𑁨𑁫-𑁨𑁮. 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀦𑀺𑀤𑁆𑀤𑁂𑀲𑁄

𑁭𑁬. 𑀓𑀣𑀁 𑀅𑀢𑁆𑀣𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀥𑀫𑁆𑀫𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀦𑀺𑀭𑀼𑀢𑁆𑀢𑀺𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁, 𑀧𑀝𑀺𑀪𑀸𑀦𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄, 𑀲𑀢𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄. 𑀅𑀜𑁆𑀜𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄, 𑀅𑀜𑁆𑀜𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄, 𑀅𑀜𑁆𑀜𑁄 𑀲𑀢𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄, 𑀅𑀜𑁆𑀜𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄, 𑀅𑀜𑁆𑀜𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄. 𑀬𑁂𑀦 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀥𑀫𑁆𑀫𑀸 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀥𑀫𑁆𑀫𑀸 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀥𑀫𑁆𑀫𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀅𑀥𑀺𑀫𑁄𑀓𑁆𑀔𑀝𑁆𑀞𑁄 𑀅𑀢𑁆𑀣𑁄, 𑀧𑀕𑁆𑀕𑀳𑀝𑁆𑀞𑁄 𑀅𑀢𑁆𑀣𑁄, 𑀉𑀧𑀝𑁆𑀞𑀸𑀦𑀝𑁆𑀞𑁄 𑀅𑀢𑁆𑀣𑁄, 𑀅𑀯𑀺𑀓𑁆𑀔𑁂𑀧𑀝𑁆𑀞𑁄 𑀅𑀢𑁆𑀣𑁄, 𑀤𑀲𑁆𑀲𑀦𑀝𑁆𑀞𑁄 𑀅𑀢𑁆𑀣𑁄. 𑀅𑀜𑁆𑀜𑁄 𑀅𑀥𑀺𑀫𑁄𑀓𑁆𑀔𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀧𑀕𑁆𑀕𑀳𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀉𑀧𑀝𑁆𑀞𑀸𑀦𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀅𑀯𑀺𑀓𑁆𑀔𑁂𑀧𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀤𑀲𑁆𑀲𑀦𑀝𑁆𑀞𑁄 𑀅𑀢𑁆𑀣𑁄. 𑀬𑁂𑀦 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀅𑀢𑁆𑀣𑀸 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀅𑀢𑁆𑀣𑀸 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀅𑀢𑁆𑀣𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀧𑀜𑁆𑀘 𑀥𑀫𑁆𑀫𑁂 𑀲𑀦𑁆𑀤𑀲𑁆𑀲𑁂𑀢𑀼𑀁 𑀩𑁆𑀬𑀜𑁆𑀚𑀦𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑀸, 𑀧𑀜𑁆𑀘 𑀅𑀢𑁆𑀣𑁂 𑀲𑀦𑁆𑀤𑀲𑁆𑀲𑁂𑀢𑀼𑀁 𑀩𑁆𑀬𑀜𑁆𑀚𑀦𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑀸. 𑀅𑀜𑁆𑀜𑀸 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀬𑁄, 𑀅𑀜𑁆𑀜𑀸 𑀅𑀢𑁆𑀣𑀦𑀺𑀭𑀼𑀢𑁆𑀢𑀺𑀬𑁄. 𑀬𑁂𑀦 𑀜𑀸𑀡𑁂𑀦 𑀇𑀫𑀸 𑀦𑀸𑀦𑀸 𑀦𑀺𑀭𑀼𑀢𑁆𑀢𑀺𑀬𑁄 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑀸 𑀦𑀸𑀦𑀸 𑀦𑀺𑀭𑀼𑀢𑁆𑀢𑀺𑀬𑁄 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀦𑀺𑀭𑀼𑀢𑁆𑀢𑀺𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀸𑀦𑀺, 𑀧𑀜𑁆𑀘𑀲𑀼 𑀅𑀢𑁆𑀣𑁂𑀲𑀼 𑀜𑀸𑀡𑀸𑀦𑀺, 𑀤𑀲𑀲𑀼 𑀦𑀺𑀭𑀼𑀢𑁆𑀢𑀻𑀲𑀼 𑀜𑀸𑀡𑀸𑀦𑀺. 𑀅𑀜𑁆𑀜𑀸𑀦𑀺 𑀥𑀫𑁆𑀫𑁂𑀲𑀼 𑀜𑀸𑀡𑀸𑀦𑀺, 𑀅𑀜𑁆𑀜𑀸𑀦𑀺 𑀅𑀢𑁆𑀣𑁂𑀲𑀼 𑀜𑀸𑀡𑀸𑀦𑀺, 𑀅𑀜𑁆𑀜𑀸𑀦𑀺 𑀦𑀺𑀭𑀼𑀢𑁆𑀢𑀻𑀲𑀼 𑀜𑀸𑀡𑀸𑀦𑀺. 𑀬𑁂𑀦 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀜𑀸𑀡𑀸 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀜𑀸𑀡𑀸 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀝𑀺𑀪𑀸𑀦𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑁭𑁭. 𑀲𑀤𑁆𑀥𑀸𑀩𑀮𑀁 𑀥𑀫𑁆𑀫𑁄, 𑀯𑀻𑀭𑀺𑀬𑀩𑀮𑀁 𑀥𑀫𑁆𑀫𑁄, 𑀲𑀢𑀺𑀩𑀮𑀁 𑀥𑀫𑁆𑀫𑁄, 𑀲𑀫𑀸𑀥𑀺𑀩𑀮𑀁 𑀥𑀫𑁆𑀫𑁄, 𑀧𑀜𑁆𑀜𑀸𑀩𑀮𑀁 𑀥𑀫𑁆𑀫𑁄. 𑀅𑀜𑁆𑀜𑁄 𑀲𑀤𑁆𑀥𑀸𑀩𑀮𑀁 𑀥𑀫𑁆𑀫𑁄, 𑀅𑀜𑁆𑀜𑁄 𑀯𑀻𑀭𑀺𑀬𑀩𑀮𑀁 𑀥𑀫𑁆𑀫𑁄, 𑀅𑀜𑁆𑀜𑁄 𑀲𑀢𑀺𑀩𑀮𑀁 𑀥𑀫𑁆𑀫𑁄, 𑀅𑀜𑁆𑀜𑁄 𑀲𑀫𑀸𑀥𑀺𑀩𑀮𑀁 𑀥𑀫𑁆𑀫𑁄, 𑀅𑀜𑁆𑀜𑁄 𑀧𑀜𑁆𑀜𑀸𑀩𑀮𑀁 𑀥𑀫𑁆𑀫𑁄. 𑀬𑁂𑀦 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀥𑀫𑁆𑀫𑀸 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀥𑀫𑁆𑀫𑀸 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀥𑀫𑁆𑀫𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀺𑀬𑀝𑁆𑀞𑁄 𑀅𑀢𑁆𑀣𑁄. 𑀓𑁄𑀲𑀚𑁆𑀚𑁂 𑀅𑀓𑀫𑁆𑀧𑀺𑀬𑀝𑁆𑀞𑁄 𑀅𑀢𑁆𑀣𑁄. 𑀧𑀫𑀸𑀤𑁂 𑀅𑀓𑀫𑁆𑀧𑀺𑀬𑀝𑁆𑀞𑁄 𑀅𑀢𑁆𑀣𑁄. 𑀉𑀤𑁆𑀥𑀘𑁆𑀘𑁂 𑀅𑀓𑀫𑁆𑀧𑀺𑀬𑀝𑁆𑀞𑁄 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀬 𑀅𑀓𑀫𑁆𑀧𑀺𑀬𑀝𑁆𑀞𑁄 𑀅𑀢𑁆𑀣𑁄. 𑀅𑀜𑁆𑀜𑁄 𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀺𑀬𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀓𑁄𑀲𑀚𑁆𑀚𑁂 𑀅𑀓𑀫𑁆𑀧𑀺𑀬𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀧𑀫𑀸𑀤𑁂 𑀅𑀓𑀫𑁆𑀧𑀺𑀬𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀉𑀤𑁆𑀥𑀘𑁆𑀘𑁂 𑀅𑀓𑀫𑁆𑀧𑀺𑀬𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀅𑀯𑀺𑀚𑁆𑀚𑀸𑀬 𑀅𑀓𑀫𑁆𑀧𑀺𑀬𑀝𑁆𑀞𑁄 𑀅𑀢𑁆𑀣𑁄. 𑀬𑁂𑀦 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀅𑀢𑁆𑀣𑀸 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀅𑀢𑁆𑀣𑀸 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀢𑁆𑀣𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀧𑀜𑁆𑀘 𑀥𑀫𑁆𑀫𑁂 𑀲𑀦𑁆𑀤𑀲𑁆𑀲𑁂𑀢𑀼𑀁 𑀩𑁆𑀬𑀜𑁆𑀚𑀦𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑀸, 𑀧𑀜𑁆𑀘 𑀅𑀢𑁆𑀣𑁂 𑀲𑀦𑁆𑀤𑀲𑁆𑀲𑁂𑀢𑀼𑀁 𑀩𑁆𑀬𑀜𑁆𑀚𑀦𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑀸. 𑀅𑀜𑁆𑀜𑀸 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀬𑁄, 𑀅𑀜𑁆𑀜𑀸 𑀅𑀢𑁆𑀣𑀦𑀺𑀭𑀼𑀢𑁆𑀢𑀺𑀬𑁄. 𑀬𑁂𑀦 𑀜𑀸𑀡𑁂𑀦 𑀇𑀫𑀸 𑀦𑀸𑀦𑀸 𑀦𑀺𑀭𑀼𑀢𑁆𑀢𑀺𑀬𑁄 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑀸 𑀦𑀸𑀦𑀸 𑀦𑀺𑀭𑀼𑀢𑁆𑀢𑀺𑀬𑁄 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀦𑀺𑀭𑀼𑀢𑁆𑀢𑀺𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀧𑀜𑁆𑀘𑀲𑀼 [𑀧𑀜𑁆𑀘 (?)] 𑀥𑀫𑁆𑀫𑁂𑀲𑀼 𑀜𑀸𑀡𑀸𑀦𑀺, 𑀧𑀜𑁆𑀘𑀲𑀼 [𑀧𑀜𑁆𑀘 (?)] 𑀅𑀢𑁆𑀣𑁂𑀲𑀼 𑀜𑀸𑀡𑀸𑀦𑀺, 𑀤𑀲𑀲𑀼 [𑀤𑀲 (?)] 𑀦𑀺𑀭𑀼𑀢𑁆𑀢𑀻𑀲𑀼 𑀜𑀸𑀡𑀸𑀦𑀺. 𑀅𑀜𑁆𑀜𑀸𑀦𑀺 𑀥𑀫𑁆𑀫𑁂𑀲𑀼 𑀜𑀸𑀡𑀸𑀦𑀺, 𑀅𑀜𑁆𑀜𑀸𑀦𑀺 𑀅𑀢𑁆𑀣𑁂𑀲𑀼 𑀜𑀸𑀡𑀸𑀦𑀺, 𑀅𑀜𑁆𑀜𑀸𑀦𑀺 𑀦𑀺𑀭𑀼𑀢𑁆𑀢𑀻𑀲𑀼 𑀜𑀸𑀡𑀸𑀦𑀺. 𑀬𑁂𑀦 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀜𑀸𑀡𑀸 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀜𑀸𑀡𑀸 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀝𑀺𑀪𑀸𑀦𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄, 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄, 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄, 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄, 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄, 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄. 𑀅𑀜𑁆𑀜𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄, 𑀅𑀜𑁆𑀜𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄, 𑀅𑀜𑁆𑀜𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄, 𑀅𑀜𑁆𑀜𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄, 𑀅𑀜𑁆𑀜𑁄 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄, 𑀅𑀜𑁆𑀜𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄, 𑀅𑀜𑁆𑀜𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀥𑀫𑁆𑀫𑁄. 𑀬𑁂𑀦 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀥𑀫𑁆𑀫𑀸 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀥𑀫𑁆𑀫𑀸 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀥𑀫𑁆𑀫𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀉𑀧𑀝𑁆𑀞𑀸𑀦𑀝𑁆𑀞𑁄 𑀅𑀢𑁆𑀣𑁄, 𑀧𑀯𑀺𑀘𑀬𑀝𑁆𑀞𑁄 𑀅𑀢𑁆𑀣𑁄, 𑀧𑀕𑁆𑀕𑀳𑀝𑁆𑀞𑁄 𑀅𑀢𑁆𑀣𑁄, 𑀨𑀭𑀡𑀝𑁆𑀞𑁄 𑀅𑀢𑁆𑀣𑁄, 𑀉𑀧𑀲𑀫𑀝𑁆𑀞𑁄 𑀅𑀢𑁆𑀣𑁄, 𑀅𑀯𑀺𑀓𑁆𑀔𑁂𑀧𑀝𑁆𑀞𑁄 𑀅𑀢𑁆𑀣𑁄, 𑀧𑀝𑀺𑀲𑀗𑁆𑀔𑀸𑀦𑀝𑁆𑀞𑁄 𑀅𑀢𑁆𑀣𑁄. 𑀅𑀜𑁆𑀜𑁄 𑀉𑀧𑀝𑁆𑀞𑀸𑀦𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀧𑀯𑀺𑀘𑀬𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀧𑀕𑁆𑀕𑀳𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀨𑀭𑀡𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀉𑀧𑀲𑀫𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀅𑀯𑀺𑀓𑁆𑀔𑁂𑀧𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀧𑀝𑀺𑀲𑀗𑁆𑀔𑀸𑀦𑀝𑁆𑀞𑁄 𑀅𑀢𑁆𑀣𑁄. 𑀬𑁂𑀦 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀅𑀢𑁆𑀣𑀸 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀅𑀢𑁆𑀣𑀸 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀢𑁆𑀣𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀲𑀢𑁆𑀢 𑀥𑀫𑁆𑀫𑁂 𑀲𑀦𑁆𑀤𑀲𑁆𑀲𑁂𑀢𑀼𑀁 𑀩𑁆𑀬𑀜𑁆𑀚𑀦𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑀸, 𑀲𑀢𑁆𑀢 𑀅𑀢𑁆𑀣𑁂 𑀲𑀦𑁆𑀤𑀲𑁆𑀲𑁂𑀢𑀼𑀁 𑀩𑁆𑀬𑀜𑁆𑀚𑀦𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑀸. 𑀅𑀜𑁆𑀜𑀸 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀬𑁄, 𑀅𑀜𑁆𑀜𑀸 𑀅𑀢𑁆𑀣𑀦𑀺𑀭𑀼𑀢𑁆𑀢𑀺𑀬𑁄. 𑀬𑁂𑀦 𑀜𑀸𑀡𑁂𑀦 𑀇𑀫𑀸 𑀦𑀸𑀦𑀸 𑀦𑀺𑀭𑀼𑀢𑁆𑀢𑀺𑀬𑁄 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑀸 𑀦𑀸𑀦𑀸 𑀦𑀺𑀭𑀼𑀢𑁆𑀢𑀺𑀬𑁄 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀦𑀺𑀭𑀼𑀢𑁆𑀢𑀺𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀲𑀢𑁆𑀢𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀸𑀦𑀺, 𑀲𑀢𑁆𑀢𑀲𑀼 𑀅𑀢𑁆𑀣𑁂𑀲𑀼 𑀜𑀸𑀡𑀸𑀦𑀺, 𑀘𑀼𑀤𑁆𑀤𑀲𑀲𑀼 𑀦𑀺𑀭𑀼𑀢𑁆𑀢𑀻𑀲𑀼 𑀜𑀸𑀡𑀸𑀦𑀺. 𑀅𑀜𑁆𑀜𑀸𑀦𑀺 𑀥𑀫𑁆𑀫𑁂𑀲𑀼 𑀜𑀸𑀡𑀸𑀦𑀺, 𑀅𑀜𑁆𑀜𑀸𑀦𑀺 𑀅𑀢𑁆𑀣𑁂𑀲𑀼 𑀜𑀸𑀡𑀸𑀦𑀺, 𑀅𑀜𑁆𑀜𑀸𑀦𑀺 𑀦𑀺𑀭𑀼𑀢𑁆𑀢𑀻𑀲𑀼 𑀜𑀸𑀡𑀸𑀦𑀺. 𑀬𑁂𑀦 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀜𑀸𑀡𑀸 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀜𑀸𑀡𑀸 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀝𑀺𑀪𑀸𑀦𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑁄, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀥𑀫𑁆𑀫𑁄, 𑀲𑀫𑁆𑀫𑀸𑀯𑀸𑀘𑀸 𑀥𑀫𑁆𑀫𑁄, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀥𑀫𑁆𑀫𑁄, 𑀲𑀫𑁆𑀫𑀸𑀆𑀚𑀻𑀯𑁄 𑀥𑀫𑁆𑀫𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀥𑀫𑁆𑀫𑁄, 𑀲𑀫𑁆𑀫𑀸𑀲𑀢𑀺 𑀥𑀫𑁆𑀫𑁄, 𑀲𑀫𑁆𑀫𑀸𑀲𑀫𑀸𑀥𑀺 𑀥𑀫𑁆𑀫𑁄. 𑀅𑀜𑁆𑀜𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑁄, 𑀅𑀜𑁆𑀜𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀥𑀫𑁆𑀫𑁄, 𑀅𑀜𑁆𑀜𑁄 𑀲𑀫𑁆𑀫𑀸𑀯𑀸𑀘𑀸 𑀥𑀫𑁆𑀫𑁄, 𑀅𑀜𑁆𑀜𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀥𑀫𑁆𑀫𑁄, 𑀅𑀜𑁆𑀜𑁄 𑀲𑀫𑁆𑀫𑀸𑀆𑀚𑀻𑀯𑁄 𑀥𑀫𑁆𑀫𑁄, 𑀅𑀜𑁆𑀜𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀥𑀫𑁆𑀫𑁄, 𑀅𑀜𑁆𑀜𑁄 𑀲𑀫𑁆𑀫𑀸𑀲𑀢𑀺 𑀥𑀫𑁆𑀫𑁄, 𑀅𑀜𑁆𑀜𑁄 𑀲𑀫𑁆𑀫𑀸𑀲𑀫𑀸𑀥𑀺 𑀥𑀫𑁆𑀫𑁄. 𑀬𑁂𑀦 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀥𑀫𑁆𑀫𑀸 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀥𑀫𑁆𑀫𑀸 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀥𑀫𑁆𑀫𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀤𑀲𑁆𑀲𑀦𑀝𑁆𑀞𑁄 𑀅𑀢𑁆𑀣𑁄, 𑀅𑀪𑀺𑀦𑀺𑀭𑁄𑀧𑀦𑀝𑁆𑀞𑁄 𑀅𑀢𑁆𑀣𑁄, 𑀧𑀭𑀺𑀕𑁆𑀕𑀳𑀝𑁆𑀞𑁄 𑀅𑀢𑁆𑀣𑁄, 𑀲𑀫𑀼𑀝𑁆𑀞𑀸𑀦𑀝𑁆𑀞𑁄 𑀅𑀢𑁆𑀣𑁄, 𑀯𑁄𑀤𑀸𑀦𑀝𑁆𑀞𑁄 𑀅𑀢𑁆𑀣𑁄, 𑀧𑀕𑁆𑀕𑀳𑀝𑁆𑀞𑁄 𑀅𑀢𑁆𑀣𑁄, 𑀉𑀧𑀝𑁆𑀞𑀸𑀦𑀝𑁆𑀞𑁄 𑀅𑀢𑁆𑀣𑁄, 𑀅𑀯𑀺𑀓𑁆𑀔𑁂𑀧𑀝𑁆𑀞𑁄 𑀅𑀢𑁆𑀣𑁄. 𑀅𑀜𑁆𑀜𑁄 𑀤𑀲𑁆𑀲𑀦𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀅𑀪𑀺𑀦𑀺𑀭𑁄𑀧𑀦𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀧𑀭𑀺𑀕𑁆𑀕𑀳𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀲𑀫𑀼𑀝𑁆𑀞𑀸𑀦𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀯𑁄𑀤𑀸𑀦𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀧𑀕𑁆𑀕𑀳𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀉𑀧𑀝𑁆𑀞𑀸𑀦𑀝𑁆𑀞𑁄 𑀅𑀢𑁆𑀣𑁄, 𑀅𑀜𑁆𑀜𑁄 𑀅𑀯𑀺𑀓𑁆𑀔𑁂𑀧𑀝𑁆𑀞𑁄 𑀅𑀢𑁆𑀣𑁄. 𑀬𑁂𑀦 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀅𑀢𑁆𑀣𑀸 𑀜𑀸𑀢𑀸 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀅𑀢𑁆𑀣𑀸 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀢𑁆𑀣𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀅𑀝𑁆𑀞 𑀥𑀫𑁆𑀫𑁂 𑀲𑀦𑁆𑀤𑀲𑁆𑀲𑁂𑀢𑀼𑀁 𑀩𑁆𑀬𑀜𑁆𑀚𑀦𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑀸, 𑀅𑀝𑁆𑀞 𑀅𑀢𑁆𑀣𑁂 𑀲𑀦𑁆𑀤𑀲𑁆𑀲𑁂𑀢𑀼𑀁 𑀩𑁆𑀬𑀜𑁆𑀚𑀦𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑀸. 𑀅𑀜𑁆𑀜𑀸 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀬𑁄, 𑀅𑀜𑁆𑀜𑀸 𑀅𑀢𑁆𑀣𑀦𑀺𑀭𑀼𑀢𑁆𑀢𑀺𑀬𑁄. 𑀬𑁂𑀦 𑀜𑀸𑀡𑁂𑀦 𑀇𑀫𑀸 𑀦𑀸𑀦𑀸 𑀦𑀺𑀭𑀼𑀢𑁆𑀢𑀺𑀬𑁄 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑀸 𑀦𑀸𑀦𑀸 𑀦𑀺𑀭𑀼𑀢𑁆𑀢𑀺𑀬𑁄 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀦𑀺𑀭𑀼𑀢𑁆𑀢𑀺𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀅𑀝𑁆𑀞𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀸𑀦𑀺, 𑀅𑀝𑁆𑀞𑀲𑀼 𑀅𑀢𑁆𑀣𑁂𑀲𑀼 𑀜𑀸𑀡𑀸𑀦𑀺 𑀲𑁄𑀴𑀲𑀲𑀼 𑀦𑀺𑀭𑀼𑀢𑁆𑀢𑀻𑀲𑀼 𑀜𑀸𑀡𑀸𑀦𑀺. 𑀅𑀜𑁆𑀜𑀸𑀦𑀺 𑀥𑀫𑁆𑀫𑁂𑀲𑀼 𑀜𑀸𑀡𑀸𑀦𑀺, 𑀅𑀜𑁆𑀜𑀸𑀦𑀺 𑀅𑀢𑁆𑀣𑁂𑀲𑀼 𑀜𑀸𑀡𑀸𑀦𑀺, 𑀅𑀜𑁆𑀜𑀸𑀦𑀺 𑀦𑀺𑀭𑀼𑀢𑁆𑀢𑀻𑀲𑀼 𑀜𑀸𑀡𑀸𑀦𑀺. 𑀬𑁂𑀦 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀜𑀸𑀡𑀸 𑀜𑀸𑀢𑀸, 𑀢𑁂𑀦𑁂𑀯 𑀜𑀸𑀡𑁂𑀦 𑀇𑀫𑁂 𑀦𑀸𑀦𑀸 𑀜𑀸𑀡𑀸 𑀧𑀝𑀺𑀯𑀺𑀤𑀺𑀢𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀝𑀺𑀪𑀸𑀦𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀢𑁆𑀣𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁. 𑀥𑀫𑁆𑀫𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁. 𑀦𑀺𑀭𑀼𑀢𑁆𑀢𑀺𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁. 𑀧𑀝𑀺𑀪𑀸𑀦𑀦𑀸𑀦𑀢𑁆𑀢𑁂 𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑁂 𑀜𑀸𑀡𑀁’’.

𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀦𑀺𑀤𑁆𑀤𑁂𑀲𑁄 𑀅𑀝𑁆𑀞𑀯𑀻𑀲𑀢𑀺𑀫𑁄.