𑁩. 𑀲𑀫𑀸𑀥𑀺𑀪𑀸𑀯𑀦𑀸𑀫𑀬𑀜𑀸𑀡𑀦𑀺𑀤𑁆𑀤𑁂𑀲𑁄

𑁪𑁩. 𑀓𑀣𑀁 𑀲𑀁𑀯𑀭𑀺𑀢𑁆𑀯𑀸 𑀲𑀫𑀸𑀤𑀳𑀦𑁂 𑀧𑀜𑁆𑀜𑀸 𑀲𑀫𑀸𑀥𑀺𑀪𑀸𑀯𑀦𑀸𑀫𑀬𑁂 𑀜𑀸𑀡𑀁? 𑀏𑀓𑁄 𑀲𑀫𑀸𑀥𑀺 𑁋 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸. 𑀤𑁆𑀯𑁂 𑀲𑀫𑀸𑀥𑀻 𑁋 𑀮𑁄𑀓𑀺𑀬𑁄 𑀲𑀫𑀸𑀥𑀺, 𑀮𑁄𑀓𑀼𑀢𑁆𑀢𑀭𑁄 𑀲𑀫𑀸𑀥𑀺. 𑀢𑀬𑁄 𑀲𑀫𑀸𑀥𑀻 𑁋 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄 𑀲𑀫𑀸𑀥𑀺, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄 𑀲𑀫𑀸𑀥𑀺. 𑀘𑀢𑁆𑀢𑀸𑀭𑁄 𑀲𑀫𑀸𑀥𑀻 𑁋 𑀳𑀸𑀦𑀪𑀸𑀕𑀺𑀬𑁄 𑀲𑀫𑀸𑀥𑀺, 𑀞𑀺𑀢𑀺𑀪𑀸𑀕𑀺𑀬𑁄 𑀲𑀫𑀸𑀥𑀺, 𑀯𑀺𑀲𑁂𑀲𑀪𑀸𑀕𑀺𑀬𑁄 𑀲𑀫𑀸𑀥𑀺, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁄 𑀲𑀫𑀸𑀥𑀺. 𑀧𑀜𑁆𑀘 𑀲𑀫𑀸𑀥𑀻 𑁋 𑀧𑀻𑀢𑀺𑀨𑀭𑀡𑀢𑀸, 𑀲𑀼𑀔𑀨𑀭𑀡𑀢𑀸, 𑀘𑁂𑀢𑁄𑀨𑀭𑀡𑀢𑀸, 𑀆𑀮𑁄𑀓𑀨𑀭𑀡𑀢𑀸, 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺𑀫𑀺𑀢𑁆𑀢𑀁 [𑀧𑀘𑁆𑀘𑀯𑁂𑀓𑁆𑀔𑀦𑀸𑀦𑀺𑀫𑀺𑀢𑁆𑀢𑀁 (𑀓.)].

𑀙 𑀲𑀫𑀸𑀥𑀻 𑁋 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺, 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺, 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺, 𑀲𑀻𑀮𑀸𑀦𑀼𑀲𑁆𑀲𑀢𑀺𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺, 𑀘𑀸𑀕𑀸𑀦𑀼𑀲𑁆𑀲𑀢𑀺𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺, 𑀤𑁂𑀯𑀢𑀸𑀦𑀼𑀲𑁆𑀲𑀢𑀺𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺. 𑀲𑀢𑁆𑀢 𑀲𑀫𑀸𑀥𑀻 𑁋 𑀲𑀫𑀸𑀥𑀺𑀓𑀼𑀲𑀮𑀢𑀸, 𑀲𑀫𑀸𑀥𑀺𑀲𑁆𑀲 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑀢𑀸, 𑀲𑀫𑀸𑀥𑀺𑀲𑁆𑀲 𑀞𑀺𑀢𑀺𑀓𑀼𑀲𑀮𑀢𑀸, 𑀲𑀫𑀸𑀥𑀺𑀲𑁆𑀲 𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸, 𑀲𑀫𑀸𑀥𑀺𑀲𑁆𑀲 𑀓𑀮𑁆𑀮𑀢𑀸𑀓𑀼𑀲𑀮𑀢𑀸 [𑀓𑀮𑁆𑀮𑀺𑀢𑀓𑀼𑀲𑀮𑀢𑀸 (𑀲𑁆𑀬𑀸. 𑀓.)], 𑀲𑀫𑀸𑀥𑀺𑀲𑁆𑀲 𑀕𑁄𑀘𑀭𑀓𑀼𑀲𑀮𑀢𑀸, 𑀲𑀫𑀸𑀥𑀺𑀲𑁆𑀲 𑀅𑀪𑀺𑀦𑀻𑀳𑀸𑀭𑀓𑀼𑀲𑀮𑀢𑀸. 𑀅𑀝𑁆𑀞 𑀲𑀫𑀸𑀥𑀻 𑁋 𑀧𑀣𑀯𑀻𑀓𑀲𑀺𑀡𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺, 𑀆𑀧𑁄𑀓𑀲𑀺𑀡𑀯𑀲𑁂𑀦…𑀧𑁂… 𑀢𑁂𑀚𑁄𑀓𑀲𑀺𑀡𑀯𑀲𑁂𑀦… 𑀯𑀸𑀬𑁄𑀓𑀲𑀺𑀡𑀯𑀲𑁂𑀦… 𑀦𑀻𑀮𑀓𑀲𑀺𑀡𑀯𑀲𑁂𑀦… 𑀧𑀻𑀢𑀓𑀲𑀺𑀡𑀯𑀲𑁂𑀦… 𑀮𑁄𑀳𑀺𑀢𑀓𑀲𑀺𑀡𑀯𑀲𑁂𑀦… 𑀑𑀤𑀸𑀢𑀓𑀲𑀺𑀡𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺. 𑀦𑀯 𑀲𑀫𑀸𑀥𑀻 𑁋 𑀭𑀽𑀧𑀸𑀯𑀘𑀭𑁄 𑀲𑀫𑀸𑀥𑀺 𑀅𑀢𑁆𑀣𑀺 𑀳𑀻𑀦𑁄, 𑀅𑀢𑁆𑀣𑀺 𑀫𑀚𑁆𑀛𑁄𑀫𑁄, 𑀅𑀢𑁆𑀣𑀺 𑀧𑀡𑀻𑀢𑁄; 𑀅𑀭𑀽𑀧𑀸𑀯𑀘𑀭𑁄 𑀲𑀫𑀸𑀥𑀺 𑀅𑀢𑁆𑀣𑀺 𑀳𑀻𑀦𑁄, 𑀅𑀢𑁆𑀣𑀺 𑀫𑀚𑁆𑀛𑁄𑀫𑁄, 𑀅𑀢𑁆𑀣𑀺 𑀧𑀡𑀻𑀢𑁄; 𑀲𑀼𑀜𑁆𑀜𑀢𑁄 𑀲𑀫𑀸𑀥𑀺, 𑀅𑀦𑀺𑀫𑀺𑀢𑁆𑀢𑁄 𑀲𑀫𑀸𑀥𑀺, 𑀅𑀧𑁆𑀧𑀡𑀺𑀳𑀺𑀢𑁄 𑀲𑀫𑀸𑀥𑀺. 𑀤𑀲 𑀲𑀫𑀸𑀥𑀻 𑁋 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺, 𑀯𑀺𑀦𑀻𑀮𑀓𑀲𑀜𑁆𑀜𑀸𑀯𑀲𑁂𑀦…𑀧𑁂… 𑀯𑀺𑀧𑀼𑀩𑁆𑀩𑀓𑀲𑀜𑁆𑀜𑀸𑀯𑀲𑁂𑀦… 𑀯𑀺𑀘𑁆𑀙𑀺𑀤𑁆𑀤𑀓𑀲𑀜𑁆𑀜𑀸𑀯𑀲𑁂𑀦… 𑀯𑀺𑀓𑁆𑀔𑀸𑀬𑀺𑀢𑀓𑀲𑀜𑁆𑀜𑀸𑀯𑀲𑁂𑀦… 𑀯𑀺𑀓𑁆𑀔𑀺𑀢𑁆𑀢𑀓𑀲𑀜𑁆𑀜𑀸𑀯𑀲𑁂𑀦… 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀲𑀜𑁆𑀜𑀸𑀯𑀲𑁂𑀦… 𑀮𑁄𑀳𑀺𑀢𑀓𑀲𑀜𑁆𑀜𑀸𑀯𑀲𑁂𑀦… 𑀧𑀼𑀴𑀯𑀓𑀲𑀜𑁆𑀜𑀸𑀯𑀲𑁂𑀦 [𑀧𑀼𑀴𑀼𑀯𑀓 𑀲𑀜𑁆𑀜𑀸𑀯𑀲𑁂𑀦 (𑀓.)] … 𑀅𑀝𑁆𑀞𑀺𑀓𑀲𑀜𑁆𑀜𑀸𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺. 𑀇𑀫𑁂 𑀧𑀜𑁆𑀘𑀧𑀜𑁆𑀜𑀸𑀲 𑀲𑀫𑀸𑀥𑀺.

𑁪𑁪. 𑀅𑀧𑀺 𑀘, 𑀧𑀜𑁆𑀘𑀯𑀻𑀲𑀢𑀺 𑀲𑀫𑀸𑀥𑀺𑀲𑁆𑀲 𑀲𑀫𑀸𑀥𑀺𑀝𑁆𑀞𑀸 𑁋 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀫𑀸𑀥𑀺, 𑀧𑀭𑀺𑀯𑀸𑀭𑀝𑁆𑀞𑁂𑀦 𑀲𑀫𑀸𑀥𑀺, 𑀧𑀭𑀺𑀧𑀽𑀭𑀝𑁆𑀞𑁂𑀦 𑀲𑀫𑀸𑀥𑀺, 𑀏𑀓𑀕𑁆𑀕𑀝𑁆𑀞𑁂𑀦 𑀲𑀫𑀸𑀥𑀺, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑀸𑀥𑀺, 𑀅𑀯𑀺𑀲𑀸𑀭𑀝𑁆𑀞𑁂𑀦 𑀲𑀫𑀸𑀥𑀺, 𑀅𑀦𑀸𑀯𑀺𑀮𑀝𑁆𑀞𑁂𑀦 𑀲𑀫𑀸𑀥𑀺, 𑀅𑀦𑀺𑀜𑁆𑀚𑀦𑀝𑁆𑀞𑁂𑀦 𑀲𑀫𑀸𑀥𑀺, 𑀯𑀺𑀫𑀼𑀢𑁆𑀢𑀝𑁆𑀞𑁂𑀦 𑀲𑀫𑀸𑀥𑀺, 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀞𑀺𑀢𑀢𑁆𑀢𑀸 𑀲𑀫𑀸𑀥𑀺, 𑀲𑀫𑀁 𑀏𑀲𑀢𑀻𑀢𑀺 𑀲𑀫𑀸𑀥𑀺, 𑀯𑀺𑀲𑀫𑀁 𑀦𑁂𑀲𑀢𑀻𑀢𑀺 𑀲𑀫𑀸𑀥𑀺, 𑀲𑀫𑀁 𑀏𑀲𑀺𑀢𑀢𑁆𑀢𑀸 𑀲𑀫𑀸𑀥𑀺, 𑀯𑀺𑀲𑀫𑀁 𑀦𑁂𑀲𑀺𑀢𑀢𑁆𑀢𑀸 𑀲𑀫𑀸𑀥𑀺, 𑀲𑀫𑀁 𑀆𑀤𑀺𑀬𑀢𑀻𑀢𑀺 𑀲𑀫𑀸𑀥𑀺, 𑀯𑀺𑀲𑀫𑀁 𑀦𑀸𑀤𑀺𑀬𑀢𑀻𑀢𑀺 𑀲𑀫𑀸𑀥𑀺, 𑀲𑀫𑀁 𑀆𑀤𑀺𑀦𑁆𑀦𑀢𑁆𑀢𑀸 𑀲𑀫𑀸𑀥𑀺, 𑀯𑀺𑀲𑀫𑀁 𑀅𑀦𑀸𑀤𑀺𑀦𑁆𑀦𑀢𑁆𑀢𑀸 𑀲𑀫𑀸𑀥𑀺, 𑀲𑀫𑀁 𑀧𑀝𑀺𑀧𑀚𑁆𑀚𑀢𑀻𑀢𑀺 𑀲𑀫𑀸𑀥𑀺, 𑀯𑀺𑀲𑀫𑀁 𑀦𑀧𑁆𑀧𑀝𑀺𑀧𑀚𑁆𑀚𑀢𑀻𑀢𑀺 𑀲𑀫𑀸𑀥𑀺, 𑀲𑀫𑀁 𑀧𑀝𑀺𑀧𑀦𑁆𑀦𑀢𑁆𑀢𑀸 𑀲𑀫𑀸𑀥𑀺, 𑀯𑀺𑀲𑀫𑀁 𑀦𑀧𑁆𑀧𑀝𑀺𑀧𑀦𑁆𑀦𑀢𑁆𑀢𑀸 𑀲𑀫𑀸𑀥𑀺, 𑀲𑀫𑀁 𑀛𑀸𑀬𑀢𑀻𑀢𑀺 𑀲𑀫𑀸𑀥𑀺, 𑀯𑀺𑀲𑀫𑀁 𑀛𑀸𑀧𑁂𑀢𑀻𑀢𑀺 𑀲𑀫𑀸𑀥𑀺, 𑀲𑀫𑀁 𑀛𑀸𑀢𑀢𑁆𑀢𑀸 𑀲𑀫𑀸𑀥𑀺, 𑀯𑀺𑀲𑀫𑀁 𑀛𑀸𑀧𑀺𑀢𑀢𑁆𑀢𑀸 𑀲𑀫𑀸𑀥𑀺, 𑀲𑀫𑁄 𑀘 𑀳𑀺𑀢𑁄 𑀘 𑀲𑀼𑀔𑁄 𑀘𑀸𑀢𑀺 𑀲𑀫𑀸𑀥𑀺. 𑀇𑀫𑁂 𑀧𑀜𑁆𑀘𑀯𑀻𑀲𑀢𑀺 𑀲𑀫𑀸𑀥𑀺𑀲𑁆𑀲 𑀲𑀫𑀸𑀥𑀺𑀝𑁆𑀞𑀸. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀲𑀁𑀯𑀭𑀺𑀢𑁆𑀯𑀸 𑀲𑀫𑀸𑀤𑀳𑀦𑁂 𑀧𑀜𑁆𑀜𑀸 𑀲𑀫𑀸𑀥𑀺𑀪𑀸𑀯𑀦𑀸𑀫𑀬𑁂 𑀜𑀸𑀡𑀁’’.

𑀲𑀫𑀸𑀥𑀺𑀪𑀸𑀯𑀦𑀸𑀫𑀬𑀜𑀸𑀡𑀦𑀺𑀤𑁆𑀤𑁂𑀲𑁄 𑀢𑀢𑀺𑀬𑁄.