀦… 𑀭𑀲𑁆𑀲𑀁 𑀧𑀲𑁆𑀲𑀸𑀲𑀯𑀲𑁂𑀦… 𑀲𑀩𑁆𑀩𑀓𑀸𑀬𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀸𑀲𑀯𑀲𑁂𑀦… 𑀲𑀩𑁆𑀩𑀓𑀸𑀬𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀸𑀲𑀯𑀲𑁂𑀦… 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀸𑀲𑀯𑀲𑁂𑀦… 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀸𑀲𑀯𑀲𑁂𑀦… 𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀸𑀲𑀯𑀲𑁂𑀦… 𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀸𑀲𑀯𑀲𑁂𑀦… 𑀲𑀼𑀔𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀸𑀲𑀯𑀲𑁂𑀦… 𑀲𑀼𑀔𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀸𑀲𑀯𑀲𑁂𑀦… 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀸𑀲𑀯𑀲𑁂𑀦… 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀸𑀲𑀯𑀲𑁂𑀦… 𑀧𑀲𑁆𑀲𑀫𑁆𑀪𑀬𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀁 𑀅𑀲𑁆𑀲𑀸𑀲𑀯𑀲𑁂𑀦… 𑀧𑀲𑁆𑀲𑀫𑁆𑀪𑀬𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀁 𑀧𑀲𑁆𑀲𑀸𑀲𑀯𑀲𑁂𑀦… 𑀘𑀺𑀢𑁆𑀢𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀸𑀲𑀯𑀲𑁂𑀦… 𑀘𑀺𑀢𑁆𑀢𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀸𑀲𑀯𑀲𑁂𑀦… 𑀅𑀪𑀺𑀧𑁆𑀧𑀫𑁄𑀤𑀬𑀁 𑀘𑀺𑀢𑁆𑀢𑀁 𑀅𑀲𑁆𑀲𑀸𑀲𑀯𑀲𑁂𑀦… 𑀅𑀪𑀺𑀧𑁆𑀧𑀫𑁄𑀤𑀬𑀁 𑀘𑀺𑀢𑁆𑀢𑀁 𑀧𑀲𑁆𑀲𑀸𑀲𑀯𑀲𑁂𑀦… 𑀲𑀫𑀸𑀤𑀳𑀁 𑀘𑀺𑀢𑁆𑀢𑀁…𑀧𑁂… 𑀯𑀺𑀫𑁄𑀘𑀬𑀁 𑀘𑀺𑀢𑁆𑀢𑀁… 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 … 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻… 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀅𑀲𑁆𑀲𑀸𑀲𑀯𑀲𑁂𑀦… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀧𑀲𑁆𑀲𑀸𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺. 𑀢𑀲𑁆𑀲 𑀲𑀫𑀸𑀥𑀺𑀲𑁆𑀲 𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺 𑀜𑀸𑀡𑀁, 𑀢𑁂𑀦 𑀜𑀸𑀡𑁂𑀦 𑀆𑀲𑀯𑀸 𑀔𑀻𑀬𑀦𑁆𑀢𑀺. 𑀇𑀢𑀺 𑀧𑀞𑀫𑀁 𑀲𑀫𑀣𑁄, 𑀧𑀘𑁆𑀙𑀸 𑀜𑀸𑀡𑀁. 𑀢𑁂𑀦 𑀜𑀸𑀡𑁂𑀦 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀯𑀺𑀓𑁆𑀔𑁂𑀧𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀆𑀲𑀯𑀲𑀫𑀼𑀘𑁆𑀙𑁂𑀤𑁂 𑀧𑀜𑁆𑀜𑀸 𑀆𑀦𑀦𑁆𑀢𑀭𑀺𑀓𑀲𑀫𑀸𑀥𑀺𑀫𑁆𑀳𑀺 𑀜𑀸𑀡𑀁’’.

𑀆𑀲𑀯𑀸𑀢𑀺 𑀓𑀢𑀫𑁂 𑀢𑁂 𑀆𑀲𑀯𑀸? 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀤𑀺𑀝𑁆𑀞𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄. 𑀓𑀢𑁆𑀣𑁂𑀢𑁂 𑀆𑀲𑀯𑀸 𑀔𑀻𑀬𑀦𑁆𑀢𑀺? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀅𑀦𑀯𑀲𑁂𑀲𑁄 𑀤𑀺𑀝𑁆𑀞𑀸𑀲𑀯𑁄 𑀔𑀻𑀬𑀢𑀺, 𑀅𑀧𑀸𑀬𑀕𑀫𑀦𑀻𑀬𑁄 𑀓𑀸𑀫𑀸𑀲𑀯𑁄 𑀔𑀻𑀬𑀢𑀺, 𑀅𑀧𑀸𑀬𑀕𑀫𑀦𑀻𑀬𑁄 𑀪𑀯𑀸𑀲𑀯𑁄 𑀔𑀻𑀬𑀢𑀺, 𑀅𑀧𑀸𑀬𑀕𑀫𑀦𑀻𑀬𑁄 𑀅𑀯𑀺𑀚𑁆𑀚𑀸𑀲𑀯𑁄 𑀔𑀻𑀬𑀢𑀺. 𑀏𑀢𑁆𑀣𑁂𑀢𑁂 𑀆𑀲𑀯𑀸 𑀔𑀻𑀬𑀦𑁆𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀑𑀴𑀸𑀭𑀺𑀓𑁄 𑀓𑀸𑀫𑀸𑀲𑀯𑁄 𑀔𑀻𑀬𑀢𑀺, 𑀢𑀤𑁂𑀓𑀝𑁆𑀞𑁄 𑀪𑀯𑀸𑀲𑀯𑁄 𑀔𑀻𑀬𑀢𑀺, 𑀢𑀤𑁂𑀓𑀝𑁆𑀞𑁄 𑀅𑀯𑀺𑀚𑁆𑀚𑀸𑀲𑀯𑁄 𑀔𑀻𑀬𑀢𑀺. 𑀏𑀢𑁆𑀣𑁂𑀢𑁂 𑀆𑀲𑀯𑀸 𑀔𑀻𑀬𑀦𑁆𑀢𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀦𑀯𑀲𑁂𑀲𑁄 𑀓𑀸𑀫𑀸𑀲𑀯𑁄 𑀔𑀻𑀬𑀢𑀺, 𑀢𑀤𑁂𑀓𑀝𑁆𑀞𑁄 𑀪𑀯𑀸𑀲𑀯𑁄 𑀔𑀻𑀬𑀢𑀺, 𑀢𑀤𑁂𑀓𑀝𑁆𑀞𑁄 𑀅𑀯𑀺𑀚𑁆𑀚𑀸𑀲𑀯𑁄 𑀔𑀻𑀬𑀢𑀺. 𑀏𑀢𑁆𑀣𑁂𑀢𑁂 𑀆𑀲𑀯𑀸 𑀔𑀻𑀬𑀦𑁆𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀦𑀯𑀲𑁂𑀲𑁄 𑀪𑀯𑀸𑀲𑀯𑁄 𑀔𑀻𑀬𑀢𑀺, 𑀅𑀦𑀯𑀲𑁂𑀲𑁄 𑀅𑀯𑀺𑀚𑁆𑀚𑀸𑀲𑀯𑁄 𑀔𑀻𑀬𑀢𑀺. 𑀏𑀢𑁆𑀣𑁂𑀢𑁂 𑀆𑀲𑀯𑀸 𑀔𑀻𑀬𑀦𑁆𑀢𑀺. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀯𑀺𑀓𑁆𑀔𑁂𑀧𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀆𑀲𑀯𑀲𑀫𑀼𑀘𑁆𑀙𑁂𑀤𑁂 𑀧𑀜𑁆𑀜𑀸 𑀆𑀦𑀦𑁆𑀢𑀭𑀺𑀓𑀲𑀫𑀸𑀥𑀺𑀫𑁆𑀳𑀺 𑀜𑀸𑀡𑀁’’.

𑀆𑀦𑀦𑁆𑀢𑀭𑀺𑀓𑀲𑀫𑀸𑀥𑀺𑀜𑀸𑀡𑀦𑀺𑀤𑁆𑀤𑁂𑀲𑁄 𑀤𑁆𑀯𑀢𑁆𑀢𑀺𑀁𑀲𑀢𑀺𑀫𑁄.