𑁨. 𑀲𑀻𑀮𑀫𑀬𑀜𑀸𑀡𑀦𑀺𑀤𑁆𑀤𑁂𑀲𑁄

𑁩𑁭. 𑀓𑀣𑀁 𑀲𑀼𑀢𑁆𑀯𑀸𑀦 𑀲𑀁𑀯𑀭𑁂 𑀧𑀜𑁆𑀜𑀸 𑀲𑀻𑀮𑀫𑀬𑁂 𑀜𑀸𑀡𑀁? 𑀧𑀜𑁆𑀘 𑀲𑀻𑀮𑀸𑀦𑀺 𑁋 𑀧𑀭𑀺𑀬𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀅𑀧𑀭𑀺𑀬𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀧𑀭𑀺𑀧𑀼𑀡𑁆𑀡𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀅𑀧𑀭𑀸𑀫𑀝𑁆𑀞𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀦𑁆𑀢𑀺.

𑀢𑀢𑁆𑀣 𑀓𑀢𑀫𑀁 𑀧𑀭𑀺𑀬𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁? 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁 𑀧𑀭𑀺𑀬𑀦𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀁 𑁋 𑀇𑀤𑀁 𑀧𑀭𑀺𑀬𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀓𑀢𑀫𑀁 𑀅𑀧𑀭𑀺𑀬𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁? 𑀉𑀧𑀲𑀫𑁆𑀧𑀦𑁆𑀦𑀸𑀦𑀁 𑀅𑀧𑀭𑀺𑀬𑀦𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀁 𑁋 𑀇𑀤𑀁 𑀅𑀧𑀭𑀺𑀬𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀓𑀢𑀫𑀁 𑀧𑀭𑀺𑀧𑀼𑀡𑁆𑀡𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁? 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸𑀦𑀁 𑀓𑀼𑀲𑀮𑀥𑀫𑁆𑀫𑁂 𑀬𑀼𑀢𑁆𑀢𑀸𑀦𑀁 𑀲𑁂𑀓𑁆𑀔𑀧𑀭𑀺𑀬𑀦𑁆𑀢𑁂 [𑀲𑁂𑀔𑀧𑀭𑀺𑀬𑀦𑁆𑀢𑁂 (𑀓.)] 𑀧𑀭𑀺𑀧𑀽𑀭𑀓𑀸𑀭𑀻𑀦𑀁 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀸𑀦𑀁 𑀧𑀭𑀺𑀘𑁆𑀘𑀢𑁆𑀢𑀚𑀻𑀯𑀺𑀢𑀸𑀦𑀁 𑁋 𑀇𑀤𑀁 𑀧𑀭𑀺𑀧𑀼𑀡𑁆𑀡𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀓𑀢𑀫𑀁 𑀅𑀧𑀭𑀸𑀫𑀝𑁆𑀞𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁? 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑁋 𑀇𑀤𑀁 𑀅𑀧𑀭𑀸𑀫𑀝𑁆𑀞𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀓𑀢𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁? 𑀢𑀣𑀸𑀕𑀢𑀲𑀸𑀯𑀓𑀸𑀦𑀁 𑀔𑀻𑀡𑀸𑀲𑀯𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀢𑀣𑀸𑀕𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑁋 𑀇𑀤𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁.

𑁩𑁮. 𑀅𑀢𑁆𑀣𑀺 𑀲𑀻𑀮𑀁 𑀧𑀭𑀺𑀬𑀦𑁆𑀢𑀁, 𑀅𑀢𑁆𑀣𑀺 𑀲𑀻𑀮𑀁 𑀅𑀧𑀭𑀺𑀬𑀦𑁆𑀢𑀁. 𑀢𑀢𑁆𑀣 𑀓𑀢𑀫𑀁 𑀢𑀁 𑀲𑀻𑀮𑀁 𑀧𑀭𑀺𑀬𑀦𑁆𑀢𑀁? 𑀅𑀢𑁆𑀣𑀺 𑀲𑀻𑀮𑀁 𑀮𑀸𑀪𑀧𑀭𑀺𑀬𑀦𑁆𑀢𑀁, 𑀅𑀢𑁆𑀣𑀺 𑀲𑀻𑀮𑀁 𑀬𑀲𑀧𑀭𑀺𑀬𑀦𑁆𑀢𑀁, 𑀅𑀢𑁆𑀣𑀺 𑀲𑀻𑀮𑀁 𑀜𑀸𑀢𑀺𑀧𑀭𑀺𑀬𑀦𑁆𑀢𑀁, 𑀅𑀢𑁆𑀣𑀺 𑀲𑀻𑀮𑀁 𑀅𑀗𑁆𑀕𑀧𑀭𑀺𑀬𑀦𑁆𑀢𑀁, 𑀅𑀢𑁆𑀣𑀺 𑀲𑀻𑀮𑀁 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁.

𑀓𑀢𑀫𑀁 𑀢𑀁 𑀲𑀻𑀮𑀁 𑀮𑀸𑀪𑀧𑀭𑀺𑀬𑀦𑁆𑀢𑀁? 𑀇𑀥𑁂𑀓𑀘𑁆𑀘𑁄 𑀮𑀸𑀪𑀳𑁂𑀢𑀼 𑀮𑀸𑀪𑀧𑀘𑁆𑀘𑀬𑀸 𑀮𑀸𑀪𑀓𑀸𑀭𑀡𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 [𑀬𑀣𑀸𑀲𑀫𑀸𑀤𑀺𑀡𑁆𑀡𑀁 (𑀓.)] 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀢𑀺 𑁋 𑀇𑀤𑀁 𑀢𑀁 𑀲𑀻𑀮𑀁 𑀮𑀸𑀪𑀧𑀭𑀺𑀬𑀦𑁆𑀢𑀁. 𑀓𑀢𑀫𑀁 𑀢𑀁 𑀲𑀻𑀮𑀁 𑀬𑀲𑀧𑀭𑀺𑀬𑀦𑁆𑀢𑀁? 𑀇𑀥𑁂𑀓𑀘𑁆𑀘𑁄 𑀬𑀲𑀳𑁂𑀢𑀼 𑀬𑀲𑀧𑀘𑁆𑀘𑀬𑀸 𑀬𑀲𑀓𑀸𑀭𑀡𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀢𑀺 𑁋 𑀇𑀤𑀁 𑀢𑀁 𑀲𑀻𑀮𑀁 𑀬𑀲𑀧𑀭𑀺𑀬𑀦𑁆𑀢𑀁. 𑀓𑀢𑀫𑀁 𑀢𑀁 𑀲𑀻𑀮𑀁 𑀜𑀸𑀢𑀺𑀧𑀭𑀺𑀬𑀦𑁆𑀢𑀁? 𑀇𑀥𑁂𑀓𑀘𑁆𑀘𑁄 𑀜𑀸𑀢𑀺𑀳𑁂𑀢𑀼 𑀜𑀸𑀢𑀺𑀧𑀘𑁆𑀘𑀬𑀸 𑀜𑀸𑀢𑀺𑀓𑀸𑀭𑀡𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀢𑀺 𑁋 𑀇𑀤𑀁 𑀢𑀁 𑀲𑀻𑀮𑀁 𑀜𑀸𑀢𑀺𑀧𑀭𑀺𑀬𑀦𑁆𑀢𑀁. 𑀓𑀢𑀫𑀁 𑀢𑀁 𑀲𑀻𑀮𑀁 𑀅𑀗𑁆𑀕𑀧𑀭𑀺𑀬𑀦𑁆𑀢𑀁? 𑀇𑀥𑁂𑀓𑀘𑁆𑀘𑁄 𑀅𑀗𑁆𑀕𑀳𑁂𑀢𑀼 𑀅𑀗𑁆𑀕𑀧𑀘𑁆𑀘𑀬𑀸 𑀅𑀗𑁆𑀕𑀓𑀸𑀭𑀡𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀢𑀺 𑁋 𑀇𑀤𑀁 𑀢𑀁 𑀲𑀻𑀮𑀁 𑀅𑀗𑁆𑀕𑀧𑀭𑀺𑀬𑀦𑁆𑀢𑀁. 𑀓𑀢𑀫𑀁 𑀢𑀁 𑀲𑀻𑀮𑀁 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁? 𑀇𑀥𑁂𑀓𑀘𑁆𑀘𑁄 𑀚𑀻𑀯𑀺𑀢𑀳𑁂𑀢𑀼 𑀚𑀻𑀯𑀺𑀢𑀧𑀘𑁆𑀘𑀬𑀸 𑀚𑀻𑀯𑀺𑀢𑀓𑀸𑀭𑀡𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀢𑀺 𑁋 𑀇𑀤𑀁 𑀢𑀁 𑀲𑀻𑀮𑀁 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁. 𑀏𑀯𑀭𑀽𑀧𑀸𑀦𑀺 𑀲𑀻𑀮𑀸𑀦𑀺 𑀔𑀡𑁆𑀟𑀸𑀦𑀺 𑀙𑀺𑀤𑁆𑀤𑀸𑀦𑀺 𑀲𑀩𑀮𑀸𑀦𑀺 𑀓𑀫𑁆𑀫𑀸𑀲𑀸𑀦𑀺 𑀦 𑀪𑀼𑀚𑀺𑀲𑁆𑀲𑀸𑀦𑀺 𑀦 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 [𑀦 𑀯𑀺𑀜𑁆𑀜𑀽𑀧𑀲𑀢𑁆𑀣𑀸𑀦𑀺 (𑀓.)] 𑀧𑀭𑀸𑀫𑀝𑁆𑀞𑀸𑀦𑀺 𑀅𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺 [𑀦 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺 (𑀓.)] 𑀦 𑀅𑀯𑀺𑀧𑁆𑀧𑀝𑀺𑀲𑀸𑀭𑀯𑀢𑁆𑀣𑀼𑀓𑀸𑀦𑀺 𑀦 𑀧𑀸𑀫𑁄𑀚𑁆𑀚𑀯𑀢𑁆𑀣𑀼𑀓𑀸𑀦𑀺 𑀦 𑀧𑀻𑀢𑀺𑀯𑀢𑁆𑀣𑀼𑀓𑀸𑀦𑀺 𑀦 𑀧𑀲𑁆𑀲𑀤𑁆𑀥𑀺𑀯𑀢𑁆𑀣𑀼𑀓𑀸𑀦𑀺 𑀦 𑀲𑀼𑀔𑀯𑀢𑁆𑀣𑀼𑀓𑀸𑀦𑀺 𑀦 𑀲𑀫𑀸𑀥𑀺𑀯𑀢𑁆𑀣𑀼𑀓𑀸𑀦𑀺 𑀦 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀯𑀢𑁆𑀣𑀼𑀓𑀸𑀦𑀺 𑀦 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀇𑀤𑀁 𑀢𑀁 𑀲𑀻𑀮𑀁 𑀧𑀭𑀺𑀬𑀦𑁆𑀢𑀁.

𑀓𑀢𑀫𑀁 𑀢𑀁 𑀲𑀻𑀮𑀁 𑀅𑀧𑀭𑀺𑀬𑀦𑁆𑀢𑀁? 𑀅𑀢𑁆𑀣𑀺 𑀲𑀻𑀮𑀁 𑀦 𑀮𑀸𑀪𑀧𑀭𑀺𑀬𑀦𑁆𑀢𑀁, 𑀅𑀢𑁆𑀣𑀺 𑀲𑀻𑀮𑀁 𑀦 𑀬𑀲𑀧𑀭𑀺𑀬𑀦𑁆𑀢𑀁, 𑀅𑀢𑁆𑀣𑀺 𑀲𑀻𑀮𑀁 𑀦 𑀜𑀸𑀢𑀺𑀧𑀭𑀺𑀬𑀦𑁆𑀢𑀁, 𑀅𑀢𑁆𑀣𑀺 𑀲𑀻𑀮𑀁 𑀦 𑀅𑀗𑁆𑀕𑀧𑀭𑀺𑀬𑀦𑁆𑀢𑀁, 𑀅𑀢𑁆𑀣𑀺 𑀲𑀻𑀮𑀁 𑀦 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁.

𑀓𑀢𑀫𑀁 𑀢𑀁 𑀲𑀻𑀮𑀁 𑀦 𑀮𑀸𑀪𑀧𑀭𑀺𑀬𑀦𑁆𑀢𑀁? 𑀇𑀥𑁂𑀓𑀘𑁆𑀘𑁄 𑀮𑀸𑀪𑀳𑁂𑀢𑀼 𑀮𑀸𑀪𑀧𑀘𑁆𑀘𑀬𑀸 𑀮𑀸𑀪𑀓𑀸𑀭𑀡𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺, 𑀓𑀺𑀁 𑀲𑁄 𑀯𑀻𑀢𑀺𑀓𑁆𑀓𑀫𑀺𑀲𑁆𑀲𑀢𑀺! 𑀇𑀤𑀁 𑀢𑀁 𑀲𑀻𑀮𑀁 𑀦 𑀮𑀸𑀪𑀧𑀭𑀺𑀬𑀦𑁆𑀢𑀁. 𑀓𑀢𑀫𑀁 𑀢𑀁 𑀲𑀻𑀮𑀁 𑀦 𑀬𑀲𑀧𑀭𑀺𑀬𑀦𑁆𑀢𑀁? 𑀇𑀥𑁂𑀓𑀘𑁆𑀘𑁄 𑀬𑀲𑀳𑁂𑀢𑀼 𑀬𑀲𑀧𑀘𑁆𑀘𑀬𑀸 𑀬𑀲𑀓𑀸𑀭𑀡𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺, 𑀓𑀺𑀁 𑀲𑁄 𑀯𑀻𑀢𑀺𑀓𑁆𑀓𑀫𑀺𑀲𑁆𑀲𑀢𑀺! 𑀇𑀤𑀁 𑀢𑀁 𑀲𑀻𑀮𑀁 𑀦 𑀬𑀲𑀧𑀭𑀺𑀬𑀦𑁆𑀢𑀁. 𑀓𑀢𑀫𑀁 𑀢𑀁 𑀲𑀻𑀮𑀁 𑀦 𑀜𑀸𑀢𑀺𑀧𑀭𑀺𑀬𑀦𑁆𑀢𑀁? 𑀇𑀥𑁂𑀓𑀘𑁆𑀘𑁄 𑀜𑀸𑀢𑀺𑀳𑁂𑀢𑀼 𑀜𑀸𑀢𑀺𑀧𑀘𑁆𑀘𑀬𑀸 𑀜𑀸𑀢𑀺𑀓𑀸𑀭𑀡𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺, 𑀓𑀺𑀁 𑀲𑁄 𑀯𑀻𑀢𑀺𑀓𑁆𑀓𑀫𑀺𑀲𑁆𑀲𑀢𑀺! 𑀇𑀤𑀁 𑀢𑀁 𑀲𑀻𑀮𑀁 𑀦 𑀜𑀸𑀢𑀺𑀧𑀭𑀺𑀬𑀦𑁆𑀢𑀁. 𑀓𑀢𑀫𑀁 𑀢𑀁 𑀲𑀻𑀮𑀁 𑀦 𑀅𑀗𑁆𑀕𑀧𑀭𑀺𑀬𑀦𑁆𑀢𑀁? 𑀇𑀥𑁂𑀓𑀘𑁆𑀘𑁄 𑀅𑀗𑁆𑀕𑀳𑁂𑀢𑀼 𑀅𑀗𑁆𑀕𑀧𑀘𑁆𑀘𑀬𑀸 𑀅𑀗𑁆𑀕𑀓𑀸𑀭𑀡𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺, 𑀓𑀺𑀁 𑀲𑁄 𑀯𑀻𑀢𑀺𑀓𑁆𑀓𑀫𑀺𑀲𑁆𑀲𑀢𑀺! 𑀇𑀤𑀁 𑀢𑀁 𑀲𑀻𑀮𑀁 𑀦 𑀅𑀗𑁆𑀕𑀧𑀭𑀺𑀬𑀦𑁆𑀢𑀁. 𑀓𑀢𑀫𑀁 𑀢𑀁 𑀲𑀻𑀮𑀁 𑀦 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁? 𑀇𑀥𑁂𑀓𑀘𑁆𑀘𑁄 𑀚𑀻𑀯𑀺𑀢𑀳𑁂𑀢𑀼 𑀚𑀻𑀯𑀺𑀢𑀧𑀘𑁆𑀘𑀬𑀸 𑀚𑀻𑀯𑀺𑀢𑀓𑀸𑀭𑀡𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺, 𑀓𑀺𑀁 𑀲𑁄 𑀯𑀻𑀢𑀺𑀓𑁆𑀓𑀫𑀺𑀲𑁆𑀲𑀢𑀺! 𑀇𑀤𑀁 𑀢𑀁 𑀲𑀻𑀮𑀁 𑀦 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁. 𑀏𑀯𑀭𑀽𑀧𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀯𑀢𑁆𑀣𑀼𑀓𑀸𑀦𑀺 𑀧𑀸𑀫𑁄𑀚𑁆𑀚𑀯𑀢𑁆𑀣𑀼𑀓𑀸𑀦𑀺 𑀧𑀻𑀢𑀺𑀯𑀢𑁆𑀣𑀼𑀓𑀸𑀦𑀺 𑀧𑀲𑁆𑀲𑀤𑁆𑀥𑀺𑀯𑀢𑁆𑀣𑀼𑀓𑀸𑀦𑀺 𑀲𑀼𑀔𑀯𑀢𑁆𑀣𑀼𑀓𑀸𑀦𑀺 𑀲𑀫𑀸𑀥𑀺𑀯𑀢𑁆𑀣𑀼𑀓𑀸𑀦𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀯𑀢𑁆𑀣𑀼𑀓𑀸𑀦𑀺 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀇𑀤𑀁 𑀢𑀁 𑀲𑀻𑀮𑀁 𑀅𑀧𑀭𑀺𑀬𑀦𑁆𑀢𑀁.

𑁩𑁯. 𑀓𑀺𑀁 𑀲𑀻𑀮𑀁? 𑀓𑀢𑀺 𑀲𑀻𑀮𑀸𑀦𑀺? 𑀓𑀺𑀁 𑀲𑀫𑀼𑀝𑁆𑀞𑀸𑀦𑀁 𑀲𑀻𑀮𑀁? 𑀓𑀢𑀺 𑀥𑀫𑁆𑀫𑀲𑀫𑁄𑀥𑀸𑀦𑀁 𑀲𑀻𑀮𑀁?

𑀓𑀺𑀁 𑀲𑀻𑀮𑀦𑁆𑀢𑀺 𑀘𑁂𑀢𑀦𑀸 𑀲𑀻𑀮𑀁, 𑀘𑁂𑀢𑀲𑀺𑀓𑀁 𑀲𑀻𑀮𑀁, 𑀲𑀁𑀯𑀭𑁄 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮𑀁. 𑀓𑀢𑀺 𑀲𑀻𑀮𑀸𑀦𑀻𑀢𑀺 𑀢𑀻𑀡𑀺 𑀲𑀻𑀮𑀸𑀦𑀺 𑁋 𑀓𑀼𑀲𑀮𑀲𑀻𑀮𑀁, 𑀅𑀓𑀼𑀲𑀮𑀲𑀻𑀮𑀁, 𑀅𑀩𑁆𑀬𑀸𑀓𑀢𑀲𑀻𑀮𑀁.𑀓𑀺𑀁 𑀲𑀫𑀼𑀝𑁆𑀞𑀸𑀦𑀁 𑀲𑀻𑀮𑀦𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀓𑀼𑀲𑀮𑀲𑀻𑀮𑀁, 𑀅𑀓𑀼𑀲𑀮𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀅𑀓𑀼𑀲𑀮𑀲𑀻𑀮𑀁, 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀅𑀩𑁆𑀬𑀸𑀓𑀢𑀲𑀻𑀮𑀁. 𑀓𑀢𑀺 𑀥𑀫𑁆𑀫𑀲𑀫𑁄𑀥𑀸𑀦𑀁 𑀲𑀻𑀮𑀦𑁆𑀢𑀺 𑀲𑀁𑀯𑀭𑀲𑀫𑁄𑀥𑀸𑀦𑀁 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀲𑀫𑁄𑀥𑀸𑀦𑀁 𑀲𑀻𑀮𑀁, 𑀢𑀣𑀸𑀪𑀸𑀯𑁂 𑀚𑀸𑀢𑀘𑁂𑀢𑀦𑀸𑀲𑀫𑁄𑀥𑀸𑀦𑀁 𑀲𑀻𑀮𑀁.

𑁪𑁦. 𑀧𑀸𑀡𑀸𑀢𑀺𑀧𑀸𑀢𑀁 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀝𑁆𑀞𑁂𑀦 𑀲𑀻𑀮𑀁. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀝𑁆𑀞𑁂𑀦 𑀲𑀻𑀮𑀁. 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀝𑁆𑀞𑁂𑀦 𑀲𑀻𑀮𑀁. 𑀫𑀼𑀲𑀸𑀯𑀸𑀤𑀁 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀝𑁆𑀞𑁂𑀦 𑀲𑀻𑀮𑀁. 𑀧𑀺𑀲𑀼𑀡𑀁 𑀯𑀸𑀘𑀁 [𑀧𑀺𑀲𑀼𑀡𑀸𑀯𑀸𑀘𑀁 (𑀲𑁆𑀬𑀸. 𑀓.) 𑀤𑀻. 𑀦𑀺. 𑁧.𑁯 𑀧𑀲𑁆𑀲𑀺𑀢𑀩𑁆𑀩𑀸] 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀝𑁆𑀞𑁂𑀦 𑀲𑀻𑀮𑀁. 𑀨𑀭𑀼𑀲𑀁 𑀯𑀸𑀘𑀁 [𑀨𑀭𑀼𑀲𑀯𑀸𑀘𑀁 (𑀲𑁆𑀬𑀸. 𑀓.)] 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀝𑁆𑀞𑁂𑀦 𑀲𑀻𑀮𑀁. 𑀲𑀫𑁆𑀨𑀧𑁆𑀧𑀮𑀸𑀧𑀁 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀝𑁆𑀞𑁂𑀦 𑀲𑀻𑀮𑀁. 𑀅𑀪𑀺𑀚𑁆𑀛𑀁 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀝𑁆𑀞𑁂𑀦 𑀲𑀻𑀮𑀁. 𑀩𑁆𑀬𑀸𑀧𑀸𑀤𑀁 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀝𑁆𑀞𑁂𑀦 𑀲𑀻𑀮𑀁. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀝𑁆𑀞𑁂𑀦 𑀲𑀻𑀮𑀁.

𑁪𑁧. 𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀁 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀝𑁆𑀞𑁂𑀦 𑀲𑀻𑀮𑀁. 𑀅𑀩𑁆𑀬𑀸𑀧𑀸𑀤𑁂𑀦 𑀩𑁆𑀬𑀸𑀧𑀸𑀤𑀁 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀝𑁆𑀞𑁂𑀦 𑀲𑀻𑀮𑀁. 𑀆𑀮𑁄𑀓𑀲𑀜𑁆𑀜𑀸𑀬 𑀣𑀺𑀦𑀫𑀺𑀤𑁆𑀥𑀁…𑀧𑁂… 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀉𑀤𑁆𑀥𑀘𑁆𑀘𑀁… 𑀥𑀫𑁆𑀫𑀯𑀯𑀢𑁆𑀣𑀸𑀦𑁂𑀦 𑀯𑀺𑀘𑀺𑀓𑀺𑀘𑁆𑀙𑀁… 𑀜𑀸𑀡𑁂𑀦 𑀅𑀯𑀺𑀚𑁆𑀚𑀁… 𑀧𑀸𑀫𑁄𑀚𑁆𑀚𑁂𑀦 𑀅𑀭𑀢𑀺𑀁….

𑀧𑀞𑀫𑁂𑀦 𑀛𑀸𑀦𑁂𑀦 [𑀧𑀞𑀫𑀚𑁆𑀛𑀸𑀦𑁂𑀦 (𑀲𑁆𑀬𑀸.) 𑀏𑀯𑀫𑀻𑀤𑀺𑀲𑁂𑀲𑀼 𑀞𑀸𑀦𑁂𑀲𑀼] 𑀦𑀻𑀯𑀭𑀡𑁂…𑀧𑁂… 𑀤𑀼𑀢𑀺𑀬𑁂𑀦 𑀛𑀸𑀦𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑁂… 𑀢𑀢𑀺𑀬𑁂𑀦 𑀛𑀸𑀦𑁂𑀦 𑀧𑀻𑀢𑀺𑀁… 𑀘𑀢𑀼𑀢𑁆𑀣𑁂𑀦 𑀛𑀸𑀦𑁂𑀦 𑀲𑀼𑀔𑀤𑀼𑀓𑁆𑀔𑀁… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀲𑀜𑁆𑀜𑀁 𑀧𑀝𑀺𑀖𑀲𑀜𑁆𑀜𑀁 𑀦𑀸𑀦𑀢𑁆𑀢𑀲𑀜𑁆𑀜𑀁… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀁… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁.

𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀁…𑀧𑁂… 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀲𑀼𑀔𑀲𑀜𑁆𑀜𑀁… 𑀅𑀦𑀢𑁆𑀢𑀸 𑀅𑀦𑀼𑀧𑀲𑁆𑀲𑀦𑀸𑀬 𑀅𑀢𑁆𑀢𑀲𑀜𑁆𑀜𑀁… 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀦𑀦𑁆𑀤𑀺𑀁… 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬 𑀭𑀸𑀕𑀁… 𑀦𑀺𑀭𑁄𑀥𑀸 𑀅𑀦𑀼𑀧𑀲𑁆𑀲𑀦𑀸𑀬 𑀲𑀫𑀼𑀤𑀬𑀁… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀆𑀤𑀸𑀦𑀁… 𑀔𑀬𑀸𑀦𑀼𑀧𑀲𑁆𑀲𑀦𑀸𑀬 𑀖𑀦𑀲𑀜𑁆𑀜𑀁… 𑀯𑀬𑀸𑀦𑀼𑀧𑀲𑁆𑀲𑀦𑀸𑀬 𑀆𑀬𑀽𑀳𑀦𑀁.. 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑀸𑀬 𑀥𑀼𑀯𑀲𑀜𑁆𑀜𑀁… 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀫𑀺𑀢𑁆𑀢𑀁…. 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀬 𑀧𑀡𑀺𑀥𑀺𑀁… 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀪𑀺𑀦𑀺𑀯𑁂𑀲𑀁… 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬 𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀁… 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂𑀦 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑀁… 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀬 𑀆𑀮𑀬𑀸𑀪𑀺𑀦𑀺𑀯𑁂𑀲𑀁… 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀅𑀧𑁆𑀧𑀝𑀺𑀲𑀗𑁆𑀔𑀁… 𑀯𑀺𑀯𑀝𑁆𑀝𑀦𑀸𑀦𑀼𑀧𑀲𑁆𑀲𑀦𑀸𑀬 𑀲𑀜𑁆𑀜𑁄𑀕𑀸𑀪𑀺𑀦𑀺𑀯𑁂𑀲𑀁….

𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀤𑀺𑀝𑁆𑀞𑁂𑀓𑀝𑁆𑀞𑁂 𑀓𑀺𑀮𑁂𑀲𑁂…𑀧𑁂… 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀑𑀴𑀸𑀭𑀺𑀓𑁂 𑀓𑀺𑀮𑁂𑀲𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀡𑀼𑀲𑀳𑀕𑀢𑁂 𑀓𑀺𑀮𑁂𑀲𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑀝𑁆𑀞𑁂𑀦 𑀲𑀻𑀮𑀁.

𑀧𑀜𑁆𑀘 𑀲𑀻𑀮𑀸𑀦𑀺 𑁋 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀳𑀸𑀦𑀁 𑀲𑀻𑀮𑀁, 𑀯𑁂𑀭𑀫𑀡𑀻 𑀲𑀻𑀮𑀁, 𑀘𑁂𑀢𑀦𑀸 𑀲𑀻𑀮𑀁, 𑀲𑀁𑀯𑀭𑁄 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮𑀁. 𑀏𑀯𑀭𑀽𑀧𑀸𑀦𑀺 𑀲𑀻𑀮𑀸𑀦𑀺 𑀘𑀺𑀢𑁆𑀢𑀲𑁆𑀲 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀸𑀫𑁄𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀻𑀢𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀲𑁆𑀲𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺, 𑀲𑁄𑀫𑀦𑀲𑁆𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀆𑀲𑁂𑀯𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀪𑀸𑀯𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀩𑀳𑀼𑀮𑀻𑀓𑀫𑁆𑀫𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀅𑀮𑀗𑁆𑀓𑀸𑀭𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀭𑀺𑀓𑁆𑀔𑀸𑀭𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀭𑀺𑀯𑀸𑀭𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺, 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

𑀏𑀯𑀭𑀽𑀧𑀸𑀦𑀁 𑀲𑀻𑀮𑀸𑀦𑀁 𑀲𑀁𑀯𑀭𑀧𑀸𑀭𑀺𑀲𑀼𑀤𑁆𑀥𑀺 𑀅𑀥𑀺𑀲𑀻𑀮𑀁, 𑀲𑀁𑀯𑀭𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑀁 𑀘𑀺𑀢𑁆𑀢𑀁 𑀦 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺, 𑀅𑀯𑀺𑀓𑁆𑀔𑁂𑀧𑀧𑀸𑀭𑀺𑀲𑀼𑀤𑁆𑀥𑀺 𑀅𑀥𑀺𑀘𑀺𑀢𑁆𑀢𑀁 𑀲𑀁𑀯𑀭𑀧𑀸𑀭𑀺𑀲𑀼𑀤𑁆𑀥𑀺𑀁 𑀲𑀫𑁆𑀫𑀸 𑀧𑀲𑁆𑀲𑀢𑀺, 𑀅𑀯𑀺𑀓𑁆𑀔𑁂𑀧𑀧𑀸𑀭𑀺𑀲𑀼𑀤𑁆𑀥𑀺𑀁 𑀲𑀫𑁆𑀫𑀸 𑀧𑀲𑁆𑀲𑀢𑀺. 𑀤𑀲𑁆𑀲𑀦𑀧𑀸𑀭𑀺𑀲𑀼𑀤𑁆𑀥𑀺 𑀅𑀥𑀺𑀧𑀜𑁆𑀜𑀸. 𑀬𑁄 𑀢𑀢𑁆𑀣 𑀲𑀁𑀯𑀭𑀝𑁆𑀞𑁄, 𑀅𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸. 𑀬𑁄 𑀢𑀢𑁆𑀣 𑀅𑀯𑀺𑀓𑁆𑀔𑁂𑀧𑀝𑁆𑀞𑁄, 𑀅𑀬𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸. 𑀬𑁄 𑀢𑀢𑁆𑀣 𑀤𑀲𑁆𑀲𑀦𑀝𑁆𑀞𑁄, 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸.

𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀧𑀲𑁆𑀲𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀲𑀢𑀺𑀁 𑀉𑀧𑀝𑁆𑀞𑀧𑁂𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀲𑀺𑀓𑁆𑀔𑀢𑀺.

𑀧𑀜𑁆𑀘 𑀲𑀻𑀮𑀸𑀦𑀺 𑁋 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲…𑀧𑁂… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀲𑁆𑀲… 𑀫𑀼𑀲𑀸𑀯𑀸𑀤𑀲𑁆𑀲… 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬… 𑀨𑀭𑀼𑀲𑀸𑀬 𑀯𑀸𑀘𑀸𑀬… 𑀲𑀫𑁆𑀨𑀧𑁆𑀧𑀮𑀸𑀧𑀲𑁆𑀲… 𑀅𑀪𑀺𑀚𑁆𑀛𑀸𑀬… 𑀩𑁆𑀬𑀸𑀧𑀸𑀤𑀲𑁆𑀲… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸… 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀲𑀺𑀓𑁆𑀔𑀦𑁆𑀢𑀺.

𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀲𑁆𑀲…𑀧𑁂… 𑀅𑀩𑁆𑀬𑀸𑀧𑀸𑀤𑁂𑀦 𑀩𑁆𑀬𑀸𑀧𑀸𑀤𑀲𑁆𑀲… 𑀆𑀮𑁄𑀓𑀲𑀜𑁆𑀜𑀸𑀬 𑀣𑀺𑀦𑀫𑀺𑀤𑁆𑀥𑀲𑁆𑀲… 𑀅𑀯𑀺𑀓𑁆𑀔𑁂𑀧𑁂𑀦 𑀉𑀤𑁆𑀥𑀘𑁆𑀘𑀲𑁆𑀲… … 𑀥𑀫𑁆𑀫𑀯𑀯𑀢𑁆𑀣𑀸𑀦𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀬… 𑀜𑀸𑀡𑁂𑀦 𑀅𑀯𑀺𑀚𑁆𑀚𑀸𑀬… 𑀧𑀸𑀫𑁄𑀚𑁆𑀚𑁂𑀦 𑀅𑀭𑀢𑀺𑀬𑀸… 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀲𑀺𑀓𑁆𑀔𑀢𑀺.

𑀧𑀞𑀫𑁂𑀦 𑀛𑀸𑀦𑁂𑀦 𑀦𑀻𑀯𑀭𑀡𑀸𑀦𑀁…𑀧𑁂… 𑀤𑀼𑀢𑀺𑀬𑁂𑀦 𑀛𑀸𑀦𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁… 𑀢𑀢𑀺𑀬𑁂𑀦 𑀛𑀸𑀦𑁂𑀦 𑀧𑀻𑀢𑀺𑀬𑀸… 𑀘𑀢𑀼𑀢𑁆𑀣𑁂𑀦 𑀛𑀸𑀦𑁂𑀦 𑀲𑀼𑀔𑀤𑀼𑀓𑁆𑀔𑀸𑀦𑀁… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀲𑀜𑁆𑀜𑀸𑀬 𑀧𑀝𑀺𑀖𑀲𑀜𑁆𑀜𑀸𑀬 𑀦𑀸𑀦𑀢𑁆𑀢𑀲𑀜𑁆𑀜𑀸𑀬… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬… 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀲𑀺𑀓𑁆𑀔𑀢𑀺.

𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀸𑀬…𑀧𑁂… 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀲𑀼𑀔𑀲𑀜𑁆𑀜𑀸𑀬… 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀢𑁆𑀢𑀲𑀜𑁆𑀜𑀸𑀬… 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀦𑀦𑁆𑀤𑀺𑀬𑀸… 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬 𑀭𑀸𑀕𑀲𑁆𑀲… 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀲𑀫𑀼𑀤𑀬𑀲𑁆𑀲… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀆𑀤𑀸𑀦𑀲𑁆𑀲… 𑀔𑀬𑀸𑀦𑀼𑀧𑀲𑁆𑀲𑀦𑀸𑀬 𑀖𑀦𑀲𑀜𑁆𑀜𑀸𑀬… 𑀯𑀬𑀸𑀦𑀼𑀧𑀲𑁆𑀲𑀦𑀸𑀬 𑀆𑀬𑀽𑀳𑀦𑀲𑁆𑀲… 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑀸𑀬 𑀥𑀼𑀯𑀲𑀜𑁆𑀜𑀸𑀬… 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀫𑀺𑀢𑁆𑀢𑀲𑁆𑀲… 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀬 𑀧𑀡𑀺𑀥𑀺𑀬𑀸… 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀪𑀺𑀦𑀺𑀯𑁂𑀲𑀲𑁆𑀲… 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬 𑀲𑀸𑀭𑀸𑀕𑀸𑀪𑀺𑀦𑀺𑀯𑁂𑀲𑀲𑁆𑀲… 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂𑀦 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑀲𑁆𑀲… 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀬 𑀆𑀮𑀬𑀸𑀪𑀺𑀦𑀺𑀯𑁂𑀲𑀲𑁆𑀲… 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀅𑀧𑁆𑀧𑀝𑀺𑀲𑀗𑁆𑀔𑀸𑀬… 𑀯𑀺𑀯𑀝𑁆𑀝𑀦𑀸𑀦𑀼𑀧𑀲𑁆𑀲𑀦𑀸𑀬 𑀲𑀜𑁆𑀜𑁄𑀕𑀸𑀪𑀺𑀦𑀺𑀯𑁂𑀲𑀲𑁆𑀲 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀲𑀺𑀓𑁆𑀔𑀢𑀺.

𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀤𑀺𑀝𑁆𑀞𑁂𑀓𑀝𑁆𑀞𑀸𑀦𑀁 𑀓𑀺𑀮𑁂𑀲𑀸𑀦𑀁…𑀧𑁂… 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀑𑀴𑀸𑀭𑀺𑀓𑀸𑀦𑀁 𑀓𑀺𑀮𑁂𑀲𑀸𑀦𑀁… 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀦𑀼𑀲𑀳𑀕𑀢𑀸𑀦𑀁 𑀓𑀺𑀮𑁂𑀲𑀸𑀦𑀁… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀲𑀻𑀮𑀁, 𑀯𑁂𑀭𑀫𑀡𑀻 𑀲𑀻𑀮𑀁, 𑀘𑁂𑀢𑀦𑀸 𑀲𑀻𑀮𑀁, 𑀲𑀁𑀯𑀭𑁄 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮𑀁. 𑀏𑀯𑀭𑀽𑀧𑀸𑀦𑀺 𑀲𑀻𑀮𑀸𑀦𑀺 𑀘𑀺𑀢𑁆𑀢𑀲𑁆𑀲 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀸𑀫𑁄𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀻𑀢𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀲𑁆𑀲𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺, 𑀲𑁄𑀫𑀦𑀲𑁆𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀆𑀲𑁂𑀯𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀪𑀸𑀯𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀩𑀳𑀼𑀮𑀻𑀓𑀫𑁆𑀫𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀅𑀮𑀗𑁆𑀓𑀸𑀭𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀭𑀺𑀓𑁆𑀔𑀸𑀭𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀭𑀺𑀯𑀸𑀭𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺, 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

𑁪𑁨. 𑀏𑀯𑀭𑀽𑀧𑀸𑀦𑀁 𑀲𑀻𑀮𑀸𑀦𑀁 𑀲𑀁𑀯𑀭𑀧𑀸𑀭𑀺𑀲𑀼𑀤𑁆𑀥𑀺 𑀅𑀥𑀺𑀲𑀻𑀮𑀁. 𑀲𑀁𑀯𑀭𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑀁 𑀘𑀺𑀢𑁆𑀢𑀁 𑀅𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺, 𑀅𑀯𑀺𑀓𑁆𑀔𑁂𑀧𑀧𑀸𑀭𑀺𑀲𑀼𑀤𑁆𑀥𑀺 𑀅𑀥𑀺𑀘𑀺𑀢𑁆𑀢𑀁. 𑀲𑀁𑀯𑀭𑀧𑀸𑀭𑀺𑀲𑀼𑀤𑁆𑀥𑀺𑀁 𑀲𑀫𑁆𑀫𑀸 𑀧𑀲𑁆𑀲𑀢𑀺, 𑀅𑀯𑀺𑀓𑁆𑀔𑁂𑀧𑀧𑀸𑀭𑀺𑀲𑀼𑀤𑁆𑀥𑀺𑀁 𑀲𑀫𑁆𑀫𑀸 𑀧𑀲𑁆𑀲𑀢𑀺. 𑀤𑀲𑁆𑀲𑀦𑀧𑀸𑀭𑀺𑀲𑀼𑀤𑁆𑀥𑀺 𑀅𑀥𑀺𑀧𑀜𑁆𑀜𑀸. 𑀬𑁄 𑀢𑀢𑁆𑀣 𑀲𑀁𑀯𑀭𑀝𑁆𑀞𑁄, 𑀅𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸. 𑀬𑁄 𑀢𑀢𑁆𑀣 𑀅𑀯𑀺𑀓𑁆𑀔𑁂𑀧𑀝𑁆𑀞𑁄, 𑀅𑀬𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸. 𑀬𑁄 𑀢𑀢𑁆𑀣 𑀤𑀲𑁆𑀲𑀦𑀝𑁆𑀞𑁄, 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀧𑀲𑁆𑀲𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀲𑀢𑀺𑀁 𑀉𑀧𑀝𑁆𑀞𑀧𑁂𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑀢𑀺 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀲𑀺𑀓𑁆𑀔𑀢𑀺. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀲𑀼𑀢𑁆𑀯𑀸𑀦 𑀲𑀁𑀯𑀭𑁂 𑀧𑀜𑁆𑀜𑀸 𑀲𑀻𑀮𑀫𑀬𑁂 𑀜𑀸𑀡𑀁’’.

𑀲𑀻𑀮𑀫𑀬𑀜𑀸𑀡𑀦𑀺𑀤𑁆𑀤𑁂𑀲𑁄 𑀤𑀼𑀢𑀺𑀬𑁄.