𑁩𑁩. 𑀅𑀭𑀡𑀯𑀺𑀳𑀸𑀭𑀜𑀸𑀡𑀦𑀺𑀤𑁆𑀤𑁂𑀲𑁄

𑁮𑁨. 𑀓𑀣𑀁 𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀁 𑀲𑀦𑁆𑀢𑁄 𑀘 𑀯𑀺𑀳𑀸𑀭𑀸𑀥𑀺𑀕𑀫𑁄 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀢𑀸 𑀧𑀜𑁆𑀜𑀸 𑀅𑀭𑀡𑀯𑀺𑀳𑀸𑀭𑁂 𑀜𑀸𑀡𑀁? 𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀁, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀁, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀁, 𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀁, 𑀭𑀽𑀧𑁂 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀁, 𑀭𑀽𑀧𑁂 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀁; 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂… 𑀘𑀓𑁆𑀔𑀼𑀲𑁆𑀫𑀺𑀁…𑀧𑁂… 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀁, 𑀚𑀭𑀸𑀫𑀭𑀡𑁂 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀁, 𑀚𑀭𑀸𑀫𑀭𑀡𑁂 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀁.

𑀲𑀦𑁆𑀢𑁄 𑀘 𑀯𑀺𑀳𑀸𑀭𑀸𑀥𑀺𑀕𑀫𑁄𑀢𑀺 𑀲𑀼𑀜𑁆𑀜𑀢𑁄 𑀯𑀺𑀳𑀸𑀭𑁄 𑀲𑀦𑁆𑀢𑁄 𑀯𑀺𑀳𑀸𑀭𑀸𑀥𑀺𑀕𑀫𑁄. 𑀅𑀦𑀺𑀫𑀺𑀢𑁆𑀢𑁄 𑀯𑀺𑀳𑀸𑀭𑁄 𑀲𑀦𑁆𑀢𑁄 𑀯𑀺𑀳𑀸𑀭𑀸𑀥𑀺𑀕𑀫𑁄. 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀳𑀸𑀭𑁄 𑀲𑀦𑁆𑀢𑁄 𑀯𑀺𑀳𑀸𑀭𑀸𑀥𑀺𑀕𑀫𑁄.

𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀢𑀸𑀢𑀺 𑀲𑀼𑀜𑁆𑀜𑀢𑁂 𑀅𑀥𑀺𑀫𑀼𑀢𑁆𑀢𑀢𑀸 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀢𑀸. 𑀅𑀦𑀺𑀫𑀺𑀢𑁆𑀢𑁂 𑀅𑀥𑀺𑀫𑀼𑀢𑁆𑀢𑀢𑀸 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀢𑀸. 𑀅𑀧𑁆𑀧𑀡𑀺𑀳𑀺𑀢𑁂 𑀅𑀥𑀺𑀫𑀼𑀢𑁆𑀢𑀢𑀸 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀢𑀸.

𑀅𑀭𑀡𑀯𑀺𑀳𑀸𑀭𑁄𑀢𑀺 𑀧𑀞𑀫𑀁 𑀛𑀸𑀦𑀁 𑀅𑀭𑀡𑀯𑀺𑀳𑀸𑀭𑁄. 𑀤𑀼𑀢𑀺𑀬𑀁 𑀛𑀸𑀦𑀁 𑀅𑀭𑀡𑀯𑀺𑀳𑀸𑀭𑁄. 𑀢𑀢𑀺𑀬𑀁 𑀛𑀸𑀦𑀁 𑀅𑀭𑀡𑀯𑀺𑀳𑀸𑀭𑁄. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀅𑀭𑀡𑀯𑀺𑀳𑀸𑀭𑁄. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀅𑀭𑀡𑀯𑀺𑀳𑀸𑀭𑁄…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀅𑀭𑀡𑀯𑀺𑀳𑀸𑀭𑁄.

𑀅𑀭𑀡𑀯𑀺𑀳𑀸𑀭𑁄𑀢𑀺 𑀓𑁂𑀦𑀝𑁆𑀞𑁂𑀦 𑀅𑀭𑀡𑀯𑀺𑀳𑀸𑀭𑁄? 𑀧𑀞𑀫𑁂𑀦 𑀛𑀸𑀦𑁂𑀦 𑀦𑀻𑀯𑀭𑀡𑁂 𑀳𑀭𑀢𑀻𑀢𑀺 𑁋 𑀅𑀭𑀡𑀯𑀺𑀳𑀸𑀭𑁄. 𑀤𑀼𑀢𑀺𑀬𑁂𑀦 𑀛𑀸𑀦𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀳𑀭𑀢𑀻𑀢𑀺 𑁋 𑀅𑀭𑀡𑀯𑀺𑀳𑀸𑀭𑁄. 𑀢𑀢𑀺𑀬𑁂𑀦 𑀛𑀸𑀦𑁂𑀦 𑀧𑀻𑀢𑀺𑀁 𑀳𑀭𑀢𑀻𑀢𑀺 𑁋 𑀅𑀭𑀡𑀯𑀺𑀳𑀸𑀭𑁄. 𑀘𑀢𑀼𑀢𑁆𑀣𑁂𑀦 𑀛𑀸𑀦𑁂𑀦 𑀲𑀼𑀔𑀤𑀼𑀓𑁆𑀔𑁂 𑀳𑀭𑀢𑀻𑀢𑀺 𑁋 𑀅𑀭𑀡𑀯𑀺𑀳𑀸𑀭𑁄. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀲𑀜𑁆𑀜𑀁 𑀧𑀝𑀺𑀖𑀲𑀜𑁆𑀜𑀁 𑀦𑀸𑀦𑀢𑁆𑀢𑀲𑀜𑁆𑀜𑀁 𑀳𑀭𑀢𑀻𑀢𑀺 𑁋 𑀅𑀭𑀡𑀯𑀺𑀳𑀸𑀭𑁄. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀳𑀭𑀢𑀻𑀢𑀺 𑁋 𑀅𑀭𑀡𑀯𑀺𑀳𑀸𑀭𑁄. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀳𑀭𑀢𑀻𑀢𑀺 𑁋 𑀅𑀭𑀡𑀯𑀺𑀳𑀸𑀭𑁄. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀳𑀭𑀢𑀻𑀢𑀺 𑁋 𑀅𑀭𑀡𑀯𑀺𑀳𑀸𑀭𑁄. 𑀅𑀬𑀁 𑀅𑀭𑀡𑀯𑀺𑀳𑀸𑀭𑁄. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀁 𑀲𑀦𑁆𑀢𑁄 𑀘 𑀯𑀺𑀳𑀸𑀭𑀸𑀥𑀺𑀕𑀫𑁄 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀢𑀸 𑀧𑀜𑁆𑀜𑀸 𑀅𑀭𑀡𑀯𑀺𑀳𑀸𑀭𑁂 𑀜𑀸𑀡𑀁’’.

𑀅𑀭𑀡𑀯𑀺𑀳𑀸𑀭𑀜𑀸𑀡𑀦𑀺𑀤𑁆𑀤𑁂𑀲𑁄 𑀢𑁂𑀢𑁆𑀢𑀺𑀁𑀲𑀢𑀺𑀫𑁄.