𑁨𑁦-𑁨𑁪. 𑀜𑀸𑀡𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑁄

𑁭𑁫. 𑀓𑀣𑀁 𑀅𑀪𑀺𑀜𑁆𑀜𑀸𑀧𑀜𑁆𑀜𑀸 𑀜𑀸𑀢𑀝𑁆𑀞𑁂 𑀜𑀸𑀡𑀁, 𑀧𑀭𑀺𑀜𑁆𑀜𑀸𑀧𑀜𑁆𑀜𑀸 𑀢𑀻𑀭𑀡𑀝𑁆𑀞𑁂 𑀜𑀸𑀡𑀁, 𑀧𑀳𑀸𑀦𑁂𑀧𑀜𑁆𑀜𑀸 𑀧𑀭𑀺𑀘𑁆𑀘𑀸𑀕𑀝𑁆𑀞𑁂 𑀜𑀸𑀡𑀁, 𑀪𑀸𑀯𑀦𑀸 𑀧𑀜𑁆𑀜𑀸 𑀏𑀓𑀭𑀲𑀝𑁆𑀞𑁂 𑀜𑀸𑀡𑀁, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀸 𑀨𑀲𑁆𑀲𑀦𑀝𑁆𑀞𑁂 𑀜𑀸𑀡𑀁? 𑀬𑁂 𑀬𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀺, 𑀢𑁂 𑀢𑁂 𑀥𑀫𑁆𑀫𑀸 𑀜𑀸𑀢𑀸 𑀳𑁄𑀦𑁆𑀢𑀺. 𑀬𑁂 𑀬𑁂 𑀥𑀫𑁆𑀫𑀸 𑀧𑀭𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀺, 𑀢𑁂 𑀢𑁂 𑀥𑀫𑁆𑀫𑀸 𑀢𑀻𑀭𑀺𑀢𑀸 𑀳𑁄𑀦𑁆𑀢𑀺. 𑀬𑁂 𑀬𑁂 𑀥𑀫𑁆𑀫𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀢𑁂 𑀢𑁂 𑀥𑀫𑁆𑀫𑀸 𑀧𑀭𑀺𑀘𑁆𑀘𑀢𑁆𑀢𑀸 𑀳𑁄𑀦𑁆𑀢𑀺. 𑀬𑁂 𑀬𑁂 𑀥𑀫𑁆𑀫𑀸 𑀪𑀸𑀯𑀺𑀢𑀸 𑀳𑁄𑀦𑁆𑀢𑀺, 𑀢𑁂 𑀢𑁂 𑀥𑀫𑁆𑀫𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺. 𑀬𑁂 𑀬𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀢𑀸 𑀳𑁄𑀦𑁆𑀢𑀺, 𑀢𑁂 𑀢𑁂 𑀥𑀫𑁆𑀫𑀸 𑀨𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀪𑀺𑀜𑁆𑀜𑀸 𑀧𑀜𑁆𑀜𑀸 𑀜𑀸𑀢𑀝𑁆𑀞𑁂 𑀜𑀸𑀡𑀁, 𑀧𑀭𑀺𑀜𑁆𑀜𑀸 𑀧𑀜𑁆𑀜𑀸 𑀢𑀻𑀭𑀡𑀝𑁆𑀞𑁂 𑀜𑀸𑀡𑀁, 𑀧𑀳𑀸𑀦𑁂 𑀧𑀜𑁆𑀜𑀸 𑀧𑀭𑀺𑀘𑁆𑀘𑀸𑀕𑀝𑁆𑀞𑁂 𑀜𑀸𑀡𑀁, 𑀪𑀸𑀯𑀦𑀸 𑀧𑀜𑁆𑀜𑀸 𑀏𑀓𑀭𑀲𑀝𑁆𑀞𑁂 𑀜𑀸𑀡𑀁, 𑀲𑀘𑁆𑀙𑀺𑀓𑀺𑀭𑀺𑀬𑀸 𑀧𑀜𑁆𑀜𑀸 𑀨𑀼𑀲𑀦𑀝𑁆𑀞𑁂 𑀜𑀸𑀡𑀁’’.

𑀜𑀸𑀡𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑁄 𑀘𑀢𑀼𑀯𑀻𑀲𑀢𑀺𑀫𑁄.